“Lauma Helaga Ena Tuari Kaia” Gaukaralaia Namonamo

“Lauma Helaga ena tuari kaia danu do umui dogoatao. Ia be Dirava ena hereva.”​​—⁠EFE. 6:​17.

1, 2. Basileia harorolaia taudia ma haida ita abia totona dahaka ita karaia be namo?

IESU ia itaia hutuma be Dirava ena hereva dekenai idia dabu dainai, iena hahediba taudia ia hamaoroa: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” Iesu be ia hereva sibona lasi, to “iena diba tahua taudia 12 ia boiridia,” bona ia siaia idia haroro totona. (Mat. 9:​35-38; 10:​1, 5) Gabeai, Iesu be “tatau 70 ia abia hidi, rua rua dekena amo ia siaia” unai gaukara idia karaia totona.​​—⁠Luka 10:​1, 2.

² Hari danu, Basileia harorolaia taudia momo ese unai gaukara idia karaia be namo. Tanobada hegegemadai, lagani 2009 ena Memorial dekenai idia mai taudia edia namba be 18,168,323. Unai namba ese Iehova ena Witnes taudia edia namba be 10 milioni mai kahana amo ia hanaia. Uma ena anina idia auka bona mage dainai, nega ia ginidae vadaeni utua totona. (Ioa. 4:​34, 35) Unai dainai, namona be gaukara taudia ma haida totona ita guriguri. To edena dala ai iseda noinoi hegeregerena ita kara diba? Unai bamona ita karaia diba bema Basileia harorolaia bona hahediba taudia halaoa gaukara karaia taudia namodia ai ita lao.​​—⁠Mat. 28:​19, 20; Mar. 13:⁠10.

3. Edena dala ai lauma helaga ese ita ia durua haroro taudia namodia ai ita lao totona?

³ Stadi ginigunana ai, lauma helaga ese ita ia hakaua neganai, unai ese ita ia durua ‘Dirava ena hereva ita gwauraia mai goada danu’ dalana ita herevalaia. (Kara 4:​31) Danu lauma helaga ese ita ia durua haroro taudia namodia ai ita lao totona. Iseda haroro gaukara ita hanamoa dalana ta be, Iehova Dirava ese ia henia tulu namo hereana​​—⁠Iena Hereva, Baibel​​—⁠ita gaukaralaia namonamo. Unai be lauma helaga ese ia havaraia. (2 Tim. 3:​16) Baibel ena hereva ibounai be Dirava amo. Unai dainai, haroro ai Baibel ita gaukaralaia namonamo neganai, lauma helaga ese ita ia hakaua unai. Unai ita do karaia lasi neganai, Baibel ena siahu mani ita laloa.

‘Dirava Ena Hereva be mai Ena Siahu’

4. Baibel ai ia noho sivarai ese edena dala ai ta ena mauri ia haidaua diba?

⁴ Dirava ena hereva be mai ena siahu! (Heb. 4:​12) Baibel ena hereva be tuari kaia bamona, ena matana ese taunimanima idia karaia kaia edia matana ia hereaia, badina laulau dalanai ia be ta ena lalona dekenai ia vareai. Baibel ena hereva momokani be ta ena lalona dekenai ia vareai bona ena lalohadai ia tahua diba, ena laloa gaudia ibounai ia hahedinaraia diba. Unai hereva momokani be mai ena siahu ta ena kara ia haidaua totona. (Kolose 3:​10 duahia.) Oibe, Dirava ena Hereva ese taunimanima edia mauri ia haidaua!

5. Edena dala ai Baibel ese ita ia hakaua, bona dahaka ia vara diba?

⁵ Danu, Baibel sibona lalonai be aonega hereva namodia idia noho. Unai hereva namodia ese ita idia durua diba inai tanobada dikana lalonai ita noho namonamo totona. Baibel ese hari iseda raka daladia sibona ia hadiaria lasi, to nega vaira ena dala danu ia hadiaria noho. (Sal. 119:105) Hekwakwanai ita hamaoromaoroa o turadia, moale karadia, moni gaukara, dabua, bona unai bamona gaudia dekenai abia hidi ita karaia neganai, Dirava ena hereva ese ita ia durua diba. (Sal. 37:25; Aon. 13:20; Ioa. 15:14; 1 Tim. 2:⁠9) Baibel ai idia noho hakaua herevadia ita badinaia neganai, haida ita kara namo henia diba. (Mat. 7:​12; File. 2:​3, 4) Baibel ese iseda raka dalana ia hadiaria dainai, ita karaia abia hidi ese do ia havaraia gaudia ita lalohadailaia. (1 Tim. 6:⁠9) Danu Baibel be Dirava ena ura nega vaira totona ia gwauraia, unai amo iseda mauri dalana be Dirava ena ura hegeregerena ita noholaia diba. (Mat. 6:​33; 1 Ioa. 2:​17, 18) Bema ta be ena mauri lalonai Baibel ena hakaua herevadia ia badinaia, iena mauri do ia moalelaia!

6. Edena dala ai Baibel be iseda tulu badana, Satani bona ena tanobada ita tuari henia totona?

⁶ Baibel be iseda tulu badana Satani bona ena tanobada ita tuari henia totona. Paulo ia gwau Baibel be “Lauma Helaga ena tuari kaia.” (Efeso 6:​12, 17 duahia.) Ita gaukaralaia namonamo neganai, taunimanima be Satani ena imana amo ita hamauridia diba. Unai tuari kaia ese taunimanima ia hamasea lasi, to ia hamauria noho. Unai dainai namona be ita gaukara goada unai tuari kaia ita gaukaralaia namonamo totona, ani?

Hereva Momokani Hadibaia Maoromaoro

7. Dahaka dainai “Lauma Helaga ena tuari kaia” gaukaralaia namonamo dalana ita dibaia be namo?

⁷ Tuari tauna ese ena tuari kaia be tuari lalonai ia gaukaralaia namonamo totona, namona be ia treinini bona gaukaralaia namonamo dalana ia dibaia. Unai hegeregerena “Lauma Helaga ena tuari kaia” be iseda lauma tuari lalonai ita gaukaralaia namonamo be namo. Paulo ia gwau: “Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.”​​—⁠2 Tim. 2:​15.

8, 9. Dahaka ese ita do ia durua Baibel ena hereva ita lalopararalaia totona? Haheitalai ta gwauraia.

⁸ Dahaka ese ita do ia durua, haroro ai ‘hereva momokani ita hadibaia maoromaoro’ totona? Ma haida dekenai Baibel ena hereva ita do gwauraia lasi neganai, namona be ita sibona ese ita lalopararalaia namonamo guna. Unai dainai siri ena badina siridia o sivarai ita itaia be namo.

⁹ Baibel ena siri ita lalopararalaia namonamo totona, ena badina siridia ita itaia be namo. Paulo ena hereva Galatia 5:​13 ai ese unai ia hahedinaraia. Ia gwau: “Varavara taudia e, ura kwalimu taudia do umui lao totona Dirava ese umui ia boiria. To namo lasi inai bamona umui laloa, ‘Lau be ura kwalimu tauna, lauegu tauanina ena ura gaudia sibona do lau karaia.’ Lasi, to lalokau dekenai umui ta ta dekenai durua do umui henia.” Paulo be edena ura kwalimu ia herevalaia? Ia be kara dika, mase, bona hahediba hereva koikoidia edia igui amo ita ia ruhaia karana ia herevalaia, o gau ma ta ia herevalaia, a? Badina siridia ese idia hahedinaraia Paulo ia herevalaia ura kwalimu be “Taravatu ese ia gwauraia dika amo ita ia ruhaia.” (Gal. 3:​13, 19-​24, NW; 4:​1-5) Ia be Keristani taudia ese idia abia ura kwalimu ia herevalaia. Unai ura kwalimu idia abia dae taudia be lalokau dainai ta ta idia durua. Ma haida idia hereva dika henia lasi bona idia heai lasi.​​—⁠Gal. 5:​15.

10. Baibel ena hereva ita lalopararalaia namonamo totona, dahaka ita laloa be namo, bona edena bamona unai ita karaia diba?

¹⁰ Siri ena anina ita lalopararalaia namonamo totona, namona be siri ena sivarai ma haida, hegeregere daika ese Baibel ena buka ia torea, bona edena negai bona edena bamona negana ai idia torea, ita laloa. Danu unai buka ia torea ena badina ita diba, bona bema hegeregere, taunimanima edia noho dalana, kara, bona tomadiho karadia ita tahua.a

11. Siri ita herevalaia neganai, dahaka dainai ita naria namonamo?

¹¹ ‘Hereva momokani ita hadibaia maoromaoro’ ena anina be, Baibel ena hereva momokani ita herevalaia maoromaoro sibona lasi. To danu namona be ita naria namonamo, namo lasi Baibel ita gaukaralaia ma haida ita hahisia totona. Baibel ita gaukaralaia diba hereva momokani ita hahedinaraia totona, Iesu be Satani ese ia tohoa neganai ia karaia bamona, Baibel be iseda kamonai taudia botaia auna bamona ita gaukaralaia lasi. (Deu. 6:​16; 8:3; 10:20; Mat. 4:​4, 7, 10) Petero ena hereva ita laloa be namo: “Emui kudouna dekenai Keriso do umui abia dae, do umui matauraia, bona ia tamona emui Lohiabada do umui halaoa. Bema haida ese emui abidadama bona lalona namo totona umui idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.”​​—⁠1 Pet. 3:​15.

12, 13. Dahaka lalohadai aukadia be Dirava ena Hereva ese ia haidaua diba? Sivarai ta gwauraia.

¹² Bema Baibel ita gaukaralaia namonamo, dahaka ia hagugurua diba? (2 Korinto 10:​4, 5 duahia.) Baibel ena hereva momokani amo taunimanima ita durua diba idia badinaia auka gaudia hegeregere, Baibel ena hahediba hereva koikoidia, kara dikadia, bona taunimanima edia aonega idia dadaraia totona. Baibel ita gaukaralaia diba “Dirava ena diari” idia koua gaudia ita dadaraia totona. Baibel ena hahediba herevadia ita gaukaralaia diba ma haida ita durua edia lalohadai idia haidaua bona hereva momokani do idia abia dae totona.

¹³ India ai ia noho mauri lagani 93 hahine ta ena sivarai mani ita laloa. Ia maragi neganai, ia idia hadibaia ta ia mase neganai gau ta be ena tauanina ia rakatania bona tauanina idauna lalonai ia vara lou. Unai hahine be ena natuna mero​—⁠tano ma ta ai ia noho​—⁠ida revareva amo Baibel idia stadilaia neganai, unai hahine be Iehova bona ena gwauhamata namodia ia dibaia bona ia abia dae. To ta ia mase neganai gau ta be ena tauanina ia rakatania bona tauanina idauna lalonai ia vara lou lalohadaina be unai hahine ese ia abia dae momokani dainai, iena natuna ese mase taudia dekenai ia vara gauna ia herevalaia neganai ia badu. Ia gwau: “Oi gwauraia Baibel hereva momokanina lau lalopararalaia diba lasi. Tomadiho ibounai idia gwau iseda lalona ai mase diba lasi laumana ta ia noho. Hanaihanai lau abia dae tauanina be ia mase bona ita itaia diba lasi kahana ta be ia mauri bona tauanina idauidau dekenai ia hanaia nega 8,400,000 bamona. Edena dala ai unai hereva be momokani lasi? Tomadiho momo be kerere, a?” “Lauma helaga ena tuari kaia” ese unai lalohadai aukana ia haidaua diba, a? Unai hahine bona ena natuna be Baibel amo unai lalohadai idia herevalaia bena wiki haida murinai, hahine ia gwau: “Mase dekenai dahaka ia vara be hari lau lalopararalaia. Mase taudia do idia toreisi lou neganai, ita be eda lalokau mase taudia do ita hedavari henia, unai lau dibaia dainai lau moale bada. Lau ura Dirava ena Basileia do ia mai haraga.”

Lalona Veria Dalanai Gaukaralaia

14. Iseda kamonai taudia edia lalona ita veria ena anina be dahaka?

¹⁴ Haroro gaukara ai Baibel ita gaukaralaia namonamo karana be Baibel siri ita duahia sibona lasi. Paulo be “lalona veria” dalanai ia hereva, bona ita danu unai bamona ita karaia be namo. (Kara 19:​8, 9; 28:23 duahia.) “Lalona veria” anina be ta ena lalona ita “haidaua” iseda lalohadai ia abia dae totona. Ta be ia diba momokani dainai “unai gauna do ia abia dae momokani.” Bema ta ita durua Baibel ena hereva ia abia dae totona, ita be iena lalona ita veria ena lalohadai ia haidaua bona Baibel ena hereva ia abia dae. Unai bamona ita karaia totona, namona be iseda kamonai taudia dekenai ita hahedinaraia ita gwauraia herevana be momokani. Unai bamona ita karaia daladia haida do ita herevalaia.

15. Edena dala ai Baibel oi herevalaia diba unai amo taunimanima ese do idia matauraia?

¹⁵ Dirava ena Hereva ita hahedinaraia dalana ese ma haida edia hemataurai karana ia habadaia. Baibel siri ta oi herevalaia neganai, oi hahedinaraia Dirava ena lalohadai gau ta dekenai dibaia karana be mai anina bada. Henanadai oi henia bona ruma tauna ena lalohadai oi abia murinai, reana oi gwau, ‘Mani unai gauna dekenai Dirava ena lalohadai ita tahua.’ Eiava reana oi henanadai, ‘Dirava ena lalohadai be dahaka?’ Baibel ena siri be unai bamona ita herevalaia neganai, ita hahedinaraia Baibel be Dirava amo bona kamonai tauna do ia durua unai ia laloa bada totona. Dirava ia noho ia abia dae to Baibel ena hahediba herevadia ia diba namonamo lasi tauna ita haroro henia neganai, unai bamona ita karaia be namo.​​—⁠Sal. 19:​7-​10.

16. Dahaka ese oi do ia durua siri oi herevalaia namonamo totona?

¹⁶ Dala namona ai Baibel ena hereva ena anina ita gwauraia hedinarai. Paulo ia haroro negadiai, ia hadibaia gaudia “ia hahedinaraia goevagoeva bona unai toretore amo ia hamomokania.” (Kara 17:​3, NW ) Nega momo Baibel ena siri ena point be momo, bona oi herevalaia gauna dekenai siri ena hereva badadia haida oi gwauraia lou. Unai oi karaia totona, mai anina bada herevadia o henanadai haida oi henia ruma tauna ia laloparara totona. Bena, unai siri ena anina oi gwauraia hedinarai. Unai murinai, kamonai tauna oi durua ena mauri lalonai do ia badinaia dalana ia laloa totona.

17. Edena dala ai Baibel herevalaia karana amo ta ena lalona oi veria diba?

¹⁷ Lalona ia veria dalanai Baibel herevalaia. Paulo be lalona veria dalanai ‘ma haida ida buka helaga ia herevalaia.’ (Kara 17:​2, 4) Paulo bamona, iseda kamonai taudia edia kudouna ita hamarerea be namo. Henanadai idauidau oi gaukaralaia kamonai tauna ia laloa gaudia do ia herevalaia totona, unai amo oi hahedinaraia oi be ena namo oi laloa. (Aon. 20:⁠5) Hereva aukadia ita gwauraia lasi. Hereva ena badina oi hahedinaraia namonamo. Namona be hamomokania gaudia oi herevalaia. Namona be emu hereva ibounai be Baibel amo. Siri tamona sibona oi duahia bona herevalaia namonamo be namo, to namo lasi siri rua o toi oi duahia haragaharaga point oi hahedinaraia totona. Hamomokania gaudia haida oi gaukaralaia neganai, oi do ia durua lalona veria dalanai oi hereva totona. (Aon. 16:23) Bema ita ura iseda kamonai taudia dekenai hereva ma haida ita gwauraia, namona be tahua karana ita karaia. Namona be ataiai ita gwauraia mauri lagani 93 hahinena ia diba dahaka dainai taunimanima momo ese mase diba lasi laumana ia noho lalohadaina idia abia dae. Unai hahediba herevana ia matamaia gabuna bona edena dala ai tomadiho momo ese idia abia dae ia lalopararalaia neganai, Baibel ena hadibaia herevadia ia abia dae totona.b

Dirava Ena Hereva Oi Gaukaralaia Namonamo Noho

18, 19. Dahaka dainai “Lauma Helaga ena tuari kaia” ita gaukaralaia noho be namo?

¹⁸ Baibel ia gwau: “Inai tanobada ena toana be ia idau ia lao noho.” Kara dika taudia be edia kara dika do idia habadaia momokani. (1 Kor. 7:​31, NW; 2 Tim. 3:​13, NW ) Unai dainai mai anina bada gauna be ita dadaraia totona, gau badana be Dirava ena hereva, lauma helaga ena tuari kaia unai, ita gaukaralaia noho.

¹⁹ Ita moale badina ita dekenai Baibel ia noho, bona ena hereva mai siahudia ita gaukaralaia diba hahediba hereva koikoidia ita hahedinaraia bona kudou-maoro taudia ita durua totona! Gau ta ese unai sivarai do ia koua diba lasi. Unai dainai, Dirava ese ia henia Basileia harorolaia gaukarana ita karaia neganai, “lauma helaga ena tuari kaia” o Baibel ita gaukaralaia namonamo be mai anina bada.

[Footnotes]

Dahaka Oi Dibaia?

• Dirava ena hereva ena siahu be edena bamona?

• Edena dala ai ‘hereva momokani ita hadibaia maoromaoro’ diba?

• Lalohadai aukadia dekenai Baibel ena hereva ese dahaka ia karaia diba?

• Edena dala ai haroro ai lalona veria dalanai oi hereva diba?

[Box/Picture on page 12]

Lalona Veria Dalanai Dirava Ena Hereva Gaukaralaia Dalana

▪ Baibel matauraia karana hahedinaraia

▪ Baibel oi gwauraia hedinarai

▪ Lalona veria dalanai oi hereva, ta ena kudouna hamarerea totona

[Picture on page 11]

Namona be “Lauma Helaga ena tuari kaia” gaukaralaia namonamo dalana oi dibaia