Iesu Keriso be Daika?
“Ierusalema dekenai ia vareai neganai, taoni taudia ibounai be idia herevahereva, idia gwau: ‘Inai be daika?’ Hutuma idia hereva noho: ‘Inai be peroveta tauna Iesu, Galilea ena Nasareta amo!’ ”—MATAIO 21:10, 11.
LAGANI 33 C.E. ai, Iesu Kerisoa be Ierusalema dekenai ia vareai neganai, dahaka dainai taunimanima idia herevahereva? Taoni taudia momo be Iesu bona ena hoa karadia edia sivarai idia kamonai. Bona ma haida dekenai ia idia herevalaia noho. (Ioane 12:17-19) To, unai taudia idia diba lasi, Iesu ena sivarai ese tanobada ai momo do ia durua, bona lagani handred momo amo ema bona hari unai ia vara!
Iesu ena sivarai ese taunimanima ia durua dainai, idia karaia gaudia haida oi laloa.
▪ Tanobada ena kahana momo ai idia gaukaralaia kalenda be lagani ta amo idia duahia matamaia, badina idia laloa unai lagani ai Iesu ia vara.
▪ Taunimanima bilioni rua mai kahana—idia toi toi amo ta ta—be sibona idia gwauraia Keristani taudia.
▪ Tanobada hegegemadai Islam ena memba taudia bilioni ta mai kahana ese taunimanima idia hadibaia, Iesu be “peroveta tauna badana, ia ese Aberahamo, Noa, bona Mose ia hereaia.”
▪ Iesu ese ia gwauraia aonega herevadia momo be hari taunimanima ese dina ta ta ai idia gaukaralaia. Idia haida be inai:
‘Emu vairana laurina danu oi henia.’—MATAIO 5:39.
“Henia kara ena moale be bada.”—KARA 20:35.
“Tau ta be biaguna rua edia igui hesiai gaukara ia karaia diba lasi.”—MATAIO 6:24.
“Emui pel nadi be boroma dekenai umui negea lasi.”—MATAIO 7:6.
“Gau ibounai umui ura taunimanima ese umui dekenai idia karaia hegeregerena, idia dekenai danu unai bamona do umui karaia.”—MATAIO 7:12.
‘Davana do oi laloa.’—LUKA 14:28.
Momokani, Iesu ena sivarai ese momo ia durua. To, haida be Iesu dekenai lalohadai idauidau idia abia. Unai dainai, reana do oi laloa, ‘Iesu Keriso be daika?’ Baibel sibona ese ita ia hadibaia Iesu be edeseni amo ia mai, ena mauri be edena bamona, bona dahaka dainai ia mase. Iesu dekenai idia vara gaudia oi dibaia karana ese emu mauri—hari bona vaira negana ai—do ia durua bada.
[Footnote]
a “Iesu” be Nasareta amo ia mai peroveta tauna ena ladana, bona anina be “Iehova be Hahemauri Tauna.” Inai hereva “Keriso” be dagi ladana ta, bona anina be “Horoa Tauna,” unai ese ia hahedinaraia Iesu be Dirava ese ia horoa o abia hidi, dagi badana ia henia totona.