Siahu Ita Abia Hedibagani Bona Lalomanoka Hanaia Totona

“Lauma helaga be umui latanai ia diho neganai, siahu do umui abia.” ​—⁠KARA 1:​8, NW.

1, 2. Iesu be ena hahediba taudia dekenai dahaka ia gwauhamatalaia, bona dahaka dainai?

IESU ia diba iena hahediba taudia be sibona edia goada amo iena hahegani ibounai idia badinaia diba lasi. Hegeregere, tanobada ibounai dekenai haroro gaukara do idia karaia, dagedage bada do idia davaria, bona idia be taunimanima sibona dainai edia goada be hegeregere lasi, unai dainai siahu bada tauna ta ese ia durudia be namo. Iesu be guba dekenai ia daekau gwauraia neganai, ena hahediba taudia ia hamaorodia: “Lauma helaga be umui latanai ia diho neganai, siahu do umui abia, bona Ierusalema, Iudea ibounai, Samaria bona tanobada ena daudau momokani gabudia dekenai, lau do umui gwauraia hedinarai.”​—⁠Kara 1:​8, NW.

² Unai gwauhamata be Pentekoste 33 C.E. ai ia guguru, unai nega ai Iesu ena murinai idia raka taudia be lauma helaga ese ia hasiahudia dainai Ierusalema dekenai edia haroro gaukara idia goadalaia. Ena be dagedage bada idia davaria, to unai ese edia gaukara ia koua lasi. (Kara 4:20) Unai nega amo ema bona “inai nega oromana ena dokona,” Iesu ena hahediba taudia ibounai ese lauma helaga ena heduru idia abia be gau badana.​—⁠Mat. 28:​20, NW.

3. (a) Lauma helaga bona siahu be edena bamona ita gwauraia diba? (b) Iehova ese ia henia siahuna be edena dala ai ita ia durua?

³ Iesu be ena hahediba taudia dekenai ia gwauhamata ‘lauma helaga be edia latanai ia diho neganai, siahu do idia abia.’ Lauma helaga bona siahu be inai bamona ita gwauraia diba, paua ese bateri ia hasiahua bamona, lauma helaga ese ta ia hasiahua diba Dirava ena ura ia karaia totona. Iehova ese ena lauma helaga amo ena hesiai taudia dekenai siahu ia henia, unai amo idia ese edia Keristani gwauhamata idia hagugurua bona Satani ena hedibagani idauidau idia dadaraia diba.​—⁠Mika 3:8; Kolose 1:29 duahia.

4. Inai stadi lalonai dahaka do ita herevalaia, bona dahaka dainai?

⁴ Edena dala ai ita hahedinaraia ita be lauma helaga ena siahu ita abia? Lauma helaga ese ita ia biagua dainai, hekwakwanai bona hedibagani idia vara neganai, dahaka ita karaia? Momokani, Iehova ita hesiai henia neganai, Satani ena hedibagani, inai tanobada dikana ena hekwakwanai, bona iseda manoka gaudia ese ita idia hahekwakwanaia diba. Ita goada noho totona, hanaihanai haroro gaukara ita karaia bona iseda hetura karana Iehova ida ita hagoadaia be namo. Inai stadi lalonai lauma helaga ese ita ia durua hedibagani ita dadaraia, bona lalomanoka ita hanaia diba daladia haida do ita herevalaia.

Hedibagani Dadaraia

5. Edena dala ai guriguri karana ese ita ia durua diba?

⁵ Iesu ese ena hahediba taudia ia hadibaia inai bamona do idia guriguri: “Ai oi durua unai amo hedibagani lalonai do ai moru lasi, to Dika Tauna amo ai oi hamauria.” (Mat. 6:​13, NW ) Unai bamona idia guriguri taudia be Iehova ese do ia rakatanidia lasi. Nega ma ta ai Iesu ia gwau: “Emui Tamana, guba ai ese lauma helaga be idia noinoi taudia dekenai do ia henia!” (Luka 11:​13, NW ) Ita moale badina Iehova ia gwauhamata iena lauma helaga amo ita do ia durua kara maoromaoro ita badinaia totona! To namo lasi ita laloa Iehova ese Satani ena hedibagani do ia koudia. (1 Kor. 10:13) To hedibagani ita davaria neganai, ita guriguri goadagoada be mai anina bada.​—⁠Mat. 26:⁠42.

6. Edena dala ai Iesu be Satani ena hedibagani ta ta ia koua?

⁶ Iesu be Buka Helaga ena hereva ia gaukaralaia Diabolo ena hedibagani ia koudia totona. Iesu be Buka Helaga ena hereva ia laloatao dainai ia gwau: “Toretore Helagadia ia gwau . . . Toretore Helagadia be ma ia gwau . . . Satani, oi siri! Badina Toretore Helagadia ia gwau: ‘Iehova oiemu Dirava oi tomadiho henia be namo, bona ia sibona dekenai hesiai gaukara helagana do oi karaia.’ ” Iesu be Iehova ia lalokau henia bona Buka Helaga ia ura henia bada dainai, unai ese ia durua Satani ena hedibagani ia dadaraia totona. (Mat. 4:​1-10, NW ) Iesu be Satani ena hedibagani ta ta ia koua murinai, Satani ese ia rakatania.

7. Baibel be edena dala ai ita ia durua hedibagani ita dadaraia totona?

⁷ Iesu be Buka Helaga ia gaukaralaia Diabolo ena hedibagani ia dadaraia hegeregerena, ita danu be unai bamona ita karaia be namo! Oibe, namona be Dirava ena taravatu ita diba bona ita gaukara goada ita badinadia totona. Taunimanima momo be Baibel idia stadilaia neganai, Dirava ena aonega bona kara maoromaoro daladia idia diba bona edia mauri idia haidaua. Momokani, “Dirava ena hereva” be mai ena siahu bona ta “ena kudouna ai idia noho lalohadai bona ura ibounai ia tahua diba.” (Heb. 4:​12, NW ) Hanaihanai Baibel ita duahia bona ita laloa dobu neganai, Iehova ena ‘hereva momokani’ do ita lalopararalaia namonamo. (Dan. 9:13) Danu, namona be iseda manoka gaudia idia herevalaia Baibel siridia ita laloa dobu.

8. Edena dala ai lauma helaga ena heduru ita abia diba?

⁸ Iesu be Buka Helaga ia diba sibona lasi, to “lauma helaga amo ia honu” dainai, hedibagani ia dadaraia diba. (Luka 4:​1, NW ) Iesu bamona ita goada bona hedibagani ita dadaraia totona, namona be Iehova ese ia hegaegaelaia daladia hegeregere Baibel stadilaia karana, guriguri bona tadikaka taihu bamoa karadia ita laloa bada. Unai amo lauma helaga do ita abia bona Iehova kahirakahira ita noho. (Iam. 4:​7, 8) Danu, momo be Keristani maduna idauidau dekenai idia gaukara goadagoada dainai, edia hetura karana Dirava ida ia goada noho.

9, 10. (a) Keristani taudia be edena bamona hedibagani idia davaria? (b) Edena dala ai laloa dobu bona guriguri karana ese oi ia durua diba hedibagani oi dadaraia totona?

⁹ Oi be edena bamona hedibagani oi davaria? Ma ta oi hauraia kava ena be ia be oiemu adavana lasi, a? Bema oi be headava lasi mero o kekeni, oi ura Witnes lasi mero o kekeni ta oi tura henia, a? TV oi raraia o Internet oi gaukaralaia neganai, matabodaga laulaudia ese emu lalona ia veria oi raraia noho totona, a? Bema oi be unai bamona hedibagani oi davaria, dahaka oi karaia? Laloa dobu karana ese oi ia durua diba. Reana sibona oi nanadaia: ‘Bema lau be abia hidi kererena lau karaia bona lau kara dika, dahaka dika do lau davaria?’ (Iam. 1:​14, 15) Iehova, emu kongrigeisen bona emu ruma bese taudia be oi karaia kara dika dainai do idia lalohisihisi bada. To bema Iehova ena kara maoromaoro taravatudia oi badinaia, emu lalomamina do ia goeva bona do oi moale. (Salamo 119:37; Aonega Herevadia 22:3 duahia.) Hedibagani oi davaria neganai, namona be Iehova oi guriguri henia oi dekenai goada ia henia totona.

¹⁰ Satani ese Iesu ia dibagania ena sivarai amo gau ma ta ita dibaia. Iesu be dina 40 lalonai ia anivaga murinai, Satani ese ia dibagania. Satani ia laloa unai be “nega namona” Iesu ena abidadama ia tohoa totona. (Luka 4:​13, NW ) Oibe, Satani be iseda abidadama ia tohoa totona, “nega namona” ia tahua noho. Unai dainai, mai anina bada gauna be iseda hetura karana Dirava ida ia goada be namo. Nega momo Satani ia itaia bema ta be ia manoka, unai be “nega namona” ia dibagania totona. Unai dainai, bema ita hesiku o lalomanoka, karaharaga heduru totona Iehova ita guriguri henia be namo.​—⁠2 Kor. 12:​8-10.

Hesiku Bona Lalomanoka

11, 12. (a) Dahaka dainai hari momo idia lalomanoka? (b) Dahaka ese ita do ia durua lalomanoka gaudia ita haheaukalaia totona?

¹¹ Ita be goevadae lasi taudia dainai, nega ta ta ita lalomanoka diba, badina hari ita be hekwakwanai momo negana ai ita noho. Guna taunimanima be unai bamona hekwakwanai idia davaria lasi. (2 Tim. 3:​1-5) Aramagedono ia kahirakahira noho lalonai, moni ena hekwakwanai, lalohisihisi gaudia bona hekwakwanai ma haida be idia bada idia lao. Unai dainai, taunimanima idia hekwarahi tauanina dalanai edia ruma bese idia naria totona. Idia hesiku bona idia mamia edia maduna be ia metau, bona idia hegeregere lasi idia huaia totona. Bema oi dekenai unai ia vara, dahaka oi karaia diba oi haheauka totona?

¹² Namona be oi laloatao, Iesu be iena hahediba taudia dekenai ia gwauhamata durua tauna ta do ia siaia, unai be Dirava ena lauma helaga. (Ioane 14:​16, 17 duahia.) Guba bona tanobada ibounai dekenai, lauma helaga ena siahu be bada. Iehova be lauma helaga amo ita dekenai goada ia henia hekwakwanai idauidau ita haheaukalaia totona. (Efe. 3:20) Ena be ‘metau idauidau ese ita idia koua,’ to aposetolo Paulo ia gwau, bema lauma helaga dekenai ita tabekau “taunimanima edia siahu ia hereaia” siahuna do ita abia. (2 Kor. 4:​7, 8, NW ) Iehova ia gwau lasi iseda hekwakwanai do ia kokia, to ia gwauhamata iena lauma helaga do ia henia eda hekwakwanai ita haheaukalaia totona.​—⁠Fili. 4:⁠13.

13. (a) Kekeni matamata ta be edena dala ai ena gorere ia haheaukalaia? (b) Unai bamona taudia haida edia ekspiriens oi diba, a?

¹³ Mauri lagani 19 painia taihu ta ena ladana Stephanie ena sivarai mani ita laloa. Ena mauri lagani be 12 neganai, ia be strouk gorere ia abia bona doketa ese iena harana lalonai tiuma ta idia davaria. Unai murinai, ia be nega rua opereisen ia abia bona radiation treatment idia henia, ma nega rua strouk gorere ia abia, unai dainai ena tauanina laurina ia hamarere diba lasi bona ena matana ia dika. To Stephanie ese ena goada ia gaukaralaia namonamo, unai amo Keristani heboudia dekenai ia lao bona haroro gaukara ia karaia diba. Ia mamia Iehova ese dala idauidau ai ia durua ia haheauka totona. Ia lalomanoka negadiai, iseda buka bona magasin ai idia noho ekspiriens ese ia idia hagoadaia. Tadikaka taihu amo hagoadaia revarevadia ia abia, bona hebou vairanai o murinai ia idia hagoadaia. Stephanie ese ia haroro henia taudia haida be ena ruma dekenai idia lao edia Baibel stadi ia karaia totona. Unai hahenamo idauidau dainai Iehova ia tanikiu henia. Stephanie ese ia ura henia sirina be Salamo 41:3 badina ia mamia unai siri be ia dekenai ia guguru.

14. Ita lalomanoka neganai, edena bamona lalohadai ita dadaraia be namo, bona dahaka dainai?

¹⁴ Ita hesiku o lalomanoka neganai, namo lasi ita laloa eda Keristani maduna haida ita rakatania be namo. Unai be lalohadai maorona lasi. Dahaka dainai? Badina sibona eda stadi, ruma bese ena stadi, haroro gaukara bona hebou lao henia karadia amo lauma helaga ese ita ia hagoadaia. Unai Keristani maduna idauidau amo goada ita abia. (Mataio 11:​28, 29 duahia.) Nega momo tadikaka taihu be hesiku mamina idia abia, to hebou dekenai idia mai neganai unai hesiku mamina ia ore bona idia goada lou, hegeregere bateri be paua amo siahu ia abia bamona!

15. (a) Keristani tauna ena maduna be metau lasi, a? Baibel amo hahedinaraia. (b) Iehova ena gwauhamata be dahaka, bona edena henanadai ita laloa be namo?

¹⁵ Momokani, Keristani maduna idauidau be mai edia hekwarahi. Unai dainai, iseda abidadama ia goada noho totona ita gaukara goada be namo. (Mat. 16:​24-26; Luka 13:24) Iehova ese lauma helaga amo hesiku tauna dekenai goada ia henia diba. Peroveta tauna Isaia, ia gwau: “Lohiabada dekenai idia abidadama henia taudia ese, edia goada do idia hamatamataia lou. Idia be hanina dekena amo, do idia roho daekau, ugava bamona. Idia be do idia heau, bona do idia manoka lasi. Idia be do idia raka lao, bona do idia moru lasi.” (Isa. 40:​29-31) Bema Iehova ese ita dekenai goada ia henia, vadaeni namona be sibona ita nanadaia, ‘Dahaka dainai lau hesiku egu Keristani maduna idauidau lau huaia totona?’

16. Bema gau haida dainai ita hesiku eiava lalomanoka, dahaka ita karaia be namo?

¹⁶ Iehova ena Hereva ese ita ia hagoadaia “mai anina bada gaudia” ita atoa guna totona. (Fili. 1:​10, NW ) Aposetolo Paulo ese Keristani maurina be heau helulu ida ia hahegeregerea, ia gwau: “Namona be ita idia hametaua gaudia ibounai ita negea, . . . bona namona be iseda vairanai ia noho heau helulu lalonai do ita heau mai haheauka ida.” (Heb. 12:​1, NW ) Ena hereva ena anina be anina lasi gaudia dekenai eda nega do ita haorea kava lasi, badina idia ese ita do idia hametaua. Reana, ita ura iseda mauri lalonai gau momo ita karaia. Bema nega momo oi mamia gau momo oi karaia dainai oi hesiku, namona be emu mauri dalana oi tahua namonamo. Hegeregere, nega bada be moni gaukara dekenai oi haorea, a? Holide negadiai gabu idauidau dekenai oi loaloa momo, a? Eiava spot gadara o moale karadia haida dekenai nega bada oi haorea kava, a? Manau bona laloa maoromaoro karana ese ita do ia durua, iseda tauanina ena goada ena hetoana ita diba bona anina lasi gaudia dekenai nega bada do ita halusia kava lasi.

17. Dahaka dainai haida idia lalomanoka, to Iehova be edena dala ai idia ia hagoadaia?

¹⁷ Reana ita haida ita laloa tanobada ena dokona be do ia ginidae haraga, to unai ia do vara lasi dainai ita lalomanoka. (Aon. 13:12) Habakuku 2:3 ena hereva ese ita ia hagoadaia diba. Ia gwau: “To inai lau palania kara be harihari do ia vara lasi. Unai dainai ena anina do oi torea, ia noho. To ia be nega daudau lasi lalonai do ia vara. Lau koikoi lasi. Sedira oi laloa iena mai be haraga lasi, to do oi naria noho, ia be do ia vara momokani.” Oibe, inai tanobada dikana haorea negana be Iehova ese ia makaia nega korikorina ai do ia vara!

18. (a) Edena gwauhamata namodia ese oi idia hagoadaia? (b) Stadi gabena ai dahaka do ita herevalaia?

¹⁸ Momokani Iehova ena hesiai taudia ibounai be hesiku bona lalomanoka do ia ore negana idia naria noho. Unai nega ai idia ibounai be edia matamata negana ena goada do idia abia lou. (Iobu 33:25) Hari inai nega danu, ena be ita hesiku, to lauma helaga ena heduru amo iseda ‘kudouna be dina ibounai goada matamata ia abia noho,’ unai amo iseda hesiai gaukara ita karaia diba. (2 Kor. 4:​16, NW; Efe. 3:16) Namo lasi oi hesiku dainai, nega vaira ai oi abia diba hahenamo idauidau oi reaia. Namona be ita laloatao, ita davaria hekwakwanai hegeregere, hedibagani, hesiku o lalomanoka be hari idia ore diba, to bema lasi Dirava ena tanobada matamatana ai do idia ore vaitani. Stadi gabena ai do ita itaia, edena dala ai lauma helaga ese Keristani taudia ia hasiahudia dagedage, laloani karadia bona hekwakwanai ma haida idia haheaukalaia totona.

Edena Bamona Do Oi Haere?

• Baibel duahia karana ese edena dala ai ita ia hagoadaia?

• Guriguri bona laloa dobu karana ese edena dala ai ita ia hagoadaia?

• Lalomanoka idia havaraia gaudia be edena dala ai oi dadaraia diba?

[Picture on page 24]

Keristani heboudia ese ita idia hagoadaia