Iesu Ena Mauri Dalana

“Lauegu aniani be lau ia siaia tauna ena ura do lau karaia bona iena gaukara do lau karaia haorea.”​​—⁠IOANE 4:⁠34.

IESU be unai hereva amo iena mauri lalonai ia laloa bada gauna ia hahedinaraia. Iesu bona ena hahediba taudia be daba ai Samaria ena ororo gabudiai idia loaloa. (Ioane 4:​6, futnout) Hahediba taudia idia laloa Iesu ia hitolo dainai, aniani haida idia henia. (Ioane 4:​31-​33) To Iesu be ena hereva amo ia laloa bada gauna ia hahedinaraia. Ia dekenai Dirava hesiai henia karana ese aniani ia hereaia. Iena hereva bona kara amo ia hahedinaraia, ia be Dirava ena ura ia laloa bada. Unai ena anina be dahaka?

▪ Dirava ena Basileia ia harorolaia bona hadibaia Baibel ese Iesu ena gaukara ia herevalaia, ia gwau: “Galilea ena gabu ibounai dekenai ia lao bona . . . ia hadibaia, Basileia ena sivarai namona ia harorolaia.” (Mataio 4:23) Iesu be Dirava ena Basileia ia harorolaia sibona lasi, to danu, aonega dalanai taunimanima ia hadibaia, ia herevalaia gaudia edia anina ia hahedinaraia, bona edia lalona ia veria. Basileia be Iesu ese ia harorolaia hereva badana.

Iesu ena haroro gaukara lalonai, kamonai taudia ia hadibaia Dirava ena Basileia be dahaka bona dahaka do ia karaia. Henunai be Basileia ena hereva momokanidia bona siri idia noho, unai ese ita do idia durua Iesu ena hereva ita lalopararalaia totona.

▪ Dirava ena Basileia be guba gavamanina, bona Iesu be Iehova ese ia abia hidi, King ai ia lao totona.​​—⁠MATAIO 4:17; IOANE 18:⁠36.

▪ Basileia ese Dirava ena ladana do ia hahelagaia bona iena ura tanobada ai do ia karaia, guba ai ia karaia bamona.​​—⁠MATAIO 6:​9, 10.

▪ Dirava ena Basileia ena lohia henunai tanobada ibounai be paradaiso ai do ia lao.​​—⁠LUKA 23:​42, 43.

▪ Kahirakahira Dirava ena Basileia do ia mai bona Iena ura tanobada totona do ia karaia.a​​—⁠MATAIO 24:​3, 7-12.

▪ Hoa karadia momo ia karaia Taunimanima idia diba Iesu be “Hadibaia Tauna.” (Ioane 13:13) To, lagani toi mai kahana ia haroro neganai, hoa karadia momo ia karaia danu. Unai ia karaia ena badina rua be inai: Ginigunana be, idia hamomokania ia be Dirava ese ia siaia. (Mataio 11:​2-6) Iharuana be, vaira negai Dirava ena Basileia ena King ai ia lao neganai, do ia karaia gaudia idia hahedinaraia. Ia karaia hoa karadia haida mani oi laloa.

▪ Lai bona hurehure bada ia koua.​​—⁠MAREKO 4:​39-41.

▪ Gorere, matakepulu, taia kudima bona aena dika taudia ia hanamoa.​​—⁠LUKA 7:​21, 22.

▪ Aniani ia habadaia dainai, hitolo taudia hutuma ia ubua.​​—⁠MATAIO 14:​17-21; 15:​34-38.

▪ Nega idaudia toi ai mase taudia ia hatoredia isi lou.​​—⁠LUKA 7:​11-15; 8:​41-55; IOANE 11:​38-44.

Mani oi laloa, unai bamona siahu bada King ta ena lohia henunai, tanobada ai mauri do ia namo herea!

▪ Iehova Dirava ena kara ia hahedinaraia Hadibaia karana dekenai, Dirava ena Natuna, Iesu Keriso, sibona ese Iehova ia gwauraia hedinarai namonamo, ta be ia hegeregerena lasi. Iesu be “Dirava ia havaraia gaudia ibounai amo ia be ginigunana,” ia be guba dekenai nega daudau Iehova ida ia noho, aneru ma haida ia hereaia. (Kolose 1:15) Inai oi laloa, Iesu dekenai dala ia noho iena Tamana ena lalohadai, ura, taravatu, bona kara, ia dibaia namonamo totona.

Iesu ia gwau diba: “Ta ese Natuna ia diba lasi to Tamana sibona, bona ta ese Tamana ia diba lasi to Natuna sibona, bona Natuna ia ura tauna sibona dekenai ia do ia hahedinaraia.” (Luka 10:22) Iesu be taunimanima ta bamona tanobada ai ia noho neganai, ia be mai ena ura bada ida iena Tamana ena kara ia gwauraia hedinarai. Iena hadibaia karana lalonai, ia be Atai Momokani Diravana ida guba dekenai ia noho neganai, ia dibaia gaudia ia herevalaia.​—⁠Ioane 8:⁠28.

Iesu be guba ai ena Tamana amo diba bada ia abia, bona tanobada ia mai neganai, unai diba be taunimanima ese idia lalopararalaia bona badinaia diba dalanai ia herevalaia.

Iesu ese ena Tamana ia gwauraia hedinarai daladia rua mani oi laloa.

▪ Iesu be ena hadibaia karana lalonai, Iehova ena ladana, ura, bona kara ia hahedinaraia.​​—⁠IOANE 3:16; 17:​6, 26.

▪ Iesu ia karaia karadia amo Iehova ena kara namodia ia hahedinaraia. Ia be ena Tamana ena kara ia hahedinaraia goevagoeva, unai be hegeregere ia gwau: ‘Bema umui ura egu Tamana ena kara umui diba, vadaeni lauegu kara umui itaia.’​​—⁠IOANE 5:19; 14:⁠9.

Iesu ena mauri dalana dekenai ita hoa. Bema Iesu ia mase ena badina ita tahua namonamo, bona ita dibaia gaudia ita badinaia, namo bada do ita abia.

[Footnote]