Anina Lasi Gaudia Raraia Lasi!

“Mani lau do oi durua, lau ese anina lasi gaudia do lau [raraia] lasi, to oiemu dala dekenai lau raka dainai, egu mauri do oi hamatamataia.”​​—⁠SAL. 119:⁠37.

1. Dahaka dainai iseda matana be mai anina bada?

MATANA be eda tauanina ena kahana badana ta! Eda matana amo gau idauidau edia toana bona kala ita itaia diba. Eda matana amo eda lalokau turadia eiava dika gaudia ita itaia diba. Eda matana amo Dirava ese ia havaraia gaudia idauidau edia hairai ita moalelaia diba. Bona unai gaudia amo ita diba Dirava be ia mauri noho bona ia be mai ena aonega bona siahu bada. (Sal. 8:​3, 4; 19:​1, 2; 104:24; Roma 1:​20) Matana amo ita itaia gaudia be iseda harana dekenai ita atoa, unai amo Iehova ita dibaia bona ia ita abidadama henia diba.​​—⁠Ios. 1:8; Sal. 1:​2, 3.

2. Dahaka dainai ita raraia gaudia do ita naria namonamo bona salamo torea tauna ena guriguri amo dahaka ita dibaia?

² To, ita raraia gaudia haida ese ita idia hadikaia diba. Iseda matana bona harana be idia gaukara hebou dainai, ita itaia gaudia ese iseda kudouna ai ura idauidau ia havaraia diba. Bona ita be Satani ese ia lohiaia matabodaga tanobada lalonai ita noho dainai, herevana laulau o matana veria gaudia be nega sisina sibona lalonai ita itaia, to ita idia hakaua kerere diba. (1 Ioa. 5:​19) Unai dainai, salamo torea tauna ese Dirava ia guriguri henia, ia gwau: “Mani lau do oi durua, lau ese anina lasi gaudia do lau [raraia] lasi, to oiemu dala dekenai lau raka dainai, egu mauri do oi hamatamataia.”​​—⁠Sal. 119:⁠37.

Matana ese Ita Ia Hakaua Kerere Diba Dalana

3-5. Baibel lalonai edena sivarai haida ese idia hahedinaraia iseda matana be ita ia hakaua kerere diba?

³ Hahine ginigunana Heva dekenai ia vara gauna mani ita laloa. Satani ia gwau, bema Heva be “kara namo bona kara dika hadibaia au ena huahua” ia ania, iena “matana do ia kehoa.” Reana, Heva ia ura ena “matana do ia kehoa” dalana ia diba. Unai dainai, ia ura bada Dirava ese ia taravatua au huahua ia ania, badina “ia itaia, unai au ena toana be namo herea, bona ena au huahua ia itaia be aniani gauna namona.” Heva be unai au huahua ia raraia noho dainai, unai ese ena lalona ia veria Dirava ena taravatu ia utua totona. Ena adavana, Adamu danu be Dirava ena taravatu ia utua, unai dainai ita ibounai be dika ita davaria.​​—⁠Gen. 2:​17; 3:​2-6, BHğ; Roma 5:​12; Iam. 1:​14, 15.

⁴ Noa ena negai danu, aneru haida be idia raraia gaudia ese edia lalona ia veria. Genese 6:2 ese idia ia herevalaia, ia gwau: “Dirava ena natuna haida ese idia itaia, inai kekeni be mai edia hairai. Vadaeni, idia ura henia kekenidia idia abia, idia adavaia.” Unai gwau-edeede aneru be tanobada kekeni idia hegahusi henia dainai, unai ese edia lalona ia veria matabodaga karadia idia karaia bona idia havaraia natudia be dagedage taudia. Unai nega ai taunimanima edia kara dika be bada herea dainai, Dirava ese taunimanima ibounai ia hamasea, to Noa bona iena ruma bese sibona ia hamauridia.​​—⁠Gen. 6:​4-7, 11, 12.

⁵ Lagani handred haida murinai, Israela taudia be Ieriko hanua idia abia neganai, Akana be ena matana amo ia itaia kohu ia ura henia bona ia henaoa. Dirava ese oda ia henia unai hanua ena kohu ibounai do idia hadikaia ore, to ia abia hidi gaudia haida sibona be Iena palai rumana dekenai do idia atoa. Iosua ese Israela taudia ia hamaoroa: “Umui naria namonamo, Lohiabada ese inai hanua ena gau ibounai umui dekenai ia taravatua dainai, gau ta do umui abia lasi.” Akana be unai hadibaia herevana ia badinaia lasi dainai, Israela taudia be Ai hanuana idia tuari henia neganai, idia lusi bona momo idia mase. Akana be ena henaohenao karana ia gwauraia hedinarai lasi ela bona Dirava ese ia hahedinaraia. Akana ia gwau: ‘Tuari dekenai ita abia kohu lau itaia bona lau ura henidia bada dainai lau abidia.’ Oibe, iena matana ese ia itaia gaudia ia ura henia bada dainai, “Akana idia hodoa mase, iena bese taudia danu” bona “edia gaudia ibounai danu lahi dekenai idia gabua.” (Ios. 6:​18, 19; 7:​1-​26) Akana be ena kudouna dekenai Dirava ese ia taravatua gaudia ia ura henia.

Sibona Iseda Ura Do Ita Biagua

6, 7. Satani ese edena “koikoi” karana ia gaukaralaia ita ia tarapua totona, bona edena dala ai bisinesi taudia ese unai idia tohotohoa?

⁶ Hari inai nega ai, Satani be Heva, gwau-edeede anerudia bona Akana dekenai ia karaia hegeregerena taunimanima ia dibagania noho. Satani ena “koikoi” karadia ibounai amo, “matana ese idia ura henia gaudia” ia gaukaralaia momo, badina unai dala amo taunimanima momo ia veria noho. (2 Kor. 2:​11; 1 Ioa. 2:​16, NW ) Bisinesi taudia be edia kohu hoihoilaia totona, matana veria daladia idia gaukaralaia. Europe dekenai bisinesi tauna ta ia gwau: “Matana be mai ena siahu, badina bema gau ta ia itaia, kudouna ia veria diba unai gauna ia ura henia bona abia totona. Nega momo matana ena ura ese iseda laloa maoromaoro karana ia hakererea diba.”

⁷ Oibe, unai dainai bisinesi taudia be edia kohu hoihoilaia totona, aonega dalanai iseda matana ia veria dalana idia gaukaralaia, unai amo ita ura edia kohu ita hoia o edia kampani dekenai ita lao! United States dekenai unai kara ia stadilaia tauna, ia gwau: “Bisinesi taudia be kastoma dekenai edia kohu idia hahedinaraia sibona lasi, to edia lalona idia veria unai kohu idia ura henia bona idia hoia totona.” Nega momo bisinesi taudia be, mahuta hebou lalohadaina ia havaraia laulauna idia gaukaralaia, unai amo kastoma edia lalona idia veria edia kohu idia hoia totona. Unai dainai, iseda matana ese ia raraia gaudia bona iseda lalona bona harana dekenai ita atoa gaudia do ita naria namonamo!

8. Iseda matana ita naria namonamo totona, Baibel be dahaka sisiba ia henia?

⁸ Keristani taudia be matana bona tauanina edia ura ese ia veria diba. Unai dainai, Dirava ena Hereva ese ita ia hamaoroa ita raraia bona ura henia gaudia do ita biagua be namo. (1 Kor. 9:​25, 27; 1 Ioane 2:​15-​17 duahia.a) Kara maoromaoro tauna Iobu be matana ese ia itaia bona ura henia karana ena siahu ia lalopararalaia. Ia gwau: “Lauegu matana dekenai taravatu lau atoa vadaeni, nega ta kekeni do lau itaia noho lasi, matabodaga kara totona.” (Iobu 31:⁠1) Iobu ia gwauhamata hegahusi dalanai hahine ta do ia dogoatao lasi, bona danu ia ura lasi matabodaga lalohadaina ta ia laloa. Iesu be ita ia hadibaia iseda lalona do ia goeva bona matabodaga lalohadai do ita dadaraia, ia gwau: “Bema tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.”​​—⁠Mat. 5:​28.

Ita Dadaraia Anina Lasi Gaudia

9. (a) Dahaka dainai Internet ita gaukaralaia neganai, do ita naria namonamo? (b) Ena be nega sisina sibona lalonai ponografi laulauna ta ita itaia, to dahaka ia vara diba?

⁹ Hari inai tanobada ai, Internet ai ponografi laulau “itaia noho” karana be bada herea. Ita be Internet ai unai gaudia ita tahua lasi, to kompiuta dekenai idia hedinarai kava! Edena dala ai? Reana ta ia gaukara noho lalonai, ena kompiuta dekenai kohu ta hoihoilaia totona matana ia veria laulau ta ia hedinarai kava diba. Eiava e-mail ta ia kehoa neganai, ponografi laulauna ta ia hedinarai bona koua dalana be ia auka. Ena be ena kompiuta amo ia kokia, to unai nega sisina sibona ia itaia gauna be ena lalona ai ia vareai vadaeni, bona unai ese dika bada ia havaraia diba. Unai tauna ena lalomamina ese hanaihanai do ia kota henia, bona ena be ia ura unai laulau dikana be ena lalona amo ia kokia, to ia laloaboio diba lasi. To, bema unai tauna be mai ena ura ida ponografi laulau ia “itaia noho,” unai be dika momokani bona unai ura dikana ia hamasea haraga be namo.​​—⁠Efeso 5:​3, 4, 12 duahia; Kol. 3:​5, 6.

10. Dahaka dainai natudia be ponografi laulau ese idia veria diba, bona idia raraia dainai dahaka hekwakwanai idia davaria?

¹⁰ Vaia, natudia be idia ura gau idauidau idia dibaia, unai dainai ponografi laulaudia ese edia matana ia veria diba. Bema unai ia vara, unai ese natudia edia lalohadai mahuta hebou karana dekenai ia hakererea diba. Ripoti ta ia gwau natudia be mahuta hebou karana dekenai lalohadai mirodia idia abia. Unai dainai, “mai lalokau bona hemataurai ida ma haida idia tura henia be auka, hahine idia itaia neganai, lalohadai mirodia sibona idia abia, bona ponografi laulau itaia karana idia manadalaia dainai, edia sikuli gaukara idia karaia namonamo lasi, bona edia turadia bona ruma bese taudia ida idia noho namonamo diba lasi.” Gabeai, idia headava neganai hekwakwanai badadia idia davaria danu.

11. Ponografi laulau raraia karana ese ia havaraia dika mani oi gwauraia.

¹¹ Keristani tadikaka ta ia gwau: “Lau be hereva momokani lau do abia lasi neganai, lau karaia kara dikadia ibounai amo, ponografi laulaudia itaia karana lau rakatania be auka. Hari danu, reana bonana ta, miusiki ta o lau itaia gauna ta, o lalohadai ta dainai, unai laulau dikadia be egu lalona ai lau itaia lou. Dina ta ta lau hekwarahi bada unai hekwakwanai lau hanaia totona.” Tadikaka ma ta be ia maragi neganai, ena tama sina be ruma dekenai idia noho lasi lalonai, ena Witnes lasi tamana ena ponografi magasin ia itaia. Ia gwau: “Unai laulau dikadia ese egu lalohadai idia hadikaia! Hari, ena be lagani 25 idia hanaia vadaeni, to unai laulau dikadia be egu harana dekenai idia do noho. Herevana, lau hekwarahi bada unai laulau lau laloaboio totona, to egu lalona amo lau kokia diba lasi. Ena be unai laulau lau laloa momo lasi, to egu lalona ia hisihisi bada.” Unai bamona anina lasi gaudia ita dadaraia be aonega karana, unai amo do ita lalohisihisi lasi! Edena bamona unai ita karaia diba? Namona be eda ‘lalohadai ibounai do ita guia noho, Keriso ita badinaia totona.’​​—⁠2 Kor. 10:⁠5.

12, 13. Edena anina lasi gaudia be Keristani taudia ese idia dadaraia be namo, bona dahaka dainai?

¹² Ita dadaraia “kara dika” o anina lasi gaudia ma haida be kohu momo, babalau, meamea, tuari bona ala-ala karadia idia hahedinaraia muvi, laulau, buka o spot gadara. (Salamo 101:3 duahia.) Iehova vairanai, Keristani tama sina edia maduna be ruma bese ese ia raraia muvi do idia abia hidi. Momokani, Keristani tauna korikorina be babalau bona meamea karadia do ia karaia lasi. To, tama sina do idia naria namonamo badina muvi, TV program, vidio gadara, komiki o natudia edia buka be nega momo babalau karadia idia hahedinaraia.​​—⁠Aon. 22:⁠5.

¹³ Herevana ita be buruka o matamata taudia, namo lasi iseda matana ese dagedage bada ala-ala karadia idia hahedinaraia vidio gadara ia itaia. (Salamo 11:5 duahia.) Iseda lalona ai Iehova ese ia taravatua karadia do ita laloa lasi. Laloaboio lasi, Satani ia ura iseda lalona ia hadikaia. (2 Kor. 11:⁠3) Danu, bema muvi namona ta ita itaia, to unai gauna dekenai nega bada ita halusia, eda ruma bese ena tomadiho, dina ta ta ai Baibel duahiduahi karana o hebou hegaegaelaia karana idia hadikaia diba.​​—⁠Fili. 1:​9, 10.

Iesu Ena Haheitalai Tohotohoa

14, 15. Satani ena hedibagani ihatoina amo dahaka ita dibaia, bona dahaka dainai Iesu ia kwalimu?

¹⁴ To madi, inai matabodaga tanobadana ai, anina lasi gaudia ibounai ita dadaraia be auka. Iesu danu be unai bamona hahetoho ia davaria. Satani ia ura Iesu ia veria Dirava ena ura do ia rakatania, unai dainai hedibagani ihatoina ai, “ororo bada herea ta ena atai dekenai ia hakaua daekau,” bona “tanobada edia basileia ibounai mai edia hairaina” be Iesu dekenai ia hahedinaraia. (Mat. 4:⁠8) Dahaka dainai unai bamona ia karaia? Satani ia laloa bema Iesu ese unai tanobada basileia idauidau edia hairai ia itaia, unai ese ena lalona do ia veria tanobada ena king ta ai ia lao totona. Iesu be dahaka ia karaia?

¹⁵ Iesu be unai tanobada basileia idauidau ia raraia noho lasi. Eiava, tanobada ena king ta ai do ia lao lalohadaina ia abia lasi. Bona Iesu be nega daudau lalonai unai gaudia ia laloa lasi, to karaharaga Satani ia lulua, ia gwau: “Satani e, idau gabu dekenai oi lao.” (Mat. 4:​10) Iesu be iena hetura karana Iehova ida ia laloa bada bona iena haere amo ia hahedinaraia ia laloa bada gauna be Dirava ena ura do ia karaia guguru. (Heb. 10:⁠7) Unai dainai, Iesu be Satani ena hedibagani ia dadaraia bona ia kwalimu.

16. Iesu ese Satani ia dadaraia karana amo dahaka ita dibaia?

¹⁶ Iesu ena sivarai amo gau foa ita dibaia: (1) Satani be ita ibounai ia dibagania noho. (Mat. 24:24) (2) Iseda matana amo ita raraia gaudia ese eda kudouna ena ura ia habadaia bona unai ese ita ia veria kara namo o kara dika ita karaia diba. (3) Satani be iseda matana ese ia ura henia gaudia ia gaukaralaia ita ia hakaua kerere totona. (1 Pet. 5:⁠8) Bona (4) Satani ena hedibagani ita dadaraia haraga, unai amo do ita moru lasi.​​—⁠Iam. 4:7; 1 Pet. 2:​21.

‘Gau Tamona Sibona Oi Raraia’ be Namo

17. Dahaka dainai ita naria ela bona hahetoho ta ita davaria, bena dadaraia dalana ita lalohadailaia be aonega karana lasi?

¹⁷ Iehova dekenai gwauhamata ita karaia neganai, ita gwau anina lasi gaudia do ita dadaraia. Iehova ena ura karaia totona ita gwauhamata neganai, salamo torea tauna hegeregerena, ita gwau: “Lau ese kara dikadia dekena amo lau raka siri noho, badina be lau ura Dirava ena hereva do lau kamonai henia.” (Sal. 119:101) Namo lasi ita naria ela bona hahetoho ta ita davaria, bena do ita karaia gauna ita lalohadailaia​​—⁠unai be aonega karana lasi. Aonega karana be dadaraia dalana do ita lalohadailaia guna. Oibe, Baibel ese ia taravatua gaudia ita diba, bona Satani ena koikoi karadia ita diba danu. Edena nega ai Satani be Iesu ia dibagania nadi be paraoa ai ia halaoa totona? Iesu be dina 40 bona hanuaboi 40 ia aniani lasi murinai bona ia “hitolo mase” negana ai. (Mat. 4:​1-4) Momokani, Satani ia diba edena nega ai ita be ita manoka bona unai nega ai ita do ia tohoa. Unai dainai, hari be nega namona, unai gaudia ita laloa dobu totona. Namo lasi ita gwau: “Gabeai do lau karaia!” Bema iseda gwauhamata Iehova dekenai be dina ta ta lalonai ita laloa noho, unai ese ita do ia durua anina lasi gaudia do ita raraia lasi totona.​​—⁠Aon. 1:5; 19:⁠20.

18, 19. (a) “Gau tamona sibona ia raraia” bona “gau dikana ia itaia” tauna edia idau mani oi gwauraia. (b) Dahaka dainai gau namodia sibona ita laloa be gau badana, bona Filipi 4:8 ena sisiba be dahaka?

¹⁸ Dina ta ta ai, iseda matana idia veria gaudia momo herea ita itaia. Unai dainai, ita laloparara Iesu be dahaka dainai ia gwau, “matana be gau tamona sibona ia raraia” be namo. (Mat. 6:​22, 23, NW ) Gau tamona sibona ia raraia tauna be Dirava ena ura sibona ia karaia noho. To, “gau dikana ia itaia” tauna be koikoi tauna, bona ia ese tauanina ena ura bona anina lasi gaudia ia laloa bada.

¹⁹ Namona be inai ita laloatao: Iseda matana ese ia raraia gaudia be iseda harana dekenai lalohadai idia havaraia, bona unai lalohadai be iseda kudouna dekenai ura ia havaraia. Unai dainai, hanaihanai gau namodia sibona ita laloa be mai anina bada. (Filipi 4:8 duahia.) Oibe, namona be salamo torea tauna ena guriguri do ita gwauraia noho: “Mani lau do oi durua, lau ese anina lasi gaudia do lau [raraia] lasi.” Bona ita diba momokani, bema unai guriguri hegeregerena ita kara, Iehova ese “[eda] mauri do [ia] hamatamataia.”​​—⁠Sal. 119:37; Heb. 10:⁠36.

[Footnote]

Dahaka Ita Laloatao be Namo . . .

• iseda matana, lalona bona kudouna be edena dala ai idia gaukara hebou?

• ponografi laulau raraia karana ena dika be dahaka?

• dahaka dainai “matana ese gau tamona sibona ia raraia” be mai anina bada?

[Pictures on page 23]

Keristani taudia ese edena anina lasi gaudia idia dadaraia be namo?