Iehova be Iseda Noho Gabuna

1, 2. Inai tanobada dekenai Dirava ena hesiai taudia edia hemami be edena bamona? Bona edia noho gabuna be edeseniai?

INAI tanobada dikana ai emu mauri oi moalelaia, a? Bema oi gwau lasi, oiemu hemami be Iehova ena hesiai taudia ma haida bamona. Gunaguna amo, Iehova idia lalokau henia taudia idia mamia, inai tanobada ai idia be idau taudia bamona idia noho. Hegeregere, Kanana tanona ai idia noho Dirava ena hesiai taudia edia hemami be unai bamona , badina idia be gabu tamona ai idia noho lasi. Baibel ia gwau: “Taunimanima vairanai idia gwau idia be idau taudia bona unai tano dekenai do idia noho daudau lasi.”​—⁠Heb. 11:13.

² Keriso ena murinai idia raka horoa taudia edia “noho gabuna be guba.” Idia danu idia laloa inai tanobada ai, idia be “idau tano taudia” bona ‘noho daudau lasi taudia’ bamona. (Fili. 3:20; 1 Pet. 2:11) “Mamoe ma haida” danu be “tanobada ena lasi,” Keriso hegeregerena. (Ioa. 10:16; 17:16) To, Dirava ena taunimanima be mai edia noho gabuna. Unai gabu be iseda matana amo ita itaia lasi, to unai gabu ai mai moale ida ita noho, bona gau ta ese ita ia hadikaia lasi. Unai noho gabuna be dahaka? Mose ia gwau: “[“Iehova e,” NW] oi sibona be aiemai noho gabuna, gunaguna ia mai bona harihari.” (Sal. 90:1) Oibe, Iehova be ia idia badinaia taudia edia “noho gabuna.” Gunaguna Iehova be edena dala ai ena hesiai taudia edia noho gabuna? Hari, Iehova be edena dala ai ena taunimanima edia noho gabuna? Bona vaira nega ai, edena dala ai ia be ena hesiai taudia edia noho gabuna ai do ia lao?

GUNAGUNA IEHOVA BE ENA HESIAI TAUDIA EDIA “NOHO GABUNA”

3. Salamo 90:1 ese Iehova be dahaka ida ia hahegeregerea, bona dahaka dainai?

³ Nega haida, Baibel ese Iehova be ita itaia gaudia ida ia hahegeregerea, unai amo iena kara ita lalopararalaia diba. Hegeregere, Salamo 90:1 ese Iehova be “noho gabuna” o ruma ta ida ia hahegeregerea. Ruma ita laloa neganai ita ese lalokau, maino bona noho namonamo gabuna ta ita laloa, ani? Dahaka dainai Baibel ese Iehova be noho gabuna o ruma ta ida ia hahegeregerea? Baibel ia gwau Iehova be lalokau. (1 Ioa. 4:8) Danu ia gwau, ia be maino Diravana bona ena hesiai taudia ia gimaia. (Sal. 4:8) Iehova be ena hesiai taudia Aberahamo, Isako bona Iakobo edia noho gabuna ai ia lao dalana mani ita itaia.

4, 5. Edena dala ai Dirava ese Aberahamo ia hanamoa bona gimaia?

⁴ Iehova ese Aberahamo dekenai ia gwau: “Oiemu tano bona oiemu varavara bona oiemu tamana ena ruma oi rakatania, bona oi dohore lau hadibaia tano dekenai do oi lao.” To, unai murinai Iehova ese ia gwauraia herevadia be Aberahamo idia hagoadaia. Ia gwau: “Lau be oi dekenai tubuna momo do lau henia, dohore idia be bese bada herea. Oi do lau hanamoa, bona oiemu ladana do lau habadaia.” Iehova ma ia gwau: “Oi idia hanamoa taudia be lauegu hanamoa do idia davaria, to oi idia hadikaia taudia be dohore lau hadikaia.”​—⁠Gen. 12:1-3.

⁵ Iehova ia gwauhamata Aberahamo bona ena tubudia do ia hanamoa bona gimaia, bona Ia ese unai gwauhamata ia hagugurudia. (Gen. 26:1-6) Hegeregere, Iehova ese Aigupito ena Farao bona Gerara ena King Abimeleka ia koudia dainai, Aberahamo idia hamasea lasi bona ena adavana Sara idia abia lasi. Isako bona Rebeka be unai bamona ia gimaia danu. (Gen. 12:14-20; 20:1-14; 26:6-11) Baibel ia gwau, Iehova “ese Israela besena ia naria, dagedage bona dika momokani dekena amo ia ese ia gimadia. Bona Lohiabada ese king haida ia sisiba henidia, Israela taudia do idia hadikaia lasi totona. Lohiabada ia gwau, ‘Lau ese lau abia hidi bese taudia, be do umui hisihisi henidia lasi. Lauegu peroveta taudia do umui hadikaia lasi.’”​—⁠Sal. 105:14, 15.

6. Isako ese Iakobo be dahaka ia hamaoroa? Reana Iakobo be dahaka ia laloa?

⁶ Iehova ese Aberahamo ena tubuna, Iakobo ia naria danu. Iakobo ia ura headava neganai, ena tamana, Isako ese ia hamaoroa, ia gwau: “Kanana taudia edia natuna ta do oi adavaia lasi. Mesopotamia dekenai do oi lao, oiemu tubuna Betuela ena ruma dekenai do oi daekau, oiemu vavana Labana ena natuna kekeni ta do oi adavaia.” (Gen. 28:1, 2) Iakobo be ena tamana ese ia hamaoroa hegeregerena ia karaia. Ia ese ena ruma bese ia rakatania bona kilomita momo lalonai sibona ia raka ela bona Harana dekenai ia ginidae. (Gen. 28:10) Reana, Iakobo ia laloa: ‘Lagani hida egu famili do lau itaia lasi? Egu vavana be lau ia itaia neganai do ia moale, eiava? Iehova ia lalokau henia hahinena ta do lau davaria, eiava?’ To, Iakobo be kilomita 100 ia raka murinai, Lusu dekenai ia ginidae bona unuseniai gau ta ia vara. Ia vara gauna dainai, Iakobo ena lalohekwarahi ia ore. Dahaka ia vara?

7. Dirava ese Iakobo dekenai dahaka hagoadaia herevadia ia gwauraia?

⁷ Lusu ai Iehova be nihi ta amo Iakobo ia hamaoroa, ia gwau: “Dohore lau durua oi, oi lau henia gabudia ibounai dekenai do lau naria oi, bona oi be do lau hakaua mai lou inai tano dekenai. Lau ese oi do lau rakatania lasi, ela bona oi dekenai lau hereva henia kara ibounai do lau karaia haorea.” (Gen. 28:15) Unai hereva namodia ese Iakobo idia hagoadaia! Unai murinai, Iakobo ia ura dikadika Iehova ese ena gwauhamata do ia hagugurua dalana ia itaia. Bema oi be emu tano oi rakatania, bona tano ma ta oi lao Dirava oi hesiai henia totona, reana Iakobo bamona oi lalohekwarahi danu. To, reana oi itaia vadaeni, Iehova be dala idauidau ai oi ia naria.

8, 9. Edena dala ai Iehova be Iakobo ena “noho gabuna” ai ia lao, bona unai amo dahaka ita dibaia?

⁸ Iakobo be Harana ai ia ginidae neganai, ena vavana Labana ese ia abia dae bona gabeai Lea bona Rahela ia henia, ena adavana ai idia lao totona. Lagani haida murinai, Labana ese Iakobo ia kara auka henia bona ena davana be nega 10 ia haidaua! (Gen. 31:41, 42) To, Iakobo ese unai ibounai ia haheaukalaia, badina ia diba Iehova ese do ia naria​—⁠bona Iehova be unai bamona ia karaia momokani. Dirava ese Iakobo ia hamaoroa Kanana dekenai do ia giroa lou neganai, “iena mamoe bona nani be momo herea, iena hesiai tatau bona hahine, kamelo bona doniki danu idia momo herea.” (Gen. 30:43) Iakobo ese Iehova ia tanikiu henia, ia gwau: “Lau, emu hesiai tauna be hegeregere lasi, lau dekenai emu hebogahisi bona emu gwauhamata hamomokania karadia oi hahedinaraia totona. Badina egu itotohi sibona lau dogoatao bona Ioridane Sinavaina lau hanaia, bona hari lau be orea rua ai lau lao.”​—⁠Gen. 32:10, NW.

⁹ Unai haheitalai ese idia hahedinaraia, Mose ena hereva be idia momokani. Ia gwau: “[“Iehova e,” NW] oi sibona be aiemai noho gabuna, gunaguna ia mai bona harihari”! (Sal. 90:1) Iehova ena kara be ia idau lasi. Gunaguna amo ema bona hari, Ia ese ena hesiai taudia ia lalokau henia, gimaia bona naria noho. (Iam. 1:17) Mani unai ia karaia dalana ita itaia.

HARI, IEHOVA BE ISEDA “NOHO GABUNA”

10. Dahaka dainai ita diba momokani, Iehova be ena hesiai taudia edia “noho gabuna”?

¹⁰ Mani inai haheitalai oi laloa: Kota dekenai oi be witnes ta bamona oi hedinarai, bona raskol dikana ta ena kerere oi gwauraia hedinarai. Ia be dagedage bona ala-ala tauna, bona tanobada hegegemadai taunimanima momo be ia totona idia gaukara. Kota rumana oi rakatania neganai, emu hemami be edena bamona? Oi gari, a? Oibe! Reana pulisi do oi noia oi idia gimaia totona, ani? Iehova ena hesiai taudia danu be unai bamona, idia be mai gari lasi ida Satani ena kara dika idia gwauraia hedinarai. (Apokalupo 12:17 duahia.) Satani ia hekwarahi Dirava ena taunimanima edia haroro gaukara ia koua totona. To ia kwalimu lasi, badina tanobada hegegemadai ita be taunimanima ita do haroro henidia noho. Edena bamona unai ita karaia diba? Haere be tamona: Iehova be iseda “noho gabuna.” Ia ese inai nega dokona ai ena taunimanima ia gimaia bona hanamoa noho. (Isaia 54:14, 17 duahia.) To, Iehova ese ita do ia gimaia bona hanamoa noho, bema Satani ena hedibagani lalonai ita moru lasi.

11. Aberahamo, Isako bona Iakobo edia sivarai amo, dahaka gau ma ta ita dibaia?

¹¹ Aberahamo, Isako bona Iakobo edia sivarai amo gau ma ta do ita dibaia. Ena be Kanana tanona ai idia noho, to unai taudia idia bamoa lasi bona edia kara dikadia idia inai henia. (Gen. 27:46) Idia karaia diba o idia karaia diba lasi gaudia ena lista latana ta idia badinaia lasi. Badina idia diba vadaeni, Iehova be dahaka ia ura henia bona dahaka ia inai henia. Ita dekenai idia be haheitalai namona, badina idia gaukara goada tanobada amo idia gini siri totona! Oi hekwarahi Aberahamo, Isako bona Iakobo edia haheitalai oi tohotohoa totona, a? Oi abia hidi turadia bona moale karadia amo, oi hahedinaraia oi be tanobada amo oi gini siri, a? Madi, Keristani kongrigeisen lalonai haida be Satani ena tanobada idia ura henia. Bema oi danu be unai bamona, Iehova ena heduru totona oi guriguri be namo. Laloatao: Inai tanobada be Satani ena, bona ia be sibona ena ura ia tahua bona ita ia laloa bada lasi.​—⁠2 Kor. 4:4; Efe. 2:1, 2.

12. (a) Edena dala ai Iehova ese ena hesiai taudia ia durua? (b) Iehova ese ita ia henia heduru gaudia dekenai, emu lalohadai be dahaka?

¹² Bema ita ura Satani ena hedibagani ita dadaraia, namona be Iehova ena heduru daladia ibounai ita abia dae. Hegeregere Keristani heboudia, ruma bese ena tomadiho, bona elda taudia ese ita idia hagoadaia bona durua, mauri ena hekwakwanai ita haheaukalaidia totona. (Efe. 4:8-12) Tadikaka George Gangas, lagani daudau lalonai Hakaua Oreana ena memba ta, ese Dirava ena taunimanima ia herevalaia, ia gwau: “Idia ida lau noho neganai, lau mamia lau be egu bese korikori ida lau noho bamona.” Oi danu emu hemami be unai bamona, a?

13. Heberu 11:13 amo dahaka mai anina bada gauna ita dibaia?

¹³ Aberahamo, Isako bona Iakobo edia sivarai amo ita dibaia gauna ma ta be inai: Namona be mai gari lasi ida ita hahedinaraia, ita be tanobada amo ita idau. Paragraf 1 ai ita itaia bamona, unai abidadama tatau be “taunimanima vairanai idia gwau idia be idau taudia bona unai tano dekenai do idia noho daudau lasi.” (Heb. 11:13) Oi danu oi hahedinaraia oi be tanobada amo oi idau, a? Nega haida unai bamona ita karaia be auka. To, Dirava bona tadikaka taihu edia heduru amo unai oi karaia diba. Laloatao, oi be sibona oi noho lasi. Iehova idia ura hesiai henia taudia ibounai be Satani bona ena tanobada ida idia tuari noho! (Efe. 6:12) To, Satani ita halusia diba, bema Iehova ita abidadama henia bona ia be iseda noho gabuna namona ai ita halaoa.

14. Aberahamo be edena “taoni” ia mai totona ia naria?

¹⁴ Namona be Aberahamo ita tohotohoa, bona gabeai do ita abia davana namona ita laloa noho. (2 Kor. 4:18) Aposetolo Paulo ia gwau, Aberahamo “be taoni mai ena badina aukana ia naria noho, unai taoni ena palani ia karaia tauna bona ia haginia tauna be Dirava.” (Heb. 11:10) Unai “taoni” be Dirava ena Basileia, bona Aberahamo be unai “taoni” ia mai totona ia naria. To, ita be ita naria lasi, badina hari Basileia be guba ai ia lohia vadaeni. Bona Baibel ena peroveta herevadia ese idia hahedinaraia, kahirakahira unai Basileia ese tanobada ibounai do ia lohiaia. Emu mauri dalana amo oi hahedinaraia oi be unai Basileia oi abia dae momokani, a? Emu mauri lalonai unai Basileia oi atoa guna, bona tanobada amo oi gini siri, a?​—⁠2 Petero 3:11, 12 duahia.

IEHOVA BE EDA “NOHO GABUNA” ELA BONA HANAIHANAI

15. Inai tanobada idia abidadama henia taudia dekenai dahaka do ia vara?

¹⁵ Dokona ia do mai lasi neganai, tanobada ena hekwakwanai be do idia bada idia lao. (Mat. 24:7, 8) Bona hisihisi badana ai, mauri be do ia auka momokani. Tanobada hegegemadai dika bada do idia vara bona taunimanima do idia daradara bona gari dikadika. (Hab. 3:16, 17) Baibel ia gwau, taunimanima be sibona idia gimaia totona, ‘kohua lalonai bona ororo ena nadi badadia huanai do idia hunia.’ (Apok. 6:15-17) To, kohua o ororo bamona politikol bona bisinesi oreadia ese idia do ia gimaia lasi.

16. Kongrigeisen be edena bamona ita laloa be namo, bona dahaka dainai?

¹⁶ Peroveta tauna Habakuku bamona, iseda Hamauria Diravana dekenai do ita moale. Hisihisi badana ai Iehova ese ita do ia gimaia. (Hab. 3:18) To, Iehova ese edena dala ai ita do ia gimaia? Ita diba lasi dainai, do ita naria bona do ita itaia. To ita diba gauna be inai: Iehova ese Israela taudia be Aigupito amo ia hakaudia-lasi hegeregerena, “hutuma bada” taudia danu be Iehova amo hadibaia hereva do idia abia. (Esodo 13:18 duahia; Apok. 7:9) Edena dala ai unai hadibaia herevadia do ita abia? Reana, kongrigeisen amo ita do ia hadibaia dahaka ita karaia totona. Isaia ia gwau, Dirava ena taunimanima be “ruma” ta lalonai do idia vareai bona dika ta do idia davaria lasi. Unai “ruma” be tanobada hegegemadai idia noho kongrigeisen ia laulaulaia. (Isaia 26:20 duahia.) Oi be Kongrigeisen heboudia oi laloa bada, a? Oi be nega ibounai Iehova ese kongrigeisen amo ia halasia hadibaia herevadia oi badinaia, a?​—⁠Heb. 13:17.

17. Edena dala ai Iehova be idia mase vadaeni abidadama taudia edia “noho gabuna”?

¹⁷ Ena be abidadama taudia haida be reana hisihisi badana do lasi neganai idia mase, to Iehova be edia “noho gabuna.” Edena dala ai? Iehova ese do ia hatoredia isi lou. Aberahamo, Isako bona Iakobo idia mase murinai, Iehova ese Mose ia hamaoroa ia be edia Dirava. (Eso. 3:6) Iesu ese unai hereva ia gwauraia lou, ia gwau: “Ia be mase taudia edia Dirava lasi, to mauri taudia edia Dirava, badina ia dekenai idia ibounai be idia mauri noho.” (Luka 20:38) Iehova idia badinaia taudia edia toreisi lou karana be do ia vara momokani dainai, Iehova vairanai idia be idia mauri noho bamona.​—⁠Had. 7:1.

18. Tanobada matamatana lalonai, edena dala ai Iehova be ena taunimanima edia “noho gabuna” ai do ia lao?

¹⁸ Tanobada matamatana lalonai, Iehova be dala idauna ta ai ena taunimanima edia “noho gabuna” ai do ia lao. Apokalupo 21:3 ia gwau: “Dirava ena palai rumana be taunimanima ida ia noho, bona ia be idia ida do ia noho.” Iehova ese Iesu Keriso do ia gaukaralaia, lagani 1,000 lalonai tanobada ibounai ia lohiaia totona. Lagani 1,000 ena dokona ai, Iesu ese ena Tamana ena ura tanobada totona do ia hagugurua, bona Basileia be Iehova dekenai do ia henia lou. (1 Kor. 15:28) Bena Iehova sibona ese goevadae taudia do ia lohiaia. Vaira negana ai, gau namodia momo do ita moalelaia! Unai dainai, namona be idaunegai idia noho abidadama taudia ita tohotohoa, bona Iehova be iseda “noho gabuna” ai ita halaoa.