Keristani Ruma Bese E, “Umui Hegaegae”

“Umui hegaegae noho, badina umui laloa lasi horana ai taunimanima ena Natuna do ia mai.”​—⁠LUKA 12:⁠40.

1, 2. Baibel ena hereva hegeregerena dahaka dainai ita “hegaegae” be gau badana?

“TAUNIMANIMA ena Natuna be mai hairai ida ena aneru ibounai danu do ia mai” bona “ia ese taunimanima do ia hapararaia” neganai, oi bona emu ruma bese be edena bamona? (Mat. 25:​31, 32) Ita diba lasi horana ai unai do ia vara dainai, Iesu ena hereva hegeregerena ita “hegaegae” be gau badana!​—⁠Luka 12:⁠40.

² Vanegai stadi lalonai ruma bese taudia ta ta edia maduna idia huaia namonamo bona edia abidadama do ia goada karana ita herevalaia. Hari, ita ese ruma bese taudia edia hetura karana Dirava ida idia hanamoa daladia ma haida do ita herevalaia.

‘Gau Tamona Sibona Oi Raraia’

3, 4. (a) Dahaka dainai Keristani ruma bese idia gima be namo? (b) ‘Gau tamona sibona ita raraia’ ena anina be dahaka?

³ Keriso ena mai totona ita hegaegae lalonai, ruma bese idia gima be namo, dika gau idauidau ese edia lalona ia veria bona Iehova tomadiho henia karana idia rakatania. Kohu laloa bada karana be tarapu ta, bona ruma bese momo be unai tarapu lalonai idia moru vadaeni. Unai dainai Iesu ena sisiba ita laloa ia gwau, iseda matana be “gau tamona sibona ia raraia” be namo. (Mataio 6:​22, 23 duahia.) Lamepa ese iseda raka dalana ia hadiaria dainai, ita moru lasi, unai hegeregerena iseda “kudouna ena matana” amo ita itaia gaudia ese iseda raka dalana ia hadiaria dainai, kara dika dekenai ita moru lasi.​—⁠Efe. 1:⁠18.

⁴ Laulau dalanai iseda “kudouna ena matana” ese gau tamona sibona ia raraia anina be dahaka? Anina be gau tamona sibona ita laloa bada bona ita ura hagugurua. Namo lasi iseda mauri lalonai nega bada be tanobada ena kohu ita tahua bona ruma bese durua gaudia sibona ita laloa. To, gau badana be Dirava ena Basileia do ita atoa guna. (Mat. 6:33) Unai ena anina be dina ta ta ai ita abia tauanina durua gaudia be hegeregere, bona nega bada ita henia Dirava ena hesiai gaukara ita karaia totona.​—⁠Heb. 13:⁠5.

5. Edena dala ai kekeni matamata ta ese ia hahedinaraia ena “matana” be painia gaukara sibona ia raraia?

⁵ Tama sina ese natudia idia hadibaia gau tamona sibona idia raraia neganai, hahenamo momo do idia davaria! Ethiopia dekenai ia noho kekeni matamata ena sivarai mani ita laloa. Haisikuli ai maka namodia ia abia dainai, iunivesiti lao totona skolasip ta ia abia. To, Iehova ena hesiai gaukara ia laloa bada dainai, unai skolasip ia dadaraia. Daudau lasi murinai, kampani ta ese ia dekenai gaukara ta idia henia bona idia hamaoroa hua ta ta ai K9,800 do ia abia​—⁠unai be momo ese idia abia pei ia hanaia. To, taihu matamata ena “matana” be painia gaukara sibona ia raraia. Unai dainai, ena lalona ia hadaia unai moni gaukara do ia abia lasi. Ena tama sina be dahaka idia laloa? Iena abia hidi dainai idia moale bada!

6, 7. Edena kara dekenai ‘ita naria namonamo’ be namo?

⁶ Mataio 6:​22, 23 lalonai Iesu ena sisiba be mataganigani karana ita dadaraia be namo. Inai hereva “matana be ia dika” ena anina be, ta be ia mataganigani eiava ma ta ena kohu ia ura henia dikadika. (Mat. 6:​23, futnout) Unai kara dekenai Iehova ena lalohadai be dahaka? Baibel ia gwau: “Namona be matabodaga karadia, kara miro idauidau bona mataganigani karadia be umui huanai umui herevalaia lasi.”​—⁠Efe. 5:⁠3.

⁷ Mataganigani karana be ma haida dekenai ita itaia diba, to ita sibona dekenai unai kara ita itaia lasi. Unai dainai, aonega karana be Iesu ena sisiba ita badinaia, ia gwau: “Umui naria namonamo bona mataganigani karadia idauidau ibounai dainai do umui gima noho.” (Luka 12:15) Unai ita karaia totona sibona iseda kara do ita tahua namonamo. Keristani ruma bese ese moale karadia bona kohu momo haboua karana dekenai edia nega bona moni idia haorea karana idia laloa namonamo be gau badana.

8. Kohu ta ita do hoia lasi neganai, dahaka ita laloa guna be namo?

⁸ Kohu ta oi do hoia lasi neganai, ena davana sibona oi laloa lasi, to gau ma haida oi laloa danu be namo. Hegeregere sibona oi nanadaia: ‘Bema inai kohu lau hoia, do lau gaukaralaia momo bona lau naria namonamo diba, a? Unai kohu gaukaralaia dalana lau diba namonamo totona nega bada do lau halusia, a?’ Umui matamata taudia e, namo lasi TV dekenai idia hahedinaraia kohu ese emui matana idia veria, bena tanobada ena sitaelo dabua eiava dava bada kohu ma haida umui haboua. Kohu idauidau haboua urana umui biagua be namo. Danu, namona be oi laloa bema unai kohu oi hoia, oi bona emu ruma bese taudia do ia durua taunimanima ena Natuna ena mai dainai umui noho hegaegae totona, a? Namona be Iehova ena gwauhamata oi abidadama henia, ia gwau: “Lau ese umui do lau negea lasi, bona umui do lau rakatania lasi momokani.”​—⁠Heb. 13:⁠5.

Iehova Ena Hesiai Gaukara Lalonai Ita Karaia Diba Gaudia

9. Dahaka dainai Iehova hesiai henia karana ese ruma bese ia durua diba?

⁹ Ruma bese taudia ese edia abidadama bona Dirava tura henia karana idia hagoadaia dalana ma ta be, tahua gaudia idia atoa bona hagugurua hebou. Unai amo do idia itaia, bema idia be Iehova idia hamoalea bona edia mauri lalonai mai anina bada gaudia idia atoa guna eiava lasi.​—⁠Filipi 1:10 duahia.

10, 11. Emu ruma bese ida dahaka tahua gaudia umui hagugurua noho, bona dahaka gau ma haida umui ura hagugurua?

¹⁰ Ruma bese taudia ta ta ese idia karaia diba gaudia idia abia hidi neganai, hahenamo momo do idia davaria. Hegeregere, dina ta ta ai umui karaia diba gauna ta be dina ena siri umui herevalaia hebou. Ruma bese taudia ta ta edia haere amo tama do ia diba bema edia hetura karana Iehova ida bona edia abidadama be ia goada eiava lasi. Hanaihanai Baibel duahia karana ese natudia edia duahiduahi karana ia hanamoa, bona Baibel ena hereva idia lalopararalaia namonamo diba. (Sal. 1:​1, 2) Bona ita hekwarahi iseda guriguri karana ita hanamoa totona. Danu ita hekwarahi lauma helaga ena huahua ita hahedinaraia totona. (Gal. 5:​22, 23) Reana dala ita tahua, haroro gaukara ai ita davaria taudia dekenai hebogahisi ita hahedinaraia diba. Ruma bese be unai idia karaia hebou neganai, edia natudia idia durua ma haida dekenai hebogahisi idia hahedinaraia totona, bona do idia ura painia o misinari gaukara idia karaia.

¹¹ Iehova ena hesiai gaukara lalonai oi bona emu ruma bese ida umui karaia diba gaudia umui herevalaia. Umui gaukara hebou diba emui haroro horadia umui habadaia totona, a? Ruma bese taudia be idia gaukara hebou diba mai gari lasi ida telefon amo, dala ai, bona bisinesi teritori ai idia haroro totona, a? Pablisa be momo lasi gabuna dekenai umui haroro diba, a? Ruma bese lalonai ta be gado ma ta ia dibaia, unai amo idau tano taudia dekenai sivarai namona ia harorolaia diba, a?

12. Tama be dahaka ia karaia diba iena ruma bese ena abidadama ia goada totona?

¹² Ruma bese taudia ese idia karaia diba gaudia be tama ese ia abia hidi be namo. Idia ura karaia gaudia idia palanilaia hebou diba. To, namona be emui noho dalana bona diba hegeregerena umui karaia diba tahua gauna ta umui abia hidi. (Aon. 13:12) Momokani, mai anina bada gaudia ita karaia totona, nega bada ita atoa be namo. Unai dainai, TV raraia karana dekenai nega bada oi halusia lasi, to unai nega oi gaukaralaia Dirava oi hesiai henia totona. (Efe. 5:​15, 16) Umui gaukara goada umui atoa tahua gaudia umui hagugurua totona. (Gal. 6:⁠9) Ruma bese be Iehova ena hesiai gaukara idia atoa guna neganai, ‘taunimanima ibounai do idia itaia idia be idia goada idia lao.’​—⁠1 Tim. 4:⁠15.

Ruma Bese Ena Tomadiho Negana Reaia Lasi

13. Wiki ta ta ena hebou dekenai dahaka idia haidaua, bona edena henanadai ita laloa be namo?

¹³ January 1, 2009 ai hebou ita karaia dalana idia haidaua bona unai ese ruma bese ia durudia taunimanima ena Natuna ena mai totona do idia hegaegae. Kongrigeisen Buka Stadi be Tiokratik Haroro Sikuli bona Hesiai Hebou danu idia hatamonaia. Unai dala matamata dainai, ruma bese ibounai be sediual idia karaia diba Ruma Bese Ena Tomadiho idia karaia totona, unai ese edia abidadama do ia hagoadaia. Lagani ta mai kahana ia hanaia vadaeni dainai, namona be sibona ita nanadaia: ‘Ruma Bese Ena Tomadiho eiava sibona egu stadi lau karaia totona nega lau atoa, a? Unai lau karaia dainai, Dirava kahirakahira lau lao bona egu ruma bese maurina ia hanamoa, a?’

14. (a) Ruma Bese Ena Tomadiho eiava sibona eda stadi ita karaia ena badina badana be dahaka? (b) Dahaka dainai Ruma Bese Ena Tomadiho ita karaia hanaihanai be mai anina bada?

¹⁴ Ruma Bese Ena Tomadiho eiava sibona eda stadi ita karaia ena badina badana be, ita ura Dirava kahirakahira do ita lao. (Iam. 4:⁠8) Baibel ita stadilaia hanaihanai bona iseda Havaraia Tauna ita dibaia namonamo neganai, iseda hetura karana ia ida be do ia goada. Iehova kahirakahira ita lao karana ese ita do ia durua Ia ita lalokau henia ‘mai eda kudouna ibounai, mai eda mauri ibounai, mai eda lalona ibounai, bona mai eda goada ibounai ida.’ (Mar. 12:30) Oibe, ita ura Dirava do ita kamonai henia bona ia ita tohotohoa. (Efe. 5:⁠1) “Hisihisi badana” ita naria noho lalonai, ruma bese tomadiho ita karaia hanaihanai be mai anina bada, badina unai dala amo ruma bese taudia ibounai ita noho “hegaegae” diba. (Mat. 24:21) Unai be mai anina bada ita roho mauri totona.

15. Edena dala ai Ruma Bese Ena Tomadiho negana ese ruma bese taudia ia durua idia hetura namonamo totona?

¹⁵ Ruma Bese Ena Tomadiho ita karaia ena badina ma ta be, ruma bese taudia ia durua idia hetura namonamo totona. Wiki ta ta lalonai ruma bese be Baibel idia herevalaia hebou neganai, edia hebamo karana ia hanamoa. Headava tau bona hahine be Baibel amo idia dibaia gaudia idia herevalaia hebou neganai, unai ese edia headava maurina ia hagoadaia! (Hadibaia Tauna 4:12 duahia.) Tama sina bona natudia be Dirava idia tomadiho henia hebou neganai, idia lalotamona bona lalokau heheni, unai be “taunimanima ia hatamonaia gauna hereadaena.”​—⁠Kol. 3:⁠14.

16. Taihu toi be Baibel stadilaia hebou karana amo idia davaria namo mani oi herevalaia.

¹⁶ Mani kongrigeisen ta ai vabu toi edia sivarai ita laloa. Ena be idia be varavara korikori lasi, to idia be siti tamona dekenai idia noho bona lagani momo lalodiai idia hebamo. Nega idia atoa gau haida idia karaia hebou totona, to idia ura edia abidadama ia hagoadaia gaudia idia karaia hebou danu. Unai dainai, hanuaboi ta idia makaia Baibel bukana ta, “Bearing Thorough Witness” About God’s Kingdom idia stadilaia totona. Idia ta ia gwau: “Aiemai stadi karana ai moalelaia bada dainai, hora tamona ai hanaia danu. Emai lalona ena matana amo aposetolo taudia dekenai idia vara hekwakwanai ai itaia, bona ai be unai bamona hekwakwanai ai davaria neganai, do ai karaia gaudia ai herevalaia. Bena ai herevalaia gaudia be haroro gaukara dekenai ai badinaia toho. Unai ese Basileia harorolaia bona taunimanima be hahediba taudia ai halaoa gaukarana ia hanamoa bona ai moale.” Unai idia karaia dainai, edia abidadama ia goada bona edia hetura karana ia hanamoa. Idia gwau: “Emai stadi hebou negana ai moalelaia bada.”

17. Edena dala ai Ruma Bese Ena Tomadiho negana be ibounai ese idia moalelaia diba?

¹⁷ Oi danu be unai bamona oi karaia, a? Emui ruma bese ena tomadiho eiava sibona emu stadi amo dahaka namo oi davaria? Bema unai tomadiho negana be ita reaia momo, namo do ita davaria lasi. Namona be ruma bese taudia ta ta idia hegaegae bona idia makaia negana ai stadi idia karaia. Anina lasi gaudia ese unai stadi negana ia hadikaia lasi be namo. Danu, namona be ruma bese taudia ta ta do ia durua gaudia umui stadilaia. Ruma bese taudia ibounai ese unai stadi negana idia moalelaia totona, dahaka oi karaia diba? Namona be hadibaia dala namodia umui gaukaralaia, stadi umui moalelaia bona ta ta umui matauraia.​—⁠Iam. 3:18.a

“Noga Noho” Bona “Hegaegae”

18, 19. Taunimanima ena Natuna ena mai be ia kahirakahira dainai, oi bona emu ruma bese be dahaka do umui karaia?

¹⁸ Lagani 1914 amo ema bona hari tanobada ia dika ia lao karana ese ia hahedinaraia Satani ena tanobada dokona be kahirakahira. Aramagedono be ia kahirakahira vadaeni. Kahirakahira taunimanima ena Natuna do ia mai Iehova idia dadaraia taudia ia hahemaoro henia totona. (Sal. 37:10; Aon. 2:​21, 22) Unai ita diba dainai, oi bona emu ruma bese taudia be dahaka umui karaia be namo?

¹⁹ Oi be Iesu ena sisiba oi badinaia bona ‘gau tamona sibona oi raraia,’ a? Ena be inai tanobada taudia ese kohu momo, ladana bada, bona dagi bada idia tahua, oi bona emu ruma bese be Iehova ena hesiai gaukara umui atoa guna, a? Ruma Bese Ena Tomadiho eiava sibona emu stadi ena sediual oi badinaia noho, a? Ruma Bese Ena Tomadiho negana oi badinaia dainai, ena namo oi itaia danu, a? Vanegai pura ena stadi ai ita herevalaia bamona, ruma bese lalonai tau, hahine bona natu e, emui maduna ta ta umui huaia namonamo bona umui “noga noho,” a? (1 Tes. 5:⁠6) Bema oibe, taunimanima ena Natuna ia mai neganai, oi be oi “hegaegae” vadaeni.

[Footnote]

Dahaka Oi Dibaia?

• Keristani ruma bese idia “hegaegae” daladia toi herevalaia . . .

‘gau tamona sibona idia raraia.’

Iehova hesiai henia totona tahua gaudia idia atoa bona hagugurua.

Ruma Bese Ena Tomadiho negana idia reaia lasi.

[Picture on page 13]

Bema ‘gau tamona sibona ita raraia,’ tanobada ena lalona veria gaudia do ita dadaraia