Distrik Bona Intenesenel Hebouheboudia ese Ita Idia Hagoadaia Dirava Ita Hanamoa Totona!
“Dirava Ita Hanamoa” Distrik bona Intenesenel Hebouheboudia ese haroro namona idia henia vadaeni. Unai mai anina bada tiokratik heboudia ese Iehova ena ladana idia hanamoa bona ita ia durua ‘Lohiabada ena ladana badana do ita abia isi’ totona. (Sal. 96:8) Momokani, Iehova ese ia havaraia gau namodia, ena kara namodia idia hahedinaraia gaudia unai, dainai ia ita hanamoa be namo.—Iobu 37:14; Apok. 4:11.
Henunai idia noho henanadai bona emu nouti ai oi torea herevadia oi gaukaralaia, January 19 purana lalonai hebouhebou ena program ena riviu totona oi hegaegae bona haere oi henia totona.
1. Edena dala ai Dirava ia havaraia mauri lasi gaudia ese Ia idia hanamoa, bona unai gaudia ese Dirava idia hanamoa dalana bona taunimanima ese Dirava idia hanamoa dalana be edena bamona idia idau? (Sal. 19:1-3; “Dirava Ia Havaraia Gaudia ese Iena Hairai Idia Hahedinaraia”)
2. Iesu ena toana ia idau karana ese hari inai negai dahaka ia laulaulaia, bona unai ese hari inai negai Keristani taudia edena dala ai ia hagoadaia? (Hebouhebou ena hereva badana, “Peroveta Matahanaidia mai Hairaidia ese Ita Idia Hagoadaia!”)
3. Peroveta tauna Daniela ese ia hahedinaraia manau karana be edena bamona ita habadaia diba, bona edena dala ai namo do ita davaria bema unai bamona ita karaia? (Dan. 9:2, 5; 10:11, 12; “Iehova Ena Hairai be Manau Taudia Dekenai Ia Hedinarai”)
4. (a) Amosa ena peroveta herevana amo dahaka gau toi Dirava ena hahemaoro karana dekenai ita dibaia diba? (Amo. 1:3, 11, 13; 9:2-4, 8, 14) (b) Amosa 2:12 ai ia noho haheitalai amo Iehova ena Witnes taudia be dahaka mai anina bada gauna idia dibaia? (“Amosa Ena Peroveta Herevana—Ena Anina Iseda Nega Totona”)
5. (a) Herevana tau ta ia inuinu neganai ia kekero lasi, to kekero muramura gaukaralaia kerere karana ena dika haida be dahaka? (b) Kekero muramura gaukaralaia kerere karana ena hekwakwanai be edena bamona ita hamaoromaoroa diba? (Mar. 9:43; Efe. 5:18; “Kekero Muramura Gaukaralaia Kerere Karana Ena Tarapu Dadaraia”)
6. Edena dala ai buklet matamatana “See the Good Land” amo namo oi davaria noho? (“ ‘Tano Namona’—Paradaiso Ena Toana Hegeregerena”)
7. Edena dala toi amo Iehova “ena diaridiari be ita ese ita hahedinaraia, hevarivari bamona”? (2 Kor. 3:18; “Hevarivari Bamona Iehova Ena Hairai Hahedinaraia”)
8. Ita ia badu henia kava tauna badana be daika, bona ena be unai badu karana do ita mamia, to dahaka ese ita ia durua diba Dirava ita badinaia noho totona? (Sal. 109:1-3; “Ita Idia Badu Henia Kava”)
9. Keriso ena lalohadai ladana bada abia karana dekenai be dahaka, bona edena dala ai ta ese ena lalona ia hadaia diba unai Keriso ena lalohadai ia habadaia totona? (Mat. 20:20-26; “Ladana Bada Abia Karana Dekenai Keriso Ena Lalohadai Ita Abia”)
10. Herevana tauanina dalanai ita hesiku, to dahaka ese ita ia durua diba lauma dalanai ita goada totona? (“Ita Hesiku, to Iseda Goada Ia Ore Lasi”)
11. Satani ese ena koikoi karadia ia halasia daladia haida be dahaka, bona iseda abidadama idia hadikaia toho gaudia amo ita siri totona, dahaka hereva maorona Baibel dekenai ita badinaia be namo? (Ioa. 10:5; “ ‘Idau Taudia Edia Gadona’ Dainai Naria Namonamo”)
12. (a) Tama sina ese edena dala ai Iesu ena haheitalai Mareko 10:14, 16 ai idia badinaia diba? (b) Inai buka matamatana Learn From the Great Teacher dekenai, dahaka gau oi ura henia? (“Iseda Natudia—Harihari Gaudia Namodia”)
13. Edena dala ai matamata taudia ese Iehova idia hanamoa noho? (1 Tim. 4:12; “Matamata Taudia ese Iehova Idia Hanamoa Dalana”)
14. “Dagedage Lalonai Haroro Goadagoada Noho” drama lalonai, edena kahana be oi laloatao noho?
15. Edena dala ai (a) Petero bona Ioane? (Kara 4:10) (b) Stefano? (Kara 7:2, 52, 53) (c) aposetolo edia negai ia noho Keristani kongregesen taudia, edia haheitalai ita tohotohoa diba? (Kara 9:31; drama bona ena hereva “Sivarai Namona Harorolaia Karana Ita ‘Hadokoa Lasi’ ”)
16. (a) Iseda lalona ita hadaia Dirava be edena dala idauidau ai ita hanamoa totona? (b) “Dirava Ita Hanamoa” Hebouheboudia dekenai ita dibaia gaudia ita badinaia neganai, dahaka ita diba momokani? (Ioa. 15:9, 10, 16; “ ‘Huahua Momo Umui Atoa Noho Neganai,’ Iehova Umui Hanamoa”)
Hebouhebou dekenai lauma dalanai ita abia hadibaia hereva namodia ita laloa loulou neganai, iseda lalona do ia veria ita dibaia gaudia ita badinaia totona. (Fili. 4:8, 9) Unai ese iseda lalona ia hagoadaia ‘gau ibounai do ita karaia Dirava ita hanamoa totona.’—1 Kor. 10:31.