Iesu​—Moale Korikorina ia Abia Tauna

IESU be moale korikorina ia abia, a? Iena famili be taga taudia lasi, bona iena mauri lalonai ena kohu be momo lasi. Momokani, “ena kwarana ia atoa gabuna be lasi.” (Luka 9:57, 58) Danu, Iesu be ena inai taudia ese ena ladana idia hadikaia bona hamasea.

Reana oi gwau, ‘Lau laloa unai bamona tauna be moale korikorina ia abia lasi!’ To, Iesu be ena mauri lalonai gau momo ia karaia. Mani gau foa ita herevalaia.

1. IESU BE DIRAVA ENA URA IA KARAIA.

“Lauegu aniani be lau ia siaia tauna ena ura do lau karaia.”​—Ioane 4:34.

Iesu be ena hereva bona kara amo ia hahedinaraia, ia ura ena guba Tamana, Iehovaa ena ura ia hagugurua. Iesu be Dirava ena ura ia karaia dainai ia moale bada. Ia ese unai gaukara be aniani ida ia hahegeregerea, ataiai Baibel sirina ena hereva bamona. Iesu ese unai hereva ia gwauraia negana mani ita laloa.

Iesu ese unai hereva be dina tubua o 12 oklok bamona ai ia gwauraia. (Ioane 4:6) Daba ibounai ia be Samaria ena ororo gabudiai ia loaloa bona ia hitolo. Unai dainai, iena hahediba taudia ese ia idia hamaoroa: “Rabi e, oi aniani.” (Ioane 4:31) Iesu ena haere ese ia hahedinaraia, ia be Dirava ena gaukara ia karaia amo ena bogana ia honu bona ia goada. Momokani, Iesu be Dirava ena ura ia karaia dainai moale korikorina ia abia.

2. IESU ESE ENA TAMANA IA LALOKAU HENIA BADA.

“Lau ese Tamana lau lalokau henia.”​—Ioane 14:31.

Iesu be ena guba Tamana ia tura henia namonamo. Ia be Dirava ia lalokau henia dainai, ia ura ma haida dekenai ena Tamana ena ladana, ura, bona kara ia harorolaia. Iesu ena hereva, kara bona lalohadai amo ena Tamana ena kara ia hahedinaraia. Iesu ena sivarai ita duahia neganai, unai be hegeregere iena Tamana ena sivarai ita duahia. Unai dainai, Filipo ese Iesu ia noia, “Ai dekenai Tamana oi hahedinaraia” neganai, Iesu ia haere: “Lau ia itaia tauna be Tamana danu ia itaia vadaeni.”​—Ioane 14:8, 9.

Iesu be ena Tamana ia lalokau henia dainai, mai ena ura ida taravatu ia badinaia ela bona ia mase. (Filipi 2:7, 8; 1 Ioane 5:3) Momokani, Iesu be Dirava ia lalokau henia bada dainai moale korikorina ia abia.

3. IESU BE TAUNIMANIMA IA LALOKAU HENIA.

“Lalokau karana hereadaena be inai, tau ta ese ena turadia totona ena mauri ia atoa diho.”​—Ioane 15:13.

Ita be goevadae lasi taudia dainai, ita be hegeregere lasi mauri hanaihanai ita abia totona. Baibel ia gwau: “Tau tamona [Adamu] dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.” (Roma 5:12) Ita be hegeregere lasi kara dika ena davana, mase unai, amo ita sibona ita hamauria diba.​—Roma 6:23.

To, Iehova ita tanikiu henia badina taunimanima hamauria dalana ta ia karaia. Iena Natuna goevadaena, Iesu, ia koua lasi to ia siaia tanobada ai hisihisi do ia ania ela bona ia mase, unai amo ena mauri davalaia boubouna amo taunimanima be kara dika bona mase amo ia hamauridia. Iesu be ena Tamana bona taunimanima ia lalokau henidia dainai, mai ena ura ida Tamana ia kamonai henia bona ena mauri goevadaena be ita totona ia henia. (Roma 5:6-8) Momokani, Iesu be taunimanima ia lalokau henia dainai moale korikorina ia abia.b

4. IESU IA DIBA ENA TAMANA ESE IA LALOKAU HENIA BONA LALONAMO HENIA.

“Inai be egu Natuna, egu lalokau, ia lau lalonamo henia.”​—Mataio 3:17.

Iesu ia bapatiso neganai, Iehova be guba amo unai hereva ia gwauraia. Momokani, Iehova be ena Natuna, Iesu ia lalokau henia bona lalonamo henia. Iesu ia gwau: “Tamana ese lau ia lalokau henia”! (Ioane 10:17) Iesu be unai ia diba dainai, taunimanima edia dagedage bona kirikirilaia karadia ia haheaukalaia. Danu, unai diba ese ia durua lalohadai maorona ia abia bona ia gari lasi ela bona ia mase. (Ioane 10:18) Momokani, Iesu ia diba ena Tamana ese ia lalokau henia bona lalonamo henia dainai moale korikorina ia abia.

Momokani, Iesu be moale korikorina ia abia. Iena sivarai amo moale korikorina abia dalana ita dibaia diba. Iesu ese ena hahediba taudia ia hadibaia edena dala ai moale korikorina idia abia diba, bona atikol gabena ai unai hakaua hereva haida do ita herevalaia.