Dirava Ena Hereva Amo Diba Abia

Edena Dala ai Iesu Ena Mase Ita Laloatao?

Inai atikol lalonai, reana oi gwauraia vadaeni henanadai haida idia noho bona emu Baibel ai edia haere do oi davaria dalana, ia hahedinaraia. Iehova ena Witnes taudia be mai edia moale ida oi dekenai unai henanadai do idia haerelaidia.

1. Edena dala ai Iesu ena mase ita laloatao?

Iesu be ena hahediba taudia ia hamaoroa ena mase laloatao totona, anibou ta do idia karaia, bona paraoa bona wain idia gaukaralaia. Paraoa ese Iesu ena tauanina ia laulaulaia bona wain ese iena rara ia laulaulaia.​—⁠Luka 22:19, 20 duahia.

Iesu ia gaukaralaia paraoa dekenai isti idia atoa lasi. Baibel ai, nega momo isti ese kara dika ia laulaulaia. Unai dainai paraoa ese Iesu ena goevadae tauanina ia laulaulaia. Ia ese boubou gauna bamona ia henia, unai ese Mose ena Taravatu henunai idia karaia animal boubouna ia hadokoa. (Heberu 10:5, 9, 10) Wain ese Iesu ena dava bada rarana ia laulaulaia, boubou gauna ta bamona ia bubua, eda kara dika gwauatao totona.​—⁠1 Petero 1:19; 2:24; 3:18 duahia.

2. Edena negai Iesu ena mase ita laloatao?

Iesu be Pasova, Nisan 14 ai, ia mase. Iuda edia kalenda ai unai be dina ia diho murinai. Iesu ia do mase lasi hanuaboina ai, ena aposetolo taudia ida Pasova idia ania, bena ia ese memorial karaia dala matamatana ia hamatamaia, ena mase laloatao totona.​—⁠Luka 22:14, 15 duahia.

Hari, Dirava ena taunimanima be ia ese Iesu amo taunimanima be kara dika bona mase amo ia hamauria karana idia laloatao. (Esodo 12:5-7, 13, 17) Lagani ta ta ai Pasova aria be nega tamona idia karaia, unai hegeregerena Iesu ena mase laloatao hebouna be lagani ta ta ai nega tamona idia karaia, Baibel ena kalenda ai unai dina be Nisan 14, dina ia diho murinai.​—⁠Ioane 1:29 duahia.

3. Daidia ese paraoa idia ania bona wain idia inua?

Iesu be hahediba taudia dekenai wain ia henia neganai, ia gwau: “Inai kapusi ese kontraka matamatana ia laulaulaia.” (1 Korinto 11:25) Unai kontraka matamatana ese Mose ena Taravatu gwauhamatana ena gabu ia abia. Unai Taravatu ai Dirava be Israela taudia ia hamaoroa, bema ia idia kamonai henia idia be iena bese ai do idia lao. (Esodo 19:5, 6) To, Israela taudia idia kamonai lasi dainai, Ia ese kontraka matamatana ia karaia.​—⁠Ieremia 31:31 duahia.

Unai kontraka matamatana amo Iehova be bese ibounai ia hanamoa. Unai kontraka taudia be 144,000 sibona. Idia amo Dirava ese taunimanima milioni momo do ia hanamoa bona tanobada paradaisona ai do idia mauri hanaihanai. Kontraka matamatana taudia haida be hari tanobada ai Iehova idia hesiai henia. Idia sibona be paraoa idia ania bona wain idia inua, badina Iehova be idia ida kontraka matamatana ia karaia, bona Iesu ena rara amo unai ia hamomokania.​—⁠Luka 12:32; Apokalupo 14:1, 3 duahia.

4. Edena dala ai Memorial ese ita ia durua?

Lagani ta ta ai idia karaia Iesu ena mase ena Memorial ese ita ia durua Iehova ena lalokau hereadaena ita laloa bada totona. Iena Natuna ia siaia bona eda kara dika totona ia mase. Unai dainai Memorial ita lao neganai, namona be Iesu ia mase ena anina ita laloa. Danu, Iehova bona Iesu ese ita totona idia karaia gaudia dainai, eda tanikiu hahedinaraia daladia ita laloa be namo.​—⁠Ioane 3:16; 2 Korinto 5:14, 15 duahia.

Diba ma haida oi abia totona, inai buka ena rau 206-208 oi itaia. Iehova ena Witnes taudia ese idia karaia. Baibel be Dahaka Ia Hadibaia?