Gau ta ese Oi Ia Koua Lasi Hairai Oi Abia Totona

1, 2. (a) Heberu gado herevana idia hahanaia “hemataurai” bona “hairai” ena anina be dahaka? (b) Inai stadi ai edena henanadai edia haere do ita tahua?

INAI hereva “matauraia,” hanamoa, o “hairai” oi kamonai neganai, dahaka oi laloa? Dirava ese ia havaraia gaudia edia hairai oi laloa, a? (Sal. 19:1) Eiava taunimanima ese taga taudia, aonega taudia, bona idia kwalimu taudia idia hanamoa o matauraia bada karana oi laloa, a? Baibel lalonai, Heberu gado herevana ena anina be metau, idia gaukaralaia “hemataurai” bona “hairai” idia herevalaia totona. Idaunegai, koini be golo o siliva amo idia karaia. Bema koini ta ena metau be bada, anina be ia be moni badana bona gau momo ia hoia diba. Unai dainai, Heberu gado herevana idia hahanaia “matauraia” o “hairai” ese dava bada o hairai bada gauna ta ia herevalaia.

² Nega momo taunimanima ese siahu bona ladana bada taudia idia matauraia. To, Dirava ese ta dekenai hairai ia henia totona, unai tauna amo dahaka kara ia tahua? Aonega Herevadia 22:4 ia gwau: “Lohiabada do oi gari henia, bona do oi manau. Inai bamona oi karaia neganai, kohu, bona matauraia, bona mauri do oi davaria.” Bona Iamesi ia gwau: “Iehova ena matanai umui sibona umui hamanaua, bona ia ese umui do ia abia isi.” (Iam. 4:10) Iehova ese ita dekenai dahaka hairai ia henia? Dahaka ese ita ia koua diba unai hairai ita abia lasi totona? Bona edena dala ai ma haida ita durua diba, unai hairai idia abia totona?

3-5. Edena dala ai Iehova ese ita dekenai hairai ia henia?

³ Salamo torea tauna ia abia dae, Iehova be ia dekenai hairai o hanamoa do ia henia. (Salamo 73:23, 24 duahia.)a Edena dala ai Iehova ese ia idia kamonai henia taudia dekenai hairai ia henia? Ia ese ita ia lalonamo henia bona dala idauidau ai ita ia hanamoa. Hegeregere, Iehova ese ita ia durua iena ura ita lalopararalaia bona iena turana ai ita lao totona.​—⁠1 Kor. 2:7; Iam. 4:8.

⁴ Iehova ese ita dekenai hairai ia henia dalana ma ta be, ita ia abia hidi sivarai namona ita harorolaia totona. (2 Kor. 4:1, 7) Eda haroro gaukara amo Iehova ita hanamoa neganai, ia ese ita dekenai hairai ia henia bona ita ese ma haida ita durua. Iehova ia gwauhamata: “Lau dekenai idia matauraia taudia be do lau matauraidia.” (1 Sam. 2:30) Iehova ese haroro gaukara idia karaia taudia dekenai hairai ia henia dalana ma ta be, idia dekenai ladana namona ia henia anina be, Ia ese ia lalonamo henidia. Bona tadikaka taihu ese unai bamona taudia idia hanamoa danu.​—⁠Aon. 11:16; 22:1.

⁵ Iehova idia badinaia taudia edia vaira negana be edena bamona? Baibel ia gwauhamata: “Ia ese oi dekenai ia henia tano, be do oi dogoatao diba, bona Lohiabada ese tau dikadia do ia hadikaia ore neganai, oi ese inai kara do oi itaia.” (Sal. 37:34) Oibe, Dirava ena hesiai taudia be vaira negana ai mauri hanaihanai do idia abia.​—⁠Sal. 37:29.

“LAU BE TAUNIMANIMA EDIA HANAMOA LAU ABIA DAE LASI”

6, 7. Dahaka dainai momo idia abia dae lasi Iesu be Mesia?

⁶ Dahaka ese ita ia koua diba Iehova amo hairai ita abia lasi totona? Dala ta be bema ita be Iehova idia diba lasi taudia edia lalohadai ita laloa bada. Iesu ena negai, lohia taudia haida be unai bamona idia karaia. Aposetolo Ioane ia gwau, unai lohia taudia ese Iesu idia abidadama henia, “to Farisea taudia dainai ia idia gwauraia hedinarai lasi, badina sinagoga amo idia luludia garina. Farisea taudia ese taunimanima edia hanamoa karana idia ura henia bada, to Dirava ena hanamoa karana idia ura henia maragi.” (Ioa. 12:42, 43) Unai lohia taudia ese Farisea taudia edia lalohadai idia laloa bada lasi be namo.

⁷ Iesu ese ia hahedinaraia, dahaka dainai momo idia abia dae lasi ia be Mesia. (Ioane 5:39-44 duahia.) Israela besena be lagani handred momo lalodiai Mesia idia naria. Iesu ena haroro gaukara ia hamatamaia neganai, haida be Daniela ena peroveta herevana hegeregerena idia abia dae, Mesia be ia ginidae vadaeni. Hua haida gunanai, momo idia laloa Ioane Bapatiso be Mesia. (Luka 3:15) To, Mesia ia ginidae neganai, Toretore Helagadia idia hahedibalaia taudia ese ia idia dadaraia. Dahaka dainai? Iesu ese ena badina ia herevalaia, ia gwau: “Edena bamona umui abidadama diba, bema umui ta ta amo hanamoa umui abia dae, to Dirava tamona amo hanamoa umui tahua lasi?”

8, 9. Edena dala ai Iehova ese ita dekenai ia henia hairai ita laloa maragi diba? Haheitalai gwauraia.

⁸ Bema ita naria namonamo lasi, ita ese taunimanima amo ita abia ladana abia isi karana do ita laloa bada, to Iehova ese ita dekenai ia henia hairai do ita laloa maragi. Unai ita lalopararalaia totona, mani haheitalai ta ita herevalaia. Reana oi laloatao, hanuaboi ta ori be lasi bona, guba ai hisiu tausen momo oi itaia. Reana hisiu edia hairai oi moalelaia, ani? (1 Kor. 15:40, 41) To siti haida ai, lamepa momo edia diari dainai, hisiu oi itaia namonamo lasi. Dahaka dainai? Badina dala ai, steidiam ai, bona ruma badadia edia lamepa edia diari be bada herea dainai, hisiu ena diari idia koua, a? Lasi. To, siti edia lamepa be kahirakahira idia noho dainai, edia diari ese hisiu ita itaia dalana idia koua. Unai dainai, hisiu edia hairai ita itaia totona, lamepa idia noho lasi gabuna ta dekenai ita lao be namo.

⁹ Unai hegeregerena, taunimanima amo ita abia hanamoa karana dainai, Dirava amo ia mai hanamoa karana do ita laloa maragi diba. Momo be sivarai namona idia abia dae lasi, badina idia ura lasi edia turadia bona famili ese idia gwauraidia dika. Iehova ena hesiai taudia haida danu be ma haida edia lalohadai dainai idia gari. Hegeregere, matamata tadikaka ta be idia siaia gabu ta ai ia haroro totona. unuseniai idia noho taudia ibounai be ia idia diba, to idia momo idia diba lasi ia be Iehova ena Witnes tauna. Unai tadikaka be do ia gari bona unuseni do ia haroro lasi, a? Eiava reana pablisa ta ia ura ena hesiai gaukara ia habadaia, to haida ese ia idia kirikirilaia. Ia ese Iehova ena hesiai gaukara idia laloa maragi taudia edia hereva do ia kamonai, a? Eiava reana pablisa ma ta be kerere badana ta ia karaia. To, ia ura lasi kongrigeisen ai ena maduna idauidau ia haboioa, o ena famili bona turadia idia lalohisihisi dainai, ena kerere do ia hunia, a? Bema ena hetura karana Iehova ida ia laloa bada, ia ese elda taudia do ia noia ia idia durua totona.​—⁠Iamesi 5:14-16 duahia.

10. (a) Bema ita ura taunimanima edia hanamoa herevana ita ura henia bada, dahaka ia vara diba? (b) Bema ita manau, dahaka namo do ita davaria?

¹⁰ Reana oi mamia oi gaukara goada lo Keristani tauna ai oi lao totona, to tadikaka ta be nega ibounai oi ia sisiba henia. Iena sisiba oi abia dae neganai, namo oi davaria diba. To, bema oi hekokoroku, o oi ura lasi emu ladana ia dika, eiava emu kara dainai ekskius idauidau oi gwauraia, vadaeni iena sisiba do oi dadaraia. Eiava, reana oi be tadikaka taihu haida ida gaukara ta umui karaia hebou. Ena be oi ese lalohadai namodia oi gwauraia bona gaukara badana oi karaia, to ma ta dekenai hanamoa herevana idia gwauraia dainai, oi lalohisihisi, a? Bema unai bamona ia vara, namona be oi laloatao, “ia manau tauna be hairai do ia abia.”​—⁠Aon. 29:23, NW.

11. Ma haida ese ita idia hanamoa neganai edena bamona ita kara be namo, bona dahaka dainai?

¹¹ Namona be elda taudia bona kongrigeisen maduna idia ura abia tadikaka idia naria namonamo, namo lasi ‘taunimanima amo hanamoa idia tahua.’ (1 Tes. 2:6; 1 Tim. 3:1) Bema tadikaka ta be gaukara ta ia karaia dainai haida ese idia hanamoa, edena bamona ia kara be namo? Momokani, ia be King Saulo bamona, sibona hanamoa totona kohoro nadi ta, idia koroa gauna do ia haginia lasi. (1 Sam. 15:12) To, namona be ia hahedinaraia, unai gaukara ia karaia diba badina Iehova ese ia durua, bona vaira nega ai ia karaia diba bema Iehova ese ia do ia hanamoa bona durua noho. (1 Pet. 4:11) Ma haida ese ita idia hanamoa neganai, ita iseda lalona ai ita laloa gauna ese do ia hahedinaraia, ita be edena bamona hairai ita ura abia.​—⁠Aon. 27:21.

“UMUI URA EMUI TAMANA ENA URA UMUI KARAIA”

12. Dahaka dainai Iuda taudia haida ese Iesu ena hereva idia dadaraia?

¹² Iehova ena hairai ita abia lasi totona, ita ia koua gauna ma ta be, iseda ura dikadia. Unai dainai, reana do ita ura lasi hereva momokani ita kamonai. (Ioane 8:43-47 duahia.) Hegeregere, Iesu ese Iuda taudia haida ia hamaoroa idia be iena hereva idia dadaraia, badina idia ura edia tamana Diabolo ena ura idia karaia.

13, 14. (a) Saiens taudia ese taunimanima edia harana bona gadona be edena bamona idia herevalaia? (b) Edena dala ai daika do ita kamonai henia ena abia hidi ita karaia?

¹³ Nega haida, ita ura henia gauna sibona ita kamonaia. (2 Pet. 3:5) Iehova ese iseda harana be hoa dalanai ia karaia, badina rege haida ia dadaraia diba. Mani oi kamonai namonamo, gau hida edia regena be hari oi kamonai diba? Reana matamanai unai rege idauidau oi kamonai lasi. Dahaka dainai? Ena be emu harana be rege idauidau ia kamonai diba, to oi ia durua gau tamona sibona ena regena oi kamonai totona. To, saiens taudia idia gwau, harana be taunimanima edia gadona ia kamonai neganai, ia hekwarahi bada badina harana be tau tamona sibona ena gadona ia kamonai diba. Anina be taunimanima rua be nega tamona oi idia hereva henia neganai, emu harana ese abia hidi ia karaia daika ena hereva do ia kamonai totona. Nega momo oi ura kamonai henia tauna ena hereva sibona oi kamonai. Iesu ena negai, Iuda taudia idia ura edia tamana, Diabolo, ena ura idia karaia, unai dainai Iesu idia kamonai henia lasi.

¹⁴ Baibel ia gwau “aonega” bona “kavakava” be idia boiboi noho, idia ura idia ita kamonai henia. (Aon. 9:1-5, 13-17) Daika do ita kamonai henia? Bema ita be Iesu ena mamoe, ia do ita kamonai henia bona badinaia. (Ioa. 10:16, 27) Iesu ia gwau, iena murinai idia raka taudia be “hereva momokani ena kahanai idia noho.” (Ioa. 18:37) Idia be “idau taudia edia gadona idia diba lasi.” (Ioa. 10:5) Mai manau ida Iesu idia badinaia taudia be Dirava ese do ia hanamodia.​—⁠Aon. 3:13, 16; 8:1, 18.

“UMUI DEKENAI HANAMOA DO IA HENIA”

15. Dahaka dainai Paulo ia gwau, ia davaria hisihisi dainai Efeso taudia ese hanamoa do idia davaria?

¹⁵ Edena dala ai ma haida ita durua diba, Dirava ena hairai idia abia totona? Dala namona ta be, iseda haheauka karana amo. Paulo be Efeso kongrigeisen dekenai ia gwau: “Umui lau noia umui totona lau davaria hisihisi dainai umui hesiku lasi, badina lau davaria hisihisi ese umui dekenai hanamoa do ia henia.” (Efe. 3:13) Dahaka dainai Paulo ia gwau, ia davaria hisihisi ese Efeso taudia dekenai hanamoa do ia henia? Ena be Paulo be hekwakwanai idauidau ia davaria, to ena tadikaka ia hesiai henidia. Unai amo ia hahedinaraia Keristani tauna dekenai Dirava hesiai henia karana be mai anina bada. Bema Paulo ia lalomanoka, reana iena tadikaka do idia laloa edia hetura karana Iehova ida, edia haroro gaukara, bona edia helaro be anina lasi. Paulo ena haheauka dainai, tadikaka idia itaia, Keriso ena hahediba tauna ai idia lao be mai anina bada.

16. Lusitera ai Paulo dekenai dahaka ia vara?

¹⁶ Paulo ena gaukara goadagoada bona haheauka karana ese tadikaka ia durua dalana mani ita laloa. Kara 14:19, 20 ese Lusitera ai Paulo dekenai ia vara gauna ia herevalaia, ia gwau: “Iuda taudia be Antioka bona Ikonio amo idia mai bona hutuma edia lalona idia veria, bena nadi amo Paulo idia hodoa bona taoni murimurinai idia veria lao, idia laloa ia mase vadaeni. To hahediba taudia ese ia idia hagegea neganai, ia toreisi bona taoni lalonai ia vareai. Bona murina dinana ai, ia bona Banaba be Derebe dekenai idia lao.” Mani oi laloa: Paulo be nadi amo idia hodoa bona kahirakahira ia mase, to unai dina murinai ia be kilomita 100 bamona ia raka!

17, 18. (a) Timoteo be edena dala ai Paulo ese Lusitera ai ia davaria hekwakwanai ia diba? (b) Paulo ena haheauka karana ese edena dala ai Timoteo ia durua?

¹⁷ Paulo be nadi amo idia hodoa neganai, Timoteo be unuseni ia noho, a? Reana. Kara bukana ese unai ia herevalaia lasi. To Timoteo be ia vara gauna ia diba. Paulo be Timoteo dekenai ena revareva iharuana ia torea neganai, ia gwau: “Oi ese egu hadibaia herevadia, mauri dalana, . . . oi badinaia namonamo.” Timoteo be Lusitera ai Paulo be nadi amo idia hodoa sivaraina sibona ia diba lasi, to Antioka ai Iuda taudia ese Paulo idia lulua, bona Ikonio ai haida idia ura nadi amo Paulo idia hodoa mase ena sivarai ia diba danu.​—⁠2 Tim. 3:10, 11; Kara 13:50; 14:5, 19.

¹⁸ Timoteo ia diba Paulo be unai hahetoho ibounai ia haheaukalaia. Timoteo be Paulo ena haheitalai amo gau momo ia dibaia. Paulo be Lusitera dekenai ia giroa lou neganai, ia kamonai kongrigeisen lalonai Timoteo be haheitalai namona, bona “Lusitera bona Ikonio ai idia noho tadikaka be Timoteo idia herevalaia, idia gwau ia be tau namona.” (Kara 16:1, 2) Gabeai, Timoteo ia hegeregere maduna badadia ia huaia totona.​—⁠Fili. 2:19, 20; 1 Tim. 1:3.

19. Edena dala ai iseda haheauka karana ese ma haida ia durua diba?

¹⁹ Bema Dirava ena ura ita karaia noho, iseda haheitalai ese matamata taudia ia durua diba, Dirava ena hesiai taudia namodia ai idia lao totona. Matamata taudia ese eda haroro dalana bona hekwakwanai badadia ita hanaia dalana idia itaia, bona unai ese idia ia durua. Paulo ia gwau, hekwakwanai momo ia haheaukalaia, unai amo ma haida do ia durua mauri hanaihanai idia abia totona.​—⁠2 Tim. 2:10.

20. Dahaka dainai Dirava amo hairai ita tahua be namo?

²⁰ Momokani, badina namodia dainai ita ese ‘Dirava amo hanamoa ita tahua’ be namo. (Ioa. 5:44; 7:18) Oibe, Iehova ese ia amo hairai idia tahua taudia dekenai “mauri hanaihanai do ia henia.” (Roma 2:6, 7 duahia.) Danu, iseda haheauka karana ese ma haida do ia durua, Iehova idia badinaia noho, bona mauri hanaihanai idia abia totona. Unai dainai, namo lasi gau ta ese oi ia koua Dirava amo hairai oi abia totona.