Duahia Taudia Idia Henanadai . . .

Iehova Ena Witnes Taudia be Abidadama amo Gorere Idia Hanamoa, A?

▪ Iehova ena Witnes taudia be abidadama amo gorere idia hanamoa lasi. Iesu bamona, idia abia dae edia gaukara badana be Dirava ena Basileia ena sivarai namona idia harorolaia. Danu, idia abia dae Keristani taudia momokanidia edia toana be gorere hanamoa karana amo ia hedinarai lasi, to mai anina bada gauna ta amo ia hedinarai.

Momokani, aposetolo edia negai Iesu Keriso ese gorere taudia ia hebogahisi henia dainai, edia gorere ia hanamoa, unai be mai anina bada ita dekenai. Unai amo Iesu ese ia hamomokania, ia be Dirava ena Basileia ena King ai do ia lao neganai, ena lohia henunai “ta ese do ia gwau lasi, ‘Lau be gorere.’ ”​—Isaia 33:24.

To, hari inai negai be edena bamona? Kerisendom bona Keristani lasi tomadiho orea haida edia gorere hanamoa taudia idia gwau idia be hoa dalanai gorere idia hanamoa diba. Haida idia gwau idia be Iesu ena ladanai ‘hoa kara momo idia karaia,’ to Iesu be unai bamona taudia dekenai do ia gwau: “Umui be lau diba lasi momokani. Idau gabuna dekenai umui lao, umui dika karaia taudia.” (Mataio 7:​22, 23) Unai dainai, hari inai negai abidadama amo gorere idia hanamoa taudia be Dirava ese ia abia dae o ia hanamoa, a?

Baibel ese Iesu ia karaia hoa karadia ia herevalaia dalana ita itaia. Baibel ai Iesu ena gorere hanamoa sivaraidia bona hari inai negai abidadama amo gorere hanamoa taudia ita hahegeregerea neganai, do ita diba Dirava ese unai taudia edia kara ia abia dae o lasi.

Iesu be gorere hanamoa karana amo hutuma ia veria lasi iena murinai idia raka totona. Ia ese taunimanima idia noho lasi gabudia ai gorere taudia momo ia hanamoa. Nega momo unai gorere taudia ia hamaoroa ia karaia hoa karana be ta dekenai do idia herevalaia lasi.​—Luka 5:​13, 14.

Iesu be hoa karadia ia karaia neganai davana ia gwauraia lasi. (Mataio 10:8) Danu, nega ibounai ia karaia hoa karadia ese taunimanima ia hanamoa. Ia dekenai idia lao gorere taudia ibounai edia gorere ia ore vaitani, herevana idia be mai edia abidadama o lasi. (Luka 6:19; Ioane 5:​5-9, 13) Iesu ese mase taudia ia hatorea isi lou!​—Luka 7:​11-17; 8:​40-56; Ioane 11:​38-44.

Ena be Iesu ese hoa karadia ia karaia, to ia ese unai hoa karadia amo taunimanima ia veria lasi. Momokani, ena gaukara badana be Dirava ena Basileia ena sivarai namona ia harorolaia. Iesu be ena murinai idia raka taudia ia durua hahediba taudia ai idia lao totona, unai amo idia ese ma haida do idia hadibaia Dirava ena Basileia henunai taunimanima edia gorere do ia ore.​—Mataio 28:​19, 20.

Momokani, aposetolo edia negai Iesu murinai idia raka taudia haida be hoa dalanai gorere taudia idia hanamoa, to gabeai unai idia karaia lou lasi. (1 Korinto 12:​29, 30; 13:​8, 13) Hari inai negai, taunimanima ese Keristani taudia momokanidia be gorere hanamoa karana amo idia dibaia lasi, to lalokau idia hahedinaraia karana amo idia dibaia. (Ioane 13:35) Gorere hanamoa taudia ese Keristani ruma besena​—tano bona noho dala idauidau amo idia mai bona lalokau ai idia noho hebou besena​—idia havaraia diba lasi.

Ena be taunimanima huanai heiriheiri ia vara, to Keristani oreana ta be mai lalotamona ida idia lalokau heheni dainai, idia ura lasi ta ta o ma haida idia hadikaia. Idia be daidia? Idia be Iehova ena Witnes taudia. Tanobada hegegemadai, taunimanima idia diba Iehova ena Witnes taudia be Keriso ena lalokau idia hahedinaraia. Ena be edia kopina ena kala, kastom, tano bona noho daladia be idauidau, to Dirava ese idia ia hanamoa dainai lalotamona ai idia noho. Namona be edia hebou ta dekenai oi lao bona oi sibona do oi itaia, ani?

[Picture on page 23]

Hari inai negai abidadama amo gorere hanamoa taudia (edia laulau be idiba kahanai ia noho) be Dirava ese ia durudia, a?