Heduru Ruma Bese Totona

1. Pura ta ta ena Sabati taravatuna amo edena dala ai Israela ruma besedia be namo idia davaria?

¹ Sabati taravatuna be Iehova ese mai ena lalokau ida ia henia heduru gauna, unai amo ruma bese be namo idia davaria. Israela taudia be dina ta ta idia karaia gaukaradia amo idia laga-ani bona idia be mai edia nega Iehova ena kara namodia bona edia hetura karana ia ida idia laloa totona. Tama sina ese unai nega idia gaukaralaia diba edia natudia dekenai Taravatu idia hadibaia totona. (Deu. 6:​6, 7) Pura ta ta ena Sabati dinana ai, Iehova ena taunimanima be edia tomadiho karana idia laloa bada.

2. Sabati taravatuna amo Iehova dekenai dahaka ita dibaia?

² Momokani, hari inai negai Iehova ese ruma bese ia haganidia lasi Sabati taravatuna idia badinaia totona. To, unai taravatu amo iseda Dirava dekenai gau ta ita dibaia. Ia be hanaihanai ena hetura karana ena taunimanima ida ia laloa bada. (Isa. 48:​17, 18) Hari inai negai, Iehova ese ena lalokau ia hahedinaraia dalana ta be Ruma Bese Ena Tomadiho amo.

3. Ruma Bese Ena Tomadiho ena badina be dahaka?

³ Ruma Bese Ena Tomadiho Ena Badina be Dahaka? January 2009 ai, inai hebou toi, Kongrigeisen Buka Stadi, Tiokratik Haroro Sikuli, bona Hesiai Hebou be dina tamona dekenai ita karaia matamaia. Unai idia karaia ena badina ta be, dala ia kehoa ruma bese taudia ese edia hetura karana Iehova ida do idia hagoadaia, unai idia karaia dalana ta be wiki ta ta ai, dina ta idia abia hidi ruma bese ena tomadiho idia karaia totona. Ruma bese ta ta idia hagoadaia, bema hegeregere, guna buka stadi totona idia gaukaralaia negana be do idia gaukaralaia edia ruma bese stadi totona, bona unai negai Baibel idia stadilaia namonamo bona ruma bese do ia durua gaudia idia herevalaia.

4. Hora tamona sibona lalonai Ruma Bese Ena Tomadiho ita karaia be namo, a? Herevalaia.

⁴ Kongrigeisen Buka Stadi lao henia totona, nega bada ita halusia ita hegoeva, buka stadi gabuna dekenai ita raka eiava motuka amo ita lao, bona unai bamona gaudia ma haida ita karaia totona. Oibe, ita momo be nega bada ita halusia unai hora tamona hebouna dekenai ita lao totona. To hari eda hebou ena sediual idia haidaua dainai, ita be mai eda nega iseda ruma bese ida Iehova ita tomadiho henia totona. Unai dainai, hora tamona sibona lalonai iseda Ruma Bese Ena Tomadiho ita karaia lasi. To, namona be iseda ruma bese taudia idia durua gaudia bona idia karaia diba gaudia ita laloa guna, bena unai hegeregerena nega ita abia hidi.

5. Ruma Bese Ena Tomadiho negana be herevahereva karana sibona, a? Herevalaia.

⁵ Ruma Bese Ena Tomadiho Negana be Herevahereva Karana Sibona, A? Headava taudia bona ruma bese mai edia natudia ese Baibel idia herevalaia hebou neganai, ta ta idia hagoadaia. (Roma 1:12) Bona ruma bese taudia be idia noho hebou namonamo. Unai dainai, Ruma Bese Ena Tomadiho negadiai, Baibel herevalaia karana be mai anina bada. To danu, ruma bese taudia ta ta ese nega idia atoa diba sibodia edia stadi idia karaia totona. Hegeregere, ruma bese ibounai idia helai hebou bona stadi idia karaia murinai, ta ta be sibodia edia stadi idia karaia diba, reana hebou totona idia hegaegae eiava magasin idia duahidia diba. Ruma bese haida be idia lalotamona unai hanuaboi ai TV do idia raraia lasi.

6. Ruma Bese Ena Tomadiho be edena bamona ita karaia diba?

⁶ Ruma Bese Ena Tomadiho Karaia Dalana. Ruma Bese Ena Tomadiho be henanadai bona haere sibona bamona ita karaia lasi. Ruma bese taudia ese Ruma Bese Ena Tomadiho negana idia moalelaia totona, ruma bese momo edia sediual be hebou dekenai ita badinaia sediual hegeregerena idia karaia. Do idia stadilaia gaudia idia hapararaia bona dala idauidau ai unai kahadia idia karaia. Hegeregere, reana idia ese Baibel idia duahia hebou, eiava hebou ena kahana haida idia hegaegaelaia, eiava haroro herevana ta idia tohoa. Ruma bese ese idia badinaia diba daladia haida be rau 6 dekenai idia noho.

7. Tama sina be dahaka idia karaia be namo?

⁷ Tama Sina be Dahaka Idia Karaia be Namo? Bema mai lalokau bona lalomanau ida Ruma Bese Ena Tomadiho idia karaia, ruma bese taudia be stadi amo gau momo do idia dibaia. Reana nega haida bema medu ia diho lasi, ruma murimuri ai Ruma Bese Ena Tomadiho umui karaia diba. Stadi ena huanai umui laga-ani sisina diba. Ruma bese haida be stadi ia ore murinai, aniani sisina idia ania. Ruma Bese Ena Tomadiho negana be natudia gwau henia eiava matahakani henia negana lasi, to tama sina ese unai nega idia gaukaralaia diba edia natudia ida idia vara hekwakwanai idia herevalaia totona. To, bema natuna ta be ia kerere, vadaeni wiki huanai dina ta idia abia hidi diba ia ida idia herevahereva totona, to natudia ma haida vairanai unai idia karaia lasi, dika ia hemarai. Namona be Ruma Bese Ena Tomadiho negana be moale negana, badina unai ese ita tomadiho henia Diravana ena kara ia hahedinaraia, ia be moale Diravana.​—1 Tim. 1:​11, NW.

8, 9. Ruma bese kwarana be dahaka ia karaia diba?

⁸ Ruma Bese Kwarana be Edena Bamona Ia Hegaegae Diba? Bema Ruma Bese Ena Tomadiho negadia ta ta totona ruma bese kwarana ia hegaegae namonamo​—hegeregere do idia stadilaia gauna bona karaia dalana ia lalohadailaia​—ruma bese taudia be namo bada do idia davaria. (Aon. 21:5) Unai gauna dekenai tau ese ena adavana ena lalohadai ia abia be namo. (Aon. 15:22) Reana nega haida ruma bese kwaradia ese edia natudia edia lalohadai idia tahua diba. Bema unai bamona idia karaia, edia natudia edia ura gaudia bona idia lalohekwarahilaia gaudia do idia dibaia.

⁹ Ruma Bese Ena Tomadiho hegaegaelaia totona ruma bese kwarana ese nega bada ia halusia be anina lasi. Badina ruma bese taudia ibounai idia diba, pura ta ta ai Ruma Bese Ena Tomadiho dekenai dahaka do idia karaia, unai dainai ruma bese kwarana be nega ibounai sediual matamata ia karaia be anina lasi. Stadi ta ta murinai, ruma bese kwarana be idia herevalaia gauna ia laloa noho dainai, unai be nega namona stadi ma ta totona ia hegaegae. Ruma bese ena kwarana haida be Ruma Bese Ena Tomadiho negana ai do idia karaia gaudia be pepa ta dekenai idia torea bona ruma bese ese idia itaia diba gabuna ta dekenai idia atoa, hegeregere frisa dekenai. Unai amo ruma bese taudia be mai moale ida Ruma Bese Ena Tomadiho negana do idia naria, bona nega ia noho idia hegaegae totona.

10. Edena bamona sibona idia noho taudia ese Ruma Bese Ena Tomadiho negana idia gaukaralaia diba?

¹⁰ Sibona Ia Noho Tauna be Edena Bamona? Sibona ia noho tadikaka eiava taihu be Ruma Bese Ena Tomadiho negana ai sibona ena stadi ia karaia diba. Ena stadi negana ai, ia ese Baibel ia duahia, hebou totona ia hegaegae, bona Gima Kohorona bona Awake! ia duahidia diba. Pablisa haida be sibodia edia stadi negadiai buka ma haida idia stadilaia. Nega haida, pablisa ma ta eiava ruma bese ta idia boiria diba bona Baibel amo lalona hagoadaia herevadia idia herevalaia diba.

11, 12. Ruma bese ena tomadiho karaia hanaihanai ena namo haida be dahaka?

¹¹ Ruma Bese Ena Tomadiho Karaia Hanaihanai Ena Namo Haida be Dahaka? Mai edia kudouna ibounai ida tomadiho momokani idia badinaia taudia be Iehova kahirakahira idia lao. Danu, ruma bese taudia ese Iehova idia tomadiho henia hebou neganai, unai ese edia hetura karana ia hagoadaia. Headava taudia rua ese idia davaria hahenamodia be inai bamona idia herevalaia: “Ai be natudia lasi bona painia gaukara ai karaia noho, ai be nega ibounai mai moale ida emai Ruma Bese Ena Tomadiho negana ai naria. Ai mamia unai ese emai hetura karana ia hagoadaia bona iseda guba Tamana kahirakahira ai lao. Ruma Bese Ena Tomadiho totona ai makaia dinana ai, ai noga neganai, ta ta dekenai ai gwau: ‘Hari hanuaboi dahaka do ita karaia? Ruma Bese Ena Tomadiho!’ ”

¹² Ruma bese ena tomadiho ese idia bisi bada ruma besedia ia durua danu. Regula painia gaukara ia karaia sina ta, mai ena natuna memero rua, ia gwau: “Guna, ruma bese stadi ai karaia momo lasi. Nega ta ta sibona ai karaia, badina lau hesiku. Lau diba lasi edena negai stadi lau karaia diba. Unai dainai inai revareva lau torea, badina lau ura umui lau tanikiu henia bada Ruma Bese Ena Tomadiho negana dainai. Hari, nega ibounai ruma bese stadi ai karaia bona namo bada ai davaria.”

13. Dahaka ese ia hahedinaraia emu ruma bese be Ruma Bese Ena Tomadiho amo namo bada do idia davaria?

¹³ Sabati taravatu hegeregerena, Ruma Bese Ena Tomadiho be iseda guba Tamana amo ia mai harihari gauna ta bona ruma bese ia durudia diba. (Iam. 1:17) Israela ruma besedia ese Sabati taravatuna idia badinaia karana amo edia hetura karana Iehova ida idia hagoadaia. Unai hegeregerena, Ruma Bese Ena Tomadiho negana ai ita karaia gaudia ese iseda ruma bese do ia durua namo bada idia davaria totona. (2 Kor. 9:6; Gal. 6:​7, 8; Kol. 3:​23, 24) Bema emui ruma bese ese unai dala namodia idia badinaia, emui ruma bese be salamo torea tauna ena hereva do idia badinaia, ia gwau: “To lau be Dirava badibadinai lau noho. Inai be namo herea momokani. Siahu Ibounai Lohiabada e, oi be lauegu magu momokani.”​—Sal. 73:28.

[Blurb on page 5]

Namona be Ruma Bese Ena Tomadiho negana be moale negana, badina unai ese ita tomadiho henia Diravana ena kara ia hahedinaraia, ia be moale Diravana

[Box on page 6]

DOGOATAO

Ruma Bese Ena Tomadiho ai Oi Karaia Diba Gaudia Haida

Baibel:

• Wiki ta ta ena Baibel duahiduahi ena kahana ta umui duahia hebou. Reana ta ese Baibel lalonai ia noho sivarai ia duahia, bona ma haida be sivarai ese ia gwauraia taudia edia hereva idia duahia diba.

• Umui duahia Baibel sivarai ena kahana ta be drama ta bamona umui karaia.

• Ruma bese taudia ta ta abia hidi Baibel ena karoa ta idia duahia guna bona unai karoa dekenai henanadai ta eiava rua idia torea. Bena ruma bese taudia ta ta ese idia torea henanadaidia dekenai hetahu idia karaia hebou.

• Wiki ta ta ai, kadi ta dekenai siri ta umui torea bona ruma bese taudia ese unai siri idia laloatao bona ena anina idia gwauraia hedinarai toho. Unai kadi ibounai umui haboua, bona wiki ta ta ai unai siridia umui riviulaia, unai amo do umui diba siri hida umui laloatao diba.

• Idia rekodi Baibel duahiduahi umui kamonai bona emu Baibel amo umui badinaia.

Hebou:

• Hebou ena kahana ta umui hegaegaelaia hebou.

• Pura vaira ena hebou dekenai do umui abia Basileia anedia umui tohoa.

• Bema Tiokratik Haroro Sikuli dekenai ta be mai ena tok eiava Hesiai Hebou dekenai mai ena haheitalai, karaia dalana umui herevalaia hebou eiava ruma bese vairanai oi tohoa.

Ruma Bese Ia Durua Gaudia:

• Memero Kekeni Edia Henanadai eiava Hadibaia Tauna Badana amo Diba Ita Abia bukana ena kahana haida herevalaia.

• Sikuli ai ia vara diba hekwakwanai ta hanaia dalana tohoa.

• Natudia noia idia davaria hekwakwanai ta dekenai hetahu idia karaia bena tama sina dekenai unai idia gwauraia hedinarai toho.

Haroro Gaukara:

• Saturday bona Sunday ena haroro totona hamatamaia herevadia umui tohoa.

• Emui haroro gaukara habadaia totona, Memorial eiava sikuli holide negadia ruma bese ese idia atoa diba tahua gaudia namodia umui herevalaia.

• Ruma bese taudia ta ta dekenai nega sisina henia, unai amo haroro gaukara ai idia davaria henanadaidia dekenai hetahu idia karaia, bena unai umui tohoa.

Lalohadai Ma Haida:

• Magasin matamatadia edia kahana haida umui duahia hebou.

• Ruma bese taudia ta ta ese magasin matamatadia lalonai idia moalelaia kahadia idia duahidia guna, bena unai idia herevalaia.

• Nega haida emu Ruma Bese Ena Tomadiho neganai, pablisa ta eiava headava taudia ta umui boiria diba, bona reana idia umui inteviu henia.

• Iseda vidio ta umui itaia bona herevalaia.

• Awake! ena kahana ta ladana “Young People Ask” eiava “For Family Review” herevalaia hebou.

• Gima Kohorona ena kahana ta ladana “Emui Natudia Hadibaia” eiava “Matamata Taudia Totona” herevalaia hebou.

• Yearbook matamata eiava distrik hebouhebou ai idia halasia buka matamatana ena kahana ta umui duahia bona herevalaia.

• Distrik eiava sekit hebouhebou murinai, hebouhebou ena hereva badadia umui riviulaia.

• Iehova ese ia havaraia gaudia itaia bona unai gaudia amo Iehova dekenai umui dibaia gaudia herevalaia.

• Ruma bese taudia idia gaukara hebou diba mapu ta, eiava unai bamona gauna ta idia karaia totona.