Ta ese Oi Ia Habadua Neganai

MOMO idia gwau ta ese oi ia kara dika henia dainai davana oi karaia lou neganai, emu hemami do ia namo. Unai bamona idia hereva badina ta ese ita ia habadua o hadikaia neganai, vaia ita ura ena kerere davana ita karaia lou. Ta be ita ia kara dika henia neganai, iseda lalomamina ese ita ia hadibaia ita ia kara henia dalana be maoro lasi bona ita hamaoromaoroa be namo. To henanadai be inai: Edena bamona do ita hamaoromaoroa?

Taunimanima ese ita idia habadua o hadikaia daladia be idauidau: Ta ese iseda vairana ia pataia, ita ia doria, ita ia hereva dika henia, ita ia botaia, iseda kohu ia henaoa, bona kara ma haida. Bema ta be oi dekenai unai bamona kara ta ia karaia, emu hemami be edena bamona? Hari inai negai, taunimanima momo be do idia gwau: ‘Edia dika davana do lau karaia lou!’

United States ai, tisa haida ese haisikuli stiuden idia panisidia dainai, stiuden ese idia samanidia koikoi. New Orleans ai Teacher’s Union oreana ena presiden, Brenda Mitchell, ia gwau, “Unai bamona idia karaia neganai, tisa ena ladana bona ena gaukara namona idia hadikaia.” Ena be gabeai idia davaria unai stiuden edia samania hereva be koikoi, to edia kara ese tisa taudia edia ladana bona gaukara namona ia hadikaia vadaeni.

Gaukara gabuna ai, idia moale lasi gaukara taudia o gaukara amo idia hadokoa taudia be idia lalohisihisi dainai, kampani ena kompiuta amo mai anina bada bisinesi herevadia idia kokia eiava hadikaia. Ma haida be kampani ena hehuni herevadia idia henaoa bona kampani ma haida dekenai idia hoihoilaia o idia henia. The New York Times magasin ia gwau: “Gaukara taudia ese kompiuta amo kampani ena faila idia henaoa, to nega momo idia ese kampani ena kohu idauidau idia henaoa danu.” Unai kara idia koua totona, kampani biagudia ese sekuriti gadi idia siaia gaukara amo idia hadokoa tauna do ia itaia ena kohu ia haboua bona opesi amo do ia hakaua raka lasi.

To, nega momo dika ena davana karaia lou karana be ruma bese taudia bona turadia huanai ia vara. Bema ta be ma ta hadikaia karana ta ia karaia o herevana ta ia gwauraia, ia hadikaia tauna danu do ia ura davana ia karaia lou. Bema emu turana ta be oi ia hereva auka henia, oi danu be ia oi hereva auka henia lou, a? Bema emu ruma bese tauna ta ese oi ia habadua, dala oi tahua iena dika davana oi karaia lou totona, a? Momokani, nega momo iseda ruma bese tauna o turana ta ese ita ia habadua neganai, ita ura unai bamona ita karaia, ani?

Kara Dika Davana Henia Lou Karana Ena Dika

Nega momo haida be dika ena davana idia karaia edia lalohisihisi idia haorea totona. Hegeregere, Baibel ese ia hahedinaraia bese kwarana tauna Iakobo, ena natuna memerodia be Kanana tauna Sekema ese edia taihuna Daina ia hadikaia sivaraina idia kamonai neganai, idia lalohisihisi bona “idia badu dikadika.” (Genese 34:​1-7) Sekema ena kara dika davana idia karaia lou totona, Iakobo ena natuna memero rua be dala idia tahua, Sekema bona ena ruma bese taudia idia hadikaia totona. Koikoi dalanai, Simeona bona Levi be Kanana hanua dekenai idia vareai bona tatau ibounai, Sekema danu idia alaia mase.​​—⁠Genese 34:​13-​27.

Unai ala-ala karana ese hekwakwanai ia hamaoromaoroa, a? Iakobo be unai sivarai ia kamonai neganai, Simeona bona Levi ia gwau henidia, ia gwau: “Lau dekenai kerere umui havaraia vadaeni, bona lauegu ladana umui hadikaia vadaeni inai tano noho taudia edia huanai. . . . Idia be do idia haboua, do idia tuari ita dekenai, vadaeni, lau bona lauegu bese ibounai be do ita mase ore.” (Genese 34:30) Oibe, idia ese hekwakwanai idia hamaoromaoroa lasi, to edia ala-ala karana dainai dika bada ia vara; Iakobo ena ruma bese taudia idia gima badina edia dekena taudia ese do idia tuari henia. Dika idia davaria lasi totona, Dirava ese Iakobo ia hamaoroa namona be ia bona ena ruma bese be Betele dekenai do idia lao.​​—⁠Genese 35:​1, 5.

Sekema ese Daina ia hadikaia dainai idia vara hekwakwanai ese ita dekenai mai anina bada gauna ta ia hadibaia. Ma haida edia kara dika ena davana ita karaia lou neganai, idia danu ese iseda dika ena davana do idia karaia lou.

Dika Ena Davana Karaia Loulou Karana

Ita ia kara dika henia tauna ena dika davana ita karaia lou totona ita laloa momo karana ese ita ia hadikaia diba. Buka ta (Forgiveness​—⁠How to Make Peace With Your Past and Get On With Your Life) ia gwau: “Guna haida ese oi dekenai idia karaia kara dika oi laloa momo dainai, hanaihanai oi badu henidia, bona dala oi tahua edia kara dika ena davana oi karaia lou totona. To, unai bamona lalohadai ese emu nega bona goada ia haorea kava.” Baibel ia gwau bamona, ‘mama ese gorere dikana do ia havaraia.’​​—⁠Aonega Herevadia 14:⁠30.

Momokani, bema tau ta ena lalona dekenai ma haida kara dika henia bona inai henia lalohadaina ia noho, do ia moale lasi. Baibel herevalaia tauna ta ia gwau: “Bema oi laloa ta ena kara dika davana oi karaia be mai ena namo, mani lagani momo lalodiai unai bamona idia karaia taudia edia mauri dalana oi stadilaia.”

Tanobada ena kahana momo ai ia vara noho iduhu bona tomadiho idauidau edia inai heheni karana mani oi laloa. Nega momo tau ta ese ma ta ia alaia dainai ala-ala heheni karana ia vara, bona unai kara ia doko diba lasi. Hegeregere, terorist taudia haida ese bomu amo matamata taudia 18 idia hamasea neganai, hahine ta be mai taitai ida ia boiboi, “Edia natudia iboudiai ita hamasea be namo!” Unai dala amo, dagedage ia bada ia lao, bona taunimanima momo idia ura unai kara lalonai idia vareai.

“Matana Ena Davana be Matana”

Haida idia gwau ta ena kerere davana idia karaia lou karana be Baibel ena hereva bamona. Hegeregere idia gwau, “Baibel ia gwau, ‘matana ena davana be matana, isena ena davana be isena,’ ani?” (Levitiko 24:20) Taunimanima idia laloa “matana ena davana be matana” ena taravatu ese gwau maoro ia henia ta ena kara dika davana karaia lou totona. To, momokani Dirava ese unai taravatu ia atoa badina ia ura lasi Israela taudia ese ta ena kara dika davana karaia lou karana idia karaia kava. Edena dala ai?

Bema Israela tauna ta be Israela tauna ma ta ia haberoa bona ena matana ia hadikaia, diadi taudia be Taravatu hegeregerena hahemaoro maoromaorona do idia karaia. To, bero ia abia tauna be maoro lasi, ia sibona ese unai kara dika tauna eiava iena ruma bese tauna ta do ia haberoa totona. Taravatu ia gwau bero ia abia tauna be kota dekenai do ia lao, bona diadi taudia ese hahemaoro maoromaorona do idia karaia. Israela taudia idia diba taravatu ia gwau, kara dika tauna ia karaia kererena hegeregerena panisi do idia henia dainai, unai ese idia ia koua kara dika idia karaia lasi totona. To, ma gau haida danu do ita laloa.

Iehova Dirava ese unai taravatu ia do karaia lasi neganai, Ia ese Israela taudia ia hamaorodia, ia gwau: “Emui tadikakana do oi badu henia noho lasi, oiemu lalona dekenai. . . . Kara dika ena davana do umui haloua lasi, bona unai tau do umui badu henia noho lasi.” (Levitiko 19:​17, 18) Momokani, “matana ena davana be matana, isena ena davana be isena” ena Taravatu be Mose ena Taravatu ibounai ida ita laloa be namo. Inai hahegani badadia rua ese Mose ena Taravatu ibounai idia hanaia, inai hahegani be: “Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida” bona “emu dekena tauna do oi lalokau henia, oi sibona oi lalokau henia hegeregerena.” (Mataio 22:​37-​40, NW ) Bema Keristani taudia korikoridia be ta ese ia kara dika henidia, dahaka do idia karaia?

Maino Dalana Badinaia

Baibel ese Iehova ia gwauraia, “maino Diravana” bona ia idia tomadiho henia taudia ia hadibaia ‘maino idia tahua be namo bona maino ena dala do idia badinaia.’ (Heberu 13:​20, NW; 1 Petero 3:​11, NW ) To, edena dala ai unai ita karaia diba?

Iesu be tanobada ai haroro gaukara ia karaia neganai, taunimanima ese idia kanudia, idia kwadia, ena inai taudia ese idia dagedage henia, ena turana ta ese ia samania koikoi, bona ena hahediba taudia ese idia rakatania danu. (Mataio 26:​48-​50; 27:​27-​31) To, Iesu be dahaka ia karaia? Petero ia gwau: “Idia hereva dika henia, to ia hereva dika henia lou lasi. Hisihisi ia abia neganai, ia dagedage lasi. To mai abidadama danu, sibona ena mauri be Dirava ena imana dekenai ia henia. Badina Keriso ia diba Dirava be Kota Biaguna maoromaorona.”​​—⁠1 Petero 2:​23.

Petero ia gwau: “Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona.” (1 Petero 2:​21) Oibe, Baibel ese Keristani taudia ia hagoadaia Iesu ena dika davana karaia lou lasi haheitalaina idia tohotohoa totona. Iesu be ena Ororo Harorona ai, ia gwau: “Umui dekenai idia badu henia taudia do umui lalokau henia, bona umui dekenai idia dagedage henia taudia dainai do umui guriguri. Unai dekena amo emui Tamana guba dekenai ia noho ese iena natuna do ia halaoa umui.”​​—⁠Mataio 5:​44, 45.

Vadaeni, Keriso ena lalokau idia tohotohoa taudia be ma haida ese idia kara dika henia neganai, dahaka do idia karaia? Aonega Herevadia 19:11 ia gwau: “Tau ta ena aonega ese haheauka ia henia noho, vadaeni ia badu haraga lasi. Bema tau ta ese oi dekenai ia kara dika, do oi laloaboio be kara namona momokani.” Bona inai hereva idia badinaia danu: “Namo lasi dika ese umui do ia halusia, to umui ese kara namo dekena amo dika do umui halusia.” (Roma 12:​21) Unai be hari dika ena davana idia karaia lou karana amo ia idau! Keristani lalokau korikorina ese ita do ia durua ta ena kara dika davana do ita karaia lou lasi bona ‘dika do ita laloaboio,’ badina “lalokau ese edia dika ia laloatao noho lasi.”​​—⁠1 Korinto 13:⁠5.

Unai ena anina be raskol taudia ese ita idia kara dika henia eiava hagaria herevana ta idia gwauraia neganai, ita manau sibona bona kara ta ita karaia lasi, a? Lasi! Paulo ena hereva, “kara namo dekena amo dika do umui halusia” ena anina be unai bamona lasi. To, ma haida ese ita idia kara dika henia neganai, ita be mai eda maoro sibona ita gimaia totona. Bema ta be oi ia kara dika henia o emu kohu ta ia hadikaia, pulisi do oi rini henidia diba. Bema unai hekwakwanai be sikuli o gaukara gabuna dekenai ia vara, gavamani taudia haida dekenai heduru totona ita lao diba.​​—⁠Roma 13:​3, 4.

Namona be ita laloatao hahemaoro maoromaorona be inai tanobada lalonai do ita davaria diba lasi. Oibe, momo be edia mauri ibounai lalonai unai idia tahua, to idia davaria lasi dainai idia lalohisihisi bada.

Satani ia ura bada taunimanima be ta ta idia inai henia bona ta ta edia kara dika ena davana idia karaia lou, unai amo maino ai do idia noho lasi. (1 Ioane 3:​7, 8) Inai Baibel ena hereva namona ita laloatao be namo: “Lauegu lalokau taudia e, dika ena davana do umui henia lasi, davana henia be, Dirava sibona. Badina be Buka Helaga ia gwau: ‘Lohiabada ia gwau, “Dika ena davana be lau sibona ese do lau karaia.” ’ ” (Roma 12:19) Bema unai hekwakwanai be Iehova ena imana dekenai ita rakatania, ita lalohisihisi lasi, badu lasi, bona dagedage be lasi.​​—⁠Aonega Herevadia 3:​3-6.

[Blurb on page 28]

“Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai” bona “oiemu badibadinai tauna dekenai oi lalokau henia, oi sibona oi lalokau henia bamona ”

[Pictures on page 29]

Lalokau “ese edia dika ia laloatao noho lasi.”​​—⁠1 Korinto 13:5