Satani Ena Koikoi Herevadia Dadaraia
‘TA ESE umui ia koia lasi be namo. Emui Dirava ese umui do ia durua lasi. Lau danu maino do umui karaia bena do umui mase lasi!’ Rabesake, Asuria ena King Senakeriba ena ofesa ta, ese unai hereva be Ierusalema ai idia noho taudia dekenai ia gwauraia. King ena tuari oreana be Iuda tanona ai idia vareai. Rabesake ia ura ena hereva amo Ierusalema taudia ia hagaridia, bena Asuria taudia ida maino do idia karaia.—2 Kin. 18:28-35.
Asuria taudia be dagedage taudia. Idia ese idia hadiburaia taudia dekenai idia karaia kara dika rohorohodia edia sivarai idia gwauraia hedinarai, edia inai taudia idia hagaria totona. Histori torea tauna Philip Taylor ia gwau, idia ese “taunimanima hagaria herevadia bona hereva koikoidia idia gwauraia, unai amo idia halusia taudia do idia biagua noho, bona danu, idia ese ma haida dekenai idia karaia kara dika rohorohodia edia sivarai idia gwauraia hedinarai, unai amo edia inai taudia idia hagaria.” Hereva koikoidia be tuari kohudia bamona. Taylor ia gwau hereva koikoidia ese “ta ena lalona ia hadikaia o hakavakavaia diba.”
Keristani taudia momokanidia edia ‘tuari be taunimanima danu lasi. Idia edia tuari be lauma dikadia danu,’ unai lauma dikadia be Dirava idia gwau-edeede henia anerudia. (Efe. 6:12) Edia gunalaia tauna be Satani Diabolo. Ia danu be hereva koikoidia amo taunimanima ia hagaria.
Satani ia gwau, ia be hegeregere ita ta ta eda Dirava badinaia karana ia hadikaia diba. Iobu ena negai, Satani be Iehova Dirava dekenai ia gwau: “Tau ta ese iena gau ibounai do ia negea, iena mauri do ia dogoatao totona.” Satani ena hereva ena anina be inai: Hahetoho momo ia davaria tauna be daudau lasi murinai o gabeai Dirava badinaia karana do ia rakatania. (Iobu 2:4) Satani ena hereva be maoro, a? Oi laloa ita ibounai be hisihisi momo dainai Dirava badinaia karana do ita rakatania—eiava ita mauri totona Dirava ena hakaua herevadia do ita dadaraia, a? Satani ia ura unai bamona lalohadai ita abia dae. Unai dainai ia ese hereva koikoidia be uhe bamona iseda lalona dekenai ia hadoa. Satani ese ia gaukaralaia daladia haida bona ita dadaraia diba daladia mani ita laloa.
Idia be “Kahu Dekenai Ia Karaia Taudia”
Satani ese Iobu ena turana ta ladana Elipasa ia gaukaralaia dainai, Iobu dekenai ia gwau taunimanima be manoka gaudia bamona. Ia ese Iobu ia hamaoroa, taunimanima be “raro rumadia dekenai idia noho taudia, be Dirava ese do ia abidadama henidia? Edena bamona kahu dekenai ia karaia taudia, kaubebe bamona idia manoka taudia, be Dirava ese do ia abidadama henia? Taunimanima ta be dabai ia mauri noho diba, to adorahi neganai do ia mase momokani, bona tau ta ese unai mase do ia laloa lasi.”—Iobu 4:19, 20.
Baibel ese ita be “hodu”—raro amo idia karaia gaudia—ida ia hahegeregerea. (2 Kor. 4:7) Ita be hodu manokana bamona, badina ita be Adamu bona Heva edia natudia bona ita goevadae lasi. (Roma 5:12) Unai dainai, Satani ena hahetoho lalodiai ita moru diba. To ita be Keristani taudia dainai, Iehova be ita ia durua diba. Ena be ita be manoka gaudia sibona, to Dirava ena matanai ita be dava bada gaudia bamona. (Isa. 43:4) Ma danu, Iehova ese idia noinoi taudia dekenai lauma helaga ia henia. (Luka 11:13) Iena lauma ese ita dekenai “siahu badana” ia henia diba, unai amo ita be Satani ena hahetoho ibounai ita haheaukalaia diba. (2 Kor. 4:7; Fili. 4:13) Bema ‘eda abidadama dekenai ita gini goada,’ bona Diabolo ita koua, Dirava ese ita do ia haginia goada, bona eda abidadama do ia hagoadaia. (1 Pet. 5:8-10) Unai dainai, Satani dekenai ita gari lasi be namo.
Tau ta be ‘Dika Ia Inua Noho’
Elipasa ia henanadai: “Taunimanima be edena bamona do idia goevagoeva diba? Hahine ena bogana dekena amo ia vara tauna, be edena bamona ia maoromaoro diba?” Bena ia sibona ese haere ia henia, ia gwau: “Oi kamonai: Dirava ese iena aneru danu ia abidadama henia lasi, bona idia be goevagoeva lasi iena vairana dekenai. Unai bamona dainai, Dirava ena vairanai taunimanima be edena bamona? Idia be kara dika bona kara bodaga taudia. Idia ese dika idia inua noho, ranu bamona!” (Iobu 15:14-16) Elipasa be Iobu ia hamaoroa Iehova ena matanai taunimanima ibounai be kara dika taudia. Diabolo be lalohadai kereredia ia havaraia danu. Ia ura iseda kerere gunadia ita laloa momo, bena ita laloa Dirava be eda dika do ia gwauatao lasi. Danu, ia ura ita laloa Iehova be ita dekenai gaukara momo ia henia, hebogahisi lasi, eda dika ia gwauatao lasi, bona durua lasi.
Momokani, ita ‘ibounai be ita kara dika vadaeni bona Dirava ena hairai ita reaia.’ Goevadae lasi taudia ibounai be hegeregere lasi Iehova ena taravatu maoromaorodia idia badinaia totona. (Roma 3:23, NW; 7:21-23) To, Iehova dekenai ita be mai anina bada. Iehova ia diba “idaunegai gaigaina, bona iena ladana be Diabolo bona Satani” ese goevadae lasi taudia ia tohoa. (Apok. 12:9, 10) Dirava ia diba “ita be kahu sibona,” unai dainai iseda kerere ia laloa hanaihanai lasi.—Sal. 103:8, 9, 14, NW.
Bema kara dika ita rakatania bona mai iseda kudouna ibounai ida ita helalo-kerehai bona Iehova dekenai ita giroa lou, “ia ese [iseda] dika do ia gwauatao momokani.” (Isa. 55:7; Sal. 51:17) Baibel ia gwau ena be iseda kara dika ‘be bada, rara ia kakakaka momokani bamona, to Dirava ese ita do ia huria, vadaeni do ita goeva, sinou ia kurokuro bamona.’ (Isa. 1:18) Unai dainai, namona be eda lalona ita hadaia Iehova ena ura ita karaia noho totona.
Herevana dahaka gaukara namona ita karaia, to Dirava vairanai ita be goevadae lasi. Adamu bona Heva be idia sibona bona ita eda mauri goevadaena bona mauri hanaihanai helarona idia haboioa. (Roma 6:23) To, Iehova be taunimanima ia lalokau henia bada dainai, inai dala ia karaia: Bema ita ese iena Natuna, Iesu Keriso, ena mauri davalaia boubouna ita abidadama henia, Ia ese eda dika do ia gwauatao. (Mat. 20:28; Ioa. 3:16) Momokani, Iehova be “hariharibada” Diravana! (Tito 2:11) Ia ese iseda dika ia gwauatao diba! Unai dainai, namona be Satani ena lalohadai dikadia ita dadaraia.
“Oi ese Iena Tauanina Do Oi Hadikaia”
Satani ia gwau Iobu ese Dirava abidadama henia karana do ia negea bema gorere badana ta ia davaria. Diabolo be Iehova dekenai ia gwau: “Oi ese iena tauanina do oi hadikaia. Bema inai bamona oi karaia neganai, Iobu ese oiemu ladana do ia hadikaia momokani.” (Iobu 2:5) Bema ita gorere o buruka lalonai ita laloa ita be anina lasi, Dirava ena Inai Tauna ia moale badina ia ura unai bamona ita laloa.
Ena be guna Iehova ena hesiai gaukara momo ita karaia to hari be unai bamona lasi, Ia be ita ia dadaraia lasi. Bema ta ese iseda turana ta ia botaia bona haberoa be edena bamona? Eda turana do ita laloa maragi badina gaukara momo ia karaia lasi, guna bamona, a? Lasi! Ia do ita lalokau henia bona laloa bada—badina reana ia be ita hamaoroa karana ta ia karaia lalonai bero ia davaria. Ita diba Iehova be iseda mauri ia lalopararalaia namonamo, ani? Baibel ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia.”—Heb. 6:10.
Baibel ese “vabu ogogamina ta” ia herevalaia, reana ia be lagani momo lalonai Dirava tomadiho henia karana ia durua. Unai vabu ese ena “moni maragimaragi rua” be dubu ena kontribusen maua dekenai ia udaia neganai, Iesu be unai ia itaia neganai ia gwau unai vabu ese ia henia gauna be anina lasi, a? Lasi, to Iesu ese unai vabu ia hanamoa badina ia be ena mauri durua moni ibounai ia gaukaralaia tomadiho momokanina ia durua totona.—Luka 21:1-4.
Bema Dirava ita badinaia noho, ita diba momokani eda hetura karana Ia ida be do ia goada noho, ena be ita goevadae lasi dainai ita buruka o gorere. Unai bamona abidadama taudia be Dirava ese do ia rakatania lasi, herevana hesiai gaukara momo idia karaia lasi.—Sal. 71:9, 17, 18.
“Hamauria Do Umui Abia Dae, Emui Tuari Kwara Gauna Bamona”
Edena dala ai Satani ena koikoi herevadia ita dadaraia diba? Aposetolo Paulo ia gwau: “Lohiabada ena siahu dekena amo do umui siahu, bona Lohiabada ena goada dekena amo do umui goada. Dirava ese ia henia tuari dabua ibounai do umui kwatua, vadaeni do umui goada, Satani ena koikoi karadia do umui koua.” Unai tuari dabua ta be inai: Hahemauri ena tuari kwara gauna. (Efe. 6:10, 11, 17) Satani ena koikoi herevadia dainai, namona be unai kwara gauna ita abia dae bona nega ibounai eda kwarana ai ita atoa. Tuari tauna ena kwarana be ena kwara gauna ese ia gimaia. Iseda “hahemauri helarona”—ita abia dae Iehova ese tanobada matamatana ai ena gwauhamata do ia hagugurua karana—ese iseda lalona do idia gimaia bena Satani ena koikoi herevadia do ita dadaraia. (1 Tes. 5:8, NW ) Hanaihanai sibona eda stadi ita karaia, unai amo unai helaro be ia mauri o goada noho bamona.
Iobu be Satani ena dagedage bona hahetoho ibounai ia haheaukalaia. Iobu be toreisi lou helarona ia abia dae momokani dainai mase dekenai ia gari lasi danu. To, Iehova dekenai ia gwau: “Oi ese lau dekenai do oi boiboi, vadaeni oi dekenai do lau haere, bona lau, oi ese oi karaia tauna dekenai, do oi moale noho.” (Iobu 14:15) Ita diba herevana Iobu be Dirava badinaia karana dainai ia mase, to ia abia dae momokani Dirava be iena hesiai taudia ia lalokau henidia dainai, mase amo idia Ia hatorea isi lou diba.
Namona be ita danu be Dirava momokanina, Iehova, ita abidadama henia. Herevana Satani bona ena orea ese dahaka idia karaia ita dekenai, to Iehova ese unai ia hamaoromaoroa diba. Danu, Paulo ena hagoadaia herevana ita laloatao, ia gwau: “Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.”—1 Kor. 10:13.
[Picture on page 20]
Iehova ese oiemu hesiai gaukara ia laloa bada
[Picture on page 21]
Hahemauri ena tuari kwara gauna ita abia dae bona nega ibounai eda kwarana ai ita atoa