Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w09 7/15 rau 19-23
  • Iesu Tohotohoa—Mai Gari Lasi ida Haroro

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • Iesu Tohotohoa—Mai Gari Lasi ida Haroro
  • 2009 Gima Kohorona Iehova Ena Basileia Ia Harorolaia
  • Sinado maragidia
  • Inai Bamona Atikol
  • Dagedage Lalonai Idia Gari Lasi be Namo
  • Lalokau Dainai Iesu be mai Gari Lasi ida Ia Haroro
  • Lauma Helaga ese Ita Ia Durua mai Gari Lasi ida Ita Haroro Totona
  • Hari Keristani Taudia be mai Gari Lasi ida Idia Haroro
  • Mai Goada ida Oi Haroro, A?
    Iseda Basileia Gaukara—2000
  • ‘Dirava Ena Hereva Ita Gwauraia Mai Goada Danu’
    Gima Kohorona Iehova Ena Basileia Ia Harorolaia—2010
  • Mai Gari Lasi ida Dirava Ena Hereva Ita Gwauraia Noho
    Iseda Basileia Gaukara—2005
  • Gari Lasi
    Taunimanima Lalokau Henia​—Hahediba Taudia ai Halaoa
Ma Haida Itaia
2009 Gima Kohorona Iehova Ena Basileia Ia Harorolaia
w09 7/15 rau 19-23

Iesu Tohotohoa​—⁠Mai Gari Lasi ida Haroro

“Sivarai Namona, Dirava dekena amo ia mai gauna, umui dekenai ai gwauraia, mai gari lasi danu.”​​—⁠1 TES. 2:⁠2.

1. Dahaka dainai Dirava ena Basileia ena sivarai namona be sivarai hereadaena?

SIVARAI namodia ita kamonai neganai ita moale, ani? Dirava ena Basileia ena sivarai namona be sivarai hereadaena. Unai sivarai ese ita ia hadibaia hisihisi, gorere, taitai, bona mase be do idia ore. Unai sivarai namona dainai, ita be mauri hanaihanai abia dalana, Dirava ena ura, bona Iehova tura henia daladia ita diba. Oi laloa taunimanima ibounai be Iesu ese ia harorolaia sivarai namona do idia moalelaia, a? Lasi, haida idia ura lasi kamonai.

2. Iesu ena hereva, ‘heai do ia havaraia’ ena anina oi gwauraia hedinarai.

2 Iesu ese ena aposetolo taudia ia hamaoroa: “Umui emui lalona dekenai umui gwau lasi, maino lau mailaia tanobada dekenai totona lau mai. Maino lau mailaia lasi, to tuari kaia sibona. Badina lau mai, be heai do lau havaraia totona. Tau ta ese iena tamana do ia badu henia, bona kekeni ta ese iena sinana do ia badu henia, bona hahine matamata ese iena ravana hahine do ia badu henia. Bona ruma taudia ese ruma ena biaguna do idia badu henia.” (Mat. 10:​34-​36) Taunimanima momo be sivarai namona idia dadaraia. Haida be sivarai namona idia harorolaia taudia idia inai henia, ena be idia haida be edia ruma bese taudia.

3. Eda haroro gaukara ita karaia namonamo totona, dahaka ita karaia be namo?

3 Ita danu be Iesu ia harorolaia hereva momokanidia ita harorolaia, bona idia kamonai taudia momo be unai idia dadaraia, guna momo be Iesu dekenai idia karaia bamona. Ita diba hari inai negai unai do ia vara danu. Iesu be ena aposetolo taudia dekenai ia gwau: “Hesiai tauna ese iena biaguna ia hereaia lasi. Bema idia ese lau dekenai idia dagedage henia, umui dekenai danu do idia dagedage henia.” (Ioa. 15:20) Tano momo ai taunimanima be ita dekenai dagedage karadia idia karaia lasi, to ita idia kirikirilaia bona idia ura lasi kamonai. Unai dainai, namona be mai abidadama bona gari lasi ida sivarai namona ita harorolaia noho.​​—⁠2 Petero 1:​5-8 duahia.

4. Paulo ese haroro gaukara ia karaia noho totona, dahaka dainai ia “gari lasi” be namo?

4 Reana nega haida oi itaia haroro gaukara be mai ena hekwarahi, eiava oi gari ena kahana ma haida oi karaia totona. Pablisa ma haida be unai bamona hekwakwanai idia davaria danu. Aposetolo Paulo be hereva momokani ia diba namonamo bona mai gari lasi ida ia haroro, to nega haida ia hekwarahi bada haroro gaukara ia karaia totona. Paulo ese Tesalonika ai idia noho Keristani taudia ia tore henia neganai, ia gwau: “Guna Filipi hanua dekenai ai lao neganai, be ai dekenai idia dagedage, bona ai idia hisihisi henia. Umui dekenai ai mai neganai tau momo ese ai idia koua gwauraia. To Dirava ese ai ia hagoadaia, vadaeni Sivarai Namona, Dirava dekena amo ia mai gauna, umui dekenai ai gwauraia, mai gari lasi danu.” (1 Tes. 2:⁠2) Filipi dekenai Kota biaguna taudia ese Paulo bona ena bamona Sila be au amo idia botaia, dibura ruma ai idia atodia, bona edia aena be au metaudia amo idia koua. (Kara 16:​16-​24) To, Paulo bona Sila be “mai gari lasi danu” haroro gaukara idia karaia noho. Edena dala ai edia haheitalai ita tohotohoa diba? Unai ita haerelaia totona, namona be ita itaia dahaka ese Dirava ena hesiai taudia ginigunadia haida ia durua mai gari lasi ida Iehova ena hereva momokani idia harorolaia, bona edena dala ai edia haheitalai ita tohotohoa diba.

Dagedage Lalonai Idia Gari Lasi be Namo

5. Dahaka dainai Iehova idia badinaia taudia be hanaihanai gari lasi karana idia hahedinaraia be namo?

5 Iesu Keriso be gari lasi karana ia hahedinaraia tauna hereadaena. Dirava ese Adamu bona Heva ia karaia negana amo ema bona hari, Iehova idia badinaia taudia ibounai be hanaihanai unai kara idia hahedinaraia be namo. Dahaka dainai? Badina Adamu bona Heva idia gwau-edeede murinai, Iehova ia peroveta Iena hesiai taudia bona Satani ena hesiai taudia huanai inai heheni karana do ia vara. (Gen. 3:​15, BHğ) Daudau lasi murinai unai inai heheni karana ia hedinarai goevagoeva. Hegeregere, Kaino ese kara maoromaoro tauna Abela ia inai henia bona ia hamasea. Abata do lasi neganai, taunimanima ese abidadama tauna ma ta Enoka idia inai henia. Enoka ia peroveta Dirava bona Iena aneru helagadia momo herea do idia mai, Dirava idia badinaia lasi taudia idia kota henia totona. (Iuda 14, 15) Unai haroro herevana dainai momo idia moale lasi. Taunimanima ese Enoka idia inai henia, bona reana idia hamasea diba bema Iehova ese edia huana amo ia kokia lasi. Enoka be gari lasi karana ia hahedinaraia, ani?​​—⁠Gen. 5:​21-​24.

6. Dahaka dainai Mose be Farao ia hereva henia totona ia gari lasi be namo?

6 Mani oi laloa: Nega ta Mose be mai gari lasi ida Farao ia hereva henia. Farao be lohia tauna ta, bona ia be dirava idauidau edia gwaukau tauna ta sibona lasi, to ia gwau ia be dirava ta badina ia be dina diravana, Ra, ena natuna. Reana Farao ma haida idia karaia bamona, ia be sibona ena laulau ia tomadiho henia. Farao be taravatu ia haginia tauna; ia ura taunimanima ese ena oda sibona idia badinaia. Ia be mai ena siahu, ia hekokoroku, bona dagedage tauna, bona ma haida edia lalohadai ia abia dae lasi. Ena be Farao ese Mose ia boiria lasi, to unai manau bona mamoe naria tauna be Farao vairanai ia hedinarai loulou. Mose be dahaka ia perovetalaia? Hisihisi 10. Bona dahaka ia noia? Ia ura Farao ese gwaumaoro ia henia hesiai taudia milioni momo be Aigupito do idia rakatania! Mose ia gari, a? Lasi vaitani!​​—⁠Num. 12:3; Heb. 11:⁠27.

7, 8. (a) Baibel negadiai idia noho abidadama taudia ese dahaka hahetoho idia davaria? (b) Dahaka ese abidadama taudia ia durua mai gari lasi ida tomadiho momokani idia goadalaia totona?

7 Gabeai, peroveta taudia bona abidadama taudia ma haida be mai gari lasi ida tomadiho momokani idia badinaia. Momokani, Satani ena tanobada ese idia ia inai henia. Paulo ia gwau: “Nadi dekenai idia hodoa, idia mase, iri dekenai idia utua kahana rua, idia mase, tuari kaia dekena amo idia aladia mase. Idia haida madi, mamoe kopina bona nanigosi kopina, dabua bamona idia karaia, idia loaloa. Idia be ogogami, hisihisi idia abia, bona taunimanima ese idia hadikadia.” (Heb. 11:37) Dahaka ese unai abidadama hesiai taudia ia durua idia gini goada totona? Matamaia siri haida lalonai, aposetolo Paulo ese ia hahedinaraia dahaka ese Abela, Aberahamo, Sara, bona ma haida ia durua idia haheauka totona. Ia gwau: “Dirava ena gwauhamata ena anina idia do davaria lasi. To [mai abidadama ida] daudau herea dekena amo, unai gwauhamata gaudia idia itaia, bona idia moale bada.” (Heb. 11:13) Unai dainai, peroveta taudia hegeregere Elia, Ieremia, bona ma haida be mai gari lasi ida tomadiho momokani idia goadalaia, bona Iehova ena gwauhamata idia abidadama henia dainai, unai ese idia ia durua idia gini goada totona.​​—⁠Tito 1:⁠2.

8 Unai Baibel negadiai idia noho abidadama taudia be vaira negai do idia vara gwauhamata namodia idia naria noho. Dirava ese mase taudia ia hatorea isi lou neganai, unai abidadama taudia be Keriso Iesu bona 144,000 taudia edia hahelaga gaukarana amo do idia goevadae bona “kara dika ena igui amo do ia ruhadia.” (Roma 8:​21, NW ) Ma danu, idaunegai Ieremia bona hesiai taudia ma haida be Iehova ena gwauhamata dainai idia gini goada, badina Iehova be Ieremia dekenai ia gwau: “Inai taudia ibounai ese oi do idia heai henia, to idia ta ese oi do ia halusia lasi. Badina be, lau be oi dekenai lau noho, bona oi do lau durua. Lau Lohiabada lau hereva inai.” (Ier. 1:19) Hari inai negai, Dirava ena gwauhamata nega vaira totona, bona Iehova ese ita do ia gimaia herevadia ita laloa noho neganai, unai ese ita do ia hagoadaia bada.​​—⁠Aon. 2:7; 2 Korinto 4:​17, 18 duahia.

Lalokau Dainai Iesu be mai Gari Lasi ida Ia Haroro

9, 10. Edena dala ai Iesu be gari lasi karana ia hahedinaraia (a) tomadiho gunalaia taudia vairanai, (b) tuari taudia vairanai, (c) hahelaga tauna badana vairanai, (d) Pilato vairanai?

9 Iesu be dala idauidau ai gari lasi karana ia hahedinaraia. Hegeregere, ena be siahu taudia ese Iesu idia inai henia, to ia be Dirava ena hereva ia harorolaia noho. Ia be mai gari lasi ida tomadiho gunalaia taudia, edia koikoi karadia bona hahediba herevadia ia hahedinaraia. Iesu ese unai tatau ia hahemaoro henia. Nega ta, Iesu ia gwau: “Taravatu hadibaia taudia bona Farisea taudia, kara koikoi taudia, dika do umui davaria momokani! Badina umui be mase guria gabudia, peni dekena amo idia hakurokuroa bamona, edia murimuri kahana itaia neganai be idia namo, to edia lalonai be mase edia turiana bona miro ibounai idia honu momokani. Unai bamona danu taunimanima ese umui idia itaia be kara maoromaoro taudia bamona, to emui lalona be koikoi bona kerere idia honu momokani vadaeni.”​​—⁠Mat. 23:​27, 28.

10 Tuari taudia be Getesemane umana ai Iesu idia koua neganai, Iesu be mai gari lasi ida idia dekenai ia sibona ia gwau: “Lau inai.” (Ioa. 18:​3-8) Gabeai, ia be Sanhedrin ena siahu taudia dekenai idia hakaua lao bona hahelaga tauna badana ese ia nanadaia. Ena be Iesu ia diba unai hahelaga tauna be ia hamasea dalana ia tahua noho, to mai gari lasi ida ia gwau ia be Keriso bona Dirava ena Natuna. Ma ia gwau idia ese ia do idia itaia “Siahu Ibounai Dirava ena idiba kahanai ia helai, guba ena ori lalonai do ia diho mai.” (Mar. 14:​53, 57-⁠65) Daudau lasi murinai, Iesu be Pilato ena vairanai idia abia lao; Pilato be mai ena maoro Iesu ia ruhaia totona. To Pilato ese samania herevadia ia gwauraia neganai, Iesu be hereva ta ia gwauraia lasi. (Mar. 15:​1-5) Iesu be gari lasi karana ia hahedinaraia unai, ani?

11. Gari lasi bona lalokau karana be edena bamona idia gaukara hebou?

11 Iesu be Pilato dekenai ia gwau: “Hereva momokani gwauraia hedinarai totona lau vara, bona lau mai inai tanobada dekenai.” (Ioa. 18:37) Iehova ese Iesu ia abia hidi sivarai namona ia harorolaia totona, bona Iesu be ena guba Tamana ia lalokau henia dainai mai moale ida unai gaukara ia karaia. (Luka 4:​18, 19) Danu, Iesu be taunimanima ia lalokau henidia. Ia diba edia mauri be mai ena hekwarahi. Unai hegeregerena, ita ese Iehova bona eda dekena taudia ita lalokau henia dainai, mai gari lasi ida haroro gaukara ita karaia be namo.​​—⁠Mat. 22:​36-​40.

Lauma Helaga ese Ita Ia Durua mai Gari Lasi ida Ita Haroro Totona

12. Dahaka dainai aposetolo taudia idia moale?

12 Ena be Iesu ia mase, to aposetolo taudia idia moale badina idia itaia Iehova ese hahediba taudia edia namba ia habadaia noho. Mani oi laloa: Dina tamona lalonai, Ierusalema ai, Pentekoste ariana karaia totona idia lao Iuda taudia 3,000 bona Iuda tomadihona idia badinaia taudia haida be bapatiso idia abia! Reana Ierusalema ai idia noho taudia ibounai be unai idia herevalaia momo! Baibel ia gwau: “Ibounai idia gari, badina hoa kara bona toa kara momo aposetolo taudia ese idia karaia.”​​—⁠Kara 2:​41, 43.

13. Dahaka dainai tadikaka be idia gari lasi totona idia guriguri, bona dahaka ia vara?

13 Tomadiho gunalaia taudia be idia badu dikadika dainai, Petero bona Ioane idia abia bona dibura ruma ai idia atoa, bona idia oda henia Iesu ena sivarai idia harorolaia lasi totona. To Petero bona Ioane be dibura rumana idia rakatania neganai, edia tadikaka dekenai idia lao, bona idia ibounai be ia vara dagedage karana dainai idia guriguri, idia gwau: “Lohiabada e, . . . oiemu hesiai taudia dekenai goada oi henia, vadaeni ai ese oiemu hereva do ai gwauraia, gari lasi.” Dahaka ia vara? Baibel ia gwau: “Lauma Helaga ese ibounai ia hahonua, bona Dirava ena hereva idia gwauraia, mai goada danu.”​​—⁠Kara 4:​24-​31.

14. Edena dala ai lauma helaga ese haroro gaukara lalonai ita ia durua?

14 Ita itaia, Iehova ena lauma helaga ese aposetolo taudia ia hagoadaia dainai, idia be mai gari lasi ida Dirava ena hereva idia harorolaia. Iehova ese ita dekenai goada ia henia dainai, ita be mai gari lasi ida ma haida dekenai hereva momokani ita harorolaia noho. Bema Iehova ena lauma helaga totona ita noinoi, vadaeni ita dekenai do ia henia. Iehova ena heduru dainai, ita danu be mai gari lasi ida hahetoho idauidau ita hanaia diba.​​—⁠Salamo 138:3 duahia.

Hari Keristani Taudia be mai Gari Lasi ida Idia Haroro

15. Hari edena dala ai hereva momokani ese taunimanima ia hapararaia?

15 Idaunegai bamona, hari inai negai hereva momokani ese taunimanima ia hapararaia noho. Haida be idia kamonai, to ma haida be eda tomadiho karana idia lalopararalaia lasi dainai ita idia matauraia lasi. Iesu ena peroveta herevana hegeregerena, haida be ita idia gwauraia dika, kirikirilaia, bona inai henia. (Mat. 10:22) Nega haida, taunimanima ese nius halasia oreadia amo koikoi herevadia idia halasia, iseda ladana idia hadikaia totona. (Sal. 109:​1-3) To, tanobada hegegemadai Iehova ena taunimanima be mai gari lasi ida sivarai namona idia harorolaia noho.

16. Edena ekspiriens ese ia hahedinaraia, iseda gari lasi karana ese taunimanima edia lalohadai ia haidaua diba sivarai namona idia abia dae totona?

16 Iseda gari lasi karana ese taunimanima edia lalohadai ia haidaua diba bena Basileia sivaraina idia abia dae. Kyrgyzstan ai ia noho taihu ta ia gwau: “Haroro gaukara lau karaia lalonai, ruma tauna ta ese lau ia hamaoroa: ‘Lau be Keristani dubudia lalonai idia tomadiho henia Diravana lau abia dae lasi. Bema egu ruma dekenai oi mai lou, egu sisia ese oi do ia koria!’ Iena murinai be sisia badana ta (bulldog) mai ena seini ia gini noho. To Basileia Sivaraina Namba 37 ladana, “Tomadiho Koikoi be Kahirakahira Do Ia Ore!” hariharilaia gaukarana ai karaia lalonai, lau be unai ruma dekenai lau giroa lou. Egu lalohadai be unai tau ena ruma ai ia noho tauna ma ta do lau davaria, to lasi, guna lau ia lulua tauna ese iduara ia kehoa. Maoromaoro Iehova lau guriguri henia murinai lau gwau: ‘Namo, dina toi gunanai oi gwauraia herevana bona oiemu sisia lau laloatao. To lau ura oi dekenai inai pepapepa lau henia, badina lau danu be oi bamona, Dirava momokani tamona lau abia dae, to dubu idauidau ese Dirava idia gwauraia dalana lau abia dae lasi. Kahirakahira Dirava ese tomadiho koikoi do ia panisia. Inai pepapepa oi duahia neganai, gau ma haida do oi diba.’ Lau hoa badina unai tauna ese Basileia Sivaraina Namba 37 ia abia. Bena ruma ma ta dekenai lau raka lao. Miniti haida murinai, unai tau be egu murina amo ia heau mai bona ena imana dekenai be Basileia Sivaraina Namba 37 ia dogoatao. Ia gwau: ‘Pepa lau duahia vadaeni. To dahaka do lau karaia, unai amo Dirava ese lau do ia panisia lasi?’ ” Unai tau ese stadi ia abia dae, bona Keristani heboudia dekenai ia lao matamaia.

17. Edena dala ai gari lasi taihu ta ese ena stadi hahinena ia hagoadaia ia gari lasi totona?

17 Iseda gari lasi karana ese ma haida ia durua idia gari lasi totona. Russia dekenai, taihu ta be basi ai ia guia bona hahine ta dekenai magasin ta ia herevalaia. Tau ma ta be ena sea amo ia toreisi, unai taihu ena imana amo magasin ia abia bona foloa dekenai ia negea bona ia moia. Mai boiboi bada danu taihu ia gwau henia, bona ia ura taihu ena adres ia abia bona taihu ia hamaoroa hanua dekenai do ia haroro lasi totona. Unai taihu be Iehova ena heduru ia noia, bona Iesu ena hereva ia laloatao: “Tauanina . . . do idia alaia diba lasi taudia dekenai do umui gari lasi.” (Mat. 10:28) Taihu be mai manau ida unai tau dekenai ia gwau: “Egu adres do lau henia lasi, bona hanua dekenai do lau haroro noho.” Bena basi amo ia diho. Taihu ia diba lasi gauna be inai, ia stadi henia hahinena ta be unai basi lalonai ia noho danu. Unai stadi hahinena be taunimanima ia gari henia dainai, kongrigeisen heboudia dekenai ia lao lasi. To iseda taihu ena gari lasi karana ia itaia neganai, unai ese ia hagoadaia hebou dekenai ia lao totona.

18. Iesu ia karaia bamona, dahaka ese oi ia durua mai gari lasi ida oi haroro totona?

18 Inai tanobada dikana lalonai, namona be Iesu ia karaia bamona mai gari lasi ida ita haroro. Dahaka ese oi do ia durua unai bamona oi karaia totona? Vaira nega ai do idia vara gaudia oi laloa. Dirava bona taunimanima lalokau henia karana oi hagoadaia noho. Iehova dekenai oi guriguri. Hanaihanai oi laloatao, Iesu be oi ida ia noho. (Mat. 28:20) Lauma helaga ese oi do ia hagoadaia. Iehova ese oi do ia hanamoa bona durua. Unai dainai, namona be ita gari lasi bona ita gwau: “Lohiabada be lauegu durua Tauna, lau be lau gari diba lasi. Taunimanima edena bamona lau do idia hadikaia?”​​—⁠Heb. 13:⁠6.

Edena Bamona Do Oi Haere?

• Dahaka dainai Dirava ena hesiai taudia idia gari lasi be namo?

• Ita gari lasi totona, dahaka ita dibaia . . .

Baibel negadiai idia noho abidadama taudia amo?

Iesu Keriso amo?

Aposetolo edia negai idia noho taudia amo?

hari inai negai idia noho Keristani taudia amo?

[Picture on page 21]

Iesu be mai gari lasi ida tomadiho gunalaia taudia edia kerere ia hahedinaraia

[Picture on page 23]

Iehova ese ita ia durua mai gari lasi ida ita haroro totona

    Hiri Motu Pablikeisen (1987-2025)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia