“Do Ia Abia Dae”
1 Nega ta, Iesu be iena hahediba taudia ida headava idia herevalaia neganai, ia gwau headava lasi maurina be ‘harihari bada’ gauna bamona. Bena ia gwau: “Inai hereva do ia abia dae diba tauna ese do ia abia dae.” (Mat. 19:10-12) Lagani haida murinai, aposetolo Paulo be headava lasi maurina ena namo ia gwauraia bona haida ia hagoadaia iena haheitalai hegeregerena do idia headava lasi. (1 Kor. 7:7, 38) Hari inai negai momo be headava lasi maurina idia “abia dae” bona ena namo idia moalelaia. Unai namo haida be dahaka?
2 Gaukara Umui Karaia mai “Laloa Rua Lasi” Ida: Paulo ia lalo-parara headava lasi maurina ese dala ia kehoa mai “laloa rua lasi” ida Iehova ia hesiai henia totona. Unai hegeregerena, hari ia headava lasi tadikakana ta ese Hesiai Gaukara Hadibaia Sikulina totona aplikeisen ia hahonua diba, bona ia headava lasi tauna be painia gaukara lalonai ia vareai diba, gado ma ta ia dibaia, haroro taudia be momo lasi gabuna dekenai ia lao, Betele dekenai ia gaukara, eiava hesiai gaukara idauidau lalonai ia vareai diba. Ia be mai ena nega bada bona dala idauidau ia gaukaralaia sibona ena stadi ia karaia bona ia laloa dobu bona mai kudouna ibounai ida Iehova ia guriguri henia totona. Ia headava lasi tauna dekenai nega bada ia noho ma haida ia durua totona. Unai bamona gaukara ibounai be ta ‘ia durua’ totona.—1 Kor. 7:32-35; Kara 20:35.
3 Unai bamona Dirava ena hesiai gaukara be mai laloa rua lasi ida ita karaia neganai, hahenamo momo do ia mailaia. Lagani 27 lalonai Kenya dekenai ia noho murinai, ia headava lasi taihu ta ia gwau: “Turadia momo idia noho bona gaukara be bada! Ai gaukara hebou [bona] ta ta ai vadivadi henia. . . . Lau be adavana lasi dainai lau be gabu idauidau momo dekenai lau loaloa diba, unai ese lau ia durua lauegu hesiai gaukara idauidau lau karaia bada totona, bona lau be unai amo moale bada lau davaria.” Ma ia gwau: “Lagani idia hanaia lalonai lauegu turana karana Iehova dekenai ia bada ia lao.”
4 Headava Lasi Maurina Ena Harihari Gauna Gaukaralaia Namonamo: Iesu ia gwau “guba Basileia totona” headava lasi maurina ena harihari gauna idia gaukaralaia be namo. (Mat. 19:12) Harihari gaudia ma haida hegeregerena, headava lasi maurina ita gaukaralaia namonamo neganai, moale bona namo bada do ita abia. Idia headava lasi taudia momo ese headava lasi maurina idia gaukaralaia namonamo bona Iehova dekenai idia tabekau aonega bona goada ia henia neganai, idia ese headava lasi maurina ena namo idia lalo-pararalaia.