Goada Oi Abia Bona Ma Haida Oi Hagoadaia

Ita ia durua gauna ginigunana be iseda famili, turadia, bona tadikaka taihu edia hahegoada karadia.

Eda turana ta ena hagoadaia hereva namodia be dehoro namona ta bamona, iseda bero ia hanamoa bona ita ia hagoadaia. (Aon. 16:24; 18:24; 25:11) To, Keristani korikoridia be haida amo hahegoada idia abia sibona lasi, to idia ura ma haida idia hagoadaia danu. Idia be “Dirava amo [idia] abia lalogoada amo hisihisi idauidau idia abia taudia ma haida [idia] hagoadaia diba.” (2 Kor. 1:4; Luka 6:31) Mexico ena distrik naria tadikaka ladana, Antonio be unai bamona ia karaia.

Antonio be kensa gorerena ia abia neganai, ia lalometau bada. To, ia ura lasi unai ia lalohisihisilaia. Vadaeni, Antonio be dahaka ia karaia? Basileia anedia ia laloatao bona ia anelaia, unai amo ane edia hereva ia laloa dobu. Danu, guriguri ia gwauraia bona Baibel ia duahia karana amo goada ia abia.

To, Antonio ia laloparara ia ese heduru bada be tadikaka taihu amo ia abia. Ia gwau: “Lau bona egu adavana ai lalometau neganai, emai varavara ta ai boiria mai; ia be kongrigeisen elda tauna ta, bona ai ida ia guriguri. Unai ese ai ia hagoadaia bada. Momokani, emai varavara bona kongrigeisen taudia ese ai idia durua bada dainai, nega kwadogina lalonai emai lalohisihisi ia ore.” Antonio ia moale badina iena turadia ese idia lalokau henia bona laloa bada!

Ita ia durua gauna iharuana be, Dirava ena lauma helaga. Aposetolo Petero ia gwau, lauma helaga be “harihari gauna.” (Kara 2:38) Pentekoste 33 C.E. ai, lauma helaga be Iesu ena murinai idia raka taudia latanai ia diho neganai, unai ia momokani. To, Dirava ese lauma helaga be harihari gauna ita ibounai dekenai ia henia. Unai dainai, namona be Dirava ita noia unai harihari gauna be ita dekenai ia henia totona.​—⁠Isa. 40:28-31.

HISIHISI IDIA DAVARIA TAUDIA LALODIA

Aposetolo Paulo be hekwakwanai idauidau ia davaria, bona nega momo kahirakahira idia hamasea danu. (2 Kor. 1:8-10) Herevana dahaka ia vara, to Paulo be ia lalohekwarahi lasi. Ia diba Dirava ese ia durua dainai, ia lalogoada. Ia gwau: “Iseda Lohiabada Iesu Keriso ena Dirava bona Tamana do ita hanamoa. Ia be hebogahisi Tamana bona lalogoada ibounai ia henia Diravana. Iseda hisihisi ibounai lalonai ia ese ita dekenai lalogoada ia henia noho.” (2 Kor. 1:3, 4) Paulo ia ura lasi ena hekwakwanai ia laloa momo. To, ena haheauka karana dainai goada ia abia, bona hekwakwanai idia davaria taudia ma haida ia durua diba.

Antonio ena gorere ia ore neganai, loaloa naria gaukara ia karaia lou. Momokani, ia be tadikaka taihu ia laloa bada, to hari ia bona ena adavana ese gorere taudia idia vadivadi henia bona hagoadaia danu. Hegeregere, nega ta Antonio be ia gorere bada tadikaka ta ia vadivadi henia neganai, ia davaria tadikaka be ia ura lasi kongrigeisen heboudia ia lao. Antonio ia gwau: “Unai tadikaka be Iehova bona kongrigeisen taudia ia ura henia bada, to ena gorere dainai ia laloa ia be anina lasi.”

Antonio ese unai tadikaka ia hagoadaia dalana be, kongrigeisen ena pati maragina ta dekenai, ia ese tadikaka ia noia guriguri ia gwauraia totona. Ena be tadikaka ia mamia ia hegeregere lasi, to ia guriguri. Antonio ia gwau: “Ia ese guriguri namo hereana ia gwauraia. Unai murinai, goada ia abia bona ia mamia Dirava ese ia ia laloa bada.”

Oibe, reana ita ibounai be nega ta hisihisi ta ita haheaukalaia. To, Paulo ena hereva bamona, unai ese ita ia durua hekwakwanai idia davaria taudia ma haida ita hagoadaia totona. Unai dainai, namona be iseda tadikaka taihu edia hisihisi ita lalopararalaia, bona iseda Dirava, Iehova ia karaia bamona, ma haida ita hagoadaia.