OI LALOATAO, A?
Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:
Nisan 14 ai, Pasova mamoe be edena negai idia alaia?
Baibel ma haida ai inai hereva “adorahi kahana” idia gaukaralaia. Unai dainai, ita gwau diba mamoe be dina ia diho vadaeni to gabu ia diari sisina lalonai idia alaia mase. (Eso. 12:6)—12/15, rau 18-19.
Edena Baibel hakaua herevadia ese matamata taudia do idia durua abia hidi maorodia idia karaia totona?
Hakaua Herevadia toi be inai: (1) Dirava ena Basileia bona ena kara maoromaoro do umui tahua guna. (Mat. 6:19-34) (2) Haida hesiai henia karana amo moale oi davaria. (Kara 20:35) (3) Oi matamata lalonai Iehova hesiai henia karana oi moalelaia. (Had. 12:1)—1/15, rau 19-20.
Mamoe Natuna be edena negai do ia headava? (Apok. 19:7)
King, Iesu Keriso, ese ena inai taudia ia halusia bona ia kwalimu murinai unai do ia vara. Anina be Babulonia Badana bona Aramagedono tuarina idia ore murinai mamoe natuna do ia headava.—2/15, rau 10.
Dahaka dainai aposetolo edia negai, Iuda taudia be Mesia ena mai idia “naria noho”? (Luka 3:15)
Ita diba lasi bema Iuda taudia be Daniela ese Mesia ia perovetalaia herevana idia lalopararalaia—ita ese ita lalopararalaia hegeregerena—eiava lasi. (Dan. 9:24-27) To, reana idia be aneru ta ese mamoe naria taudia dekenai ia gwauraia herevana eiava peroveta hahinena Ana ese dubu helaga ai beibi maragina Iesu ia itaia neganai ia gwauraia herevana idia kamonai. Danu, hisiu stadilaia babalau taudia be “Iuda taudia edia king ai do ia lao natuna” itaia totona idia lao. (Mat. 2:1, 2) Gabeai, Ioane Bapatiso ese ia hahedinaraia Keriso be kahirakahira do ia mai.—2/15, rau 26-27.
Dahaka dainai namo lasi ita gwau “Oibe,” ma gabeai ita gwau “Lasi”? (2 Kor. 1:18)
Momokani, nega haida gau haida idia vara dainai, ita karaia palani do ita haidaua. To, bema gwauhamata ta ita karaia, namona be ita hekwarahi unai ita hagugurua totona.—3/15, rau 32.
Bema tadikaka o taihu ta be ena famili ia rakatania bona tano ma ta ai moni gaukara ia karaia, dahaka hekwakwanai idia vara diba?
Bema tama o sina be famili ida ia noho lasi, natudia edia hemami bona kara be do ia idau. Natudia ese tama sina do idia matauraia lasi. Bona tama o sina be heudahanai ena tarapu lalonai ia moru diba.—4/15, rau 19-20.
Haroro gaukara ai ita ese edena henanadai foa do ita laloatao be namo?
Daika lau hereva henia noho? Edeseni ai idia lau hereva henia noho? Edena nega be hegeregere idia lau hereva henia totona? Edena dala ai idia lau hereva henia be namo?—5/15, rau 12-15.