BAIBEL HENANADAI EDIA HAERE
Dirava ena ladana be daika?
Iseda famili taudia ta ta bona ita ubua animal be mai edia ladana. Unai dainai, ita gwau diba Dirava be mai ena ladana danu. Baibel ai Dirava ena dagi ladadia be momo, hegeregere Siahu Ibounai Diravana, Siahu Ibounai Lohiabadana, bona Havaraia Tauna, to ia be mai ena ladana korikorina.—Esodo 6:3, duahia.
Dirava ia ura taunimanima ibounai ese iena ladana idia diba. Salamo 83:18 ia gwau: “Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”
Dahaka dainai Dirava ena ladana ita gaukaralaia be namo?
Eda tura namodia ida ita herevahereva neganai, edia ladana ita gaukaralaia
Dirava ia ura iena ladana korikorina ita gaukaralaia. Eda tura namodia ida ita herevahereva neganai, edia ladana ita gaukaralaia. Dirava ita hereva henia neganai ena ladana ita gaukaralaia danu be mai anina bada, ani? Ma danu, Iesu Keriso ese ita ia hagoadaia Dirava ena ladana ita gaukaralaia totona.—Mataio 6:9; Ioane 17:26 duahia.
To, Dirava ena turana ai ita lao totona, iena ladana ita diba sibona be hegeregere lasi, namona be iena kara ita diba danu. Hegeregere, Dirava ena kara be edena bamona? Dirava kahirakahira ita lao diba, a? Unai henanadai edia haere be Baibel ai oi davaria diba.