Iesu Be Haida Sibona Amo Hutuma Ia Ubua

1-3. Iesu ese Betesaida ai hutuma bada ia ubua ena sivarai mani oi gwauraia. (Laulau ginigunana itaia.)

MANI inai oi piksaia. (Mataio 14:14-21 duahia.) Lagani 32 C.E. ena Pasova ariana be kahirakahira. Iesu bona ena hahediba taudia be Galilea Gohuna ena kone hanua maragina ladana, Betesaida dekenai idia noho neganai, tatau 5,000 bamona, hahine bona natudia danu be Iesu ena hereva idia kamonai totona idia lao.

² Iesu be unai hutuma ia itaia neganai ia hebogahisi. Unai dainai, gorere taudia ia hanamodia bona Dirava ena Basileia ia harorolaia. Adorahi momokani ai, hahediba taudia be Iesu idia hamaoroa hutuma do ia siaidia, unai amo kahirakahira idia noho hanua dekenai do idia lao bona aniani do idia hoia. To, Iesu ese ena hahediba taudia ia hamaorodia: “Umui ese idia dekenai aniani umui henia.” Reana iena hereva dekenai idia daradara, badina edia aniani be hegeregere lasi—paraoa faiv bona gwarume rua sibona.

³ Iesu ia hebogahisi dainai, hoa karana ta ia karaia, bona Evanelia bukadia idia torea taudia foa ese unai idia sivarailaia. (Mar. 6:35-44; Luka 9:10-17; Ioa. 6:1-13) Iesu ese ena hahediba taudia ia hamaorodia, hutuma do idia hadibaia orea ta ta be rei dekenai do idia helai, orea haida be 50, bona ma haida be 100. Ia guriguri murinai, paraoa bona gwarume ia makohia. Ia sibona ese taunimanima dekenai aniani ia henia lasi, to ena “hahediba taudia dekenai ia henia bona hahediba taudia ese hutuma dekenai idia henia.” Taunimanima ibounai idia aniani, idia bogakunu, bona aniani oredia idia noho, unai be hoa gauna! Mani oi laloa: Iesu ese ena hahediba taudia haida sibona amo taunimanima tausen ia ubudia.—Maua ai futnout 1 itaia.a

4. (a) Iesu be dahaka gaukara ia laloa bada, bona dahaka dainai? (b) Inai stadi bona stadi gabena ai dahaka do ita herevalaia?

⁴ Iesu be ia murinai idia raka taudia dekenai Dirava ena hereva do ia hadibaia gaukarana ia laloa bada. Ia diba Dirava ena hereva momokani ese taunimanima ia durua diba mauri hanaihanai idia abia totona. (Ioa. 6:26, 27; 17:3) Iesu be hutuma ia hebogahisi henidia dainai, paraoa bona gwarume amo ia ubudia. Unai hegeregerena, ena hahediba taudia ia hebogahisi henia dainai, hora momo lalonai ia hadibadia. (Mar. 6:34) To Iesu ia diba, kahirakahira guba dekenai do ia giroa lou. (Mat. 16:21; Ioa. 14:12) Iesu be guba ai ia daekau murinai, edena dala ai tanobada ai idia noho hahediba taudia dekenai Dirava ena hereva momokani do ia hadibaia? Ia ese hutuma ia ubudia dalana do ia badinaia: Tatau haida sibona amo taunimanima momo do ia ubua. Unai tatau haida be daidia? Mani ita itaia, edena dala ai Iesu ese unai tatau ia gaukaralaia horoa taudia dekenai Dirava ena hereva idia hadibaia totona. Stadi gabena ai, ita ese inai mai anina bada henanadai do ita herevalaia: Keriso ese hari daidia ia gaukaralaia Dirava ena hereva momokani be ita dekenai idia hadibaia totona?

IESU ESE TATAU HAIDA IA ABIA HIDI

5, 6. (a) Iesu be dahaka abia hidi badana ia karaia unai amo ia mase murinai, ena murinai idia raka taudia be Dirava ena hereva momokani do idia abia noho? (b) Edena dala ai Iesu ese aposetolo taudia be gaukara badana ta totona ia hahegaegaea?

⁵ Ena famili ia laloa bada tama ta be gau haida ia hegaegaelaia, unai amo ia mase neganai, edia noho do ia namo. Unai hegeregerena Iesu, Keristani kongrigeisen ena Kwarana, ese dala ia hegaegaelaia unai amo ia mase murinai, ena murinai idia raka taudia be Dirava ena hereva momokani do idia abia noho. (Efe. 1:22) Hegeregere, ena haroro gaukara ia matamaia neganai, ia ese abia hidi badana ta ia karaia. Iesu ese tatau ginigunadia ia abia hidi, unai amo gabeai idia ese hutuma do idia ubua. Unai ia karaia dalana mani ita itaia.

⁶ Iesu be hanuaboi ibounai lalonai ia guriguri murinai, ena hahediba taudia ia haboua bona idia huana amo aposetolo taudia 12 ia abia hidi. (Luka 6:12-16) Lagani rua lalonai unai tatau 12 ia bamoa, bona ena hereva bona kara amo ia hadibadia. Ia diba idia ese gau momo idia dibaia be namo, unai dainai Baibel ese ia gwauraidia “hahediba taudia.” (Mat. 11:1; 20:17) Idia ta ta ia sisiba henia bona haroro gaukara ia hadibadia. (Mat. 10:1-42; 20:20-23; Luka 8:1; 9:52-55) Unai dala amo idia ia hahegaegaea, badina ia mase bona guba dekenai ia giroa lou murinai, idia be gaukara badana do idia karaia.

7. Edena dala ai Iesu be aposetolo taudia ese do idia karaia gaukara badana ia hahedinaraia?

⁷ Aposetolo taudia be dahaka maduna do idia huaia? Pentekoste 33 C.E. ia kahirakahira neganai, ia hedinarai goevagoeva aposetolo taudia be “naria gaukarana” do idia karaia. (Kara 1:20) To, edia gaukara badana be dahaka? Iesu ia toreisi lou murinai, aposetolo Petero dekenai ia gwauraia herevana amo haere do ita davaria. (Ioane 21:1, 2, 15-17 duahia.) Aposetolo taudia ma haida edia vairanai, Iesu ese Petero ia hamaoroa: “Lauegu mamoe natudia oi ubua.” Iesu ese ia hahedinaraia ena aposetolo taudia danu be ia ese ia abia hidi tatau edia huanai idia noho. Momokani, unai ese ia hahedinaraia Iesu be ena “mamoe natudia” ia laloa bada!—Maua ai futnout 2 itaia.b

PENTEKOSTE AMO TAUNIMANIMA IDIA UBUA MATAMAIA

8. Edena dala ai Keristani matamatadia idia hahedinaraia, Keriso ese ia abia hidi aposetolo taudia edia gaukara idia lalopararalaia?

⁸ Pentekoste 33 C.E. ai, ia toreisi lou vadaeni tauna Keriso, ese ena aposetolo taudia ia gaukaralaia, horoa Keristani taudia ma haida dekenai Dirava ena hereva momokani idia hadibaia totona. (Kara 2:41, 42 duahia.) Unai dina ai, lauma helaga ese Iuda taudia bona idau bese taudia ia horodia, bona idia be aposetolo taudia edia gaukara idia lalopararalaia. Idia be mai edia lalona ibounai ida “aposetolo taudia edia hadibaia herevadia idia kamonai namonamo noho.” Unai Keristani matamatadia be Dirava ena hereva totona idia hitolo bada, bona idia diba edeseni amo unai do idia abia. Idia be aposetolo taudia dekenai idia lao, bena aposetolo taudia ese Iesu ena hereva bona kara, bona Toretore Helagadia lalonai Iesu idia perovetalaia herevadia edia anina idia gwauraia hedinarai. (Maua ai futnout 3 itaia.)—Kara 2:22-36.c

9. Aposetolo taudia be edena dala ai idia hahedinaraia, Iesu ena mamoe ubua gaukarana idia laloa bada?

⁹ Aposetolo taudia be Iesu ena mamoe ubua gaukarana idia laloa bada. Hegeregere, kongrigeisen matamatana lalonai ia vara hepapahuahu ta idia hamaoromaoroa dalana mani ita laloa. Unai negai haida be tauanina durua aniani totona idia hepapahuahu. Dina ta ta aniani idia haria neganai, Grik gado ai idia hereva vabu idia laloa lasi, to Heberu gado ai idia hereva vabu dekenai aniani idia henia. Edena dala ai aposetolo taudia ese unai hekwakwanai badana idia hamaoromaoroa? “Aposetolo taudia 12” ese lo tadikaka seven idia abia hidi aniani haria gaukarana idia karaia totona. Unai aposetolo taudia momo be Iesu ese ia gaukaralaia, Betesaida ai hutuma dekenai aniani idia haria totona. Idia laloparara idia ese ma haida dekenai Dirava ena hereva momokani idia hadibaia be gaukara badana. Unai dainai, idia ese nega bada idia atoa ‘Dirava ena hereva hadibaia gaukarana idia goadalaia’ totona.—Kara 6:1-6.

10. Edena dala ai Keriso ese aposetolo taudia bona tau badadia ia gaukaralaia?

¹⁰ Lagani 49 C.E. ai, lo elda taudia ma haida be idia do mauri noho aposetolo taudia ida idia gaukara hebou. (Kara 15:1, 2 duahia.) Ierusalema ai “aposetolo taudia bona tau badadia” be hakaua oreana ena gaukara idia karaia. Keriso, kongrigeisen ena Kwarana, ese unai lo tatau ia gaukaralaia Baibel ena hahediba herevadia dainai idia vara hepapahuahu idia hamaoromaoroa, bona Basileia ena sivarai namona harorolaia bona hadibaia gaukarana idia gunalaia totona.—Kara 15:6-29; 21:17-19; Kol. 1:18.

11, 12. (a) Dahaka ese ia hahedinaraia, aposetolo edia negai Iesu ese kongrigeisen ia hadibaia dalana be Iehova ese ia hanamoa? (b) Edena dala ai momo idia hahedinaraia Iesu ese kongrigeisen ia hadibaia dalana idia lalopararalaia?

¹¹ Iehova be ena Natuna ese aposetolo edia negai idia noho kongrigeisen ia hadibaia dalana ia hanamoa, a? Oibe! Edena dala ai unai ita diba? Kara bukana ia gwau: “Taoni idauidau dekenai idia lao neganai, unai gabu taudia dekenai taravatu idia henidia idia badinaia totona. Unai taravatu be Ierusalema ai idia noho aposetolo taudia bona tau badadia ese idia abia hidi gaudia. Unai dainai kongrigeisen taudia edia abidadama ia goada ia lao bona dina ta ta ai edia namba ia bada daekau.” (Kara 16:4, 5) Kongrigeisen be hakaua oreana ena hereva idia badinaia dainai, idia goada idia lao. Unai ese ia hamomokania Iehova be ena Natuna ese kongrigeisen ia hadibaia dalana ia hanamoa. Namona be ita laloatao kongrigeisen do idia goada, bema Iehova ese edia gaukara ia hanamoa.—Aon. 10:22; 1 Kor. 3:6, 7.

¹² Ita itaia vadaeni Iesu be ena murinai idia raka taudia hadibaia totona, inai dala ia badinaia: Tatau haida sibona amo hutuma ia ubua. Momo be Iesu ese kongrigeisen ia hadibaia totona ia gaukaralaia dalana idia lalopararalaia. Danu, aposetolo taudia—hakaua oreana ginigunana—idia hahedinaraia Dirava ese idia ia durua. Badina Kara 5:12d ia gwau: “Aposetolo taudia be taunimanima huanai toa bona hoa karadia momo idia karaia.” (Maua ai futnout 4 itaia.) Unai dainai, Keristani matamatadia be do idia daradara lasi, mamoe ubua totona Iesu ese daidia ia gaukaralaia. To, aposetolo taudia idia mase murinai unai ia idau.

AVA DIKADIA BE MOMO, TO WITI BE MOMO LASI

13, 14. (a) Iesu ia gwau kongrigeisen dekenai dahaka do ia vara, bona edena negai unai ia guguru matamaia? (b) Edena dala rua ai kongrigeisen be dagedage ia davaria? (Futnout mauana itaia.)

¹³ Iesu ia gwau Keristani kongrigeisen be dagedage do ia davaria. Laloatao, witi bona ava dikadia ena parabole lalonai Iesu ia gwau, uma biaguna ese uma gabu matamata lalonai witi (horoa Keristani taudia) ia hadoa murinai, inai tauna ta ese ava dikadia (Keristani koikoidia) ia hadoa danu. Iesu ia gwau unai witi bona ava dikadia be do idia tubu hebou ela bona gogoa negana—“nega oromana ena dokona.” (Mat. 13:24-30, 36-43) Daudau lasi murinai Iesu ena hereva ia guguru matamaia.—Maua ai futnout 5 itaia.e

¹⁴ Ena be aposetolo edia negai, aposteit taudia ese hereva momokani idia mogea toho, to aposetolo taudia ese unai idia “koua.” (2 Tes. 2:3, 6, 7) Aposetolo taudia ibounai idia mase murinai, aposteit karana be kongrigeisen lalonai ia vareai. Unai negai, ava dikadia be idia momo herea, to witi be momo lasi. Danu, Iesu ese Dirava ena hereva momokani halasia totona ia gaukaralaia taudia idia noho lasi. Unai be do ia idau. To, edena negai?

GOGOA NEGANA—DAIDIA ESE UBUA GAUKARANA DO IDIA KARAIA?

15, 16. Bible Student taudia be Baibel idia stadilaia namonamo dainai dahaka ia vara, bona dahaka henanadai ia hedinarai?

¹⁵ Gogoa negana ia kahirakahira lalonai, haida be Baibel ena hereva momokani idia ura henia matamaia. Ita laloatao lagani 1870 lalodiai, hereva momokani idia tahua taudia haida be ava dikadia o Kerisendom dubudia amo idia raka siri. Idia ese orea maragina ta idia haginia bona Baibel stadi klas idia hamatamaia. Unai orea maragina be sibona idia gwauraia Bible Student taudia. Idia be Dirava ena heduru idia noia, bona mai manau bona ura ida Baibel idia stadilaia namonamo.—Mat. 11:25.

¹⁶ Unai Bible Student taudia be Baibel idia stadilaia namonamo dainai, anina namona ia havaraia. Idia ese tomadiho koikoidia edia hahediba hereva koikoidia idia hahedinaraia, hereva momokani idia harorolaia, Baibel bukadia idia printaia bona tanobada hegegemadai idia hariharilaia. Edia gaukara ese hereva momokani totona idia hitolo bona ranu mase taudia momo edia lalona ia veria bona kudouna ia hamarerea. To reana do ita henanadai: Lagani 1914 be do lasi neganai idia noho Bible Student taudia be, Iesu ese ia abia hidi iena mamoe do idia ubua taudia, a? Lasi. Badina unai negai witi bona ava dikadia be idia do tubu hebou noho, bona Iesu ese Dirava ena hereva do idia hadibaia taudia ia do abidia hidi lasi. Danu, ava dikadia (Keristani koikoidia) be witi (Keristani momokanidia) amo do idia hapararaia negana ia do ginidae lasi.

17. Lagani 1914 ai dahaka mai anina bada gaudia idia vara matamaia?

¹⁷ Vanegai ena stadi amo ita dibaia gogoa negana be lagani 1914 ai ia matamaia. Unai lagani ai, mai anina bada gaudia haida idia vara matamaia. Iesu be King ai ia lao, bona dina gabedia ia matamaia. (Apok. 11:15) Lagani 1914 amo ela bona 1919 ena matamanai, Iesu be ena Tamana ida Dirava ena dubu helaga sekea bona hagoevaia gaukarana idia karaia. (Maua ai futnout 6 itaia.)f (Mal. 3:1-4) Bena lagani 1919 ai, witi gogoa gaukarana ia matamaia. Unai be nega maorona Iesu ese haida do ia abia hidi Dirava ena hereva idia halasia totona, a? Oibe!

18. Iesu ia gwau daidia do ia abia hidi, bona dina gabedia ia matamaia neganai, edena henanadai badana ia vara?

¹⁸ Iesu ese dina gabedia ia perovetalaia neganai, ia gwau tatau haida do ia abia hidi Dirava ena hereva be “nega korikori ai” idia halasia totona. (Mat. 24:45-47) Unai tatau be daidia? Aposetolo edia negai ia karaia hegeregerena, Iesu be tatau haida sibona amo hutuma do ia ubua. To dina gabedia idia matamaia neganai, inai henanadai badana ia vara, Unai tatau haida be daidia? Unai henanadai bona ma haida be stadi gabena ai do ita herevalaia.