Iesu ese Tausen Momo Ia Ubua

Lagani 32 C.E. ena Pasova ia kahirakahira, bona aposetolo taudia be haroro gaukara amo idia giroa mai. Idia hesiku bada dainai, Iesu ese ia hamaoroa bouti amo Betesaida dekenai do idia lao, laga-ani totona. To bouti be kone kahirakahira ia mai lalonai, Iesu ia itaia taunimanima tausen momo be unuseni idia noho. Ena be Iesu ia ura ena aposetolo taudia sibona ida do idia noho, to mai hebogahisi ida taunimanima ia abia dae. Gorere taudia ia hanamoa bona ia hadibadia matamaia. Unai dina ai, Iesu ese idia dekenai Dirava ena Basileia ia hadibaia. Adorahi ai, ena aposetolo taudia idia mai bona idia gwau: ‘Idia hitolo dainai oi siaia lao, edia aniani idia hoia totona.’

Iesu ia gwau: ‘Do idia lao lasi. Idia dekenai aniani umui henia.’ Aposetolo taudia idia henanadai: ‘Oi ura do ai lao bona idia totona aniani do ai hoia, a?’ Aposetolo tauna Filipo ia gwau: ‘Ena be 200 denario amo paraoa ita hoia, to do ia hegeregere lasi inai hutuma totona.’

Iesu ia henanadai: ‘Ita dekenai dahaka aniani ia noho?’ Andrea ia gwau: ‘Paraoa 5 bona gwarume rua. Unai be hegeregere lasi.’ Iesu ia gwau: ‘Unai paraoa bona gwarume be lau dekenai oi abia mai.’ Taunimanima ia hamaoroa grup ta ta be 50 bona 100 ai, rei dekenai do idia helai. Iesu ese paraoa bona gwarume ia abia, guba ia itaia, bona ia guriguri. Bena aposetolo taudia dekenai aniani ia henia, bona idia ese taunimanima dekenai idia henia. Tatau be 5,000 bona idia ida be hahine bona natudia, idia aniani ela bona edia bogana ia honu. Unai murinai, aposetolo taudia ese aniani oredia be bosea lalonai idia udaia. Bosea 12 idia hahonua! Unai be hoa kara idauna, ani?

Taunimanima idia moale dainai idia ura Iesu be edia king ai do idia halaoa. To Iesu ia diba unai be Iehova ese king ai ia do ia halaoa negana lasi. Unai dainai hutuma ia siaidia lao bona ena aposetolo taudia ia hamaoroa Galilea Gohuna ena kahana ma ta dekenai do idia lao. Aposetolo taudia be bouti dekenai idia guia, bona Iesu sibona be ororo dekenai ia daekau. Dahaka dainai? Badina ia ura ena Tamana dekenai ia guriguri. Ena be Iesu ia bisi bada, to hanaihanai guriguri totona nega ia atoa.