Oi Kwalimu Diba Dalana

TAUNIMANIMA momo idia ura edia mauri lalonai idia kwalimu. Haida be moni gaukara dekenai dagi badadia idia tahua bona idia hagugurua gaudia amo taga taudia ai idia lao bona ladana bada idia abia. Haida idia ura idia karaia gaudia dekenai idia kwalimu, to unai idia hagugurua lasi.

Emu mauri ai oi tahua gauna ese ia hahedinaraia, do oi kwalimu eiava lasi. Bona mai anina bada gaudia rua be inai, emu nega bona goada oi gaukaralaia namonamo, bona kara haida oi karaia emu mauri ai gau haida oi haidaua totona.

Keristani taudia momo idia davaria, haroro gaukara ese idia dekenai moale bada ia mailaia. Matamata bona buruka taudia be ful-taim hesiai gaukara lalonai idia vareai dainai, edia mauri lalonai idia kwalimu. To, haida be hesiai gaukara dekenai idia hesiku dainai, edia mauri lalonai unai idia tahua guna lasi, to gau ma haida idia tahua. Dahaka dainai unai ia vara? Dahaka oi karaia diba, unai amo mai anina bada gaudia oi laloaboio lasi? Bona edena dala ai oi kwalimu diba?​—⁠Ios. 1:​8, NW.

Sikuli Murinai Karaia Gaudia Bona Ura Idauidau

Keristani matamata taudia ese Dirava momokani hesiai henia karana bona gau ma haida dekenai, lalohadai maorona idia abia be namo. Unai bamona idia karaia matamata taudia ita hanamoa, badina mauri namona do idia moalelaia.

To, Keristani matamata taudia haida be sikuli murinai gau idauidau momo idia karaia. Unai bamona gaudia be kerere lasi. To, Keristani matamata taudia be sibona idia nanadaia: ‘Lau karaia gaudia dekenai lau haorea nega ena bada be edena bamona? Edena bamona taudia lau bamoa? Edia kara bona lalohadai be edena bamona? Bona egu mauri lalonai dahaka be mai anina bada?’ Toana be unai bamona gaudia dekenai, ta be ena nega bada ia haorea diba, bena ia hesiku o nega be lasi ena hetura karana Dirava ida ia hagoadaia totona. Unai dainai, mai anina bada gaudia oi atoa guna ena badina oi diba be namo.​—⁠Efe. 5:​15-17.

Mani Wiktora ita laloa. Ia gwau: “Egu mauri lagani be 12 neganai, lau be volibol klab ta dekenai lau vareai. Unai nega amo, kwalimu ahudia momo lau abia. Bona dala ia noho lau be ladana bada tauna ai lau lao totona.” Gabeai, Wiktor ia laloa momo badina ena spot gadara dainai, Iehova tomadiho henia karadia ia goadalaia lasi. Nega ta, Baibel ia duahia gwauraia neganai ia mahuta. Danu, ia laloparara ia be haroro gaukarana ia moalelaia lasi. “Unai spot gadara ese egu goada ia haorea bona lau mamia egu hesiai gaukara Iehova dekenai ia maragi ia lao danu. Lau diba egu nega bada lau gaukaralaia lasi Iehova lau hesiai henia totona.”

Edukeisen Badana Oi Tahua be Namo, A?

Baibel ena hereva hegeregerena, Keristani tauna be mai ena maduna ena ruma bese be tauanina dalanai ia naria totona. (1 Tim. 5:⁠8) Unai ena anina be koledi eiava iunivesiti digri do ia abia unai ia karaia totona, a?

Edukeisen bada tahua karana ese ta ena hetura karana Iehova ida ia hadikaia diba. Mani Baibel ena sivarai ta amo unai ita laloa.

Baruku be Ieremia, peroveta tauna, ena seketere. Nega ta, Baruku ese Iehova hesiai henia karana ia laloa maragi bona ladana bada ia tahua. Iehova be unai ia itaia bona Ieremia amo Baruku ia sisiba henia: “Oi ese gau namo herea, oi sibona totona, oi tahua noho, a? Lau Lohiabada lau gwau: Inai bamona tahua kara do oi karaia lasi.”​—⁠Ier. 45:⁠5.

Baruku be dahaka “gau namo herea” ia tahua? Iuda taudia edia negai, reana Baruku be ia ura ladana bada ia abia. Eiava ia ura taga tauna ai ia lao. Herevana dahaka, to Baruku ese mai anina bada gaudia​—⁠ena hetura karana Iehova ida idia hagoadaia gaudia unai​—⁠ia laloa maragi. (Fili. 1:10) To ia ese Iehova ena sisiba hereva Ieremia amo ia kamonai henia dainai, Ierusalema idia hadikaia ore neganai, ia roho mauri.​—⁠Ier. 43:⁠6.

Unai sivarai amo dahaka ita dibaia? Gau ta ia maoro lasi dainai Baruku be sisiba ia abia. Ia be sibona totona gau namo hereadia ia tahua. Bema oi be sibona naria daladia oi diba, vadaeni oi, eiava emu tama sina eiava emu varavara edia ura hagugurua totona, oi laloa emu nega, moni, bona goada oi gaukaralaia edukeisen badana oi tahua noho totona, a?

Kompiuta gaukara ia diba momo tauna, Grzegorz, mani ita laloa. Ena gaukara turadia edia laloani herevadia dainai, kompiuta treinini ma haida ia abia. Bona ia davaria, ia be nega lasi Iehova tomadiho henia karadia ma haida ia karaia totona. Ia gwau: “Lau mamia unai ese egu hetura karana Iehova ida ia hadikaia. Iehova ena hesiai gaukara lalonai lau atoa tahua gaudia lau hagugurua lasi dainai, egu lalomamina ia dika.”

Gaukara Sibona Laloa Bada Karana

Dirava ena Hereva ese Keristani taudia ia hagoadaia idia gaukara goada, ena be idia be gaukara biagudia eiava gaukara taudia, gau badana be edia maduna idia huaia. Aposetolo Paulo ia gwau: “Herevana dahaka umui karaia, mai emui kudouna bona goada ibounai ida do umui karaia, Iehova totona umui karaia bona taunimanima totona lasi.” (Kol. 3:​22, 23) Ena be ita be gaukara goada taudia, to eda hetura karana namona eda Havaraia Tauna ida ita habadaia be namo. (Had. 12:13) Bema Keristani tauna ta be ena moni gaukara sibona ia laloa bada, vadaeni Iehova tomadiho henia karadia be gau iharuana ai ia halaoa diba.

Keristani tauna be moni gaukara sibona ia laloa bada neganai, do ia hesiku Dirava ia hesiai henia bona ena ruma bese ia naria totona. King Solomona ia gwau ta ia “hekwarahi bada” be anina lasi, unai be hegeregere “lai ia lulua kava.” Bema Keristani tauna be moni gaukara dekenai nega bada ia haorea, ia be nega daudau lalonai do ia lalometau. Unai bamona tauna be moni gaukara ena hesiai ia lao henia bona unai ese ena goada ibounai ia haorea diba. Ia be ‘ena gaukara ena anina do ia moalelaia,’ a? (Had. 3:​12, 13; 4:⁠6) Ena goada ia hegeregere ena ruma bese maduna bona Iehova tomadiho henia karadia idauidau ia karaia totona, a?

Eastern Europe ai ia noho tauna, Janusz be ena bisinesi gaukara sibona ia laloa bada. Ia gwau: “Tanobada taudia be lau idia hanamoa, badina gau idauidau lau karaia diba bona gaukara ta ta lau hagugurua. To egu hetura karana Iehova ida ia dika ia lao, bona haroro gaukara lau hadokoa. Daudau lasi, hebou lao henia karana lau rakatania. Lau hekokoroku dainai elda taudia edia sisiba lau dadaraia bona kongrigeisen lau rakatania danu.”

Emu Mauri Lalonai Oi Kwalimu Diba

Inai atikol lalonai ita be gau toi ita herevalaia. Keristani tauna ta ese unai gaudia dekenai ena nega bada ia haorea bona Iehova tomadiho henia karadia idauidau do ia manokalaia. Oi be unai gaudia ta oi karaia noho, a? Bema oibe, henunai idia noho henanadai, Baibel edia siri, bona haida edia hereva ese oi idia durua diba oi kwalimu totona.

Sikuli murinai karaia gaudia bona ura idauidau: Unai bamona gaudia sibona oi laloa bada, a? Guna Iehova tomadiho henia karadia totona oi atoa nega be hari unai gaudia dekenai oi haorea, a? Emu tadikaka bona taihu bamoa karana oi moalelaia lasi, a? Bema oi be unai bamona, namona be King Davida oi tohotohoa, ia be Iehova ia noia, ia gwau: “Egu lao dala namona, mani lau dekenai do oi hedinaraia.”​—⁠Sal. 143:⁠8.

Loaloa naria tauna ta ese Wiktor, matamanai ita herevalaia tauna, ia durua. Unai tadikaka be ia dekenai ia gwau: “Oi be mai emu ura bada ida volibol gadara oi herevalaia.” Wiktor ia gwau: “Iena hereva ese egu lalona ia kehoa. Bona lau laloparara lau karaia noho gaudia lau hadokoa be namo. Unai dainai, egu tanobada turadia lau rakatania bona kongrigeisen lalonai tura namodia lau tahua.” Hari, Wiktor be ena kongrigeisen lalonai mai goada ida Iehova ia hesiai henia. Ia gwau: “Emu turadia, emu tama sina o emu kongrigeisen elda taudia oi nanadaia, bema emu sikuli gaudia idauidau ese emu hetura karana Iehova ida ia hanamoa eiava ia hadikaia.”

Namona be emu kongrigeisen elda taudia oi hadibaia, oi ura Dirava hesiai henia gaukaradia ma haida oi karaia, ani? Buruka taudia oi bamodia eiava oi durudia, reana idia totona sitoa oi lao eiava edia ruma gaukara oi karaia diba, a? Ena be emu mauri lagani ia bada eiava maragi, to ful-taim hesiai gaukara oi karaia diba, bona oi moale ena badina be ma haida dekenai oi herevalaia.

Edukeisen badana: Iesu ese ita ia sisiba henia, ‘sibona hanamoa dalana ita tahua noho’ lasi. (Ioa. 7:18) Herevana edukeisen badana eiava maragina oi tahua, to mai ‘anina bada gaudia oi diba’ vadaeni, a?​—⁠Fili. 1:​9, 10.

Kompiuta ia diba momo tauna, Grzegorz ena mauri lalonai gau haida ia haidaua. Ia gwau: “Elda taudia edia sisiba lau abia dae bona egu mauri lalonai gau haida lau haidaua. Lau laloparara edukeisen badana lau tahua noho be anina lasi. Unai ese egu nega bona goada ia haorea.” Grzegorz be ena nega bada ia gaukaralaia kongrigeisen gaukaradia ia karaia totona. Gabeai, Singul Tadikaka Edia Baibel Sikuli ia haorea. Oibe, Iehova ese ia hadibaia totona, ‘ena nega ia gaukaralaia namonamo.’​—⁠Efe. 5:⁠16.

Moni gaukara: Moni gaukara sibona oi laloa bada dainai, oi be nega lasi Iehova tomadiho henia karadia idauidau oi karaia totona, a? Nega oi atoa emu ruma bese taudia ida oi herevahereva totona, a? Hebou dekenai emu tok henia karana oi hanamoa, a? Oi be ma haida ida hagoadaia gaudia umui herevalaia, a? “Dirava do oi gari henia, bona iena oda do oi badinaia,” bona Iehova ese oi do ia hanamoa bona ‘emu hekwarahi amo oi abia gaudia do oi moalelaia.’​—⁠Had. 2:24; 12:⁠13.

Guna ita herevalaia tauna, Janusz, ena bisinesi ia moru. Ia be moni lasi bona ena abitorehai be bada dainai, Iehova ena heduru ia tahua. Janusz ese ena mauri lalonai gau haida ia haidaua dainai, hari ia be kongrigeisen ai elda maduna ia abia bona ia regula painia danu. Ia gwau: “Lau dekenai tauanina durua gaudia be hegeregere, unai dainai Iehova tomadiho henia karadia idauidau lau karaia diba, bona lau lalomaino.”​—⁠Fili. 4:​6, 7.

Namona be nega oi atoa, mai momokani ida emu ura gaudia bona do oi tahua gaudia oi laloa namonamo totona. Iehova hesiai henia karana amo emu mauri lalonai do oi kwalimu, bona gau badana be unai oi laloa bada.

Namona be emu mauri lalonai gau haida oi haidaua, bona anina lasi gaudia haida oi rakatania, unai amo ‘do oi hamomokania Dirava ena ura be ia namo, ia ese ia abia dae bona ia goevadae.’ (Roma 12:⁠2) To emu mauri lalonai oi kwalimu diba, bema mai lalona ibounai ida Iehova oi hesiai henia.

[Footnote]

[Box/Picture on page 31]

Oi Kwalimu Diba Dalana

Gau momo ese emu nega ia haorea diba, to edena dala ai mai anina bada gaudia do oi laloa bada? Nega oi atoa emu ura bona tahua gaudia oi laloa namonamo totona, namona be henunai idia noho henanadai oi laloa dobu:

SIKULI MURINAI KARAIA GAUDIA BONA URA IDAUIDAU

▪ Sikuli murinai oi bamona taudia edia kara bona lalohadai be edena bamona?

▪ Oi karaia gaudia dekenai oi haorea nega ena bada be edena bamona?

▪ Emu mauri lalonai dahaka be mai anina bada?

▪ Guna Iehova tomadiho henia totona oi atoa nega be hari unai gaudia dekenai oi haorea, a?

▪ Edena bamona taudia oi bamoa?

▪ Emu turadia edia hebamo oi moalelaia, to tadikaka taihu edia hebamo oi moalelaia lasi, a?

EDUKEISEN BADANA

▪ Bema oi be sibona naria daladia oi diba, oi laloa emu nega, moni, bona goada oi haorea edukeisen badana oi tahua noho totona, a?

▪ Oi sibona oi naria totona, koledi eiava iunivesiti digri oi abia be namo, a?

▪ Unai ese kongrigeisen heboudia lao henia karana do ia koua, a?

▪ Mai ‘anina bada gaudia oi diba’ vadaeni, a?

▪ Oi abia dae momokani Iehova ese oi do ia naria, a?

MONI GAUKARA

▪ Oi abia hidi gaukarana dainai, ‘emu gaukara ena anina oi moalelaia,’ a?

▪ Emu goada ia hegeregere, emu ruma bese maduna bona Iehova tomadiho henia karadia idauidau oi karaia totona, a?

▪ Nega oi atoa emu ruma bese taudia ida oi herevahereva totona, a?

▪ Moni gaukara sibona oi laloa bada dainai, oi be nega lasi Iehova tomadiho henia karadia idauidau oi karaia totona, a?

▪ Emu tok henia karana be edena bamona?

[Picture on page 30]

Baruku be ladana bada bona kohu momo ia tahua dainai, Iehova ese ia sisiba henia