‘Mai Emui Manau ida, Iehova Umui Tahua’

“UMUI tanobada taudia mai emui manau ida, ena hahegani umui badinadia taudia, Iehova umui tahua. Kara maoromaoro umui tahua, lalo-manau umui tahua, bena reana do umui hehuni diba, Iehova ena badu dinana ai.”​—Sefania 2:3.

Peroveta tauna Sefania be unai bamona ia hereva ‘mai edia manau tano taudia’ dekediai, bona ia hagoadadia ‘lalo-manau idia tahua’ bena do idia mauri diba “Iehova ena badu dinana ai.” Ita daradara diba lasi, ita roho mauri totona namona be ita manau. To dahaka dainai?

Dahaka Dainai Manau Ita Tahua be Namo?

Manau be manada karana, ia hekokoroku eiava ia heagi lasi. Ia be ma kara haida bamona, hegeregere sibona laloa bada lasi karana bona manada karana. Unai dainai, manau taudia idia hadibadia diba, bona ena be hisihisi ia havaraia, to idia ura Dirava ena imana dekena amo mata-hakani idia abia.​—Salamo 25:9; Heberu 12:​4-11.

Ita gwau lasi ta be ia sikuli dainai eiava mai ena dagi dainai do ia manau eiava ia manau lasi. To, sikuli bada taudia eiava tanobada gaukara dekenai idia kwalimu taudia be nega momo idia laloa idia sibodia edia dala idia abia hidi diba, tomadiho dalana danu. Unai ese ia koudia diba, ma ta ese ia hadibadia eiava ia sisiba henidia toho edia mauri idia haidaua totona. Ma haida be edia taga dainai idia laloa kerere, idia laloa edia kohu dainai do idia noho namo. Unai dainai, Dirava ena Hereva, Baibel, amo lauma dalanai taga idia tahua lasi.​—Mataio 4:4; 5:3; 1 Timoteo 6:17.

Iesu ena nega lalonai toretore taudia, Farisea taudia, bona hahelaga taudia badadia oi lalodia. Nega ta tuari taudia haida idia siaidia Iesu idia dogoatao totona, to idia giroa neganai idia abia mai lasi, bona Farisea taudia idia gwau: “Be, umui danu ia koia vadaeni? Sedira hanua edia lohia ta o Farisea taudia ta ese ia dekenai idia abidadama vadaeni, a? Lasi momokani. Inai taunimanima be Mose ena taravatu idia diba lasi. Idia be Dirava dekena amo dika davana do idia davaria.” (Ioane 7:​45-49) Idia laloa, diba lasi taudia bona sikuli lasi taudia sibodia be tanobada ena aonega idia abia lasi dainai Iesu ena hereva do idia abia dae.

To, Farisea taudia haida be hereva momokani idia ura henia, bona Iesu bona Keristen taudia durudia totona idia hereva. Idia haida be Nikodemo bona Gamaliel. (Ioane 7:​50-52; Kara 5:​34-40) Iesu ia mase murinai, “dubu naria taudia momo danu Iesu ena dala idia abia dae.” (Kara 6:7) Ita daradara lasi, haheitalai namona ta be aposetolo Paulo. Gamaliel ese ia hadibaia, bona Iuda tomadihona ia habadaia toho bada dainai taunimanima momo ese idia matauraia. To, gabeai ia be manau dekenai Keriso Iesu ena boiboi ia badinaia bona ia murinai ia raka goadagoada tauna ai ia lao.​—Kara 22:3; 26:​4, 5; Galatia 1:​14-24; 1 Timoteo 1:​12-16.

Unai ibounai ese ia hahedinaraia, herevana ta ena noho be edena bamona, eiava ena lalohadai Baibel ena sivarai dekenai be dahaka, to Sefania ena hereva be mai ena anina. Bema ta ia ura Dirava ese ia moalelaia bona iena Hereva ese ia hakaua, manau be gau badana.

Hari Inai Nega Lalonai ‘Manau Tahua’ Taudia

Tanobada hegegemadai taunimanima milion momo be Basileia ena sivarai namona idia abia dae. Iehova ena Witness taudia be pura ta ta iboudiai, taunimanima edia ruma dekenai, Baibel stadi milion hani bona ma haida idia karaia. Unai taudia edia noho bona bese edia kara be idauidau, moni dalana ai haida idia ogogami bona ma haida idia taga. To, gau tamona, idia iboudiai idia manau bona edia ruma dekenai eiava ma gabu ta ai, ta ese ia hadibadia neganai, Baibel sivaraina idia abia dae. Idia momo be diba bada idia abia badina idia hekwarahi ia koudia toho gaudia idia dadaraidia totona. Oibe, idia be hari inai nega ai ‘mai edia manau tanobada taudia.’

Haheitalai ta oi laloa: Maria, Mexico dekenai. Iunivesiti dekenai, taravatu ia stadilaia bona tama sina amo ia abia monina dainai iena noho ia hegeregere. Unai dainai, iena lalohadai be ta ese ia koua lasi bona unai ese iena kara ia haidaua, ia gwau ia be “gwau-edeede, hemataurai lasi, dagedage, bona ia laloa Dirava ia noho lasi” hahinena ai ia lao. Maria ia gwau: “Lau laloa hekwakwanai iboudiai be moni amo lau hanamoa diba, bona Dirava be gau badana lasi. Lau laloa ia noho lasi.” Ma ia gwau: “Lau laloa tomadiho be kavakava bona ia be taunimanima ese idia ura henia karana ta sibona.”

Gabeai, Maria ia itaia iena tamana maragina ena natuna be Iehova ena Witness ta ai ia lao murinai ena kara ia idau. Maria ia gwau: “Guna ia be dika momokani, to hari ia be maino bona kara maoromaoro tauna. Varavara idia gwau ia be haroro tauna bona Baibel ia duahia, bona unai dainai hari ia inuinu lasi eiava hahine ia tahudia lasi. Unai dainai lau ura ia mai lau dekenai Baibel ia duahia totona, badina lau laloa unai dala amo lau tahua mainona bona hemami namona do lau davaria.” Gabeai, Maria be Witness tauna ta mai ena adavana ida edia amo Baibel stadi ia abia.

Iena kara momo ia haidaua be namo, to ia hekwarahi bada Baibel ena hahegani kwarana dagina matauraia karana ia abia dae totona, unai amo iena tau do ia badinaia diba. To iena mauri bona lalohadai ia haidaua momokani. Ia gwau: “Lau laloa tadikaka be egu ruma dekenai idia mai bona Iehova ena amo heduru idia mailaia negana amo, egu ruma lalonai moale, maino, bona Dirava ena hahenamo ia noho.” Hari inai negai, Maria be gwauhamata bona bapatiso Iehova ena Witness hahinena ta.

Tomadiho momokanina tahua karana dekenai, manau karana, eiava manau lasi karana, be mai ena gaukara badana. Nega momo, ruma bese lalonai, hahine ese hereva momokani ia abia dae bona ia ura Dirava ia hesiai henia, to ena adavana ese ia abia dae haraga lasi. Reana tatau haida idia hekwarahi inai idia abia dae totona: iena adavana ese ma ta​—Iehova Dirava​—do ia badinaia. (1 Korinto 11:3) Chihuahua, Mexico ai, hahine ta ia ura ia dekenai Baibel stadi idia karaia, bona gabeai ia bona ena natudia 7 be hereva momokani idia abia dae. Iena tau ese ia inai henia. Badina be dahaka? Badina ia ura lasi iena ruma bese taudia be ruma ta ruma ta dekenai idia haroro bona Baibel bukadia bona magasin idia henia loaloa. Ia laloa iena dagi be mai anina bada dainai unai gaukara be hegeregere lasi. To iena ruma bese taudia idia gini auka, edia lalona idia hadaia vadaeni Dirava do idia hesiai henia totona. Gabeai, unai tau ia lalo-parara Dirava ena dala abia dae karana be namo. To lagani 15 idia lao ore murinai bena sibona ena gwauhamata ia karaia Iehova dekenai.

Mexico dekenai, daudau hanuadia momo idia noho, unai hanua taudia be mai edia Indian gado bona kastom. Baibel ena sivarai be unai taudia dekenai ia lao bona ia durudia edia diba habadaia totona, idia haida be hereva momokani dekenai diba idia abia neganai, duahiduahi bona toretore dekenai diba idia abia danu. To ena be taunimanima idia sikuli lasi eiava edia kohu be haida sibona, ita gwau lasi hereva momokani do idia abia dae haraga. Edia bese heagilaia karana dainai bona sene karadia idia dogoa tao noho dainai, nega haida idia haida idia hekwarahi hereva momokani idia abia dae totona. Unai dainai, Indian hanua taudia haida be hereva momokani idia abia dae neganai, hanua taudia ma haida ese idia hahisidia. Unai dainai, manau ena toana be idauidau.

Mai Manau ida Oi Abia Dae

To oi be edena bamona? Dirava ena Hereva momokani oi abia dae, a? Eiava oi hekwarahi Baibel ena hereva momokani haida oi abia dae totona? Reana oi sibona oi tahua be namo, bona do oi itaia dahaka ese oi ia koua. Hereva momokani idia abia dae taudia momo be dagi bada lasi taudia dainai oi lalohisihisi, a? Reana oi hekokoroku, a? Namona be aposetolo Paulo ena hereva oi laloa, ia gwau: “Tanobada ena kavakava gaudia be Dirava ese ia abia hidi, aonega taudia do ia hahemaraia totona. Bona tanobada ena manoka gaudia danu Dirava ese ia abia hidi, goada taudia do ia hahemaraia totona. Tanobada ese ia negea gaudia, bona taunimanima idia ura lasi gaudia Dirava ese ia abia hidi. Tanobada taudia idia laloa be anina lasi gaudia Dirava ese ia abia hidi, tanobada ena gau badadia do ia haorea totona. Inai anina be, tau ta Dirava vairanai ia hekokoroku diba lasi.”​—1 Korinto 1:​27-29.

Bema davana bada herea gauna ta be anina bada lasi hodu lalonai oi davaria, unai davana bada gauna do oi dadaraia, a? Lasi momokani! Dirava be unai dala ia abia hidi iena hamauria Hereva momokanina ita ia henia totona, aposetolo Paulo ese ia gwauraia hedinarai hegeregerena, ia gwau: “Inai diari ai abia vadaeni taudia be hodu sibona bamona do ai noho. Inai anina be taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.” (2 Korinto 4:7) Manau bona kara manada dainai, davana bada gauna ena namo momokani do ita itaia; “hodu” eiava idia mailaia tanobada taudia, ita itaia mo sibona lasi. Unai ita karaia neganai, dala ia namo ita “hehuni diba, Iehova ena badu dinana ai,” bona ita manau dainai “tanobada do idia abia” taudia ai do ita lao.​—Sefania 2:3; Mataio 5:5.