Kahu Dekenai Ita Giroa Lou Edena Bamona?

“OI BE tano dekena amo karaia gauna, bona tano dekenai do oi giroa lou.” Tau ginigunana, Adamu, be unai hereva ia kamonai neganai, ia diba vadaeni dahaka do ia vara. Dirava ese tano ena kahu amo ia karaia bona tano ena kahu sibona dekenai do ia giroa lou. Ia mase badina ena Havaraia Tauna, Iehova Dirava, ia kamonai henia lasi.​—⁠Genese 2:​7, 15-17; 3:​17-19.

Baibel ia hahedinaraia taunimanima be kahu amo idia mai. Ia gwau danu: “Ia kara dika soul-ia sibona do ia mase.” (Esekiela 18:​4, NW; Salamo 103:14) Mase ese lalohisihisi bada ia mailaia taunimanima milioni momo dekenai bona mase tauanina kara henia karana dekenai henanadai momo ia havaraia.

Guna Bona Hari Idia Karaia Karadia

Dirava ena idaunegai taudia ese mase taudia edia tauanina be edena bamona idia kara henia? Baibel ena rau ginigunadia amo, ia hahedinaraia mase taudia be dala idauidau ai idia kara henidia, tano dekenai idia guridia danu. (Genese 35:⁠8) Bese kwarana Aberahamo bona ena adavana, Sara, bona idia edia natuna mero Isako bona edia tubuna Iakobo be Makapela nadi ena matuna lalonai idia guridia. (Genese 23:​2, 19; 25:9; 49:​30, 31; 50:13) Israela ena hahemaoro taudia Gideona bona Samson be ‘edia tamadia edia guria gabuna dekenai idia guridia.’ (Gunalaia Taudia 8:32; 16:31) Unai ese ia hahedinaraia Dirava ena idaunegai taudia idia ura gauna be famili ta ta be mai ena gara gabuna. Iesu Keriso ia mase neganai, iena tauanina be nadi lalonai idia utua gara gabuna matamatana lalonai idia atoa. (Mataio 27:​57-60) Unai nega lalonai, mase taudia edia tauanina be tano lalonai idia guria eiava nadi ena matuna lalonai idia atoa. Unai kara be tanobada ena gabu momo dekenai idia do karaia noho.

To, hari tanobada ena kahana haida dekenai, tano ena bada be hegeregere lasi bona ena davana be bada herea dainai, gara gabudia karaia be auka. Unai dainai taunimanima haida be dala idaudia ai mase taudia edia tauanina kara henia daladia idia lalohadailaia noho.

Mase taudia edia tauanina gabua bona edia lahi kahuna negea karana be ia bada ia lao. England dekenai, edia mase taudia 10 10 amo 4 4 bamona dekenai unai idia karaia. Sweden dekenai, taoni ai mase taudia 10 10 amo 8 8 bona ma haida dekenai unai idia karaia, bona au idia tubu gabudia haida idia abidia hidi lahi kahuna negea gabudia totona. Bona China dekenai, Shanghai bona davara kahirakahira ai idia noho siti haida dekenai, siti ena gavamani ese lagani ta lalonai nega ta ta ia abia hidi bona mase taudia momo edia lahi kahuna be nega tamona davara dekenai idia negea.

Lahi kahuna be edeseniai idia negea diba? Gabu ta dekenai idia nega kava diba lasi. Haida idia laloa lahi kahuna negea karana ese gorere ia havaraia diba. To, unai do ia vara lasi badina tauanina idia gabua neganai, unai ese gorere havaraia gaudia ia hamasea. England bona United States ai gara gabudia haida ese ava gabudia eiava palaoapalaoa umadia idia abia hidi lahi kahuna negea gabudia totona. Oibe, Keristani taudia be Baibel ena lalohadai mase tauanina gabua bona lahi kahuna negea karana dekenai idia laloa bada.

Baibel Ena Lalohadai be Dahaka?

Peroveta tauna Isaia ese “Babulonia ena king” dekenai ia hereva metauna ia henia neganai, ia gwau: “Oiemu guria gabuna dekena amo, oi idia negea daudau.” (Isaia 14:​4, 19) Lahi kahuna negea karana be unai hemarai karana ida ita hahegeregerea be namo, a? Lasi, badina unai siri lalonai mase tauanina idia gabua bona ena lahi kahuna idia naria o idia negea karana ia gwauraia lasi.

Iesu Keriso ese iena Lagani 1,000 Lohia Negana lalonai tanobada dekenai mase taudia do idia toreisi lou ia herevalaia neganai, ia gwau: “Mase guria gabu dekenai idia noho taudia ibounai ese [lauegu] gadona do idia kamonai. Vadaeni guria gabu dekena amo do idia toreisi.” (Ioane 5:​28, 29) To, toreisi lou ia perovetalaia herevana ma ta ese ia hahedinaraia, tau ta do ia toreisi lou totona, gara gabuna dekenai do idia guria eiava lasi be anina lasi. Apokalupo 20:13 ia gwau: “Davara lalonai idia mase vadaeni taudia be davara ese idia ia henia daekau lou. Bona Mase, bona mase taudia edia gabu ese idia lalonai idia koua noho taudia idia henia daekau lou.” Unai dainai, tau ta be edeseniai eiava edena bamona ‘kahu dekenai ia giroa lou’ be anina bada lasi. To, mai anina bada gauna be Dirava ese do ia laloatao bona do ia hatorea isi lou eiava lasi. (Iobu 14:​13-15; Luka 23:​42, 43 itaia.) Dava bada kwara nadi ese Iehova idia durua lasi taunimanima ia lalodiatao totona. Mase tauanina gabua karana ese ta ena toreisi lou dalana ia koua lasi. Bona bema lahi kahuna negea karana be lalohadai maorona ida idia karaia bona tomadiho koikoi edia kara idia badinaia lasi, unai be Baibel ena lalohadai hegeregerena.

Mase tauanina ena lahi kahuna negea karana idia abia hidi taudia ese edia tano ena taravatu do idia badinaia. Mase tauna ena varavara taudia bona taunimanima ma haida edia hemami do idia laloa danu be namo. Iehova ena hesiai taudia be do idia naria namonamo, Baibel ese ia taravatua lasi karana idia karaia neganai, unai ese Keristani taudia edia ladana namona ia hadikaia lasi. Gavamani ese mase tauanina gabua bona ena lahi kahuna negea karana idia abia dae, to taunimanima be idia do abia dae lasi tanodia dekenai, unai be mai anina bada. Momokani, Keristani tauna be soul ia mase diba lasi kastom o tomadiho karadia amo do ia gini siri.

Guri Gabuna amo Ita Kwalimu Vaitani!

Mase tauanina ena lahi kahuna negea karana idia abia dae taudia haida idia gwau unai kara ena anina be guri gabuna amo ita kwalimu. To, Baibel ena gwauhamata, ‘Dirava ese mase do ia haorea,’ ia guguru neganai, namo bada do ia mailaia.​—⁠1 Korinto 15:​24-28.

Unai ena anina be guri gabudia, gara gabudia, mase tauanina gabua bona ena lahi kahuna negea karana danu, be kara gunadia ai do idia lao. Oibe, mase be do ia ore vaitani. Lauma ena siahu henunai aposetolo Ioane be inai ia torea: “Gado ta lau kamonai, helai gabuna badana dekena amo ia mai, ia hereva badabada, ia gwau, ‘Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia orea momokani. Badina be gau gunadia be idia ore vaitani.’ ”​—⁠Apokalupo 21:​3, 4.

Dirava ena Basileia henunai, Adamu ena kara dika dainai ia vara mase ia ore vaitani neganai, unai do ia vara. Unai neganai kara namo taudia be kahu dekenai do idia giroa lou lasi.

[Picture on page 29]

Mase tauanina idia kara henia karadia haida

[Picture on page 31]

Sagami Bay, Japan, dekenai mase tauanina ena lahi kahuna idia negea

[Credit Line Page 31]

Courtesy of Koueisha, Tokyo