Taunimanima Durua ‘Mahuta amo Idia Noga’ Totona
“Umui be hari ita noho negana umui diba. Hari be mahuta amo umui noga negana.”—ROMA 13:11.
ANINA OI GWAURAIA DIBA, A?
Dahaka dainai Keristani taudia idia noga noho be gau badana?
Dahaka dainai ita haroro henia taudia edia noho daladia ita itaia namonamo be namo?
Dahaka dainai kamonai taudia ita matauraia be namo?
1, 2. Dahaka dainai taunimanima be mahuta amo idia noga be namo?
DRAIVA momo be idia mahuta dainai, lagani ta ta ai taunimanima tausen momo idia mase. Haida be edia moni gaukara amo idia hadokodia badina gaukara totona idia leiti o gaukara gabunai idia mahuta. To, bema ta be Dirava tomadiho henia karana dekenai ia mahuta, dika bada do ia davaria. Unai dainai Baibel ia gwau: “Ia noga noho . . . tauna be do ia moale.”—Apok. 16:14-16.
2 To, Aramagedono ia mai kahirakahira noho lalonai, taunimanima be Dirava idia tomadiho henia lasi, idia mahuta bamona. Kerisendom ena gunalaia taudia haida danu idia gwau edia dubu taudia be idia mahuta noho. Edena dala ai taunimanima idia mahuta? Dahaka dainai Keristani taudia idia noga noho be gau badana? Taunimanima be mahuta amo idia noga totona, edena dala ai ita durua diba?
EDENA DALA AI TAUNIMANIMA IDIA MAHUTA?
3. Dirava tomadiho henia karana dekenai ia mahuta tauna ena kara mani oi gwauraia.
3 Idia mahuta taudia be gaukara ta idia karaia lasi. To, Dirava tomadiho henia karana dekenai ia mahuta tauna be ia bisi, to ia karaia gaudia be Dirava ena ura hegeregerena lasi. Idia be dina ta ta ena lalohekwarahi gaudia, moale karadia, dagi bada o moni bona kohu sibona idia laloa bada. Bona idia bisi bada dainai idia be nega lasi Dirava idia laloa totona. To, Dirava idia badinaia taudia idia diba ita be “dina gabediai” ita noho, unai dainai idia gaukara goada Dirava ena ura idia karaia totona.—2 Pet. 3:3, 4; Luka 21:34-36.
4. Dahaka dainai Paulo ese Keristani taudia ia hamaoroa “namo lasi [idia] mahuta noho, haida idia mahuta bamona”?
4 Mani 1 Tesalonika 5:4-8 duahia. Unai siri lalonai aposetolo Paulo ese Keristani taudia ia hamaoroa “namo lasi [idia] mahuta noho, haida idia mahuta bamona.” Ena hereva ena anina be dahaka? “Ita mahuta noho” bema Dirava ena kara maoromaoro taravatudia ita badinaia lasi, bona ia taravatua karadia ita karaia. “Ita mahuta noho” dalana ma ta be, bema ita laloa Iehova ese kara dika taudia do ia haorea negana be daudau. Unai dainai namona be ita naria namonamo, kara dika taudia edia kara bona lalohadai ese ita ia hadikaia garina.
5. Idia mahuta noho bamona taudia be dahaka lalohadai kereredia idia abia?
5 Haida idia laloa Dirava be ia noho lasi dainai, do ia hahemaoro henidia lasi. (Sal. 53:1) Idia laloa Dirava be ita ia laloa lasi dainai, ia ita laloa be anina lasi. Ma haida idia laloa, herevana edena dubu idia lao, Dirava idia tura henia diba. Unai bamona lalohadai kereredia idia abia taudia be idia mahuta noho bamona, bona idia noga be namo. Edena bamona idia ita durua diba?
ITA NOGA NOHO BE NAMO
6. Dahaka dainai ita noga noho be gau badana?
6 Bema ita noga noho, ma haida ita durua diba idia noga totona. To edena dala ai ita noga noho diba? Namona be Dirava idia tomadiho henia lasi taudia edia kara ita dadaraia. Baibel ia gwau edia kara be “dibura karadia,” hegeregere matabodaga karadia, regerege bada pati, gwau-edeede hemarai karadia idia karaia, idia kekero, heai, bona mama. (Roma 13:11-14 duahia.) Taunimanima edia kara ita dadaraia be auka, unai dainai ita gima noho be namo. Mani ita laloa, draiva ia diba bema ia mahuta, ia mase diba. Unai hegeregerena, bema Keristani tauna ta be Dirava tomadiho henia karana ai ia mahuta, ia mase diba!
7. Bema teritori ai taunimanima idia kamonai lasi, edena lalohadai kererena ita abia diba?
7 Bema ita laloa iseda teritori taudia ibounai be sivarai namona do idia abia dae lasi bona edia lalohadai do idia haidaua lasi, haroro gaukara do ita laloa bada lasi. (Aon. 6:10, 11) Reana do ita laloa, ‘Bema idia ura lasi sivarai namona idia kamonai, dahaka dainai do lau hekwarahi idia lau durua totona?’ Momokani, hari momo idia ura lasi idia kamonai, to reana gabeai edia mauri lalonai gau ta ia vara dainai edia lalona idia haidaua. Unai dainai bema ita noga noho, idia ita durua diba. Unai ita karaia totona, namona be haroro dala matamatadia ita gaukaralaia, unai amo taunimanima edia lalona ita veria diba Basileia ena sivarai idia abia dae totona. Ita noga noho totona, ita haroro ena badina ita laloatao be gau badana.
ISEDA HARORO GAUKARA BE MAI ANINA BADA
8. Dahaka dainai iseda haroro gaukara be mai anina bada?
8 Namona be ita laloatao, ena be taunimanima idia kamonai lasi, to iseda haroro gaukara amo Iehova ena ladana ita hanamoa. Danu, inai nega dokona ai Dirava be haroro gaukara amo ena ura ia hagugurua noho. Kahirakahira Dirava ese sivarai namona idia abia dae lasi taudia do ia hahemaoro henia. (2 Tes. 1:8, 9) Bema ita laloa “kara maoromaoro taudia bona kara maoromaoro lasi taudia be do idia toreisi lou” dainai, ita haroro goadagoada be anina lasi—unai be lalohadai kererena. (Kara 24:15) Baibel amo ita diba “nanigosi” bamona taudia be Dirava ese do ia haorea momokani. Haroro gaukara be Dirava ena hebogahisi ia hahedinaraia dalana ta, badina unai ese dala ia kehoa taunimanima be edia mauri idia haidaua bona mauri hanaihanai idia abia totona. (Mat. 25:32, 41, 46; Roma 10:13-15) Bema ita haroro lasi, edena bamona taunimanima be hahemauri sivaraina idia kamonai diba?
9. Edena dala ai haroro gaukara ese oi bona ma haida ia durua?
9 Sivarai namona harorolaia karana amo namo bada ita abia danu. (1 Timoteo 4:16 duahia.) Oibe, Iehova bona ena Basileia harorolaia gaukarana ese emu abidadama bona lalokau Dirava dekenai ia hagoadaia, ani? Danu, unai ese oi ia durua Keristani kara namodia oi hahedinaraia noho totona. Bona haroro gaukara amo emu lalokau Dirava dekenai oi hahedinaraia neganai, oi moale. Momo idia moale badina idia itaia edia Baibel stiuden taudia be hereva momokani idia dibaia, bona lauma helaga ena heduru amo edia kara idia haidaua.
ITAIA NAMONAMO
10, 11. (a) Edena dala ai Iesu bona Paulo be haheitalai namodia? (b) Edena dala ai haroro gaukara ai ita noga diba?
10 Dala idauidau ai taunimanima ita durua diba sivarai namona idia abia dae totona. Hegeregere, ita haroro neganai taunimanima edia noho dalana ita itaia namonamo. Iesu be haheitalai namona. Ia be goevadae tauna dainai taunimanima edia lalohadai ia diba. Hegeregere, Farisea tauna ia badu neganai, Iesu be unai ia diba, ena be hereva ta ia gwauraia lasi. Danu, kara dika hahine ta ia helalo-kerehai neganai, Iesu be unai ia diba. Bona vabu ta ese ena mauri durua monina ibounai be moni mauana ai ia udaia neganai, Iesu be unai ia diba danu. (Luka 7:37-50; 21:1-4) Oibe, Iesu be taunimanima ia durudia diba badina edia dabu gaudia ia diba. Herevana ita be goevadae lasi taudia, to ma haida ita durua diba. Aposetolo Paulo be unai bamona ia karaia danu. Ia be dala idauidau ai ia haroro taunimanima ibounai ia durudia totona.—Kara 17:22, 23, 34; 1 Kor. 9:19-23.
11 Bema Iesu bona Paulo bamona ita noga, taunimanima ese idia laloa bada gaudia do ita diba, bona edia lalona ita veria diba. Hegeregere, ruma ta oi lao henia neganai, oi itaia gauna amo do oi diba ruma tauna be edena hanua amo, dahaka ia laloa bada, ia headava bona ia be mai ena natudia, eiava ia be singul. Bema ia be gaukara ta ia karaia noho, namona be ena gaukara oi hanamoa.
12. Ita haroro lalonai, dahaka ita laloatao be namo?
12 Bema iseda haroro gaukara ita laloa bada, do ita ura lasi gau ta ese ia hadikaia. Momokani, haroro ai eda herevahereva karana amo ta ta ita hagoadaia diba. To laloaboio lasi, ita haroro ena badina be ita ura ma haida dekenai sivarai namona ita hadibaia. (Had. 3:1, 7) Unai dainai do ita naria namonamo, namo lasi ita bamoa tauna ida gau haida ita kikilaia momo. To, namona be ruma tauna dekenai do ita herevalaia kiki herevana ita herevalaia hebou. Danu, ena be mobael fon be mai ena heduru, to ruma tauna ida iseda herevahereva karana ia hadikaia lasi totona, eda mobael fon ita koua be namo.
KAMONAI TAUNA LALOA BADA
13, 14. (a) Kamonai tauna ena lalohadai be edena bamona do ita diba? (b) Haroro dala namodia ita dibaia totona, daidia ita bamoa be namo?
13 Haroro ai oi davaria taudia idia hereva neganai, oi kamonai namonamo be namo. Edia lalohadai oi diba totona, dahaka henanadai oi gaukaralaia diba? Reana idia laloa gauna be tomadiho be momo, dagedage karadia idia bada idia lao, o gavamani dekenai idia moale lasi. Eiava Dirava idia ura dibaia taudia dekenai Dirava ia havaraia mauri gaudia oi herevalaia, o Baibel ena sisiba ese idia ia durua dalana oi herevalaia diba. Taunimanima ibounai, Dirava idia abia dae lasi taudia danu, ese guriguri karana idia laloa bada. To momo idia daradara bema Dirava be edia guriguri ia kamonai o lasi. Ma haida be inai henanadai ena haere idia ura diba: Dirava be guriguri ibounai ia kamonai, a? Bema lasi, ia kamonai totona dahaka ita karaia be namo?
14 Haroro gaukara idia manadalaia pablisa ita bamoa neganai, idia amo haroro dala namodia do ita dibaia. Reana oi itaia, idia be ruma tauna idia hereva henia neganai, henanadai aukadia idia gaukaralaia lasi. Danu, edia vairana ena toana bona gado regena amo idia hahedinaraia ruma tauna ena lalohadai idia laloa bada.—Aon. 15:13.
HEMATAURAI BONA AONEGA HAHEDINARAIA
15. Dahaka dainai kamonai taudia ita matauraia be namo?
15 Oi mahuta mase lalonai ta ese oi ia hanogaia neganai, do oi moale, a? Momo be ma haida ese mahuta amo idia hanogaia haraga neganai, idia moale lasi. Unai hegeregerena, Dirava idia laloa bada lasi taudia be mai hemataurai ida ita durudia be namo. Dahaka do oi karaia bema oi haroro henia tauna be ia badu? Namona be mai manau ida ia oi hereva henia, unai amo oi hahedinaraia ia oi matauraia. Ia oi tanikiu henia bena oi raka siri. (Aon. 15:1; 17:14; 2 Tim. 2:24) Bema mai hemataurai ida ia oi kara henia, reana gabeai Witnes tauna ma ta ia vadivadi neganai do ia kamonai.
16, 17. Edena dala ai haroro gaukara ai hemataurai bona aonega ita hahedinaraia diba?
16 Nega haida ena be ruma tauna ese koua herevadia ia gwauraia, to ia oi hereva henia diba. Reana unai bamona ia hereva badina ia ura lasi emu haroro herevana ia kamonai. To Baibel ena hereva ia abia dae totona, namona be mai hemataurai bona aonega ida lalona veria henanadai ta oi gaukaralaia.—Kolose 4:6 duahia.
17 Nega haida bema ita itaia ruma tauna be ia bisi bada, aonega karana be ia ita hanamoa bona ita rakatania. To, nega haida reana hereva kwadogina ta oi gwauraia diba. Pablisa haida be miniti ta lalonai Baibel siri ta idia duahia bona ruma tauna dekenai henanadai ta idia rakatania, nega ma ta ai unai idia herevalaia totona. To, nega haida haroro hereva kwadogina ese dala ia kehoa ruma tauna ida oi herevahereva noho totona. Reana emu haroro lalonai, unai oi tohoa diba.
18. Nega bona gabu idauidau ai ita haroro totona, dahaka ita karaia diba?
18 Bema ita hegaegae namonamo, nega bona gabu idauidau ai ita davaria taudia ita haroro henidia diba. Tadikaka taihu momo be edia poketi o baege lalonai buka, magasin o pepapepa idia udaia. Bona dala ia kehoa negadiai Baibel ena siri ta idia duahia. Reana emu kongrigeisen ai haroro naria tauna o painia taudia oi noia diba, nega bona gabu idauidau ai haroro daladia umui hegaegaelaia totona.
EDA VARAVARA ITA DURUDIA
19. Dahaka dainai eda varavara ita haroro henidia noho be namo?
19 Ita ibounai ita ura iseda varavara ita durudia sivarai namona idia abia dae totona. (Ios. 2:13; Kara 10:24, 48; 16:31, 32) Nega ginigunana ita haroro henidia neganai, idia kamonai lasi dainai ita ura lasi ita hereva henidia lou. Reana ita laloa herevana dahaka ita hereva o karaia, edia lalona do idia haidaua lasi. To reana gau ta ia vara dainai, edia mauri o lalohadai idia haidaua diba. Eiava idia dekenai hereva momokani gwauraia dalana oi hanamoa dainai, hari idia ura kamonai.
20. Edena dala ai ita hahedinaraia ita be eda varavara ita matauraia?
20 Iseda varavara edia hemami ita matauraia be namo. (Roma 2:4) Haroro ai ita davaria taudia ita hereva henidia hegeregerena, namona be mai manau bona hemataurai ida eda varavara ita hereva henidia. Reana idia dekenai hereva momokani oi herevalaia sibona lasi, to hereva momokani ese oi ia durua dalana be emu kara amo oi hahedinaraia danu. (Efe. 4:23, 24) Bona oi hahedinaraia Iehova be oi ia hadibaia dainai emu mauri oi moalelaia. (Isa. 48:17) Oibe, namona be emu varavara dekenai Keristani tauna ena mauri dalana oi hahedinaraia.
21, 22. Eda varavara ita durua noho karana ese dahaka namo ia havaraia diba? Ekspiriens herevalaia.
21 Taihu ta ia gwau: “Lau hekwarahi egu kara bona hereva amo egu ruma bese taudia 13 lau haroro henidia totona. Lagani ta ta idia ta ta lau tore henidia. Bona lagani 30 lalonai, egu famili huanai lau sibona be Witnes hahinena ta.”
22 Dina ta unai taihu ese ena kakana ia rini henia. Bona ena kakana ia gwau ia be edia dubu ena haroro tauna ia noia ia ida Baibel do ia stadilaia, to unai ia vara lasi. Taihu ese ia hamaoroa ia ese Baibel amo do ia durua neganai, ena kakana ia gwau: “Namo, to oi lau hamaoroa, lau be Iehova ena Witnes hahinena ai do lau lao diba lasi.” Taihu ese Baibel be Dahaka Ia Hadibaia? bukana ta ia siaia. Dina ta ta taihu ese ia rini henia, to ena kakana be unai buka ia do duahia lasi. Taihu ia gwau: “Ia lau rini henia lou neganai, ia lau noia ena buka do ia abia bona miniti 15 lalonai unai buka ai idia noho siri haida do ai duahia bona herevalaia hebou. Gabeai, ia ura ena stadi negana ai halataia. To unai murinai ena stadi totona ia ese lau ia rini henia, nega haida lau do mahuta lalonai ia rini, bona nega haida dina ta lalonai nega rua ia rini. Murina laganina ai ia bapatiso, bona lagani ta murinai painia gaukara ia hamatamaia.”
23. Dahaka dainai taunimanima ita durua mahuta amo idia noga totona be gau badana?
23 Taunimanima be mahuta amo idia noga totona, namona be ita aonega bona haroro goadagoada be gau badana. Momo be sivarai namona idia abia dae noho. Hua ta ta ai taunimanima 20,000 mai kahana be bapatiso idia abia. Unai dainai, namona be aposetolo Paulo ese Akipo dekenai ia henia sisiba ita badinaia. Ia gwau: ‘Lohiabada amo oi abia hesiai gaukarana do oi naria namonamo bona oi hagugurua.’ (Kol. 4:17) Haroro ita goadalaia ena badina be wiki vaira ena stadi ai do ita herevalaia.
OI NOGA NOHO DALANA
▪ Nega bada atoa Dirava ena ura karaia totona
▪ “Dibura karadia” dadaraia
▪ Gima lasi karana ena dika laloa
▪ Emu teritori ai idia noho taudia laloa bada
▪ Haroro dala matamatadia tohoa
▪ Oi haroro ena badina laloatao