Koikoi Tanobadana ai Kara Momokani Badinaia

TANOBADA hegegemadai taunimanima ibounai be koikoi karadia idia karaia. Ma haida idia koia, kohu davadia idia habadaia, idia henaohenao, abitorehai idia haloua lasi, bona bisinesi koikoi karadia idia heagilaia. Keristani taudia be koikoi taudia huanai idia noho dainai, hahetoho momo idia davaria. Edena dala ai koikoi karadia ita dadaraia diba? Gau toi ese ita do idia durua: (1) Iehova gari henia karana, (2) Baibel amo iseda lalomamina ita hadibaia, bona (3) ita dekenai ia noho gaudia be hegeregere lalohadaina. Mani unai gaudia ita herevalaia.

Iehova Gari Henia Karana

Peroveta tauna Isaia ia gwau: “Lohiabada be iseda Kota Biaguna, ia sibona be iseda King.” (Isa. 33:22) Ita laloparara Iehova be siahu ibounai Diravana dainai, namona be ia ita gari henia, unai ese ita do ia durua koikoi karadia ita dadaraia totona. Aonega Herevadia 16:6 ia gwau: “Lohiabada oi gari henia neganai, oi be kara dika dekena amo oi siri noho.” Dirava ese ita do ia panisia dainai ita gari henia lasi, to ita gari henia badina ia ita matauraia, bona ita ura lasi ia ita habadua. Bona iseda guba Tamana be iseda namo ia laloa bada.​—⁠1 Pet. 3:⁠12.

Ia vara momokani sivarai ta ese unai ia hamomokania. Ricardo bona ena adavana Fernanda be edia banika akaun amo K1,600 idia kokia.a Fernanda ese unai moni ia duahia lasi, to ena paosi lalonai ia udaia sibona. Edia abitorehai haida edia davana idia karaia murinai, idia hoa badina Fernanda ena paosi lalonai K1,600 ia do noho. Idia gwau: “Reana banika hahinena be moni ma haida ia atoa kau.” Edia abitorehai be momo dainai, matamanai idia ura unai moni idia dogoatao. To, Richardo ia gwau: “Iehova ai guriguri henia ai dekenai goada do ia henia, unai moni ai henia lou totona. Ai ura Iehova ai hamoalea dainai Aonega Herevadia 27:11 ena hereva ai badinaia, bona moni be banika taudia dekenai ai henia lou.”

Baibel amo Iseda Lalomamina Ita Hadibaia

Baibel stadilaia bona ena hereva badinaia karana amo iseda lalomamina ita hadibaia diba. Unai amo ‘Dirava ena hereva ia mauri noho bona mai ena siahu’ iseda lalona bona kudouna do ia biagua. Unai ese ita do ia durua ‘mai momokani ida gau ibounai ita karaia’ totona.​—⁠Heb. 4:12; 13:⁠18.

João ena sivarai mani ita laloa. Iena abitorehai be K11,700 to abitorehai davana ia karaia lasi bona taoni ma ta dekenai ia lao. Lagani eit murinai, João be Baibel ia stadilaia bona hereva momokani ia dibaia neganai, ena lalomamina ese ia doria moni ia heniatorehai tauna do ia tahua bona ena abitorehai do ia haloua! Ena adavana bona natuna foa ia naridia bona ena pei be bada lasi dainai, heniatorehai tauna ese gwaumaoro ia henia, hua ta ta ai ena abitorehai ia haloua diba.

Ita Dekenai Idia Noho Gaudia be Hegeregere

Aposetolo Paulo ia gwau: “Dirava badinaia karana lalonai gau momo do ita abia, bema ita abia dae ita dekenai idia noho gaudia be hegeregere. . . . Unai dainai, bema ita be mai iseda aniani, dabua bona noho gabuna, unai be hegeregere.” (1 Tim. 6:​6-8) Bema unai sisiba ita badinaia, mataganigani karadia hegeregere, taravatu idia utua bisinesi karadia eiava profit badana do ita abia bisinesi dekenai do ita vareai lasi. (Aon. 28:20) Oibe, Paulo ena sisiba ita badinaia neganai, ita do ia durua Dirava ena Basileia ita atoa guna, badina ita diba Dirava ese iseda dabu gaudia do ia henia.​—⁠Mat. 6:​25-34.

To, “taga ena koikoi siahuna” dainai do ita naria namonamo, mataganigani bona kohu ura henia karadia dekenai ita moru garina. (Mat. 13:22) Mani Akana ita laloa. Israela taudia be Ioridane Sinavaina idia hanaia neganai, unai hoa karana ia itaia. To, mataganigani urana ese ia biagua dainai, Ieriko hanua amo idia abia siliva, golo bona dabua namo hereana ia henaoa. Unai dainai, Dirava ese ia hamasea. (Ios. 7:​1, 20-26) Lagani momo murinai, Iesu ia gwau: “Umui naria namonamo, kohu dekenai do umui ura henia dikadika garina”!​—⁠Luka 12:​15, BH.

Gaukara Gabunai Kara Momokani Badinaia

Ita davaria diba hahetoho haida mani ita herevalaia. Gaukara gabunai kara momokani ita badinaia anina be ita “henaohenao lasi”​—⁠ena be gaukara taudia ma haida be vaia unai idia karaia. (Tito 2:​9, 10) Jurandir be gavamani dipatmen ta dekenai ia gaukara, bona bisinesi loaloa ai ia gaukaralaia moni ibounai edia risit be bosi dekenai ia henia. To, iena gaukara turadia be idia koikoi bona moni haida idia henaoa. Unai bamona idia karaia badina edia bosi badana be edia koikoi karana ia hunia. To, ena bosi ese ia gwau henia badina ia be hereva momokani ia gwauraia, bona gaukara totona gabu ma haida dekenai ia siaia lasi. Gabeai, unai dipatmen ena akaun idia odit neganai, idia davaria Jurandir sibona be ia henaohenao lasi. Idia hanamoa bona dagi badana ta idia henia.

Kohu ia hoihoilaia tauna, André, be kampani biaguna ese ia hamaoroa kastoma dekenai kohu ena davana be nega rua do ia habadaia. Iseda tadikaka be goada abia totona Iehova ia guriguri henia bona Baibel ena hakaua herevadia ia badinaia. (Sal. 145:​18-20) Danu, ia koikoi lasi ena badina be ena biaguna ia hamaoroa, to ia ura lasi kamonai. Unai dainai, André ese ena moni gaukara namona ia rakatania. To, lagani ta murinai, biaguna ese André ia boiria lou ia gaukara totona. Ia hamaoroa hari idia be kastoma dekenai kohu ena davana korikori idia gwauraia bona André be bosi ai ia halaoa.

Abitorehai Haloua

Aposetolo Paulo be Keristani taudia ia sisiba henia ia gwau: “Namo lasi umui be mai emui abitorehai ma ta dekenai.” (Roma 13:⁠8) Reana do ita laloa abitorehai ita haloua be anina lasi badina heniatorehai tauna be taga tauna. To, Baibel ia gwau: “Kara dika taudia ese idia abiatorehai, to idia henia lou lasi.”​—⁠Sal. 37:⁠21.

To, bema ‘dika ta ia vara kava’ bona abitorehai ita haloua be auka, dahaka do ita karaia? (Had. 9:11) Francisco be Alfredo amo K16,400 ia abitorehai iena ruma davana ia karaia totona. To, iena bisinesi be hekwakwanai haida ia davaria dainai, nega korikori ai iena abitorehai ia haloua diba lasi. Francisco ese unai hekwakwanai be Alfredo dekenai ia herevalaia, bona Alfredo ese gwaumaoro ia henia hua ta ta ai ena abitorehai ia haloua totona.

Ma Haida Koia Lasi

Aposetolo edia nega ai Anania bona Sapira edia haheitalai dikana mani ita laloa. Edia tano idia hoihoilaia bona moni kahana sibona be aposetolo taudia dekenai idia henia. To, idia gwau unai be tano ena davana ibounai. Idia koikoi badina idia ura tadikaka idia laloa idia be moni bada herea idia henia, bona edia ladana do idia abia isi. To, aposetolo Petero be lauma helaga ena siahu amo edia koikoi karana ia hahedinaraia, bona Iehova ese ia hamasedia.​—⁠Kara 5:​1-11.

Baibel idia torea taudia be Anania bona Sapira bamona lasi. Mose be Baibel lalonai sibona ena kerere ia gwauraia hedinarai. Dirava ese ia hamaoroa Gwauhamata Tanona ai do ia vareai lasi, badina Mose be ena badu karana ia biagua lasi. (Num. 20:​7-13) Danu, Iona be Dirava ese Nineva hanua dekenai ia siaia neganai ia karaia gaudia bona ena manoka gaudia be Baibel lalonai ia torea.​—⁠Iona 1:​1-3; 4:​1-3.

Hereva momokani oi gwauraia totona oi gari lasi be namo, ena be ia auka. Mauri lagani 14 kekenina Nathalia ena sivarai ese unai ia hamomokania. Ia be ena test pepana ia riviulaia neganai, ia itaia tisa ese haere ta ia tikia, ena be ia kerere. Ia diba bema tisa ia hamaoroa, ena maka do ia kokia, to unai ia laloa lasi bona ena tisa ia hadibaia. Ia gwau: “Egu tama sina ese lau idia hadibaia, Iehova lau hamoalea totona hereva momokani lau gwauraia be mai anina bada. Bema egu tisa lau hadibaia lasi, egu lalomamina ese lau do ia kota henia.” Tisa be Nathalia ena kara ia moalelaia.

Kara Momokani ese Iehova Ia Hanamoa

Mauri lagani 17 kekeni ladana Giselle be paosi ta ia davaria, bona unai paosi lalonai pepa haida bona K83 idia noho. Hedmasta ese ia durua unai paosi ena biaguna idia tahua totona. Hua ta murinai hedmasta be klas ibounai vairanai revareva ta ia duahia bona Giselle bona ena ruma bese ia hanamoa, badina idia ese Baibel ena hereva amo Giselle idia hadibaia. Giselle ena “kara namodia” ese Iehova ena ladana ia hanamoa.​—⁠Mat. 5:​14-16.

Hari, ita hekwarahi kara momokani ita badinaia totona, badina momo ‘be sibodia idia laloa bada, moni idia ura henia bada, sibodia idia abia isi, idia hekokoroku, bona ma haida idia badinaia lasi.’ (2 Tim. 3:⁠2) To, Iehova gari henia karana, iseda lalomamina be Baibel amo ita hadibaia, bona ita dekenai idia noho gaudia be hegeregere lalohadaina ese ita do ia durua inai koikoi tanobadana ai kara momokani ita badinaia totona. Danu, Iehova ita tura henia diba, badina ia be ‘kara maoromaoro bona kara namodia ia ura henia.’​—⁠Sal. 11:⁠7.

[Footnote]

[Pictures on page 7]

Iehova ita gari henia dainai kara momokani sibona ita karaia

[Picture on page 8]

Iseda kara momokani ese Iehova ia hanamoa