Harana​​—Gunaguna Unuseniai Gau Momo Idia Vara

BAIBEL idia diba namonamo taudia be inai ladana, Harana, idia kamonai neganai, maoromaoro Aberahamo idia laloa. Aberahamo, ena adavana Sara, ena tamana Tera bona iena vavana Lota be Uru hanuana amo Kanana dekenai idia lao gwauraia neganai, Harana dekenai idia ginidae guna. Unuseniai Aberahamo ena kohu be momo. Ena tamana ia mase murinai, Aberahamo be Harana ia rakatania bona Dirava ese ia gwauhamatalaia tanona ia lao henia matamaia. (Gen. 11:​31, 32; 12:​4, 5; Kara 7:​2-4) Gabeai, Aberahamo ese ena hesiai tauna badana ia siaia Harana o Harana kahirakahira idia noho gabudia ta dekenai Isako ena adavana ta do ia tahua. Aberahamo ena tubuna, Iakobo danu, be lagani haida lalonai Harana ai ia noho.​​—Gen. 24:​1-4, 10; 27:​42-​45; 28:​1, 2, 10.

Asuria ena King Senakeriba be Iuda ena King Hesekaia dekenai Asuria ena king taudia ese idia halusia “hanuadia” ia herevalaia neganai, Harana hanuana ia gwauraia danu. Unai ladana “Harana” be siti tamona sibona ia herevalaia lasi, to Harana kahirakahira idia noho hanuadia ia herevalaia danu. (2 Kin. 19:​11, 12) Esekiela ena peroveta herevana ese ia hahedinaraia Harana taudia be nega momo Turo taudia ida bisinesi karadia idia karaia; unai ese ia hahedinaraia Harana be bisinesi karadia idia karaia gabuna badana ta.​​—Ese. 27:​1, 2, 23.

Hari inai negai, Harana be taoni maragina ta bona Turkey ena ist kahanai ia noho hanua ladana, Şanlıurfa badinai ia noho. To gunaguna, Harana hanua dekenai be gau momo idia vara. Harana bona idaunegai hanua haida be edia ladana gunana idia do gaukaralaia noho​​—Baibel dekenai ia noho danu. Asuria taudia edia gado ai inai ladana Harranu ena anina be “Dala” o “Loaloa Taudia Edia Dala.” Unai ese ia hahedinaraia siti badadia amo idia mai taudia ese bisinesi karadia be Harana dekenai idia karaia. Harana ena tano lalonai be nadi haida mai edia toretore idia davaria, bona unai toretore ese idia hahedinaraia Babulonia ena King Nabonido ena sinana be Harana hanua taudia edia hua diravana, Sin, ena dubu ena hahelaga hahine badana. Haida idia gwau unai dubu be Nabonido ese ia haginia lou. Unai murinai, basileia idauidau idia lohia bona idia moru, to Harana be ia do noho.

Hari, Harana hanuana be idau momokani, guna bamona lasi. Guna, Harana be moni momo bona mai anina bada gabuna. To hari, Harana be taoni maragina ta bona unuseniai ruma maragidia haida edia guhi be kuboru bamona idia noho. Unai hanua dekenai idaunegai idia hadikaia gaudia haida idia do noho. Dirava ena tanobada matamatana ai, guna Harana ai idia noho taudia momo​​—idia haida be Aberahamo, Sara, bona Lota​—do idia toreisi lou. Reana unai neganai idia ese ita dekenai Harana​—gunaguna unuseniai gau momo idia vara gabuna​—ena sivarai ma haida do idia herevalaia.

[Picture on page 20]

Harana dekenai idaunegai idia hadikaia gaudia

[Picture on page 20]

Ruma haida edia guhi be kuboru

[Picture on page 20]

Hari, Harana ena toana be inai bamona