Iehova Ena Badinaia Bona Dika Gwauatao Karadia Tohotohoa

1, 2. (a) Dahaka dainai eda dika idia gwauatao bona ita idia badinaia turadia ita laloa bada? (b) Inai stadi ai edena henanadai edia haere do ita tahua?

EMU tura korikorina be edena bamona do oi gwauraia? Taihu ta ladana Ashley, ia gwau: “Tura korikorina be nega ibounai ia noho oi ia durua totona, bona oi kerere neganai emu dika ia gwauatao.” Ita ibounai ese eda dika idia gwauatao bona ita idia badinaia turadia ita laloa bada, badina edia kara dainai ita mamia idia ese ita idia lalokau henia.—Aon. 17:17.

² Iehova be eda Turana Namona, badina iseda dika ia gwauatao bona ita ia badinaia noho. Salamo torea tauna ia gwau: “Lohiabada e, oi be mai oiemu bogahisihisi, bona kara dika oi gwauatao noho. Oi dekenai idia guriguri noho taudia dekenai, oiemu noho hanaihanai lalokauna oi henia noho.” (Sal. 86:5) Ma ta ita badinaia bona ena dika ita gwauatao karana ena anina be dahaka? Edena dala ai Iehova ese unai kara namodia ia hahedinaraia? Bona edena dala ai iena haheitalai ita tohotohoa diba? Unai henanadai edia haere ese ita do idia durua, eda Turana, Iehova dekenai eda lalokau ita habadaia totona. Danu, unai ese ita do ia durua iseda hetura karana ma haida ida ita hagoadaia totona.—1 Ioa. 4:7, 8.

IEHOVA BE ITA IA BADINAIA

3. Badinaia karana ena anina be dahaka?

³ Badinaia karana ia hahedinaraia tauna be ta ia abidadama henia bona ena gwauhamata ia hamomokania. Nega namodia ai sibona lasi, to nega dikadia lalonai danu ena lalokau ia hahedinaraia noho. Oibe, Iehova be badinaia karana ia hahedinaraia goevagoeva tauna, badina ena ‘taunimanima ia rakatania lasi.’—Apok. 16:5.

4, 5. (a) Edena dala ai Iehova ese badinaia karana ia hahedinaraia? (b) Edena dala ai Iehova ena badinaia karadia ita laloa neganai goada do ita abia?

⁴ Edena dala ai Iehova ese badinaia karana ia hahedinaraia? Ia ese ia idia abidadama henia taudia ia rakatania lasi. Abidadama tauna King Davida be Iehova ena badinaia karana ia herevalaia. (2 Samuela 22:26 duahia.) Davida be hahetoho ia davaria negadiai, Iehova ese ia rakatania lasi, to ia hakaua, gimaia bona hamauria. (2 Sam. 22:1) Davida ia itaia Iehova ese ena badinaia karana be hereva sibona lasi, to kara amo ia hahedinaraia danu. Dahaka dainai Iehova ese Davida ia badinaia? Badina Davida ese Iehova ia badinaia danu. Iehova be ia idia badinaia taudia ia laloa bada, bona idia ia rakatania lasi.—Aon. 2:6-8.

⁵ Iehova ena badinaia karadia ita laloa neganai goada ita abia. Tadikaka ta ladana, Reed ia gwau: “Davida be hahetoho ia davaria negadiai, Iehova ese ia durua dalana ena sivarai lau duahia neganai, lau ia hagoadaia. Ena be Davida be kohua lalodiai ia hunia loaloa, to hanaihanai Iehova ese ia gimaia. Unai ese lau ia hagoadaia bada! Lau laloparara herevana egu hekwakwanai be bada o maragi, to bema Iehova lau badinaia noho, ia ese lau do ia durua.” Reana oi danu be unai bamona oi mamia, ani?—Roma 8:38, 39.

6. Edena dala ma haida ai Iehova ese badinaia karana ia hahedinaraia? Edena dala ai iena kara dainai, ena abidadama taudia ese namo idia davaria?

⁶ Edena dala ma haida ai Iehova ese badinaia karana ia hahedinaraia? Dala ta be ia ese hanaihanai ena taravatu ibounai ia badinaia. Ia gwau: “Ta ena buruka negana lalonai danu, lau idau lasi.” (Isa. 46:4, NW) Danu, abia hidi ia karaia neganai, ena kara maoromaoro taravatudia ia badinaia. (Mal. 3:6) Dala ma ta be, Iehova ese hanaihanai ena gwauhamata ia hagugurudia. (Isa. 55:11) Iehova ena badinaia karana ese ena abidadama taudia ibounai dekenai namo ia mailaia. Edena dala ai? Ita diba momokani, bema ita gaukara goada Iehova ena taravatu ibounai ita badinaia totona, ia ese ena gwauhamata hegeregerena ita do ia hanamoa.—Isa. 48:17, 18.

IEHOVA ENA BADINAIA KARANA TOHOTOHOA

7. Edena dala ta ai Iehova ena badinaia karana ita tohotohoa diba?

⁷ Edena dala ai Iehova ena badinaia karana ita tohotohoa diba? Dala ta be hekwakwanai idia davaria taudia ita durua. (Aon. 3:27) Hegeregere, reana oi diba tadikaka ta be ia gorere, ena famili ese idia dagedage henia, o kerere ta ia karaia dainai ia lalomanoka. Namona be oi lao bona ia dekenai “hanamoa bona lalona hagoadaia hereva” oi gwauraia. (Sek. 1:13)a Unai bamona oi karaia neganai, oi hamomokania oi be tura korikorina, emu lalokau ese “tadikaka ta ena lalokau ia hereaia.”—Aon. 18:24.

8. Edena dala ai headava lalonai Iehova ena badinaia karana ita tohotohoa diba?

⁸ Eda lalokau taudia dekenai dala idauidau ai iseda badinaia karana ita hahedinaraia diba. Hegeregere, bema ita be headava taudia, ita diba eda adavana ita badinaia noho be gau badana. (Aon. 5:15-18) Unai dainai, namo lasi dala ita kehoa heudahanai ena tarapu lalonai ita moru totona. (Mat. 5:28) Danu, iseda tadikaka taihu dekenai badinaia karana ita hahedinaraia diba. Hegeregere, idia ita gwauraia dika lasi, o edia ladana ita hadikaia totona koikoi herevadia ita gwauraia lasi. Bona ita ura lasi ma haida amo unai bamona hereva ita kamonai.—Aon. 12:18.

9, 10. (a) Gau ibounai lalonai ita ura daika ita badinaia noho? (b) Dahaka dainai nega haida Iehova ena hahegani ita badinadia be mai ena hekwarahi?

⁹ Ita ura gau iboudiai lalonai Iehova do ita badinaia noho. Edena dala ai unai ita karaia diba? Namona be eda kara amo ita hahedinaraia ita be Iehova ia ura henia gaudia ita ura henia, bona ia inai henia gaudia ita inai henia. (Salamo 97:10 duahia.) Bema iseda lalohadai bona hemami be Iehova ena bamona, unai ese ita do ia durua iena hahegani ita badinadia totona.—Sal. 119:104.

¹⁰ Momokani, nega haida Iehova ena hahegani ita badinadia be mai ena hekwarahi. Hegeregere, Keristani singul taudia haida idia ura headava, to orea lalonai tura namona ta idia do davaria lasi. (1 Kor. 7:39) Reana singul taihu ta ia itaia ena Witnes lasi gaukara turadia be hanaihanai palani idia karaia murimuri merona ta ia tura henia totona. Reana taihu be ia do headava lasi dainai ia lalohisihisi. To, taihu be ena lalona ia hadaia vadaeni Iehova ena taravatu do ia badinaia noho. Unai bamona badinaia karana idia hahedinaraia taudia edia haheitalai ita tohotohoa be namo, ani? Oibe, Iehova ese hahetoho negadia lalonai ia idia badinaia noho taudia do ia hanamoa.—Heb. 11:6.

IEHOVA BE DIKA IA GWAUATAO

11. Dika gwauatao karana ena anina be dahaka?

¹¹ Iehova ena kara namona ma ta be, mai ena ura ida dika ia gwauatao. Dika gwauatao karana ena anina be dahaka? Ena anina be, bema kerere tauna ia helalo-kerehai momokani, iena dika ita laloaboio bona ena kerere davana ita henia lasi. To namo lasi ita gwau, ta ena dika gwauatao karana anina be, ita laloa iena kara be kerere lasi, o unai kerere be ia vara lasi. Lasi, to dika gwauatao karana ena anina be kerere tauna do ita badu henia noho lasi. Baibel ia hahedinaraia bema kara dika tauna ia helalo-kerehai momokani, Iehova be ia “noho hegaegae kara dika ia gwauatao” totona.—Sal. 86:5, NW.

12. (a) Edena dala ai Iehova ese dika gwauatao karana ia hahedinaraia? (b) Iehova ese ta ena kara dika do ia “kokia” ena anina be dahaka?

¹² Edena dala ai Iehova ese dika gwauatao karana ia hahedinaraia? Iehova be kara dika tauna ena dika ia “gwauatao momokani,” bona ia laloaboio momokani. (Isa. 55:7) Edena dala ai ita diba Iehova be dika ia gwauatao momokani? Dirava ena gwauhamata Kara 3:19 (duahia) ai mani oi laloa. Aposetolo Petero ia gwau: “Umui helalo-kerehai bona emui kara umui haidaua.” Ia helalo-kerehai momokani tauna be iena kerere dainai ia sori bada, bona ena lalona ia hadaia unai kerere do ia karaia lou lasi. (2 Kor. 7:10, 11) Danu, ia helalo-kerehai momokani tauna be ‘ena kara ia haidaua,’ ia badinaia dala kererena ia dadaraia, bona Dirava ia hamoalea dalana ia badinaia. Bema Petero ena hereva idia kamonai taudia idia helalo-kerehai momokani, dahaka do ia vara? Petero ia gwau, Iehova ese edia kara dika do ia “kokia.” Grik gado ai inai hereva “kokia” ena anina ma ta be “dahua oho.” Unai dainai, Iehova ese iseda dika ia gwauatao neganai, unai be hegeregere spansi amo iseda kerere ia dahua oho. Oibe, Iehova be dika ia gwauatao momokani Diravana.—Heb. 10:22; 1 Ioa. 1:7.

13. Inai hereva “edia kerere do lau laloa lou lasi,” ena anina be dahaka?

¹³ Edena bamona ita diba Iehova ese iseda dika ia laloaboio momokani? Ieremia ese horoa Keristani taudia ia perovetalaia herevana ta amo Iehova ena dika gwauatao karana ita dibaia. (Ieremia 31:34 duahia.) Iehova ia gwau: “Lau ese edia kara dika do lau gwauatao, bona edia kerere do lau laloa lou lasi.” Iehova ia gwauhamata iseda dika ia gwauatao murinai, gabeai unai dika dainai ita do ia hahemaoro henia lou lasi. Danu, ia ese iseda dika do ia laloa noho lasi, bona ita do ia samania o panisia loulou lasi. To, ia ese iseda dika do ia gwauatao bona laloaboio momokani.—Roma 4:7, 8.

14. Iehova ena dika gwauatao karana ita laloa dobu neganai, edena dala ai ita ia hagoadaia? Haheitalai gwauraia.

¹⁴ Iehova ena dika gwauatao karana ita laloa dobu neganai, unai ese ita ia hagoadaia. Mani taihu Elaine ena sivarai ita laloa. Lagani momo gunanai Elaine be kongrigeisen amo idia atoa siri, to gabeai ia giroa lou. Ia gwau: “Ena be lau diba bona ma haida lau hamaorodia Iehova ese egu dika ia gwauatao vadaeni, to lau mamia Iehova be ma haida ia laloa bada bona lau ia lalokau henia lasi.” To, Elaine be Baibel siridia ai Iehova ena gwauatao karana ia duahia bona laloa dobu murinai, goada ia abia. Ma ia gwau: “Lau ese Iehova ena lalokau bona hebogahisi lau mamia momokani.” Elaine be inai hereva ese ia hagoadaia bada: “Iehova ese iseda kara dika ia gwauatao neganai, namo lasi ita laloa iseda kara dika ena miro be iseda mauri ibounai lalonai do ia noho.”b Elaine ma ia gwau: “Lau laloparara, matamanai Iehova ese egu dika ibounai ia gwauatao karana lau abia dae momokani lasi. Bona lau laloa egu kerere ena metau be egu mauri ibounai lalonai do lau huaia. To, hari lau mamia lau be Iehova kahirakahira lau noho, bona unai ese egu metau ia kokia bamona.” Momokani, Iehova be lalokau bona dika ia gwauatao Diravana!—Sal. 103:9.

IEHOVA ENA DIKA GWAUATAO KARANA TOHOTOHOA

15. Edena dala ai Iehova ena dika gwauatao karana ita tohotohoa diba?

¹⁵ Bema kerere tauna ia helalo-kerehai momokani, namona be Iehova ita tohotohoa bona ena dika ita gwauatao. (Luka 17:3, 4 duahia.) Ita laloatao Dirava ese iseda dika ia gwauatao neganai, ia laloaboio bona gabeai unai dika dainai ita do ia panisia lasi. Ita danu be haida edia dika ita gwauatao neganai, namona be edia kerere do ita laloaboio bona gabeai ita herevalaia lou lasi.

16. (a) Haida edia dika ita gwauatao ena anina be dahaka? (b) Dirava ese eda dika ia gwauatao totona, dahaka ita karaia be namo?

¹⁶ Namo lasi ita laloa ma haida edia dika ita gwauatao anina be, edia kara dika ita abia dae, eiava ita ura idia ese ita be unai bamona do idia kara henia. Lasi, to ta ena dika ita gwauatao anina be, ena kara dainai ita badu henia noho lasi. Mai anina bada gauna be Dirava ese iseda dika ia gwauatao totona, Ia do ita tohotohoa bona ma haida edia dika do ita gwauatao. (Mat. 6:14, 15) Iehova ia diba “ita be kahu sibona” bona goevadae lasi dainai, ita ia hebogahisi henia. (Sal. 103:14) Vadaeni, haida ese ita idia kara dika henia neganai, namona be ita laloatao, ita ibounai be goevadae lasi taudia, bona eda kudouna amo eda dika ita gwauatao heheni.—Efe. 4:32; Kol. 3:13.

17. Bema tadikaka o taihu ta ese ita ia hahisia, dahaka ese ita ia durua diba?

¹⁷ Momokani, haida edia dika ita gwauatao be mai ena hekwarahi. Paulo ena negai, horoa Keristani taudia haida danu be idia hekwarahi edia huanai idia vara hekwakwanai idia hamaoromaoroa totona. (Fili. 4:2) Bema tadikaka o taihu ta ese emu lalona ia hahisia, dahaka ese oi do ia durua ena dika oi gwauatao totona? Mani Iobu ena sivarai ita laloa. Iobu ena “turana toi”—Elipasa, Biledada, bona Sopara—idia gwau reana ia be kara dika ta ia karaia. Edia hereva dainai Iobu ia lalohisihisi bada. (Iobu 10:1; 19:2) Dokonai, Iehova ese unai koikoi turadia toi edia lalohadai kererena ia hamaoromaoroa, bona ia hamaorodia Iobu dekenai do idia lao bona edia dika gwauatao boubouna do idia henia. (Iobu 42:7-9) To, Iehova ia ura Iobu ese gau ta do ia karaia danu. Unai be dahaka? Iehova ese Iobu ia hamaoroa unai koikoi turadia toi totona do ia guriguri. Iobu be Iehova ena hereva hegeregerena ia karaia, bona ena dika gwauatao karana dainai, Iehova ese ia hanamoa. (Iobu 42:10, 12, 16, 17 duahia.) Unai sivarai amo dahaka ita dibaia? Ita ia hahisia tauna totona mai momokani ida ita guriguri neganai, unai ese ita do ia durua ita badu lasi totona.

IEHOVA ENA KARA NAMODIA DIBAIA BONA HAHEDINARAIA NOHO

18, 19. Edena dala ai ita ese Iehova ena kara namodia ita laloa bada diba?

¹⁸ Ita moale badina Iehova ena kara namodia haida ita herevalaia vadaeni. Ita itaia Iehova ita hereva henia diba, ia be taunimanima edia toana ia laloa bada lasi, hariharibada bona laloa maoromaoro Diravana, badinaia karana ia hahedinaraia, bona kara dika ia gwauatao. Oibe, unai be Dirava ena kara haida sibona. Nega vaira ai ita ese mai moale ida Iehova ena kara idauidau do ita dibaia noho ela bona hanaihanai. (Had. 3:11) Aposetolo Paulo ena hereva ita abia dae, ia gwau: “Dirava ena taga, ena aonega bona ena diba be dobu momokani!” Dirava ena lalokau bona inai stadi ai ita herevalaia kara namodia siks be unai bamona danu.—Roma 11:33.

¹⁹ Namona be ita ibounai ese Iehova ena kara namodia ita laloa bada. Unai ita karaia diba bema iena kara namodia ta ta ita stadilaia, ita lalodia dobu bona iseda mauri ai ita hahedinaraia danu. (Efe. 5:1) Unai bamona ita karaia neganai, ita ese Salamo torea tauna ena hereva do ita abia dae momokani, ia gwau: “Lau be Dirava badibadinai lau noho. Inai be namo herea momokani.”—Sal. 73:28.