Buatau Do Oi Ania, A?

BEMA Sautist Asia ena strit ta ai oi loaloa bona ta be oi ia kiri henia, oi itaia ena isena be korema bona ena uduna be kakakaka. Ia kanudi neganai gabu ia hadikaia. Unai tauna be buatau ia ania.

East Africa, Pakistan, India, Sautist Asia, Papua New Guinea, bona Micronesia ai, taunimanima 10 pesen bamona be buatau idia ania. Haida be edia natudia ida dala badinai o maketi ai teibolo idia atoa bona buatau idia hoihoilaia. Ma haida be edia ruma maragidia ai laiti mai edia kala idauidau idia atoa, bona lebulebu dabua idia hahedokilaia kekeni be unuseniai idia helai, kastoma idia veria totona.

Tanobada ibounai, buatau hoihoilaia taudia be moni bada idia abia. To, buatau be dahaka? Dahaka dainai momo be buatau idia ania? Edena dala unai ese edia helt ia hadikaia? Unai kara dekenai Baibel be dahaka ia gwau? Bona edena dala ai haida ese buatau ania karana idia rakatania?

Buatau be Dahaka?

Pacific bona Sautist Asia ai ia tubu pama auna (betel pama) ai buatau huahua idia vara. Buatau ania taudia ese buatau be vaga ena raurau amo idia kumia bona ahu danu idia ania. Ahu ese drag ta ladana alkaloid ia havaraia. Haida ese buatau be spice idauidau, kuku, o digara gaudia danu idia ania, ena mamina idia hanamoa totona.

Buatau, vaga, bona ahu idia mikisi neganai, kanudi ia havaraia bona ena kala ia kakakaka. Unai dainai, buatau ania taudia be idia kanudi loulou, bona nega haida motuka amo idia hanaia neganai, raka hanai taudia idia kanudia.

Buatau Ania Karana Ena Dika!

Oral Health edia ripoti ta ia gwau: “Idaunega amo taunimanima be hebou badadia, kastom karadia, bona tomadiho karadia lalonai buatau idia ania. Buatau ania taudia idia laloa buatau ese edia tauanina do ia hadikaia lasi, bona idia ania neganai idia moale . . . To gau momo ese idia hamomokania buatau ania karana be mai ena dika.” Edena dala ai?

Drag abia karana idia koua oreadia idia gwau, buatau lalonai ia noho drag ese ta ena lalona ia veria buatau ia ania loulou totona. Haida be dina tamona lalonai buatau 50 idia ania diba! Gabeai, edia isena ia korema bona edia uduna ia toto. Oral Health ia gwau, buatau idia ania hanaihanai taudia be gorere ladana chewers mucosa idia abia​—⁠edia uduna lalona ia braon bona ia toto. Danu, ‘edia gadona ai toto ia vara,’ unai be kensa gorerena ta ladana submucous fibrosis.

Danu, buatau ania karana ese uduna lalonai kensa gorere ladana squamous cell carcinoma ia havaraia, unai toto be gadona ai ia vara danu. Sautist Asia ai idia noho taudia momo be unai gorere idia abia. Taiwan ai, buatau idia ania taudia 85 pesen bamona be uduna ai kensa gorere idia abia. Danu, The China Post ia gwau, “Lagani 40 gunanai, Taiwan ai uduna ai kensa gorere idia abia taudia edia namba be nega foa amo ia bada daekau​—⁠momo ia hamasea gorere idauidau 10 amo kensa be ta.”

Tano ma haida dekenai unai ia vara danu. Papua New Guinea Post-Courier ia gwau: “PNG Medical Society ia gwau, Papua New Guinea taudia be buatau idia ura henia bada. Lagani ta ta ai buatau ese taunimanima 2,000 bamona ia hamasea, bona momo ia hagorerea.” Doketa ta ia gwau, “Kuku ania karana bamona, buatau ania hanaihanai karana ese gorere idauidau ia havaraia,” kudou bona rara varovarodia ia hadikaia danu.

Baibel be Dahaka Ia gwau?

Baibel be medikol bukana ta lasi, bona buatau ania karana ia herevalaia lasi. To, ena hakaua herevadia ita badinaia neganai, ita do ia durua ita goeva, gorere lasi, bona mauri ita moalelaia. Henunai idia noho siri bona henanadai mani oi lalodia.

“Lauegu lalokau taudia e, . . . namona be tauanina bona kudouna hamiroa gaudia ibounai amo ita goeva, bona Dirava ita gari henia noho lalonai namona be ita helaga noho.” (2 Korinto 7:1) “Emui tauanina do umui henia . . . mai helaga, bona Dirava ese ia moalelaia.” (Roma 12:1) Bema ta be buatau ia ania, oi laloa ia be Dirava ena matanai ia helaga o goeva, a?

“[Dirava] dainai ita mauri.” (Kara 17:28) “Harihari gaudia namodia ibounai bona harihari gaudia hereadaedia ibounai be atai amo.” (Iamesi 1:17) Mauri be Dirava ena harihari gauna hereadaena. Bema ta be gorere idia havaraia karadia ia karaia, ia be unai harihari gauna ia matauraia, a?

“Tau ta be biaguna rua edia igui hesiai gaukara ia karaia diba lasi.” (Mataio 6:24) “Dala do lau kehoa lasi gau ta ese lau ia biagua totona.” (1 Korinto 6:12) Bema ta ia ura Dirava ia hamoalea, kara mirona ta ese ena mauri ia biagua be maoro, a?

“Namona be emu dekena tauna oi lalokau henia, oi sibona oi lalokau henia hegeregerena.” (Mareko 12:31) “Mai ena lalokau tauna ese ena dekena tauna ia kara dika henia lasi.” (Roma 13:10) Bema ta be buatau ia ania, bona dala o gabu idauidau ai ia kanudi, unai ese ia hahedinaraia ia be ma haida ia lalokau henia, a?

‘Ita ese ita hadoa gauna, unai gauna sibona do ita abia.’ (Galatia 6:7, 8) Unai ese ia hahedinaraia gau ibounai be sibona idia vara lasi. Unai dainai, bema kara dika ita karaia, dika do ita davaria. To, bema kara namodia ita karaia, do ita noho namo bona ia noho hanaihanai moalena do ita abia. Bema buatau oi ania momo, to oi ura Dirava matanai kara maorona oi karaia bona emu mauri ia namo, edena dala ai buatau ania karana oi rakatania diba? Namona be oi guriguri bona inai dala toi oi badinaia.

Buatau Rakatania Daladia Toi

1. Lalona hadaia. Bema oi ura buatau ania karana oi rakatania, namona be emu lalona oi hadaia unai oi karaia totona. Ena be haida idia diba buatau, kuku, bona drag ania karana ese edia helt ia hadikaia diba, to unai kara idia karaia noho. Emu lalona oi hadaia totona, namona be Baibel stadilaia karana amo oi ia Havaraia Tauna bona ena lalokau karana oi dibaia. Heberu 4:12 ia gwau: “Dirava ena hereva be ia mauri noho, bona ia be mai ena siahu.”

2. Dirava ena heduru noia. Iesu Keriso ia gwau: “Umui noinoi noho, bona umui dekenai do idia henia. Umui tahua noho, bona do umui davaria, bona iduara dekenai umui pidipidi noho, bena do idia kehoa. Badina idia noinoi taudia ibounai be do idia abia, bona idia tahua taudia ibounai be do idia davaria, bona iduara dekenai idia pidipidi taudia ibounai dekenai iduara do idia kehoa.” (Luka 11:9, 10) Bema heduru totona Iehova Dirava oi guriguri henia, do ia kamonai. Badina 1 Ioane 4:8 ia gwau: “Dirava be lalokau.” Aposetolo Paulo ese Dirava ena lalokau ia mamia danu. Ia gwau: “Lau dekenai siahu ia henia tauna amo goada lau abia gau ibounai lau karaia totona.”​—⁠Filipi 4:13.

3. Ma haida amo heduru tahua. Emu turadia ese emu kara idia hanamoa o hadikaia diba. Aonega Herevadia 13:20 ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” Unai dainai emu turadia oi abia hidi namonamo! Iehova ena Witnes taudia momo be guna buatau idia ania. To, edia abidadama tamona taudia idia bamoa bona Baibel stadilaia karana ese ia durudia, unai kara mirona idia rakatania totona.

[Box/Pictures on page 24, 25]

BUATAU ANIA KARANA IDIA RAKATANIA

Awake! ese ia intaviu henia taudia faiv be guna buatau idia ania to hari unai kara idia rakatania. Mani edia hereva oi laloa.

Dahaka dainai buatau oi ania?

Pauline: Lau maragi neganai, egu tama sina ese lau dekenai buatau ania karana idia hadibaia. Emai hanua dekenai unai be vaia ai karaia karana.

Betty: Egu mauri lagani be rua neganai, egu tamana ese lau dekenai buatau ania karana ia hadibaia. Lau bada neganai, egu kiapa ai buatau momo lau huaia loaloa, toana be lau be buatau auna ta! Buatau ania karana lau manadalaia dainai, daba ibounai buatau lau ania.

Wen-Chung: Egu mauri lagani be 16 neganai, buatau lau ania matamaia. Momo idia gwau, buatau ania karana be taunimanima badadia edia kara, bona lau ura ma haida ese lau idia abia dae.

Jiao-Lian: Buatau lau hoihoilaia, egu mauri durua gaudia abia totona. Moni abia totona, namona be lau hahedinaraia egu buatau be namo herea, unai dainai buatau lau ania. Unai amo buatau ania karana lau manadalaia.

Edena dala ai unai ese emu helt ia hadikaia?

Jiao-Lian: Egu uduna, isena, bona bibina be kakakaka momokani. Egu foto gunadia lau itaia lou neganai lau hemarai. Egu bibina ia toto dainai hisihisi lau mamia.

Pauline: Egu uduna ia toto, lau mumuta, bona kukuri ranu.

Betty: Egu metau be 35 kilogram, unai be namo lasi, badina egu tauanina ia diho momokani. Egu isena edia toana be namo lasi, bona steel wool amo lau hagoevaia.

Sam: Nega momo egu uduna ia toto bona lau kukuri ranu. Hari egu isena be tamona sibona! Ena be steel wool amo egu isena lau huria, to unai ese lau ia durua lasi.

Dahaka dainai unai kara oi rakatania?

Pauline: Korinto Iharuana 7:1 ia gwau, Dirava ia ura ‘tauanina hamiroa gaudia ibounai amo ita goeva.’ Unai dainai lau hekwarahi egu Havaraia Tauna lau hamoalea totona.

Sam: Lau ura Iehova Dirava ena lauma helaga ese lau ia hakaua, unai dainai lau guriguri Iehova ese lau do ia durua buatau ania karana lau rakatania totona. Ia ese egu guriguri ia haerelaia. Bona lagani 30 bamona lau be buatau lau ania lasi.

Jiao-Lian: Baibel lau duahia lalonai, inai hereva “emui imana umui hagoevaia” lau itaia. (Iamesi 4:8) Unai hereva dainai lau laloa, ‘Bema buatau ania karana ena dika lau diba, buatau lau ania bona hoihoilaia be maoro, a?’ Unai negai, egu lalona lau hadaia, egu hetura karana Iehova ida bona egu tauanina ia hamiroa karana lau dadaraia totona.

Dahaka namo oi davaria?

Wen-Chung: Buatau lau ania badina lau ura egu turadia ese lau idia abia dae. To hari Iehova bona tadikaka taihu tura henia karana lau moalelaia.

Sam: Hari egu tauanina ia namo bona Dirava vairanai lau goeva. Buatau dekenai moni bada lau negea lasi dainai, egu famili lau naria namonamo diba.

Pauline: Lau mamia lau goeva. Egu isena be kurokuro bona goada. Bona egu ruma bona uma gabu ai buatau kopidia o maka kakakakadia be lasi.

Betty: Egu lalomamina ia goeva bona egu helt ia namo. Hari tisa gaukara bona ful-taim haroro gaukara lau karaia.

[Pictures]

Betty

Pauline

Wen-Chung

Jiao-Lian

Sam

[Diagram/Pictures on page 23]

(For fully formatted text, see publication)

Buatau ania momo karana ese gorere badadia ia havaraia diba

Isena ia korema bona uduna ia toto

Submucous fibrosis gorere

Squamous cell carcinoma gorere

[Picture on page 22]

Buatau, vaga ena raurau lalonai