Emu Mauri Lalonai Daika Oi Laloa Bada?
“Oi sibona, Ataiai Momokani Diravana, ese tanobada oi biagua noho.”—SAL. 83:18.
1, 2. Ita roho mauri totona, dahaka dainai Iehova ena ladana ita diba sibona be hegeregere lasi?
REANA ta ese oi dekenai Salamo 83:18 ia hahedinaraia neganai, unai be nega ginigunana Iehova ena ladana oi itaia. Reana oi hoa badina unai siri ia gwau: “Vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” Unai nega amo ma haida be iseda lalokau Diravana, Iehova, idia diba totona oi ese unai siri be idia dekenai oi duahia.—Roma 10:12, 13.
2 Ena be taunimanima ese Iehova ena ladana idia diba be mai anina bada, to unai sibona be hegeregere lasi. Salamo torea tauna ese hereva badana ta ia hahedinaraia, bona ita roho mauri totona unai ita laloatao be gau badana. Ia gwau: “Oi sibona, Ataiai Momokani Diravana, ese tanobada oi biagua noho.” Oibe, iunives ibounai lalonai Iehova sibona be Ataiai Momokani Diravana. Ia be Havaraia Tauna dainai, gau ibounai be ia henunai idia noho be maoro. (Apok. 4:11) Unai dainai sibona ita nanadaia, ‘Lauegu mauri lalonai daika lau laloa bada?’ Iseda haere unai henanadai dekenai ita laloa namonamo be gau badana!
Eden Umana ai Ia Vara Hepapahuahu
3, 4. Edena dala ai Satani ese Heva ia koia, bona dahaka ia vara?
3 ‘Lauegu mauri lalonai daika lau laloa bada?’—Eden umana ai idia vara gaudia dainai, unai henanadai be mai anina bada. Gwau-edeede aneruna Satani ese hahine ginigunana Heva ia koia dainai, Dirava ese ia taravatua au huahua ia ania. (Gen. 2:17; 2 Kor. 11:3) Unai ese ia hahedinaraia Heva be sibona ena ura ia laloa bada bona Iehova ena lohia siahuna ia matauraia lasi. Oibe, Heva ia hahedinaraia ena mauri lalonai Iehova ia laloa bada lasi. To edena dala ai Satani ese Heva ia koia?
4 Satani be aonega dalanai iena hereva amo Heva ia koia. (Genese 3:1-5 duahia.) Dala ginigunana be, Satani ese Iehova ena ladana ia gaukaralaia lasi. To ia gwau sibona “Lohiabada Dirava.” To, Genese bukana ia torea tauna be unai siri lalonai Iehova ena ladana ia torea. Dala iharuana be, Satani ese inai hereva “taravatu” ia gaukaralaia lasi, to inai hereva “gwau” ia gaukaralaia—Heberu gado ai unai bamona idia torea. (Gen. 2:16) Unai dala amo Satani ia ura hahedinaraia Iehova ena taravatu be anina lasi. Dala ihatoina be, ena be Satani be Heva sibona ia hereva henia, to ia ese inai hereva “umui” ia gaukaralaia. Unai ia karaia neganai, ia ese Heva ena lalona ia veria sibona ena ladana ia laloa bada totona, unai amo do ia laloa ia ese ia bona ena tau totona ia hereva be maoro. Vadaeni dahaka ia vara? Heva be ia bona ena tau totona ia hereva bona gaigai ia hamaoroa: “Uma gabu dekenai idia gini au edia huahua ibounai ai ania be ia namo.”
5. (a) Satani ese Heva ena lalona ia veria dahaka ia laloa bada totona? (b) Heva be Dirava ese ia taravatua au huahua ia ania neganai, dahaka ia hahedinaraia?
5 Danu, Satani ese Dirava ena hereva ia mogea. Ia ura Adamu bona Heva idia laloa Iehova be kara auka Diravana dainai, ‘uma gabu ena au huahua ta ania lasi taravatu ia atoa.’ Bena, Satani ese Heva ena lalona ia veria sibona ena namo do ia laloa bona ena mauri do ia hanamoa bona “Dirava hegeregere” do ia noho. Unai dainai, Heva be unai au bona ena huahua sibona ia laloa bada, to ena turana namona Iehova, gau ibounai ia henia tauna, ia laloaboio. (Genese 3:6 duahia.) Heva ese unai huahua ia ania neganai, ia hahedinaraia ena mauri lalonai Iehova ia laloa bada lasi.
Iobu Ena Nega ai Ia Vara Hepapahuahu
6. Edena dala ai Satani ese Iobu ena abidadama ena badina ia hepapahuahulaia, bona Iobu be dahaka ia karaia?
6 Lagani momo murinai, abidadama tauna Iobu dekenai ia vara gaudia amo ia hahedinaraia, iena mauri lalonai ia be daika ia laloa bada. Iehova be Satani dekenai Iobu ena abidadama ia herevalaia neganai, Satani be mai badu ida ia gwau: “Bema Iobu ese oi dekena amo gau ta ia abia lasi neganai, oi dekenai do ia gari, a?” (Iobu 1:7-10 duahia.) Satani ia diba Iobu be Dirava ia kamonai henia tauna. Unai dainai, ia ese Iobu ena abidadama ena badina ia hepapahuahulaia. Ia gwau Iehova be Iobu dekenai kohu momo ia henia dainai, ia tomadiho henia to lalokau dainai unai ia karaia lasi. Iobu sibona ese unai hepapahuahu herevana ia haerelaia diba.
7, 8. Iobu be dahaka hahetoho ia davaria, bona ena haheauka karana amo dahaka ia hahedinaraia?
7 Iehova ese Satani dekenai gwaumaoro ia henia, Iobu dekenai dika idauidau ia havaraia totona. (Iobu 1:12-19) Unai gaudia idia vara neganai, Iobu be dahaka ia karaia? Baibel ia gwau, ia be “kerere ta ia karaia lasi, bona ia ese Dirava dekenai ia badu henia lasi.” (Iobu 1:22) To Satani be ena hepapahuahu herevana ia hadokoa lasi. Satani ma ia gwau: “Tau ta ese iena gau ibounai do ia negea, iena mauri do ia dogoatao totona.”a (Iobu 2:4) Satani ia gwau bema Iobu be hisihisi ia davaria, Iehova do ia laloaboio.
8 Iobu be gorere dikana ia abia bona ena toana be ia dika momokani bona ena adavana ese ia doria Dirava do ia gwauraia dika bona do ia mase. Gabeai, iena koikoi turadia toi ese idia hamaoroa ia be kara dika haida ia karaia dainai, Dirava ese ia panisia. (Iobu 2:11-13; 8:2-6; 22:2, 3) Ena be Iobu be hisihisi bada ia davaria, to ena abidadama ia dogoatao noho. (Iobu 2:9, 10 duahia.) Iena haheauka karana amo ia hahedinaraia ena mauri lalonai Iehova ia laloa bada. Danu, Iobu ese ia hahedinaraia, ena be ita be goevadae lasi taudia, to Diabolo ena hepapahuahu herevana ita haerelaia diba.—Aonega Herevadia 27:11 sekea.
Iesu Ena Haere
9. (a) Edena dala ai Satani ese Iesu ia tohoa ena ura ia atoa guna totona? (b) Iesu be dahaka ia karaia?
9 Iesu ia bapatiso murinai, Satani ese ena lalona ia veria sibona ena ura do ia atoa guna, bona ena mauri lalonai Iehova do ia laloa bada lasi. Satani ese nega toi Iesu ia tohoa. Hahetoho ginigunana ai, Iesu be dina 40 ia aniani lasi bona ia hitolo bada dainai, Satani ese ia tohoa nadi be paraoa ai ia halaoa totona. (Mat. 4:2, 3) Satani ese ia doria ena siahu do ia gaukaralaia kerere bona nadi be paraoa ai do ia halaoa bena do ia hitolo lou lasi. To, Iesu be dahaka ia karaia? Ia be Heva bamona ia karaia lasi, to Iehova ena Hereva ia gaukaralaia bona maoromaoro unai hahetoho ia dadaraia.—Mataio 4:4 duahia.
10. Dahaka dainai Satani ese Iesu ia hamaoroa dubu helaga ena atai amo do ia roho diho?
10 Hahetoho iharuana ai, Satani ese Iesu ia hamaoroa dubu helaga ena atai amo do ia roho diho. (Mat. 4:5, 6) Dahaka dainai? Satani ia gwau bema ia bero lasi, unai ese do ia hamomokania ia be “Dirava ena natuna.” Oibe, ia ura Iesu be sibona do ia laloa bada bona ena siahu do ia hekokorokulaia. Badina, Satani ia diba haida ese tau ta idia doria neganai, sibona ena ladana ia laloa bada dainai, sibona haberoa karana ta ia karaia diba. Unai dainai, Satani ese siri ta ena anina ia mogea bona Iesu ia tohoa, to Iesu be Iehova ena Hereva ia lalopararalaia goevagoeva. (Mataio 4:7 duahia.) Iesu be unai hahetoho ia dadaraia karana amo ia hamomokania, Iehova ia laloa bada.
11. Dahaka dainai Iesu ese Satani ena basileia idauidau ia dadaraia?
11 Hahetoho ihatoina ai, Satani ese Iesu dekenai tanobada ena basileia ibounai ia hahedinaraia. (Mat. 4:8, 9) Iesu be maoromaoro unai ia dadaraia. Ia diba bema unai basileia ia abia dae, Iehova, Ataiai Momokani Diravana, ena lohia siahuna ia dadaraia unai. (Mataio 4:10 duahia.) Unai hahetoho ta ta ai, Iesu be Iehova ena ladana idia hahedinaraia siridia ia gaukaralaia Satani ia haere henia totona.
12. (a) Dahaka dainai Iesu ia lalohekwarahi? (b) Iesu be dahaka ia karaia bona ena haheitalai amo dahaka ita dibaia?
12 Iesu ena tanobada maurina dokonai, hahetoho badana ta ia davaria. Iena haroro gaukara lalonai, ia hahedinaraia ia be mai ena ura bada ida ena mauri do ia bouboulaia. (Mat. 20:17-19, 28; Luka 12:50; Ioa. 16:28) Danu, ia diba Iuda taudia edia kota dekenai ia do idia gwauraia koikoi tauna bona Dirava ena ladana ia hadikaia dainai idia hamasea be maoro. Unai ia lalohekwarahilaia bada dainai ia guriguri: “Lauegu Tamana e, bema hegeregere, inai kapusi be lau amo oi kokia.” To ma ia gwau: “Lauegu ura hegeregerena lasi, to oiemu ura hegeregerena.” (Mat. 26:39) Oibe, Iesu ese Dirava ia badinaia ela bona ia mase, unai ese ia hamomokania iena mauri lalonai Iehova ia laloa bada!
Iseda Haere
13. Heva, Iobu bona Iesu Keriso edia haheitalai amo dahaka ita dibaia?
13 Ita herevalaia gaudia amo dahaka ita dibaia? Heva be sibona ena ura bona ena ladana ia laloa bada dainai, Satani ena hahetoho dekenai ia moru bona ia hahedinaraia ena mauri lalonai Iehova ia laloa bada lasi. To, Iobu ena haheitalai amo ita dibaia gauna be, ena be goevadae lasi taudia be hekwakwanai idia davaria bona idia diba lasi dahaka dainai unai ia vara, to edia haheauka karana amo idia hahedinaraia diba idia be Iehova idia laloa bada. (Iam. 5:11) Danu, herevana Iesu be haida ese idia hahemaraia to unai ia laloa lasi, bona sibona ena ladana abia isi karana ia dadaraia. Namona be iena kara ita tohotohoa danu. (Heb. 12:2) To, edena dala ai ita dibaia gaudia ita badinaia diba?
14, 15. Edena dala ai Iesu ena kara be Heva ena amo ia idau, bona edena dala ai Iesu ita tohotohoa diba? (Rau 18 ai ia noho laulau herevalaia.)
14 Hahetoho oi davaria neganai, Iehova oi laloaboio lasi. Heva be au bona ena huahua sibona ia laloa. “Ia itaia, unai au ena toana be namo herea, bona ena au huahua ia itaia be aniani gauna namona.” (Gen. 3:6) Unai be Iesu ena kara amo ia idau! Hahetoho ta ta ai, Iesu be gabeai do idia vara gaudia ia laloa. Ia ese Dirava ena Hereva bona Iehova ena ladana ia gaukaralaia Satani ena hahetoho toi ia hanaia totona.
15 Iehova ese ia moalelaia lasi karana ta ena hahetoho ita davaria neganai, dahaka ita laloa bada? Bema unai kara ita laloa momo, do ita ura unai kara dikana ita karaia. (Iam. 1:14, 15) Karaharaga namona be iseda lalona amo ura dikana ita kokia, ena be ia be hegeregere iseda tauanina ena kahana ta ita utua oho. (Mat. 5:29, 30) Iesu bamona, namona be gabeai do idia vara gaudia ita laloa—unai kara dika ita karaia neganai, iseda hetura karana Iehova ida be edena bamona? Namona be Baibel ese ia herevalaia gaudia ita laloatao. Unai dala amo ita hamomokania iseda mauri lalonai Iehova ita laloa bada.
16-18. (a) Dahaka gaudia dainai ita lalometau diba? (b) Dahaka ese ita ia durua diba ita haheauka totona?
16 Oi dekenai gau dikana ta ia vara neganai, Iehova oi badu henia lasi. (Aon. 19:3) Inai tanobada dikana ena dokona be kahirakahira dainai, Iehova ena taunimanima momo be dika idauidau idia davaria noho. Ita diba Iehova be hoa dalanai ita do ia gimaia lasi. Iobu bamona, nega haida iseda lalokau tauna ta ia mase o dika ta ita davaria dainai ita lalometau.
17 Iobu ia diba lasi dahaka dainai Iehova ese idia vara dika ia koua lasi, bona nega haida ita danu ita diba lasi dahaka dainai gau dikadia idia vara. Reana ita kamonai tadikaka haida be tano mareremarere eiava dika ma ta dainai idia mase, Haiti dekenai ia vara bamona. Eiava ita diba tadikaka goadana ta be raskol ese idia haberoa o aksiden ta dainai ia mase. Eiava ita danu be kara dika ta o hekwakwanai ta dainai ita lalometau. Unai dainai, ita gwau: ‘Iehova e, dahaka dainai inai dika lau davaria? Dahaka kerere lau karaia?’ (Hab. 1:2, 3) Unai bamona negadiai, dahaka ese ita ia durua diba ita haheauka totona?
18 Bema dika ita davaria namo lasi ita gwau Iehova be ita dekenai ia moale lasi. Iesu ena negai dika rua idia vara neganai, momo be lalohadai kererena idia abia bona idia gwau Dirava ese unai dika ia havaraia. (Luka 13:1-5 duahia.) Hari inai negai, dika momo ita davaria bona unai dika be idia “vara kava.” (Had. 9:11) Herevana dahaka hekwakwanai ita davaria, bona ena badina ita diba lasi, to ita haheauka diba bema “lalogoada ibounai ia henia Diravana” dekenai ita tabekau. Ia ese ita dekenai goada do ia henia unai amo ia ita badinaia noho diba.—2 Kor. 1:3-6.
19, 20. (a) Ena be Iesu idia hahemaraia, to dahaka dainai ia haheauka diba? (b) Dahaka ese ita do ia durua Iesu ena kara ita tohotohoa totona?
19 Namo lasi oi hekokoroku bona oi idia hahemaraia garina oi gari. Iesu be ia manau dainai, “ia dekenai idia noho gaudia ibounai ia rakatania bona igui hesiai tauna ena toana ia abia.” (Fili. 2:5-8) Ena be idia hahemaraia, to Iehova dekenai ia tabekau dainai unai ia haheaukalaia diba. (1 Pet. 2:23, 24) Unai amo Iesu be Iehova ena ura ia atoa guna, bona Iehova ese ia dekenai dagi hereadaena ia henia. (Fili. 2:9) Iesu ia ura iena hahediba taudia danu be iena kara do idia tohotohoa.—Mat. 23:11, 12; Luka 9:26.
20 Nega haida iseda abidadama dainai, ita davaria hahetoho ese ita ia hahemaraia diba. To, namona be aposetolo Paulo bamona ita lalogoada, ia gwau: “Unai gaudia dainai hisihisi lau abia danu, to lau hemarai lasi. Badina lau abidadama henia tauna lau diba bona lau diba momokani, ia dekenai lau henia gauna be do ia naria namonamo ela bona hahemaoro dinana.”—2 Tim. 1:12.
21. Ena be tanobada taudia be sibodia idia laloa bada, to oi be dahaka do oi karaia?
21 Baibel ia gwau iseda nega ai, “taunimanima be sibodia do idia laloa bada.” (2 Tim. 3:2) Unai dainai, ita hoa lasi badina ita be unai bamona taudia huanai ita noho. Namo lasi edia kara ita tohotohoa! To, bema hahetoho o dika ita davaria, o ma haida ese ita idia hahemaraia, namona be ita hamomokania iseda mauri lalonai ita be Iehova ita laloa bada!
[Footnote]
a Baibel idia diba bada taudia haida idia laloa inai hereva “kopina ena davana be kopina” ena anina be, Iobu be sibona ena mauri ia laloa bada, to ena natuna bona animal idia mase be ia laloa bada lasi. Haida idia gwau unai hereva anina be, Iobu ese iena kopina dekenai bero ia davaria ia laloa bada lasi, to gau badana be ia mauri. Hegeregere, raskol ese tau ta ia botaia gwauraia neganai, ia be ena imana amo raskol tauna ia koua, unai amo ena kwarana ia botaia lasi bona ia mauri, to reana imana dekenai bero ia davaria. Herevana, inai hereva ena anina korikorina ita diba lasi, to ita diba ena be Iobu be gau ibounai ia haboioa, unai ia laloa bada lasi. Gau badana be ia mauri.
Riviu
• Satani ese Heva ia tohoa karana amo dahaka ita dibaia?
• Iobu be hisihisi idauidau ia davaria neganai, dahaka ia karaia, bona ena kara amo dahaka ita dibaia?
• Iesu ena mauri lalonai daika ia laloa bada, bona ena kara amo dahaka ita dibaia?
[Picture on page 17]
Heva be ena hetura karana Iehova ida ia laloa bada lasi
[Picture on page 18]
Iesu be Satani ena hahetoho ia dadaraia bona Iehova ena ura ia laloa bada
[Picture on page 20]
Haiti ai tano mareremarere murinai, tadikaka be palai rumadia ai idia haroro
[Pictures on page 20]
Metau negadiai “lalogoada ibounai ia henia Diravana” dekenai ita tabekau