‘Dirava Ena Aonega be Dobu Momokani!’
“Dirava ena taga, ena aonega bona ena diba be dobu momokani! Iena hahemaoro karadia be ta ese ia tahua diba lasi bona ena dala ibounai be ta ese ia lalopararalaia diba lasi!”—ROMA 11:33.
1. Ita bapatiso vadaeni Keristani taudia eda hahenamo badana be dahaka?
OI ABIA hahenamo badana ta be dahaka? Reana kongrigeisen lalonai gaukara ta oi abia eiava sikuli o gaukara gabuna ai oi abia hahenamo ta oi laloa. To, ita bapatiso vadaeni Keristani taudia eda hahenamo badana be, Dirava momokanina, Iehova ita tura henia diba. Unai dainai, ‘Dirava be ita ia diba.’—1 Kor. 8:3; Gal. 4:9.
2. Dahaka dainai Iehova ita diba bona ia be ita ia diba be hahenamo badana ta?
2 Dahaka dainai Iehova ita diba bona ia be ita ia diba be hahenamo badana ta? Badina iunives ibounai dekenai ia sibona be gau ibounai ia hereaia, bona ia lalokau henia taudia ibounai ia gimaia. Lauma helaga ena siahu amo peroveta tauna Nahumu ia gwau: “Lohiabada be ia namo. Ia ese iena bese taudia ia durua noho, edia hekwarahi bona hisihisi dinana neganai. Lohiabada idia abidadama henia taudia, be ia ese ia naridia noho.” (Nah. 1:7; Sal. 1:6) Momokani, nega vaira ai mauri hanaihanai ita abia totona, Dirava momokani bona ena Natuna, Iesu Keriso ita diba be namo.—Ioa. 17:3.
3. Dirava ita diba namonamo totona, dahaka be mai anina bada?
3 Dirava ena ladana sibona ita diba be hegeregere lasi. Tura namona ta bamona ia ita diba be namo, bona ia ura henia gaudia bona inai henia gaudia ita diba be gau badana. Unai ita karaia neganai, ita hahedinaraia ita ura Dirava ita diba namonamo. (1 Ioa. 2:4) To gau ma haida ita diba danu be namo. Hegeregere, ia karaia gaudia, edena dala ai bona dahaka dainai unai ia karaia ita lalopararalaia be mai anina bada. ‘Dirava ena aonega be dobu momokani’ dainai, ena ura bona ia karaia gaudia ita lalopararalaia neganai ita hoa.—Roma 11:33.
Dirava be Mai Ena Ura
4, 5. (a) Baibel ese inai hereva “ura” ia gaukaralaia ena anina be dahaka? (b) Tau ta be dala idauidau ai ena ura ia hagugurua karana ena haheitalai gwauraia.
4 Baibel ese ia hahedinaraia Dirava be mai “ena ura, gunaguna negana amo ia laloa vadaeni gauna.” (Efe. 3:10, 11) Unai hereva ena anina be dahaka? Baibel ese inai hereva “ura” ia gaukaralaia neganai, ena anina be Dirava be ena ura ia lalohadailaia vadaeni, bona dala idauidau ia gaukaralaia ena ura ia hagugurua totona.
5 Haheitalai: Tau ta ia ura gabu ta dekenai do ia lao. Iena ura be unai gabu dekenai do ia ginidae. Ia lao totona reana motuka, bouti eiava peleini dekenai do ia guia bona dala idauidau ia abia hidi diba. Ia abia hidi dalana dekenai ia lao neganai, reana medu bada do ia diho, trafik ia bisi, eiava dala idia koua dainai, ena lao dalana ia haidaua bona dala ma ta ia abia hidi. To, herevana edena dala ia badinaia, ia ura lao gabuna dekenai do ia ginidae diba.
6. Edena dala ai Iehova be dala idauidau ia gaukaralaia iena ura ia hagugurua totona?
6 Unai hegeregerena, Iehova be dala idauidau ia gaukaralaia iena ura ia hagugurua totona. Taunimanima ia karaia neganai ura kwalimu ia henidia hegeregerena, ia danu ena ura ia hagugurua totona dala idauidau ia abia hidi. Iehova ese gwauhamata Garana ia hagugurua dalana mani ita laloa. Matamanai, Iehova ese Adamu bona Heva ia hamaoroa: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.” (Gen. 1:28) Eden umana ai gwau-edeede ia vara neganai, unai ese Dirava ena ura ia koua, a? Lasi momokani! Maoromaoro Iehova be dala idauna ia abia hidi iena ura ia hagugurua totona. Ia gwau “garana” ta do ia vara bona unai garana ese Adamu, Heva bona Satani ese idia havaraia dika do ia kokia.—Gen. 3:15; Heb. 2:14-17; 1 Ioa. 3:8.
7. Esodo 3:14 ena hereva amo dahaka ita dibaia?
7 Esodo 3:14 ese ia hahedinaraia, Iehova be dala idauidau bona dala matamatadia ia gaukaralaia iena ura ia hagugurua totona. Hegeregere, Mose be iena gaukara idia koua diba gaudia ia herevalaia neganai, Iehova ese ia hamaoroa: “ ‘Lau inai lau noho.’ Ma ia gwau, ‘Israela taudia dekenai inai bamona do oi haere henia, oi gwau, “Lau noho ese ia siaia lau umui dekenai.” ’ ” (Eso. 3:14) Oibe, Iehova be gau ta ai ia sibona ia halaoa diba unai amo iena ura do ia hagugurua! Aposetolo Paulo ese Roma karoa 11 ai haheitalai ta amo unai ia hahedinaraia. Ia ese olive auna ta ia herevalaia. Herevana iseda helaro be guba eiava tanobada ai mauri hanaihanai do ita abia, to unai haheitalai ena anina ita tahua namonamo neganai, Iehova ena aonega ena dobu do ita lalopararalaia.
Ia Gwauhamatalaia Garana —Iehova Ena Ura
8, 9. (a) Dahaka gau foa ese ita do idia durua olive auna ena haheitalai ita lalopararalaia totona? (b) Edena henanadai amo ita diba, Iehova be dala idauidau ia gaukaralaia iena ura ia hagugurua totona?
8 Olive auna ena haheitalai ita lalopararalaia totona, namona be gau foa ita herevalaia guna. Unai ese ita do ia durua Iehova ena ura gwauhamata garana dekenai ita lalopararalaia totona. (1) Iehova be Aberahamo ia hamaoroa “oiemu garana dainai tanobada ena bese ibounai do lau hanamoa.” (Gen. 22:17, 18, BHğ) (2) Aberahamo amo ia vara Israela besena be “hahelaga taudia” ai do idia lao. (Eso. 19:5, 6, BHğ) (3) Israela taudia be Mesia idia dadaraia neganai, Iehova be dala ma ta ai “hahelaga taudia” ma haida ia abia hidi. (Mat. 21:43; Roma 9:27-29) (4) Aberahamo ena garana ena kahana ginigunana be Iesu, to Iehova be ma haida ia abia hidi bona unai garana ena kahana iharuana ai ia halaodia.—Gal. 3:16, 29.
9 Unai point foa ita lalopararalaia neganai, ita abia dae Apokalupo bukana ese ia herevalaia 144,000 taudia be Iesu ida, guba basileia ai king bona hahelaga taudia ai do idia lao. (Apok. 14:1-4) Baibel ia gwau unai taudia be “Israela ena iduhu.” (Apok. 7:4-8) To, unai 144,000 ibounai be Israela taudia sibona, a? Unai henanadai ena haere amo ita diba Iehova be dala idauidau ia gaukaralaia iena ura ia hagugurua totona. Aposetolo Paulo ena revareva Roma taudia dekenai ese ita ia durua unai ita lalopararalaia totona.
“Hahelaga Taudia”
10. Israela bese korikorina ese ia abia hahenamo be dahaka?
10 Guna ita herevalaia hegeregerena, Israela bese korikorina sibona be Iehova ese ia abia hidi, iena “hahelaga taudia, bese helagana” ai idia lao totona. (Roma 9:4, 5 duahia.) To, gwauhamata garana ia ginidae neganai, dahaka ia vara? Aberahamo ena garana ena kahana iharuana, 144,000 taudia ibounai be Iehova ese Israela bese korikorina sibona amo ia abidia hidi, a?
11, 12. (a) Guba basileiana ai do idia lohia taudia be edena negai idia abia hidi matamaia? (b) Aposetolo edia negai idia noho Israela taudia momo be dahaka idia karaia? (c) Aberahamo ena garana ena namba ia guguru totona, Iehova be dahaka ia karaia?
11 Roma 11:7-10 duahia. Aposetolo edia negai, Israela besena be Iesu idia dadaraia. Unai dainai, idia be Aberahamo ena garana ai do idia lao ena hahenamo idia haboioa. To, Pentekoste 33 C.E. ai, Dirava ese guba ai do idia noho “hahelaga taudia” ia abia hidi neganai, kudou-maoro Israela taudia haida ese unai hahenamo idia abia danu. Bema Israela bese korikorina ida ita hahegeregerea, idia be tausen “haida sibona.”—Roma 11:5.
12 To, Aberahamo ena garana ena namba ia guguru totona, Iehova be dahaka ia karaia? (Roma 11:12, 25) Aposetolo Paulo ese ia henia haere mani ita laloa: “Ita gwau lasi Dirava ena hereva be ia moru. Badina Israela amo idia vara taudia ibounai be Israela taudia korikoridia lasi. Bona ena be idia be Aberahamo ena garana, to Dirava ena matanai idia ibounai be Aberahamo ena natudia korikoridia lasi. . . . Aberahamo ena bese amo idia vara natudia be Dirava ena natudia korikoridia lasi, to gwauhamata amo idia vara natudia be Dirava ese ia gwauraidia Aberahamo ena garana.” (Roma 9:6-8) Oibe, Iehova be ena ura ia hagugurua totona, ia gwau lasi Aberahamo ena bese sibona amo gwauhamata garana do ia abia hidi.
Olive Auna ese Ia Laulaulaia Gauna
13. Inai gaudia be dahaka idia laulaulaia: (a) olive auna, (b) ena ramuna; (c) ena gabana bona (d) ena rigidia?
13 Aposetolo Paulo ese Aberahamo ena garana ena kahana iharuana ai idia lao taudia be olive auna ena rigidia ida ia hahegeregerea.a (Roma 11:21) Uma lalonai ia tubu olive auna ese Dirava be Aberahamo ida ia karaia gwauhamata do ia hagugurua karana ia laulaulaia. Unai au ena ramuna be ia helaga bona Iehova ia laulaulaia, badina Iehova ese lauma Israela dekenai mauri ia henia. (Isa. 10:20; Roma 11:16) Unai au ena gabana ese Iesu ia laulaulaia, ia be Aberahamo ena garana ena kahana ginigunana. Unai au ena rigidia be Aberahamo ena garana ena kahana iharuana ia laulaulaia. Bona idia ese Aberahamo ena garana ena namba idia hagugurua.
14, 15. Daidia be idia “utua oho” olive rigidia bamona, bona daidia be uma ai ia tubu olive auna ai idia atoa vareai rigidia bamona?
14 Olive auna ena haheitalai lalonai, Iesu idia dadaraia Israela bese korikorina be idia “utua oho” rigidia bamona. (Roma 11:17) Idia be Aberahamo ena garana ai do idia lao ena hahenamo idia haboioa. Daidia ese edia gabu do idia abia? Israela taudia korikoridia idia laloa idia be Aberahamo ena natudia dainai, ma bese ta ese edia gabu idia abia diba lasi. To, Ioane bapatiso ese idia ia hadibaia, Iehova be mai ena siahu nadi amo Aberahamo totona natudia do ia havaraia.—Luka 3:8.
15 Vadaeni, Iehova be dahaka ia karaia iena ura ia hagugurua totona? Paulo ia gwau ia tubu kava olive auna ena rigidia be uma ai ia tubu olive auna dekenai idia atoa vareai, idia utua oho rigi edia gabu abia totona. (Roma 11:17, 18 duahia.) Unai dainai, Roma kongrigeisen ai idia noho Idau Bese horoa Keristani taudia, be Paulo ese ia herevalaia uma ai ia tubu olive auna ai idia atoa vareai rigidia bamona. Unai dala amo idia be Aberahamo ena garana ena kahana ai idia lao diba. Guna idia be ia tubu kava olive auna ena rigidia, bona idia be dala lasi Aberahamo ena garana ena kahana ai idia lao totona. To, Iehova ese dala ia kehoa idia be lauma Israela besena ai idia lao totona.—Roma 2:28, 29.
16. Petero be edena dala ai lauma Israela bese matamatana ia herevalaia?
16 Aposetolo Petero ese unai kara be inai bamona ia gwauraia: “Umui be abidadama taudia dainai, umui dekenai ia be dava bada gauna. To abidadama lasi taudia dekenai, ‘unai nadi, ruma haginia taudia ese idia dadaraia nadina be kona nadi badana ai ia lao,’ bona ia be ‘hahekwakwanaia nadina bona hamorua nadi badana.’. . . To umui be ‘abia hidi besena, king gaukara umui karaia hahelaga taudia, bese helagana, bona Dirava ena taunimanima korikoridia.’ Vadaeni dibura amo ena diari namo herea dekenai umui ia boiria tauna ena ‘kara hereadaedia be gabu ibounai dekenai umui gwauraia hedinarai be namo.’ Guna umui be Dirava ena taunimanima lasi, to hari umui be iena taunimanima. Guna Dirava ese umui ia hebogahisi henia lasi, to hari ia ese umui ia hebogahisi henia.”—1 Pet. 2:7-10.
17. Edena dala ai Iehova be “vaia idia karaia gauna lasi” ia karaia?
17 Iehova ese ia karaia gauna be kara idauna ta. Badina Paulo ia gwau, ia karaia gauna be “vaia idia karaia gauna lasi.” (Roma 11:24) Dahaka dainai? Badina biru taudia ese ia tubu kava olive auna ena rigi be uma ai ia tubu olive auna dekenai idia atoa vareai lasi. To, aposetolo taudia edia negai, biru taudia haida be unai bamona idia karaia.b Unai hegeregerena, Iehova danu be unai bamona ia karaia. Oibe, Israela taudia korikoridia idia laloa Idau Bese taudia be Basileia ena huahua namodia idia atoa diba lasi. To, Iehova ese Idau Bese taudia be Basileia ena huahua idia atoa “besena” ai ia halaodia. (Mat. 21:43) Lagani 36 C.E. ai, Dirava ese kopina ia utua lasi idau bese tauna Korenelio ia horoa neganai, dala ia kehoa Idau Bese taudia ma haida be uma ai ia tubu olive auna dekenai ia atoa vareai bamona.—Kara 10:44-48.c
18. Lagani 36 C.E. murinai Israela taudia korikoridia be dahaka idia karaia diba?
18 Unai anina be lagani 36 C.E. murinai, Israela taudia korikoridia be Aberahamo ena garana ena kahana ai idia lao diba lasi, a? Lasi, badina Paulo ia gwau: “Bema idia danu idia abidadama matamaia lou, Dirava ese idia do ia atoa vareai lou, badina ia hegeregere idia ia atoa vareai lou totona. Bema ia tubu kava olive auna amo oi idia utua oho, bona uma ai ia tubu olive auna ai idia atoa vareai, unai be vaia idia karaia gauna lasi. Unai dainai olive au ena rigi korikoridia be olive auna dekenai idia atoa vareai lou be do ia auka lasi!”—Roma 11:23, 24.
“Israela Taudia Ibounai be Hahemauri Do Idia Abia”
19, 20. Olive auna ena haheitalai amo dahaka ita dibaia?
19 Oibe, Iehova ena ura “Dirava ena Israela” dekenai be hoa dalana ai ia guguru noho. (Gal. 6:16) Paulo ena hereva bamona, “Israela taudia ibounai be hahemauri do idia abia.” (Roma 11:26) Iehova ese ia abia hidi negana ai, “Israela taudia ibounai”—ena namba ia guguru vadaeni lauma Israela taudia—be guba ai king bona hahelaga gaukara do idia karaia. Gau ta ese Iehova ena ura do ia koua diba lasi!
20 Baibel ena peroveta hereva hegeregerena, Aberahamo ena garana, unai be Iesu Keriso bona 144,000 taudia, be “idau bese taudia” dekenai hahenamo do idia mailaia. (Roma 11:12; Gen. 22:18) Unai dala amo, Dirava ena taunimanima ibounai be unai garana amo hahenamo do idia davaria. Momokani, Iehova ese ena ura ia hagugurua dalana ita stadilaia neganai, ita itaia “Dirava ena taga, ena aonega bona ena diba be dobu momokani.”—Roma 11:33.
[Footnotes]
a Ena be Israela besena be mai ena king bona hahelaga taudia, to Israela besena ibounai be hahelaga taudia ai idia lao lasi. Taravatu ia gwau king taudia be hahelaga taudia ai idia lao diba lasi. Unai dainai, Paulo ese ia herevalaia olive auna be Israela bese korikorina ia laulaulaia lasi. To ia laulaulaia gauna be, Dirava ese hahelaga besena ta do ia havaraia, bona idia be lauma Israela besena ai do idia lao. Inai diba matamata be August 15, 1983, Watchtower, rau 14-19 ai idia halasia herevana amo ia idau.
b Maua ladana “Au Ma ta Dekenai Idia Atoa Vareai Ena Badina” itaia.
c Israela taudia korikoridia be lauma bese matamatana ena kahana ai idia lao totona, Iehova ese lagani toi mai kahana ia henidia. To, unai lagani toi mai kahana ena dokonai, Iehova ese Idau Bese taudia dekenai dala ia kehoa lauma Israela ena kahana ai idia lao totona. Daniela bukana lalonai ia noho pura 70 ena peroveta hereva ese unai ia herevalaia.—Dan. 9:27.
Oi Laloatao, A?
• Iehova ese iena ura ia hagugurua dalana amo dahaka ita dibaia?
• Roma karoa 11 ai inai gaudia be dahaka idia laulaulaia . . .
olive auna?
ena ramuna?
ena gabana?
ena rigidia?
• Dahaka dainai ia tubu kava olive auna ena rigi be uma ai ia tubu olive auna dekenai idia atoa vareai be “vaia idia karaia gauna lasi”?
[Box/Picture on page 24]
Au Ma Ta Dekenai Idia Atoa Vareai Ena Badina
▪ Lucius Junius Moderatus Columella be Roma tuari tauna bona biru tauna ta. Ia be aposetolo edia negai ia noho. Taunimanima momo be ia idia diba badina ia ese hanua ena mauri bona uma karaia daladia dekenai buka 12 ia torea.
Iena buka namba 5 lalonai inai aonega herevana ia torea: “Olive au umana ena tano ia geia tauna be huahua totona ia noinoi; olive au badinai boromakau edia kukuri ia atoa tauna be huahua totona ia noinoi goadagoada; olive au rigidia ia utua oho tauna be olive auna ia fosia huahua ia atoa totona.”
Huahua idia atoa lasi audia ia herevalaia neganai, biru taudia dekenai ia gwau: “Au dekenai matu ta oi karaia bena ia tubu kava olive auna ena rigi ta oi atoa vareai bena oi kwatua; vadaeni unai au dekenai unai rigi ia tubu dainai, au be huahua momo do ia atoa.”
[Picture on page 23]
Olive auna ena haheitalai oi lalopararalaia, a?