BAIBEL HENANADAI EDIA HAERE

Baibel ena hereva ita lalopararalaia diba, a?

Baibel be Dirava ena Hereva. Ia be leta ta bamona, tama lalokauna ta ese ita dekenai ia siaia. (2 Timoteo 3:16) Baibel ai, Dirava be ita ia hamaoroa edena dala ai ia ita hamoalea diba, dahaka dainai kara dika ia koua lasi, bona vaira neganai dahaka do ia karaia taunimanima totona. To, dubu ena hadibaia taudia ese Baibel ena hereva idia mogea dainai, taunimanima momo idia laloa Baibel ena hereva do idia lalopararalaia lasi.​—Kara 20:29, 30.

Iehova Dirava ia ura ena sivarai momokanina ita diba. Unai dainai, ita dekenai Baibel ia henia bona ena hereva ita lalopararalaia diba.​—1 Timoteo 2:3, 4 duahia.

Edena dala ai Baibel ena hereva oi lalopararalaia diba?

Iehova be Baibel ia henia bona ita ia durua ena hereva ita lalopararalaia totona. Ia be Iesu amo ita ia hadibaia. (Luka 4:16-21) Iesu ese siri ta ta edia anina ia herevalaia goevagoeva, badina ia ura kamonai taudia ia durua Toretore Helagadia idia lalopararalaia totona.​—Luka 24:27, 32, 45 duahia.

Iesu ese Keristani kongrigeisen ia haginia, unai amo ia hamatamaia gaukarana idia karaia noho. (Mataio 28:19, 20) Hari inai negai, Iesu ena hesiai taudia be Baibel amo taunimanima idia durua Dirava ena sivarai momokani idia lalopararalaia totona. Bema oi ura Baibel ena hereva oi lalopararalaia, Iehova ena Witnes taudia be mai moale ida oi do idia durua.​—Kara 8:30, 31 duahia.