Ita Hesiku, to Iseda Goada Ia Ore Lasi
“Lohiabada be noho hanaihanai Diravana. Ia be tanobada ena kahana ibounai ia karaia vadaeni Diravana. . . . Manoka bona hesiku taudia be Lohiabada ese ia hagoadaia noho, bona goada lasi taudia edia goada ia habadaia noho.”—ISAIA 40:28, 29.
1, 2. (a) Tomadiho goevana idia badinaia taudia ibounai be dahaka boiboi hereva namona idia abia? (b) Dahaka ese iseda lauma dalana ia hadikaia diba?
ITA be Iesu ena hahediba taudia dainai, ena boiboi hereva namona ita diba: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. . . . Badina be lauegu huaia auna be ia metau lasi, bona huaia neganai danu hekwarahi lasi.” (Mataio 11:28-30) Keristani taudia dekenai danu “Lohiabada ese goada matamata” ia henia. (Kara 3:19) Momokani, Baibel ena hereva momokani oi dibaia, vaira negana ena helaro namona oi davaria, bona emu mauri lalonai Iehova ena hakaua herevadia oi badinaia dainai, oi ese goada matamata oi mamia noho.
2 To, Iehova idia tomadiho henia taudia haida be nega haida idia lalo-metau. Nega haida be nega sisina sibona lalonai idia lalo-manoka. Nega haida be nega daudau lalonai idia lalo-manoka. Bena gabeai, haida idia laloa edia Keristani maduna be ia metau bada herea, Iesu ena gwauhamata hegeregerena lasi. Unai bamona hemami dikana ese Keristani tauna ena hetura karana Iehova ida ia hadikaia diba.
3. Dahaka dainai Iesu ese Ioane 14:1 dekenai sisiba herevana ia henia?
3 Iesu idia do dogoatao bona hamasea lasi neganai, ena hahediba taudia ia hamaorodia: “Umui laloa hekwarahi lasi, to Dirava dekenai umui abidadama henia, lau dekenai danu umui abidadama henia.” (Ioane 14:1) Iesu ese unai hereva ia gwauraia badina aposetolo taudia be dika bada do idia davaria. Bona unai dika murinai dagedage do ia vara. Iesu ia diba ena aposetolo taudia be lalo-manoka dainai idia moru diba. (Ioane 16:1) Bema idia naria namonamo lasi, lalohisihisi dainai lauma dalanai idia manoka diba bena Iehova dekenai do idia tabekau lasi. Hari inai negai, Keristani taudia dekenai unai bamona ia vara diba danu. Nega daudau lalonai lalo-manoka karana ese lalohisihisi ia havaraia diba, bona iseda kudouna ia hametaua diba. (Ieremia 8:18) Ita lalo-manoka diba. Unai bamona metau negadiai, reana do ita lalo-manoka bona lauma dalanai ita mase bamona, bona Iehova tomadiho henia urana ita haboioa diba.
4. Iseda kudouna ia hesiku lasi totona, dahaka ese ita ia durua diba?
4 Inai Baibel sisibana be namo herea: “To gau badana momokani, oiemu kudouna, oiemu laloa ia havaraia gauna, do oi naria namonamo, badina be oiemu laloa dekena amo, oiemu mauri be ia heau noho.” (Aonega Herevadia 4:23) Ita lalo-manoka bona lauma dalanai ita hesiku lasi totona, Baibel ese sisiba namodia ia henia, iseda kudouna ita gimaia totona. To, gau ginigunana be, ita hesiku ena badina do ita tahua be namo.
Keristani Tomadiho be Ia Metau Lasi
5. Keristani tauna ena maduna dekenai, toana be dahaka hakoikoia herevana ia hedinarai diba?
5 Momokani, Keristani tauna ai ita lao anina be do ita hekwarahi bada. (Luka 13:24) Iesu ia gwau: “Iena satauro bema ia huaia lasi, bona lauegu murina dekenai bema ia raka lasi tauna, be lauegu diba tahua tauna lasi.” (Luka 14:27) Bema unai siri ita duahia haraga, toana be unai ese Iesu ena hereva, ena huaia auna be ia metau lasi herevana, ia hakoikoia bamona. To lasi, unai siri ese Iesu ena hereva ia durua.
6, 7. Dahaka dainai ita gwau diba, iseda tomadiho dalana be hesiku ia havaraia lasi?
6 Gaukara ta ita karaia goadagoada bona ita hekwarahi neganai, eda tauanina ia hesiku diba, to bema badina namona ta dainai ita karaia, do ita lalo-goada bona ita moale. (Hadibaia Tauna 3:13, 22) Bona badina namona ta be, iseda dekena taudia dekenai Baibel ena hereva momokanidia ita hadibaia gaukarana, ani? Danu, Dirava ena kara maoromaoro taravatudia badinaia karana dekenai iseda hekwarahi ita moalelaia, badina hahenamo momo ita abia. (Aonega Herevadia 2:10-20) Dirava ena Basileia dainai ita idia dagedage henia neganai danu, ita abia dae unai be hahenamo ta.—1 Petero 4:14.
7 Bema tomadiho koikoi ena dibura dekenai idia noho taudia ese idia huaia metauna be Iesu ena huaia auna ida ita hahegeregerea, Iesu ena huaia auna be ia metau lasi. Dirava be ita ia lalokau henia bada, bona ita ia doria lasi ita hagugurua diba lasi gaudia ita karaia totona. Iehova ena “taravatu be metau lasi.” (1 Ioane 5:3) Baibel ese ia gwauraia bamona, Keristani tomadiho momokanina be ia metau lasi. Oibe, iseda tomadiho dalana ese hesiku eiava lalo-manoka ia havaraia lasi.
‘Hametaua Gaudia Ibounai Do Ita Negea Momokani’
8. Nega momo lauma dalanai ita hesiku ena badina be dahaka?
8 Bema lauma dalanai hesiku mamina ita abia, nega momo ena badina be inai tanobada dikana ese ita latanai metau ma haida ia atoa kau. “Satani ese tanobada taudia ibounai ia gunalaia noho” dainai, lalohadai kereredia ese ita idia hagegea bona unai ese iseda Keristani gini goada karana ia hamanokaia bona hamorua diba. (1 Ioane 5:19) Anina lasi gaudia ese iseda Keristani maurina idia hametaua bona idia hadikaia diba. Unai gaudia ese ita idia hametaua bona hamanokaia diba. Unai dainai, Baibel ena hereva be maoro, ia gwau: ‘Hametaua gaudia ibounai do ita negea momokani.’—Heberu 12:1-3.
9. Kohu tahua karana ese edena bamona ita ia hametaua diba?
9 Hegeregere, tanobada taudia be ladana bada, moni, moale karadia, bona laga-ani totona idia loaloa bona kohu idia tahua momo, bona unai ese iseda lalona ia veria diba. (1 Ioane 2:15-17) Keristani taudia ginigunadia haida be taga idia tahua bona edia mauri lalonai hekwakwanai momo idia davaria. Aposetolo Paulo ia gwau: “Kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama henia kara idia rakatania vadaeni, bona mai lalohisihisi momo danu, edia mauri idia hadikaia ore vadaeni.”—1 Timoteo 6:9, 10.
10. Iesu ese ia gwauraia uhe hadoa tauna ena parabole dainai, kohu momo tahua karana dekenai dahaka ita dibaia?
10 Dirava ena hesiai gaukara lalonai ita hesiku bona ita lalo-manoka neganai, reana ena badina be kohu momo tahua karana ese iseda goada lauma dalanai ia koua noho, a? Iesu ese uhe hadoa tauna ena parabole lalonai ia hahedinaraia unai be ia vara momokani diba. Iesu ia gwau “tanobada gaudia dekenai laloa momo, bona kohu ura henia bada, bona ura dika idauidau” be ava ginigini bamona, idia ese iseda kudouna lalonai Dirava ena hereva ena tubu dalana “idia koua.” (Mareko 4:18, 19) Unai dainai Baibel ese ita ia sisiba henia: “Moni do umui ura henia dikadika lasi. To umui dekenai ia noho gauna, be inai bamona do umui laloalaia, ‘Lau dekenai noho gauna be namo, ia hegeregere vadaeni.’ Badina be Dirava be inai bamona ia hereva, ia gwau: ‘Lau ese umui do lau negea lasi, bona umui do lau rakatania lasi. Lasi bona lasi momokani.’ ”—Heberu 13:5.
11. Edena dala ai ita idia hametaua gaudia ita kokia diba?
11 Nega haida, iseda mauri dekenai hekwarahi ia havaraia gauna be kohu momo abia karana lasi, to iseda kohu ita gaukaralaia dalana. Haida be gorere, edia lalokau taudia idia mase, eiava lalo-hekwarahi ma haida dainai, idia lalo-metau bada. Idia lalo-parara, nega ta ta ai gau haida idia haidaua be namo. Headava tau bona hahine ta edia lalona idia hadaia edia moale karadia haida bona anina lasi gaukara haida idia rakatania be namo. Edia kohu ibounai idia kokia bona unai anina lasi moale gaukara idauidau edia kohu idia atoa boksi lalonai bona idia itaia diba lasi gabuna dekenai idia atoa. Nega ta ta ai, ita ibounai be iseda kohu eiava kara haida ita tahua namonamo, bona anina lasi metau gaudia ita kokia be namo, badina ita dekenai hesiku idia havaraia bona ita lalo-manoka garina.
Laloa Goevagoeva Bona Manau be mai Anina Bada
12. Ita sibona iseda kerere dainai dahaka ia vara diba?
12 Ita sibona iseda kerere, ena be idia be kerere maragidia, ese iseda mauri lalonai hekwarahi idia havaraia diba. Davida ena hereva be momokani: “Egu kerere bada ese, egu kwarana idia koua vadaeni, abata ese taunimanima ia koua bamona. Egu kerere ena metau be bada herea, lau huaia diba lasi.” (Salamo 38:4) Nega momo, kara haida ita haidaua karana ese iseda hekwarahi do ia hamaragia.
13. Laloa goevagoeva karana ese edena bamona ita ia durua diba iseda haroro gaukara ita laloa namonamo totona?
13 Baibel ese ita ia hagoadaia “aonega namona, bona laloa kehoa” do ita habadaia. (Aonega Herevadia 3:21, 22) Baibel ia gwau Dirava dekena amo ia mai aonega be ia “laloa goevagoeva.” (Iamesi 3:17) Haida idia mamia, Keristani haroro gaukarana lalonai ma haida ese idia karaia hegeregerena idia karaia be namo. To, Baibel be ita ia sisiba henia: “Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, . . . unai be namo lasi. Badina be ibounai ta ta sibona ena metau, ena metau do idia huaia.” (Galatia 6:4, 5) Momokani, Keristani tadikaka edia haheitalai namodia ese ita idia durua diba, mai iseda kudouna ibounai danu Iehova ita hesiai henia totona, to aonega namona bona laloa goevagoeva karana ese ita do ia durua ita sibona ese ita hagugurua diba tahua gaudia ita atoa totona.
14, 15. Iseda tauanina bona hemami ita naria namonamo totona, edena dala ai aonega karana ita hahedinaraia diba?
14 Anina bada lasi gaudia dekenai danu iseda laloa goevagoeva karana ese ita ia durua diba ita hesiku lasi totona. Hegeregere, namona be iseda kara ita naria namonamo ita gorere momo lasi totona. Iehova ena Witnes Taudia edia brens opesi ta dekenai idia gaukara headava tau bona hahine ta edia haheitalai, mani oi laloa. Idia hesiku lasi totona aonega karana ena namo idia diba. Taihu ia gwau: “Herevana emai gaukara ena bada be edena bamona, hanuaboi ibounai nega korikori dekenai ai mahuta. Danu, hanaihanai eksasais ai karaia. Unai ese ai ia durua bada. Ai karaia diba gaudia ai dibaia, bona unai sibona ai karaia. Ai ura lasi gau momo idia karaia diba taudia danu ai sibona ai hahegeregerea.” Hanaihanai ita be aniani maorodia ita ania bona nega korikori ai ita mahuta, a? Iseda tauanina ita naria namonamo karana amo hemami bona lauma dalanai do ita hesiku lasi.
15 Ita haida iseda tauanina durua gaudia be idau. Hegeregere, Keristani taihu ta be gabu aukadia haida dekenai ful-taim hesiai gaukara ia karaia. Ia be gorere badadia ia abia, kensa gorerena danu. Dahaka ese ia durua lalo-hekwarahi ia haheaukalaia totona? Ia gwau: “Lau dekenai regerege lasi bona lau sibona lau noho negana be mai anina bada. Bema lau lalo-hekwarahi bada bona hesiku mamina lau abia, namona be regerege lasi gabuna dekenai lau sibona lau noho, buka lau duahia bona lau laga-ani.” Aonega bona laloa namonamo karana ese ita ta ta ia durua iseda tauanina durua gaudia ita dibaia totona, bona lauma dalanai do ita hesiku lasi.
Iehova Dirava ese Ita Dekenai Goada Ia Henia
16, 17. (a) Dahaka dainai lauma dalanai iseda goada karana ita naria namonamo be gau badana? (b) Dina ta ta ena gaukara lalonai dahaka ita karaia danu be namo?
16 Lauma dalanai iseda goada karana ita naria namonamo be gau badana momokani. Bema ita be Iehova Dirava ita tura henia momokani, ena be tauanina dalanai ita hesiku, to ia tomadiho henia karana dekenai do ita hesiku lasi. Iehova ese “manoka bona hesiku taudia . . . ia hagoadaia noho, bona goada lasi taudia edia goada ia habadaia noho.” (Isaia 40:28, 29) Aposetolo Paulo be unai hereva ia mamia momokani, bona ia gwau: “Ai be hesiku diba lasi. Aiemai tauanina be idia bodaga lao noho, to aiemai lauma be dina ibounai idia matamata lao noho.”—2 Korinto 4:16.
17 Inai hereva, “dina ibounai” mani ita laloa. Ena anina be dina ta ta ai Iehova ese ita dekenai ia henia gau namodia ita gaukaralaia diba. Lagani 43 lalonai misinari gaukara ia karaia goadagoada taihu ta be nega haida lalonai tauanina dalanai ia hesiku bona ia lalo-manoka. To iena goada ia ore lasi. Ia gwau: “Lau manadalaia gauna be, dina ibounai daba maragi lau noga bona gaukara ta lau do hamatamaia lasi neganai, Iehova lau guriguri henia bona iena Hereva lau duahia guna. Dina ta ta ai unai bamona lau karaia karana ese lau ia durua lau haheauka noho ema bona hari.” Oibe, bema “dina ibounai” Iehova ita guriguri henia bona iena kara hairaidia bona iena gwauhamata ita laloa dobu hanaihanai, ita diba momokani Iehova ese ita dekenai goada do ia henia.
18. Mai edia abidadama buruka eiava gorere taudia dekenai, Baibel be dahaka hagoadaia herevana ia henia?
18 Idia buruka idia lao eiava gorere dainai idia lalo-manoka taudia dekenai, unai be heduru hereva namona. Unai bamona taudia idia lalo-metau ena badina be ma haida ida idia sibona idia hahegeregerea dainai lasi, to idia itaia idia hegeregere lasi guna idia karaia bamona idia karaia totona. Iehova ese buruka taudia ia matauraia karana ita diba be hagoadaia gauna! Baibel ia gwau: “Kara maoromaoro taudia edia mauri dinadia, be do idia momo, bona buruka taudia edia huina kurokuro, be matauraia gauna.” (Aonega Herevadia 16:31) Ena be iseda tauanina ia goada lasi, to Iehova ia diba dahaka ita karaia diba bona iseda kudouna ibounai ida Ia ita tomadiho henia karadia ia laloa bada. Bona ita karaia vadaeni gaukara namodia be Dirava ese do ia laloaboio lasi. Baibel ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui dekenai ia havaraia, vadaeni umui ese Dirava ena taudia umui durua vadaeni, bona do umui durua noho danu.” (Heberu 6:10) Ita ibounai ita moale badina be lagani momo lalodiai Iehova idia badinaia taudia be ita huanai idia noho!
Hesiku Lasi
19. Hanaihanai kara namodia ita karaia neganai, unai ese edena bamona ita ia durua diba?
19 Momo idia abia dae hanaihanai ita gaukara goadagoada karana ese hesiku ia koua diba. Unai hegeregerena, hanaihanai lauma dalanai ita karaia gaukaradia ese hemami bona lauma dalanai hesiku ia koua diba. Baibel ia gwau: “Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia. Unai dainai, dala ita davaria neganai, taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Galatia 6:9, 10) Inai hereva “kara namodia do ita karaia” mani oi itaia. Ena anina be ita ese kara haida do ita karaia. Ma haida totona ita karaia kara namodia ese ita ia durua diba Iehova ita hesiai henia karana ita hesikulaia lasi totona.
20. Lalo-manoka dadaraia totona, daika ena hebamo ita dadaraia be namo?
20 To, Dirava ena taravatu idia dadaraia taudia ita bamoa bona idia danu ita gaukara ese metau ia havaraia diba. Baibel be ita ia hadibaia: “Nadi be metau, miri danu be metau, to kavakava tauna ese ia havaraia kererena, be metau herea.” (Aonega Herevadia 27:3) Lalo-manoka bona hesiku ena mamina ita dadaraia totona, lalohadai kereredia bona ma haida edia kerere idia tahua bona maumauraia taudia edia hebamo ita dadaraia be namo.
21. Edena dala ai Keristani heboudia dekenai ma haida ita hagoadaia diba?
21 Iehova be Keristani heboudia amo lauma dalanai ita dekenai goada ia henia. Unuseniai, hahediba herevadia bona hebamo namodia amo ita hahegoada heheni diba. (Heberu 10:25) Namona be hebou dekenai kongrigeisen taudia ibounai idia hekwarahi, edia haere eiava platfom amo tok idia henia neganai haida do idia hagoadaia. Hadibaia gaukara idia gunalaia taudia edia maduna be bada, ma haida idia hagoadaia totona. (Isaia 32:1, 2) Sisiba eiava heduru herevana idia henia negadiai danu, namona be sisiba hereva be ta do ia hagoadaia dalanai idia gwauraia be namo. (Galatia 6:1, 2) Ma haida ita lalokau henia karana ese ita do ia durua Iehova hesiai henia karana ita hesikulaia lasi totona.—Salamo 133:1; Ioane 13:35.
22. Ena be ita goevadae lasi, to dahaka dainai ita goada diba?
22 Inai nega dokona lalonai Iehova tomadiho henia ena anina be do ita gaukara. Bona Keristani taudia be lalohisihisi, hisihisi bona lalo-hekwarahi idia davaria danu. Iseda goevadae lasi tauanina be ia manoka, uro bamona. To, Baibel ia gwau: “Inai diari ai abia vadaeni taudia, be hodu, manoka gaudia sibona bamona do ai noho. Inai anina be taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.” (2 Korinto 4:7) Oibe, iseda tauanina do ia hesiku, to namo lasi iseda goada ia ore eiava iseda gaukara ita hadokoa. To, namona be “mai goada danu, inai bamona do ita hereva, ‘Lohiabada be lauegu durua Tauna.’ ”—Heberu 13:6.
Riviu Kwadogina
• Edena hametaua gaudia haida ita kokia diba?
• Edena dala ai iseda Keristani tadikaka dekenai “kara namodia” ita karaia diba?
• Ita hesiku eiava lalo-manoka neganai, Iehova ese edena dala ai ita ia naria?
[Picture on page 17]
Iesu ia diba nega daudau lalonai ena aposetolo taudia idia lalo-manoka neganai, do idia moru diba
[Picture on page 18]
Haida ese idia moalelaia karadia bona anina lasi gaukara haida idia atoa siri
[Picture on page 20]
Ena be iseda goada be mai ena hetoana, to Iehova ese iseda kudouna ibounai ida ia ita tomadiho henia karana ia laloa bada