Kongrigeisen Taudia Durua Noho
“Umui ta ta dekenai goada do umui henia, bona durua do umui henia.”—1 TES. 5:11.
1. Kongrigeisen ai oi noho dainai dahaka hahenamo oi davaria, to dahaka hekwakwanai be do idia vara noho?
KONGRIGEISEN ai oi noho be hahenamo badana ta. Oi ia durua Iehova oi tura henia totona. Iena Hereva be oi ia hakaua dainai, Keristani lasi karadia amo idia vara dika idauidau oi hanaia. Oi bamoa taudia idia ura oi noho namonamo. Momokani, hahenamo momo oi davaria. To, tadikaka taihu momo be hekwakwanai momo dainai idia hekwarahi. Idia haida idia ura oi durudia Dirava ena Hereva ena dobu gaudia edia anina idia lalopararalaia totona. Ma haida idia gorere o lalometau, o idia abia hidi kererena amo idia vara gau dikadia idia hisihisilaia. Bona ita ibounai be tanobada dikana lalonai ita do noho.
2. Edena dala ai hekwakwanai negadiai tadikaka taihu ita durua diba, bona dahaka dainai?
2 Ita ura lasi eda tadikaka o taihu ta ia hisihisi o hekwarahi. Aposetolo Paulo ese kongrigeisen be tauanina tamona ida ia hahegeregerea, bona ia gwau “kahana ta do ia hisihisi neganai, kahana ibounai ese unai hisihisi ena mamina do idia abia.” (1 Kor. 12:12, 26) Unai bamona ia vara neganai, namona be ita hekwarahi iseda tadikaka taihu ita durua totona. Baibel ena sivarai haida ese idia hahedinaraia, kongrigeisen taudia ese ma haida idia durua hekwakwanai idia haheaukalaia o hanaia totona. Sivarai ta ta ita kikilaia neganai, oi itaia edena dala ai unai bamona heduru do oi henia. Edena dala ai tadikaka taihu oi durua hesiai gaukara idia goadalaia, bona Iehova ena kongrigeisen oi durua?
“Edia Ruma Dekenai Idia Hakaua Lao”
3, 4. Edena dala ai Akwila bona Prisikila ese Apolo idia durua?
3 Apolo be Efeso ai ia noho neganai, ia be haroro gaukara ia goadalaia tauna ta. Baibel bukana Kara ia gwau: “Ia ese Iesu ena sivarai ia gwauraia mai siahu danu, bona iena hadibaia hereva be maoromaoro. To ia be Ioane ena bapatiso sibona ia diba.” Bema Apolo be ‘Tamana, Natuna, bona Lauma Helaga ena ladanai’ ta ia bapatiso karana ia diba lasi, ita gwau diba Ioane Bapatiso ena hahediba tauna ta eiava Pentekoste 33 C.E. do lasi neganai ia noho Iesu ena hahediba tauna ta ese Apolo ia haroro henia lasi. Ena be Apolo be haroro gaukara ia goadalaia tauna ta, to mai anina bada gaudia ma haida edia anina ia diba be namo. Edena dala ai ena tadikaka ese ia idia durua?—Kara 1:4, 5; 18:25; Mat. 28:19.
4 Akwila bona ena adavana Prisikila be sinagoga ai Apolo ese mai gari lasi ida ia harorolaia herevadia idia kamonai, vadaeni edia ruma dekenai idia hakaua lao, bona ia dekenai gau ma haida idia hadibaia. (Kara 18:24-26 duahia.) Unai be lalokau karana. Oibe, reana Akwila bona Prisikila be aonega bona hemataurai dalanai Apolo idia durua, ia lalohisihisi lasi totona. To unai gaudia idia hadibaia be maoro badina Apolo be kongrigeisen ginigunana ai idia karaia gaudia haida ia diba lasi. Ita gwau diba, Apolo be ena turana matamatadia ia tanikiu henia badina mai anina bada gaudia ia dekenai idia hadibaia namonamo. Apolo be unai gaudia ia dibaia dainai, Akaia tadikaka ia “durua bada” bona haroro namona ia henia.—Kara 18:27, 28.
5. Pablisa tausen momo be dahaka heduru idia henia, bona dahaka ia vara?
5 Hari, kongrigeisen ai idia noho taudia momo be Baibel ena hereva ena anina idia lalopararalaia dainai, edia hadibaia taudia idia tanikiu henia. Stadi taudia bona edia hadibaia taudia be turana namodia ai idia lao. Bema oi ura haida oi durua hereva momokani idia lalopararalaia totona, gau badana be sediual oi karaia, hua haida lalonai idia umui stadi henia. Pablisa momo idia ura unai bamona heduru idia henia, badina idia laloparara taunimanima edia mauri be mai anina bada. (Ioa. 17:3) Momo be hereva momokani idia lalopararalaia, edia mauri lalonai idia badinaia, bona Iehova ena ura idia karaia; unai bamona taudia ita itaia be moale gauna!
“Idia Gwau Ia be Tau Namona”
6, 7. (a) Dahaka dainai Paulo be Timoteo ia abia hidi loaloa naria gaukarana ai ia bamoa totona? (b) Paulo ese Timoteo ia durua dahaka ia karaia totona?
6 Misinari loaloa iharuana ai, Paulo bona Sila be Lusitera dekenai idia lao neganai, Timoteo idia davaria—reana ena mauri lagani be 15 bona 20 huanai. “Lusitera bona Ikonio ai idia noho tadikaka be Timoteo idia herevalaia, idia gwau ia be tau namona.” Timoteo ena sinana Eunike bona tubuna Loi be Keristani taudia, to ena tamana be Keristani tauna lasi. (2 Tim. 1:5) Paulo be unai ruma bese ia diba—reana lagani haida gunanai Lusitera ai vadivadi ginigunana ia karaia neganai idia ia diba. To vadivadi iharuana ai, aposetolo tauna ese elda taudia ia hamaoroa ia ura Timoteo ia gaukaralaia, badina ia itaia unai mero be kara namodia ia hahedinaraia. Elda oreana ese gwaumaoro ia henia murinai, Timoteo ese Paulo ia bamoa misinari gaukara idia karaia totona.—Kara 16:1-3 duahia.
7 Timoteo be ena turana burukana amo gau momo ia dibaia. Unai dainai, gabeai Paulo ese Timoteo ia siaia kongrigeisen ia vadivadi henidia, bona Paulo ena gwaukau tauna ai ia lao. Lagani 15 mai kahana lalonai, Timoteo be mai moale ida Paulo ia bamoa dainai, unai hemarai merona ena diba ia bada ia lao, ia goada, bona gabeai elda tauna ta ai ia lao.—Fili. 2:19-22; 1 Tim. 1:3.
8, 9. Kongrigeisen taudia be matamata taudia dekenai dahaka hagoadaia hereva idia henia diba? Haheitalai ta gwauraia.
8 Hari, kongrigeisen ai memero bona kekeni namodia momo idia noho. Bema lo taudia ese unai matamata taudia idia hagoadaia bona hadibaia namonamo, reana idia be do idia gaukara goada Iehova ena taunimanima huanai maduna badadia idia tahua bona abia dae totona. Emu kongrigeisen dekenai oi itaia! Timoteo bamona, matamata taudia haida idia noho hegaegae gaukara ta karaia totona, a? Bema idia oi durua bona hagoadaia, reana painia, Betele, misinari o loaloa naria taudia ai idia lao diba. Edena dala ai idia oi durua diba unai bamona tahua gaudia idia atoa totona?
9 Martin be lagani 20 lalonai Betele ai ia gaukara bona ia be sekit naria tauna ta ena kara namona ta ia do laloatao noho. Ia gwau, lagani 30 gunanai, haroro ai idia ruaosi idia gaukara hebou neganai, sekit tadikaka be ena matamata neganai Betele ai ia gaukara ena sivarai be mai moale ida ia gwauraia. Ia ese Martin ia hagoadaia, namona be ia tahua namonamo, ia hegaegae Iehova ena orea ese ia henia gaukaradia ia karaia totona o lasi. Martin ia laloa unai hereva namona dainai, gabeai ia be abia hidi maorona ia karaia. Reana oi danu be matamata taudia ida oi herevahereva, idia oi durua tahua gaudia haida idia atoa bona Iehova idia hesiai henia.
“Lalometau Taudia Do Umui Hagoadaia, Manoka Taudia Do Umui Durua”
10. Epafrodito ena hemami be edena bamona, bona dahaka dainai?
10 Epafrodito be Filipi amo gabu daudau, Roma dekenai ia lao, aposetolo Paulo ia vadivadi henia totona—Paulo be ena abidadama dainai dibura ruma ai idia atoa. Epafrodito be Filipi taudia ese idia siaia. Ia be aposetolo tauna ena harihari gaudia ia abia lao sibona lasi, to danu, ia laloa Paulo ida do ia noho, bona nega dikana lalonai Paulo ia durua. To Roma ai ia noho neganai, “gorere ia davaria, bona kahirakahira ia mase.” Epafrodito ia lalometau bada, badina ia laloa ena gaukara ia karaia namonamo lasi.—Fili. 2:25-27.
11. (a) Kongrigeisen taudia haida idia lalometau neganai, dahaka dainai ita hoa lasi? (b) Paulo be Epafrodito totona dahaka ia gwau?
11 Hari, taunimanima be gau idauidau dainai idia lalometau. Orea ta (World Health Organization) ena ripoti haida idia gwau, taunimanima ibounai faiv faiv amo tamona tamona be nega haida edia mauri lalonai idia lalometau. Iehova ena taunimanima danu idia lalometau. Reana ruma bese naria ena hekwarahi, gorere, kerere ta idia karaia, o unai bamona gaudia dainai idia lalometau. Filipi taudia be dahaka idia karaia diba Epafrodito idia durua totona? Paulo ia gwau: “Ia do umui abia dae, Lohiabada ena ladana dekenai, mai emui moale bada danu. Bona iena kara bamona idia karaia taudia ibounai do umui matauraia. Badina be Keriso ena gaukara totona Epafrodito kahirakahira ia mase. Iena mauri ia negea gwauraia, lau dekenai durua totona, bona umui karaia diba lasi durua gauna, be ia ese do ia karaia totona.”—Fili. 2:29, 30.
12. Lalometau taudia dekenai dahaka hagoadaia hereva ita henia diba?
12 Idia lalometau o lalomanoka tadikaka taihu ita hagoadaia be namo. Iehova idia hesiai henia dainai, hereva namodia haida ita gwauraia diba. Reana edia mauri idia haidaua, unai amo Keristani tauna goadana ai idia lao o ful-taim hesiai gaukara idia karaia. Edia hekwarahi ita laloa bada, bona idia ita hamaoroa Iehova be edia gaukara namona ia laloa bada danu. Bema abidadama taudia haida idia buruka o gorere dainai gaukara momo idia karaia diba lasi guna bamona, vadaeni lagani momo lalonai idia karaia hesiai gaukara ibounai ita laloa bona idia ita matauraia. Iehova ese hesiai taudia ibounai ia sisiba henia: “Lalometau taudia do umui hagoadaia, manoka taudia do umui durua bona taunimanima ibounai dekenai do umui boga-auka.”—1 Tes. 5:14, NW.
“Iena Dika Do Umui Gwauatao, Bona Iena Lalona Do Umui Hagoadaia”
13, 14. (a) Korinto kongrigeisen taudia be dahaka kara badana idia karaia, bona dahaka dainai? (b) Matahakani karana dainai, dahaka ia vara?
13 Aposetolo edia negai, Korinto kongrigeisen ai, tau ta be matabodaga karadia ia karaia bona ia helalo-kerehai lasi. Ia ese kongrigeisen ia hamiroa diba, bona Keristani lasi taudia momo be ena kara idia moalelaia lasi. Unai dainai, Paulo be maoromaoro hereva ia siaia unai tau be kongrigeisen amo idia atoa siri totona.—1 Kor. 5:1, 7, 11-13.
14 Unai matahakani karana dainai, kongrigeisen ia goeva noho bona kerere tauna ia durua ena kerere ia lalopararalaia bona ia helalo-kerehai momokani. Helalo-kerehai toana ia hahedinaraia dainai, Paulo ese revareva iharuana be unai kongrigeisen dekenai ia siaia, unai tau idia abia-vareai-lou totona. To, unai sibona idia karaia be hegeregere lasi. Paulo ese danu kongrigeisen taudia ia hamaoroa: “Harihari [ia helalo-kerehai kara dika tauna ena] dika do umui gwauatao, bona iena lalona do umui hagoadaia be namo, iena lalohisihisi ese iena abidadama do ia haorea garina.”—2 Korinto 2:5-8 duahia.
15. Bema ta ia helalo-kerehai momokani bona kongrigeisen ese ia abia-vareai-lou, edena bamona ita kara be namo?
15 Unai sivarai amo dahaka ita dibaia? Ta be kongrigeisen amo idia atoa siri neganai ita lalometau. Reana ena kara be Dirava bona kongrigeisen ena ladana ia hadikaia. Reana ita dekenai kara dika ia karaia. To, bema hahemaoro komiti be gau ibounai ia tahua bona Iehova ena dala ia badinaia dainai, ia helalo-kerehai tauna be kongrigeisen ai ia abia-vareai-lou, unai ese ia hahedinaraia Iehova be unai tau ena dika ia gwauatao. (Mat. 18:17-20) Iehova ena kara ita tohotohoa be namo, ani? Bema ita hebogahisi lasi bona haida edia dika ita gwauatao lasi, ita hahedinaraia ita be Iehova ida ita lalotamona lasi. Unai dainai, bema ta ia helalo-kerehai momokani bona kongrigeisen ese ia abia-vareai-lou, namona be ‘lalokau ia dekenai do ita hedinarai henia lou, vadaeni do ia diba ita lalokau henia momokani,’ unai amo kongrigeisen lalonai maino bona lalotamona do ia noho bona Iehova ena lalonamo do ita abia.—Mat. 6:14, 15; Luka 15:7.
“Egu Gaukara Do Ia Durua Diba”
16. Dahaka dainai Paulo be Mareko dekenai ia moale lasi?
16 Baibel ena sivarai ma ta ese ia hahedinaraia, ita idia habadua taudia ita badu henia lasi. Haheitalai be: Ioane Mareko be nega ta aposetolo Paulo ia habadua. Edena dala ai? Paulo bona Banaba be misinari loaloa ginigunana idia matamaia neganai, Mareko be idia danu ia lao. To nega ta ai, Ioane Mareko be idia ruaosi ia rakatania bona ia giroa lou hanua dekenai—unai ena badina be Baibel ese ia gwauraia lasi. Paulo be Mareko ena abia hidi dekenai ia moale lasi dainai, gabeai loaloa iharuana ena palani ia karaia neganai, ia ura lasi Mareko be idia danu do ia lao to Banaba ia ura, vadaeni hepapahuahu ia vara. Paulo ia laloa guna Mareko ese loaloa ginigunana ai idia ia rakatania dainai, ia ura lasi Mareko be idia danu ia lao.—Kara 13:1-5, 13; 15:37, 38 duahia.
17, 18. Edena bamona ita diba Paulo bona Mareko ese edia hekwakwanai idia hamaoromaoroa? Unai amo dahaka ita dibaia?
17 Mareko be Banaba ia bamoa gabu haida ai misinari gaukara idia karaia totona, unai ese ia hahedinaraia ia be Paulo ena kara dainai ia lalometau lasi. (Kara 15:39) Paulo ese lagani haida murinai ia torea herevadia ese idia hahedinaraia, Mareko be ia goada bona gaukara namona ia karaia. Unai neganai Paulo be Roma ena dibura ruma dekenai ia noho bona revareva ta be Timoteo dekenai ia siaia. Ia gwau: “Mareko do oi abia, bona umui ruaosi lau dekenai do umui mai, badina be ia ese egu gaukara do ia durua diba.” (2 Tim. 4:11) Momokani, Paulo ia itaia Mareko be gaukara goada tauna ai ia lao vadaeni.
18 Unai sivarai amo dahaka ita diba? Mareko be misinari tauna namona ena kara ia hahedinaraia. Ena be Paulo ia ura lasi Mareko be idia danu ia lao, to unai ese Mareko ia hahekwakwanaia lasi. Ia bona Paulo be Iehova idia rakatania lasi, bona idia badu heheni daudau lasi. Gabeai, Paulo ia itaia Mareko be durua tauna namona ta. Unai dainai, tadikaka ese hekwakwanai idia hanaia neganai, dala maorona be gau gunadia oi laloaboio bona nega ibounai ma haida oi durua hereva momokani lalonai idia goada totona. Ma haida edia namo oi laloa bada neganai, unai ese kongrigeisen ia hagoadaia.
Kongrigeisen Bona Oi
19. Kongrigeisen taudia ibounai be ta ta dekenai dahaka idia karaia diba?
19 Hari “metau dikadia momo” idia vara dainai, kongrigeisen tadikaka o taihu ese oi idia durua be namo, bona idia ura oi be idia oi durua. (2 Tim. 3:1) Hekwakwanai negadiai, nega momo Keristani taudia idia daradara dahaka do idia karaia, to Iehova ia diba. Ia be kongrigeisen taudia—oi danu—ia gaukaralaia diba ma haida idia durua dala maorona ai idia raka totona. (Isa. 30:20, 21; 32:1, 2) Paulo ena sisiba ita badinaia! Ia gwau, “umui ta ta dekenai goada do umui henia, bona durua do umui henia, harihari umui karaia noho bamona.”—1 Tes. 5:11.
Edena Bamona Do Oi Haere?
• Dahaka dainai kongrigeisen taudia ma haida ita durua be namo?
• Ta oi durua diba dahaka hekwakwanai badadia ia hanaia totona?
• Dahaka dainai kongrigeisen taudia ma haida edia heduru ita abia be namo?
[Picture on page 11]
Iseda tadikaka ta o taihu ta be metau badana ta ia davaria neganai ita durua
[Picture on page 12]
Hari, kongrigeisen ai memero bona kekeni namodia momo idia noho