Lalona Veria Dalanai Taunimanima Hadibaia
1 Aposetolo Paulo bamona, haroro gaukara idia karaia namonamo taudia idia diba ‘hereva momokani idia hadibaia maoromaoro’ totona, Baibel ena hereva idia gwauraia sibona be hegeregere lasi. (2 Tim. 2:15) Unai dainai, Baibel ita gaukaralaia neganai, edena dala ai “lalona veria dalanai” taunimanima ita hadibaia diba?—Kara 28:23, NW.
2 Baibel Duahia Hedinarai: Dala ginigunana be, Baibel ita duahia hedinarai, unai amo kamonai tauna do ia itaia Baibel be Dirava ena aonega amo ia honu. Dirava ena Hereva ita laloa bada karana ese kamonai tauna do ia doria ita duahia sirina ia kamonai namonamo totona. (Heb. 4:12) Reana ita gwau diba: “Lau davaria Dirava ena lalohadai ita diba guna be namo. Mani Baibel ena hereva ita itaia.” Nega iboudiai, ruma tauna dekenai Baibel ita duahia hedinarai be namo.
3 Dala iharuana be, ita gaukaralaia siri ena anina ita herevalaia. Momo be nega ginigunana ai ita duahia sirina ena anina idia lalopararalaia lasi. Nega momo unai siri ena anina bona iseda hereva ena point badana ita hahedinaraia be namo. (Luka 24:26, 27) Siri lalonai point badana idia hahedinaraia herevadia sibona ita gaukaralaia. Henanadai ta ita gaukaralaia, unai amo do ita itaia ruma tauna be point ia lalopararalaia eiava lasi.—Aon. 20:5; Kara 8:30.
4 Baibel Herevalaia Namonamo: Dala ihatoina be, ita hekwarahi ruma tauna ena kudouna ita hamarerea totona. Ruma tauna ita durua ia itaia ena mauri lalonai ita duahia sirina be edena dala ai ia badinaia diba. Baibel herevalaia namonamo karana ese ta ena lalona ia veria diba ena lalohadai ia haidaua totona. (Kara 17:2-4; 19:8) Haheitalai be inai: Salamo 83:18 ita duahia bena ita gwau, “Ta ena ladana ita diba neganai, unai ese dala do ia kehoa ena turana ai ita lao totona.” Bena reana ita nanadaia: “Bema Dirava ena ladana oi diba, oi laloa unai ese oi do ia durua emu guriguri lalona ena ladana oi gaukaralaia totona, a?” Unai bamona haheitalai amo siri ena anina oi herevalaia neganai, unai ese ruma tauna do ia durua ena mauri lalonai Baibel ena hereva ia badinaia totona. Baibel ena hereva be lalona veria dalanai kudou-maoro taudia ita hadibaia neganai, unai ese idia do ia veria mauri Dirava momokanina idia tomadiho henia totona.—Ier. 10:10.
[Study Questions]
1. Baibel ita gaukaralaia neganai, dahaka ita karaia danu be namo?
2. Edena dala ai kamonai taudia ita durua Baibel idia laloa bada totona?
3. Siri ta ita duahia murinai, dahaka ita karaia diba unai amo ruma tauna be ita duahia sirina ena anina ia lalopararalaia totona?
4. Lalona veria dalanai taunimanima ita hadibaia dalana ginigabena be dahaka?