Moale Korikorina Ita Abia Diba, A?

UNAI hereva be momokani! Inai tanobada be “hekwarahi bona lalohisihisi” amo ia honu. Reana oi sibona oi nanadaia: ‘Hari inai negai, moale korikorina lau abia diba, a?’

Maria mani oi laloa. Guna, ia be gaukara momo ia karaia diba, to hari, iena mauri lagani be 84 bona ruma ai ia noho sibona. Ena be iena harana ia gaukara namonamo, to ena tauanina ia goada lasi. Edena dala ai Maria ese moale korikorina ia abia diba?

Oi be edena bamona? Reana nega ta oi sibona oi nanadaia, ‘Edena dala ai moale korikorina lau abia diba?’ Reana gaukara tamona oi karaia loulou bona oi hesiku. Momo be emu hekwarahi idia laloa bada lasi. Ena be emu mauri ia namo, to reana oi wari dahaka be gabeai do ia vara. Nega haida oi sibona oi noho dainai, reana oi lalometau. Reana emu famili lalonai heai o hepapahuahu idia vara. Eiava oi lalokau henia tauna ta ia mase. Tau ta ladana, André, be ena tamana ia lalokau henia bada. To nega ta, iena tamana ia gorere bena ia mase. Unai ese André ena mauri ia hadikaia momokani, bona ia laloa ena daradoko do ia ore lasi.

Herevana ita hekwarahi, to inai henanadai ena haere ita diba be namo: Moale korikorina ita abia diba, a? Haere ita diba totona, namona be lagani 2,000 haida gunanai tanobada ai ia noho tauna​—Iesu Keriso​—ena mauri sivaraina ita herevalaia. Ena be Iesu be hahetoho idauidau ia davaria, to moale korikorina ia abia. Bema iena haheitalai ita tohotohoa, ita danu be moale korikorina ita abia diba.