‘Dirava Ena Hereva Ita Gwauraia Mai Goada Danu’
“Lauma Helaga ese ibounai ia hahonua, bona Dirava ena hereva idia gwauraia, mai goada danu.”—KARA 4:31.
1, 2. Dahaka dainai iseda haroro gaukara ita karaia namonamo be namo?
IESU be dina toi murinai do ia mase dainai, ena hahediba taudia ia hamaoroa: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” Iesu be mase amo ia toreisi lou bona guba dekenai ia do daekau lasi neganai, ena aposetolo taudia ia hagania ‘bese ibounai be diba tahua taudia do idia halaoa, bona idia dekenai do idia hadibaia, idia dekenai ia henia hereva ibounai be do idia badinaia.’ Ia gwauhamata ‘ia be hanaihanai idia danu idia noho ela bona tanobada dokona.’—Mat. 24:14; 26:1, 2; 28:19, 20.
2 Ita Iehova ena Witnes taudia ese ita karaia gaukarana be aposetolo taudia edia nega amo ia matamaia. Basileia harorolaia bona hahediba taudia halaoa gaukaradia be hahemauri gaukaradia dainai, idia be mai anina bada. Unai dainai, iseda haroro gaukara ita karaia namonamo be gau badana! Inai stadi lalonai, do ita itaia edena dala ai lauma helaga ese ita ia durua mai goada ida ita haroro totona. Stadi gabedia rua ese do idia hahedinaraia Iehova ena lauma helaga ese ita ia hakaua ita hadibaia namonamo bona ita haroro hanaihanai totona.
Ita Goada be Namo
3. Dahaka dainai Basileia harorolaia gaukarana ita karaia totona, ita goada be namo?
3 Dirava ese ia henia Basileia harorolaia gaukarana be gaukara hereadaena. To, nega haida ia be auka. Taunimanima haida be Dirava ena Basileia ena sivarai namona idia abia dae haraga, to momo be Noa ena negai idia noho taudia bamona. Iesu ia gwau: “Idia laloa lasi dahaka do ia vara, idia kara dika noho, ia mai bona abata badana ia ginidae.” (Mat. 24:38, 39) Ma haida ese ita idia kirikirilaia bona dagedage henia. (2 Pet. 3:3) Reana gavamani taudia, sikuli turadia, gaukara turadia, eiava ruma bese taudia ese ita idia dagedage henia diba. Danu, iseda manoka gauna ta be, ita hemarai bona haida ese ita idia dadaraia garina ita gari. Gau momo ese ita idia koua diba, Dirava ena hereva be “mai goada danu” ita harorolaia totona. (Efe. 6:19, 20) Hanaihanai Dirava ena hereva ita harorolaia totona, ita goada be namo. Dahaka ese ita ia durua diba ita goada totona?
4. (a) Ta be “mai goada danu” ia hereva ena anina be dahaka? (b) Edena dala ai Paulo be goada ia abia Tesalonika taudia ia hereva henia totona?
4 Greek herevana idia hahanaia ta be “mai goada danu” ia hereva anina be ta be “mai ena momokani ida ena lalohadai ia gwauraia hedinarai.” To unai be mai badu ida hereva karana ia herevalaia lasi. (Kol. 4:6) Mai goada danu ita haroro be namo, to danu, ita ura taunimanima ibounai ida maino ai ita noho. (Roma 12:18) Ma danu, mai goada danu Dirava ena Basileia ena sivarai namona ita harorolaia neganai, laloa maoromaoro bona aonega ita gaukaralaia be namo, unai amo haida edia lalona ita hahisia kava lasi. Momokani, mai goada ida ita haroro totona, kara haida ita karaia danu be gau badana. Unai kara be ita sibona iseda goada amo ita hahedinaraia be auka. Paulo bona iena bamoa taudia be Filipi taudia ese idia dagedage henia bona hahisidia neganai, edena dala ai goada idia abia Tesalonika taudia idia hereva henia totona? Paulo ia gwau: “Dirava ese ai ia hagoadaia.” (1 Tesalonika 2:2 duahia.) Iehova Dirava ese iseda gari mamina ia kokia diba bona mai goada danu do ita hereva.
5. Edena dala ai Iehova ese Petero, Ioane, bona hahediba taudia ma haida dekenai goada ia henia?
5 “Lohia taudia bona taravatu hadibaia taudia” be Petero bona Ioane idia koua neganai, idia dekenai idia gwau: “Mani umui laloa, bema Dirava ai kamonai henia lasi, to umui dekenai ai kamonai, inai be maoro Dirava ena vairanai? Badina be ai itaia bona ai kamonai gaudia ai hunia diba lasi, aiemai uduna ai koua diba lasi.” Idia bona edia tadikaka be dagedage karadia koua totona idia guriguri lasi, to idia guriguri neganai, idia gwau: “Lohiabada e, edia hagaria hereva harihari do oi laloa, bona oiemu hesiai taudia dekenai goada oi henia, vadaeni ai ese oiemu hereva do ai gwauraia, gari lasi.” (Kara 4:5, 19, 20, 29) Edia noinoi dainai, Iehova be dahaka ia karaia? (Kara 4:31 duahia.) Iehova be ena lauma helaga amo idia ia durua mai goada danu idia haroro totona. Dirava ena lauma helaga ese ita dekenai goada ia henia diba danu. Vadaeni, edena dala ai Dirava ena lauma helaga ita abia diba bona eda haroro gaukara ai ita do ia hakaua?
Mai Goada Danu Ita Haroro
6, 7. Edena dala badana ai Dirava ena lauma helaga ita abia diba? Haheitalai haida gwauraia.
6 Dirava ena lauma helaga ita abia totona, ita guriguri be gau badana. Iesu be ena kamonai taudia ia hamaoroa: “Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga be idia noinoi taudia dekenai do ia henidia lasi, a?” (Luka 11:13) Momokani, hanaihanai lauma helaga totona ita guriguri be namo. Bema dala dekenai haroro gaukara ita karaia, o nega bona gabu idauidau ai ita haroro, o bisinesi teritori ita karaia totona ita gari, Iehova ena lauma helaga totona ita guriguri diba bona ita noia ita ia durua mai goada danu ita haroro totona.—1 Tes. 5:17.
7 Taihu ta ladana Rosa be unai bamona ia karaia.a Dina ta Rosa be gaukara gabuna dekenai ia noho neganai, ia danu ia gaukara tisa ta be sikuli ma ta amo natudia hadikaia karana ena ripoti ta ia duahia. Unai tisa be ia duahia gauna dainai ia lalometau bona ia gwau, “Inai tanobada dekenai dahaka ia vara noho?” Rosa ia itaia unai be nega namona unai tisa ia haroro henia totona. To mai gari lasi ida ia hereva totona, dahaka ia karaia? Ia gwau: “Iehova lau guriguri henia bona lau noia ena lauma helaga amo lau ia durua totona.” Ia ese haroro namona ia henia bona dala ia karaia unai tisa danu ia herevahereva lou totona. New York City ai, kekeni maragina ta ladana Milane, ena mauri lagani be 5, ia gwau: “Sikuli dekenai lau do lao lasi neganai, lau bona egu sinana be hanaihanai Iehova dekenai ai guriguri.” Dahaka totona idia guriguri? Milane be mai gari lasi ida iena Dirava ia herevalaia bona ia badinaia totona! Iena sinana ia gwau: “Unai ese Milane ia durua vara dinadia bona holide negadia ai idia karaia karadia ia dadaraia ena badina ia herevalaia totona.” Unai ekspiriens ese idia hahedinaraia guriguri karana ese ita ia durua diba mai goada ida ita haroro totona.
8. Mai goada danu ita haroro totona, Ieremia amo dahaka ita dibaia?
8 Peroveta tauna Ieremia be mai goada danu ia haroro totona, dahaka ese ia durua? Iehova ese Ieremia ia abia hidi peroveta tauna ai ia lao neganai, Ieremia ia gwau: “Lohiabada Dirava e, lau be hereva dalana lau diba lasi, lau be mero sibona.” (Ier. 1:4-6) To gabeai, hanaihanai Ieremia ena hereva goadagoada karana dainai, momo idia gwau ia be taunimanima hadikaia herevadia ia harorolaia tauna. (Ier. 38:4) Lagani 65 mai kahana lalonai, mai goada danu Iehova ena hahemaoro herevadia ia harorolaia. Israela ai Ieremia be mai gari lasi danu ia haroro dainai, taunimanima momo be ia idia diba, unai dainai lagani 600 murinai Iesu be mai goada ida ia haroro neganai, haida idia laloa ia be Ieremia—mase amo ia toreisi lou. (Mat. 16:13, 14) Edena dala ai peroveta tauna Ieremia be ena hemarai karana ia hanaia? Ia gwau: “[Dirava ena] hereva be lahi bamona, lauegu lalona ia gabua noho, ela bona lauegu turiana dekenai. Momokani lau ese oiemu hereva lau koua toho auka herea.” (Ier. 20:9) Oibe, Iehova ena hereva ese Ieremia ia hasiahua dainai ia hereva.
9. Dahaka dainai Dirava ena hereva ese Ieremia ia hasiahua hegeregerena ita do ia hasiahua?
9 Paulo be Heberu taudia ia tore henia neganai, ia gwau: “Dirava ena hereva be ia mauri noho, bona ia be mai ena siahu. Ia be mai ena matana momokani. Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.” (Heb. 4:12) Dirava ena hereva ese Ieremia ia hagoadaia bamona, ita ia hagoadaia diba. Namona be ita laloatao: Taunimanima be edia aonega amo Baibel idia torea lasi, to lauma helaga ese ia horodia dainai Baibel idia torea. Petero Iharuana 1:21 ia gwau: “Peroveta hereva gunadia be tau ta ese sibona ena ura dekenai ia gwauraia lasi. Lasi momokani. To Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.” Nega ita atoa sibona eda Baibel stadi karana ita karaia namonamo neganai, lauma helaga ena siahu amo ia vara herevana be iseda lalona ai do ia honu. (1 Korinto 2:10 duahia.) Unai hereva be iseda lalona ai “lahi bamona” eda lalona ia gabua noho, unai amo ita ura bada ma haida dekenai unai sivarai ita herevalaia.
10, 11. (a) Bema ita ura mai goada danu ita hereva, edena dala ai Baibel ita stadilaia be namo? (b) Sibona emu stadi karana oi hanamoa dalana ta oi gwauraia.
10 Sibona eda stadi karana ese ita ia durua bada totona, namona be lalona veria dalanai Baibel ita stadilaia, unai ese iseda lalona do ia hagoadaia. Hegeregere, matahanai ta lalonai peroveta tauna Esekiela be lokua buka ta ena rau ia ania, unai buka be kamonai lasi taudia edia hahemaoro herevana ia gwauraia. Esekiela ese unai hereva ia abia dae bona ia badinaia be namo. Bema unai bamona ia karaia, ena gaukara be gau namona ai do ia lao—hani ena mamina bamona.—Esekiela 2:8–3:4, 7-9 duahia.
11 Iseda nega be Esekiela ena nega bamona. Hari inai negai, momo idia ura lasi Baibel ena hereva idia kamonai. Dirava ena hereva ita herevalaia namonamo totona, mai anina bada gauna be Baibel ita stadilaia namonamo, bona ena hereva ita lalopararalaia namonamo. Namona be hanaihanai sibona eda stadi karana ita karaia. Namona be salamo torea tauna bamona ita karaia, ia gwau: “Lohiabada e, oi be lauegu Nadi Gini Gabuna, bona egu Hamauria Tauna. Mani lau do oi durua, vadaeni lauegu uduna ena hereva, bona lauegu kudouna ena laloa, be do idia namo, oiemu vairana dekenai.” (Sal. 19:14) Baibel ai ita duahia gauna ita laloa dobu be mai anina bada, unai amo hereva momokani be iseda kudouna ai ia diho diba! Momokani, namona be sibona eda stadi karana ita hanamoa.b
12. Lauma helaga ese ita ia hakaua totona, dahaka dainai Keristani hebou ese ita ia durua diba?
12 Iehova ena lauma helaga ese ita ia durua dalana ma ta be, ‘ta ta dekenai durua henia daladia do ita laloa noho. Unai bamona lalokau dekena amo kara namodia do ita karaia. Iseda guriguri hebou kara do ita hadokoa lasi.’ (Heb. 10:24, 25) Keristani heboudia dekenai hanaihanai ita lao, ita kamonai namonamo, bona ita dibaia gaudia ita badinaia neganai, lauma helaga ese ita ia hakaua. Vadaeni, Iehova ena lauma helaga be kongrigeisen amo hakaua herevadia ia henia noho.—Apokalupo 3:6 duahia.
Mai Goada Danu Ita Haroro Ena Namo
13. Keristani taudia ginigunadia ese edia haroro gaukara idia habadaia karana amo dahaka ita dibaia?
13 Lauma helaga ena siahu be bada bona gau ta ese ia koua diba lasi, bona taunimanima ia hagoadaia diba Iehova ena ura idia karaia totona. Aposetolo edia negai, lauma helaga ena heduru amo Keristani taudia be haroro gaukara badana idia karaia. Idia ese sivarai namona be “tanobada ibounai dekenai idia harorolaia.” (Kol. 1:23) Idia momo be “sikuli bada lasi, bona aonega bada lasi taudia” dainai, unai ese ia hahedinaraia idia be lauma helaga ese ia hakaua.—Kara 4:13.
14. Dahaka ese ita ia durua diba ‘lauma be eda lalona ai do ia hururu’ totona?
14 Nega ibounai iseda mauri lalonai lauma helaga ese ita ia hakaua neganai, unai ese ita ia durua diba mai gari lasi danu haroro gaukara ita karaia totona. Danu bema nega ibounai lauma helaga totona ita guriguri, sibona eda stadi ita karaia, ita duahia gaudia ita laloa dobu, bona hebou ita lao neganai, ‘lauma be eda lalona ai do ia hururu.’ (Roma 12:11, BHğ) Baibel be “Iuda tauna ta ena ladana be Apolo. Ia be Alesandria tauna bona Efeso dekenai ia ginidae. Ia be hereva namonamo tauna” ia herevalaia neganai, ia gwau ia be “Lauma helaga dainai ia ura bada ia gaukara, vadaeni ia lao bona mai maoromaoro ida Iesu ena sivarai ia herevalaia bona ia hadibaia, to ia be Ioane ena bapatiso sibona ia diba.” (Kara 18:24, 25, NW ) Bema ‘lauma be eda lalona ai do ia hururu’ ita be mai goada danu ruma-ta-ruma-ta haroro gaukara bona nega bona gabu idauidau ai ita haroro diba.—Roma 12:11, NW.
15. Mai goada danu ita haroro ena namo haida be dahaka?
15 Mai goada danu ita haroro neganai, unai ese ita do ia durua. Ita moale badina ita laloparara iseda gaukara be mai anina bada bona namo do ia havaraia. Haroro gaukara ai anina namona bona moale bada ita davaria totona, ita ura dikadika unai gaukara ita habadaia. Ma danu, ita diba nega be kwadogi dainai, ita ura iseda haroro gaukara ita habadaia haraga.
16. Bema haroro gaukara ita hesikulaia, dahaka ita karaia be namo?
16 Bema haroro gaukara ita goadalaia lasi o guna bamona iseda haroro ita karaia lasi, be edena bamona? Vadaeni, ita sibona iseda kara ita tahua be namo. Paulo ia gwau: “Umui sibona emui kara do umui tahua, bona emui mauri do umui tohoa, umui be abidadama korikori taudia o lasi.” (2 Kor. 13:5) Sibona oi nanadaia: ‘Dirava ena lauma be egu lalona ai ia hururu, a? Iehova ena lauma helaga totona lau guriguri, a? Egu guriguri ese ia hahedinaraia lau be Iehova dekenai lau tabekau iena ura lau karaia totona, a? Egu guriguri lalonai Iehova ese ita ia henia haroro gaukarana dainai tanikiu herevadia lau gwauraia, a? Sibona egu stadi karana be edena bamona? Lau duahia bona kamonai herevadia lau laloa dobu totona nega bada lau atoa, a? Kongrigeisen heboudia lau durua, a?’ Unai bamona henanadai oi laloa neganai, unai ese oi do ia durua emu manoka gabudia oi diba bona oi hanamoa totona.
Lauma Helaga ese Oi Do Ia Hagoadaia
17, 18. (a) Hari inai negai idia karaia haroro gaukara ena bada be edena bamona? (b) Edena dala ai ita “hereva mai goada danu” Dirava ena Basileia ena sivarai namona ita harorolaia totona?
17 Iesu be mase amo ia toreisi lou bona ena hahediba taudia ia hamaoroa: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Kara 1:8) Unai nega ai idia hamatamaia gaukarana be hari tanobada hegegemadai ai idia karaia noho. Iehova ena Witnes taudia kahirakahira 7 milioni be tano 230 mai kahana ai Basileia ena sivarai idia harorolaia noho. Lagani ta lalonai, kahirakahira hora 1.5 bilioni bamona be haroro gaukara ai idia negea. Mai ura bada ida inai gabeai do ita karaia lou diba lasi gaukarana ita karaia be moale bada gauna!
18 Aposetolo edia negai bamona, hari tanobada hegegemadai idia karaia haroro gaukara be Dirava ena lauma helaga ese ia hakaua. Bema lauma helaga ena hakaua dalana ita badinaia, haroro totona ita “hereva mai goada danu.” (Kara 28:31) Unai dainai, Dirava ena Basileia ena sivarai namona ita harorolaia neganai, lauma helaga ese ita ia hakaua be namo!
[Footnotes]
a Ladana haida ai haidaua.
b Emu Baibel duahiduahi bona sibona emu stadi karana amo heduru bada oi abia totona, Tiokratik Haroro Sikuli amo Heduru Oi Abia bukana ena karoa ladana “Duahia Karana Oi Goadalaia” bona “Stadi Ena Namo be Bada,” rau 21-32 itaia.
Dahaka Oi Dibaia?
• Dahaka dainai Dirava ena hereva be mai goada danu ita gwauraia be namo?
• Dahaka ese hahediba taudia ginigunadia ia durua mai goada ida idia hereva totona?
• Edena dala ai mai goada danu ita haroro diba?
• Edena dala ai mai goada danu haroro karana ese ita ia durua?
[Picture on page 7]
Edena dala ai tama sina ese natudia idia durua diba mai goada ida idia hereva totona?
[Pictures on page 8]
Guriguri kwadogina ese oi ia durua diba mai goada ida oi haroro totona