Ena be Gau Haida Idia Idau, to Dirava Ena Lalonamo Abia Noho

EMU mauri lalonai gau haida idia idau, a? Unai gaudia oi abia dae be auka, a? Ita momo dekenai unai bamona ia vara, o gabeai do ia vara. Idaunegai idia noho kamonai taudia haida edia haheitalai namodia ese ita do idia durua kara namodia ita dibaia totona.

Hegeregere, Davida bona iena mauri lalonai idia vara gaudia mani oi laloa. King dagina do ia abia totona Samuela ese ia horoa neganai, Davida be mamoe ia naria mero maragina ta sibona. Ia matamata neganai, sibona ena ura dekenai Pilistia tau badana Goliata ia tuari henia. (1 Sam. 17:​26-​32, 42) Davida be King Saulo ese ia boiria iena ruma ai do ia noho totona, bona iena ami gunalaia tauna ai ia halaoa. Davida be ena mauri lalonai idia vara gaudia edia badina ia diba lasi, bona ia diba lasi gabeai be dahaka do idia vara.

Gabeai, Davida ena hetura karana Saulo ida be ia dika. (1 Sam. 18:​8, 9; 19:​9, 10) Davida be ena mauri ia laloa bada dainai, lagani haida lalonai gabu idauidau dekenai ia hunia loaloa. Danu Israela taudia ia lohiaia neganai, ena mauri lalonai gau haida idia idau, hegeregere ia heudahanai, bona unai kara dika ia hunia totona ala-ala karana ta ia karaia. Iena kara dika dainai ena ruma bese lalonai hekwakwanai idia vara. Unai hekwakwanai ta be, Davida be ena natuna Abesaloma ese ia gwau-edeede henia. (2 Sam. 12:​10-​12; 15:​1-​14) To, Davida be ena heudahanai bona ala-ala karadia amo ia helalo-kerehai murinai, Iehova ese ena dika ia gwauatao bona Ia lalonamo henia.

Reana oi danu be emu mauri lalonai gau haida idia idau. Gorere, moni ena hekwakwanai, o ruma bese ena hekwakwanai​​—⁠eiava ita sibona iseda kara danu​​—⁠ese iseda mauri idia haidaua diba. Edena kara namodia ese ita do idia durua unai bamona hekwakwanai ita haheaukalaia totona?

Manau Karana ese Ita Ia Durua

Manau karana ena anina be ma haida edia hereva ita badinaia. Manau momokani karana ese ita ia durua ita sibona eda kara bona ma haida edia kara ita lalopararalaia totona. Bema ma haida edia kara namodia bona idia karaia diba gaudia dainai idia ita hanamoa, ita hahedinaraia idia ita laloa bada. Unai hegeregerena, manau karana ese ita do ia durua ita dekenai idia vara gaudia ita lalopararalaia, bona edena dala ai unai do ita hanaia.

Saulo ena natuna Ionatana be haheitalai namona ia hahedinaraia. Ia biagua diba lasi gaudia haida be ena mauri lalonai idia vara, bona unai ese iena mauri idia haidaua. Samuela ese Saulo ia hamaoroa Iehova be ia amo king dagina do ia kokia neganai, ia gwau lasi king dagina be Ionatana ese do ia abia. (1 Sam. 15:28; 16:​1, 12, 13) Dirava be Davida ia abia hidi Israela ena king matamatana ai do ia lao totona, to Ionatana lasi. Ita gwau diba Saulo ena gwau-edeede karana dainai, Ionatana ese unai hahenamo namona ia reaia. Herevana Ionatana be kerere ta ia karaia lasi, to ena tamana amo king dagina ia abia lasi. (1 Sam. 20:​30, 31) Ionatana be dahaka ia karaia? Ia be unai hahenamo namona ia abia lasi dainai ia lalohisihisi bona Davida dekenai ia mama, a? Lasi. Herevana Ionatana ena mauri lagani be bada bona gau momo ia diba, to Davida ia durua. (1 Sam. 23:​16-​18) Ionatana be ia manau dainai, ia laloparara Iehova ese hahenamo be Davida dekenai ia henia, bona Ionatana be ‘sibona ia laloa bada lasi.’ (Roma 12:⁠3) Ia laloparara Iehova ia ura dahaka do ia karaia, bona unai ia abia dae.

Momokani, mauri lalonai gau momo idia idau neganai, unai ese hekwakwanai idia havaraia diba. Ionatana ese ia dibaia namonamo taudia rua ia kara henia dalana mani oi laloa. Ta be iena turana Davida, king ai do ia lao tauna. Bona ma ta be iena tamana, Saulo, ia be Iehova ese ia dadaraia to unai negai ia do lohia noho. Reana idia vara gaudia dainai Ionatana ia lalometau, to danu ia ura Iehova ese ia do ia lalonamo henia noho. Eda mauri lalonai gau haida idia idau neganai, reana do ita laloa momo bona ita lalohisihisi. To Iehova ena lalohadai unai gaudia dekenai ita lalopararalaia neganai, mai kamonai ida ia do ita hesiai henia bona unai gaudia do ita haheaukalaia.

Ma Haida ese Idia Karaia Diba Lasi Gaudia Ita Lalopararalaia

Manau tauna ia diba nega haida gau haida be ia sibona ese ia karaia diba lasi. Davida be unai ia diba danu. Ena be Iehova ese Davida ia abia hidi king dagina do ia abia, to ia be lagani haida ia naria bena gabeai king ai ia lao. Iehova ese Davida dekenai king dagina ia henia haraga lasi ena badina, be Baibel ese ia gwauraia lasi. Herevana Davida be nega sisina daudau ia naria, to ia lalohisihisi lasi. Ia diba gau haida be ia sibona ese ia karaia diba lasi, bona ia laloparara Iehova be ena hekwakwanai ia koua lasi ena badina ia diba, bona Ia ese unai do ia hamaoromaoroa. Unai dainai, ena be dala ia kehoa Saulo ia hamasea totona, to unai bamona ia karaia lasi. Bona ena turana Abisai danu ia hamaoroa unai bamona do ia karaia lasi totona.​​—⁠1 Sam. 26:​6-9.

Ita diba gau haida be ita sibona ese ita karaia diba lasi, unai dainai ita abia dae Iesu be kongrigeisen ena Kwarana bona elda oreana ia gaukaralaia ita idia hakaua totona, a? Iehova ena lalonamo ita abia totona, Ia ese Iesu amo kongrigeisen ia haheaua dalana do ita matauraia, a? Iehova ena dala do ita badinaia, herevana nega haida unai ita karaia be auka, a?​​—⁠Aon. 11:⁠2.

Manau Karana ese Ita Ia Durua Ita Laloa Maoromaoro Totona

Manau karana ese ita ia durua hekwakwanai ita haheaukalaia totona. Bona danu ita ia durua do ita badu lasi, bona eda inai taudia edia dika davana do ita henia lasi. Nega haida manau karana ita hahedinaraia be auka. Baibel ia gwau “manau taudia ibounai” be idia boiria “lalomanau idia tahua” totona. (Sep. 2:⁠3, BHğ) Ia manau tauna be ma haida edia heduru herevadia ia abia dae bona ia badinaia dainai, ena hetura karana Dirava ida do ia goada.

Edena dala ai manau karana ese ita do ia durua eda mauri lalonai idia idau gaudia ita laloa totona? Reana oi itaia haida be edia mauri lalonai gau haida idia idau neganai, idia lalohisihisi. To, reana unai amo Iehova ese ita ia hadibaia namonamo diba. Mose ena mauri lalonai idia vara gaudia ese unai idia hahedinaraia.

Mose ena mauri lagani be 40 neganai, kara namodia momo ia diba vadaeni. Ia hahedinaraia ia be Dirava ena taunimanima edia namo ia laloa bada bona sibona ena ura ia dadaraia. (Heb. 11:​24-​26) Mose be Iehova ese ia do abia hidi lasi Israela taudia be Aigupito amo do ia hakaua neganai, ena mauri lalonai gau haida idia idau bona unai ese ia idia durua ia manau totona. Aigupito ia rakatania bona lagani 40 lalonai Midiana tanona ai ladana maragi tauna bamona ia noho bona mamoe naria gaukara ia karaia. To unai ese edena dala ai Mose ia durua? Mose be ena mauri ia haidaua bona ia manau. (Num. 12:⁠3) Ia laloparara Iehova ena ura ia atoa guna be gau badana, bona iena ura be gabeai.

Mose ena manau karana mani ita laloa. Iehova be Mose dekenai ia gwau Ia ese gwau-edeede Israela besena do ia dadaraia bona Mose ena amo bese goadana ta do ia havaraia. (Num. 14:​11-​20) Mose be Israela taudia totona ia hereva. Ia ese ena hereva amo ia hahedinaraia Iehova ena ladana bona ena tadikaka ia lalodia bada, to ia sibona ena namo ia tahua lasi. Ta ese Mose ia karaia maduna​​—⁠Israela taudia do ia gunalaia bona idia totona Iehova do ia hereva henia​​—⁠ia karaia totona, ia manau be gau badana. Miriama bona Arona be Mose idia maumauraia neganai, Baibel ia gwau Mose be “tanobada taudia ibounai edia huanai ia sibona be manau herea.” (Num. 12:​1-3, 9-​15) Toana be Mose ia manau dainai edia maumau herevadia ia haheaukalaia. Bema Mose ia manau lasi dahaka do ia vara?

Nega ma ta ai, Iehova ena lauma helaga be tatau haida edia latanai ia diho dainai, idia peroveta. Mose ena hesiai tauna Iosua ia laloa Israela taudia haida be edia gaukara ena maka idia hanaia, bona peroveta gaukara idia karaia. To, Mose be ia manau bona Iehova ena lalohadai hegeregerena ia laloa dainai, ia laloa lasi ena dagi do ia haboioa o lasi. (Num. 11:​26-​29) Bema Mose be ia manau lasi, oi laloa ia be Iehova ese ia hegaegaelaia dala matamatana do ia abia dae, a?

Manau karana ese Mose ia durua Iehova amo ia abia hahenamo o maduna ia huaia namonamo totona. Mose be Iehova ese ia boiria Sinai Ororona ai ia gini bona Iena bese taudia ia hereva henia totona. Dirava ese aneru ta amo Mose ia hereva henia bona gwauhamata taravatuna havaraia tauna ai ia halaoa. Mose be ia manau dainai Iehova ese ia henia gaukara ia abia dae bona Iehova ese ia lalonamo henia.

Ita be edena bamona? Iseda hetura karana Iehova ida ia goada totona, ita manau be gau badana. Dirava ena taunimanima huanai hahenamo bona maduna idia abia taudia ibounai idia manau be namo. Unai ese ita do ia durua iseda mauri lalonai gau haida idia idau neganai, ita manau bona lalohadai maorona ita abia totona. Iseda kara be mai anina bada. Iseda maduna idia haidaua neganai, unai do ita abia dae, a? Ita dekenai unai be nega namona gau haida ita hanamoa totona, a? Reana unai be nega namona manau karana ita hahedinaraia totona!

Nega momo do ita davaria iseda mauri lalonai gau haida idia idau. Nega haida idia vara ena badina ita lalopararalaia be auka. Ita sibona ese ita karaia diba lasi gaudia bona ita lalohisihisilaia gaudia dainai reana nega haida do ia auka Iehova ena lalohadai hegeregerena ita laloa totona. To, manau karana ese ita do ia durua unai gaudia ita abia dae bona Iehova ena lalonamo ita abia noho totona.

[Blurb on page 4]

Manau momokani kara ese ita ia durua ita sibona eda kara bona ma haida edia kara ita lalopararalaia totona

[Blurb on page 5]

Iseda hetura karana Iehova ida ia goada totona, ita manau be gau badana

[Picture on page 5]

Mose ena mauri lalonai idia idau gaudia ese ia idia durua manau tauna ai ia lao totona