DUAHIA TAUDIA EDIA HENANADAI
Keristani tauna ia mase neganai, ena tauanina idia gabua diba, a?
Baibel be mase tauanina gabua karana ia taravatua lasi.
Baibel ese mase taudia edia tauanina o turia idia gabua ena sivarai haida ia gwauraia. (Ios. 7:25; 2 Siv. 34:4, 5) Reana do ita laloa unai mase taudia be hegeregere lasi hemataurai dalanai idia guridia totona. To, mase tauanidia idia gabua ena anina be unai lasi.
King Saulo bona ena natudia memero toi edia mase sivaraina amo unai ita diba. Idia be Pilistia taudia idia tuari henidia lalonai idia mase. King Saulo ena natuna ta Ionatana be Davida ena turana namona bona Davida ia durua. Iabese Gileada ai idia noho Israela tatau goadadia be edia mase sivaraina idia kamonai neganai, unai tatau hani edia mase tauanidia idia abia, idia gabudia bona edia turia idia guria. Gabeai, Davida ese unai tatau edia kara dainai ia hanamodia.—1 Sam. 31:2, 8-13; 2 Sam. 2:4-6.
Baibel ia gwau mase tauna ena helaro be do ia toreisi lou—Dirava ese mase tauna do ia hamauria lou. Herevana, mase tauna ena tauanina idia gabua o lasi, to Iehova be ia hegeregere mase tauna be tauanina matamatana ida do ia hatorea isi lou totona. King Nebukanesa ese oda ia henia, abidadama goada Heberu memero toi be siahu masemase lahi lalonai do idia negedia vareai neganai, idia gari lasi. Badina idia diba bema lahi ese idia ia gabua ore, Iehova ese ia hatoredia isi lou diba. (Dan. 3:16-18) Nazi dibura kamepa ai idia dagedage henidia bona gasi amo idia gabudia mase Iehova ena hesiai taudia goadadia danu be Dirava idia abidadama henia. Iehova ena hesiai taudia haida be bomu ese ia hamasedia o edia tauanina idia davaria diba lasi. To, Dirava ese idia do ia hatoredia isi lou.—Apok. 20:13.
Iehova be mase tauna ia hatorea isi lou totona, ena tauanina gunana do ia atoa hebou lasi. Dirava ese horoa Keristani taudia be guba dekenai do ia hatoredia isi lou karana ese unai ia hahedinaraia. Iesu be “lauma tauanina ai ia toreisi lou” bamona, horoa Keristani taudia ta ta do idia toreisi lou bona lauma tauanina do idia abia. Edia tanobada tauanina gunana ida guba dekenai do idia daekau lasi.—1 Pet. 3:18; 1 Kor. 15:42-53; 1 Ioa. 3:2.
Ita diba momokani mase tauna be do ia toreisi lou, herevana ena tauanina be idia gabua o lasi. Unai ita abia dae badina Dirava be mai ena siahu unai do ia karaia bona ia ura iena gwauhamata do ia hagugurudia. (Kara 24:15) Momokani, ita diba lasi guna Dirava ese mase taudia be edena bamona ia hatoredia isi lou, bona ita diba lasi vaira negai edena bamona do ia karaia. To, Iehova ita abidadama henia, badina Iesu ia hatorea isi lou karana amo “ia hamomokania, unai be do ia vara momokani.”—Kara 17:31; Luka 24:2, 3.
Namona be Keristani taudia ese edia tano dekenai taunimanima edia mase guria karadia, bese edia hemami bona gavamani edia taravatu do idia laloa guna. (2 Kor. 6:3, 4) Unai murinai, mase tauanina be do idia gabua o lasi ena abia hidi be tau ta sibona o ena famili taudia ida idia karaia diba.