Mai Ura Ida Sibona Idia Henia Micronesia Ai

KATHERINE be United States ai ia bada, bona ena mauri lagani be 16 neganai ia bapatiso, bona Iehova ena Witnes ta ai ia lao. Ena be haroro gaukara ia goadalaia, to ia itaia ena teritori ai momo idia ura lasi Basileia ena sivarai idia kamonai. Ia gwau: “Lau duahia ekspiriens haida lalonai taunimanima haida be Dirava idia noia Ia idia dibaia totona durua tauna ta do ia siaia. Nega momo lau laloa unai bamona tauna ta do lau davaria, to ia vara lasi.”

Katherine be teritori tamona ai lagani momo ia haroro murinai, ia laloa namona be Basileia sivaraina idia ura kamonai taudia edia teritori dekenai ia lao. Guna, nega ta ena famili ia rakatania bona gabu ta ia lao. To, unai wiki rua lalonai dina ta ta ai ena famili ia reaia dainai ia hebogahisi momo. Unai dainai, Katherine ia daradara bema ia be hegeregere unai teritori matamatana dekenai do ia noho. To, ia ura taunimanima do ia durua Iehova idia dibaia totona, unai dainai ena lalona ia hadaia do ia lao. Do ia lao henia gabudia idauidau ia laloa murinai, Guam brens ofesi ia tore henia, bona idia ese ia dekenai infomeisen idia siaia. July 9, 2007 ai, Katherine ena mauri lagani be 26 neganai, Pacific Ocean ai ia noho motumotu ta, Saipan dekenai ia lao. Ena hanua amo unai motumotu ena daudau be kilomita 10,000 bamona. Unuseniai dahaka ia vara?

GURIGURI RUA EDIA HAERE

Katherine be ena kongrigeisen matamatana ai ia ginidae murinai, Doris ia davaria. Doris ena mauri lagani be 40 bona Baibel stadi ia abia dae. Baibel Hadibaia bukana ena karoa 3 idia haorea murinai, Katherine ia lalohekwarahi. Ia gwau: “Doris be stiuden namona, bona lau ura lasi iena diba abia karana lau hadikaia. Lau be guna Baibel stadi ta lau karaia lasi dainai, lau laloa lo taihu ta, reana iena mauri lagani be Doris bamona ese ia stadi henia be namo.” Katherine be Iehova ia guriguri henia ia do ia durua taihu maorona ta do ia davaria Doris ia stadi henia totona. Bena Katherine ia lao Doris do ia hadibaia taihu ma ta ese ia do stadi henia be namo.

Katherine ia gwau: “Unai lau do gwauraia lasi lalonai, Doris ia gwau ia ura hekwakwanai ta do ia herevalaia. Iena sivarai lau kamonai murinai, ia dekenai Iehova ese lau ia durua unai bamona hekwakwanai ta lau hanaia ena sivarai lau herevalaia. Lau ia tanikiu henia.” Bena Doris ese Katherine ia hamaoroa: “Iehova ese oi ia gaukaralaia lau oi durua totona. Dina ginigunana egu ruma dekenai oi mai neganai, lau be hora momo lalonai egu Baibel lau duahia. Lau tai, bona Dirava lau noia ta do ia siaia lau ia durua Baibel lau lalopararalaia totona. Bena oi be iduara dekenai oi pidipidi. Iehova be egu guriguri ia haerelaia unai!” Katherine be unai sivarai ia herevalaia lou neganai ia tai. Ia gwau: “Doris ena hereva be egu guriguri ena haere. Iehova ese lau dekenai ia hahedinaraia lau ese Doris ena stadi lau karaia noho diba.”

Doris be lagani 2010 ai ia bapatiso, bona hari ia danu be mai ena Baibel stadi haida. Katherine ia gwau: “Lau moale bada badina egu guriguri hegeregerena, kudou maoro hahinena ta lau durua Iehova ena hesiai hahinena ai ia lao totona.” Hari, Katherine be Pacific ena motumotu ta ladana Kosrae dekenai ia spesel painia noho.

HEKWAKWANAI TOI​—⁠HANAIA DALANA

Tano idaudia amo tadikaka taihu handred mai kahana (mauri lagani 19 ia lao 79 huanai) be Micronesia ena pablisa be momo lasi gabudia dekenai idia painia. Unai haroro gaukara idia goadalaia taudia edia hemami be Erica ese ia herevalaia. Ia be lagani 2006 ai, ena mauri lagani be 19 neganai, Guam dekenai ia lao. Ia gwau: “Hereva momokani totona idia hitolo taudia haroro henia gaukarana lau moalelaia. Iehova lau tanikiu henia badina lau ia durua ful-taim hesiai gaukara lau abia hidi totona. Inai be mauri dalana hereadaena!” Hari, Erica be Marshall Islands ena hanua ta ladana, Ebeye dekenai ia spesel painia noho. To momokani, idau tano dekenai hesiai gaukara oi karaia be mai ena hekwakwanai. Mani hekwakwanai toi ita herevalaia, bona ita itaia Micronesia dekenai idia lao taudia ese edena dala ai idia hanaia.

Mauri dalana. Ena mauri lagani 22 merona Simon be lagani 2007 ai Palau dekenai ia ginidae neganai, ia itaia ia abia pei be iena hanua, England ai ia abia pei amo ia maragi. Ia gwau: “Lau ese egu ura gaudia hoia kava karana lau hadokoa be namo. Hari, lau be do lau hoia aniani lau laloa namonamo bena gabeai lau hoia, bona gabu ma haida lau sekea dava maragi aniani lau hoia totona. Bema egu kohu ta ia dika, lau ese sekenhen gauna lau hoia, bona tau ta lau tahua lau ia durua unai gauna ai hanamoa totona.” Edena dala ai kohu momo lasi maurina ese Simon ia durua? Ia gwau: “Unai ese lau ia durua bena lau laloparara dahaka gaudia be mai anina bada, bona ena be lau be kohu momo lasi to lau moale diba. Nega haida gau haida idia vara dainai lau itaia Iehova be lau ia naria noho. Lau be iniseniai lagani seven lau noho vadaeni, bona nega ibounai lau be mai egu aniani bona mahuta gabuna.” Oibe, kohu momo lasi maurina idia noholaia taudia be Iehova ese ia durua, badina idia ese Basileia idia tahua guna.​—⁠Mat. 6:32, 33.

Famili laloa momo karana. Erica ia gwau: “Lau be egu famili lau lalokau henia bada, unai dainai lau laloa idia lau laloa momo karana ese egu haroro gaukara do ia hadikaia.” Erica be dahaka ia karaia? Ia gwau: “Pablisa be momo lasi gabuna lau do lao lasi neganai, lau ese famili laloa momo karana idia herevalaia Gima Kohorona atikol haida lau duahia. Unai ese lau ia hagoadaia unai hekwakwanai lau haheaukalaia totona. Atikol ta lalonai, sina ta be ena natuna kekenina ia hagoadaia ia gwau, ‘Iehova ese oi do ia naria namonamo dalana ese lauegu naria dalana ia hereaia.’ Unai hereva ese lau ia hagoadaia bada.” Hannah bona ena adavana Patrick be Marshall Islands ena hanua ta ladana Majuro ai idia painia. Hannah be famili laloa momo karana ia hanaia totona, edia kongrigeisen tadikaka taihu ia laloa bada. Ia gwau: “Hanaihanai lau ese iseda tanobada hegegemadai tadikaka oreana dainai Iehova lau tanikiu henia badina idia be lauegu famili danu. Bema idia ese lau idia durua lasi, do lau hegeregere lasi pablisa be momo lasi gabuna ai hesiai gaukara lau karaia totona.”

Tura matamatadia davaria be auka. Simon ia gwau: “Bema oi be tano ma ta dekenai oi lao, gau momo be idia idau. Nega haida lau be egu turadia ida ai hevaseha bona kiri karadia lau reaia, badina iniseniai momo be egu hevaseha herevadia idia lalopararalaia lasi.” Erica ia gwau: “Matamanai, lau mamia tadikaka taihu lau tura henia be auka. To, unai hekwakwanai dainai lau ese iniseni lau mai ena badina lau lalohadailaia lou. Lau be sibona egu namo totona iniseni lau mai lasi, to Iehova ena hesiai gaukara karaia totona lau mai.” Ma ia gwau: “Gabeai, lau ese tura namodia haida lau davaria, bona lau dekenai idia be dava bada gaudia bamona.” Simon ia gaukara goada Palau gado ia dibaia totona, unai ese ia durua tadikaka taihu dekenai ena lalokau ia habadaia totona. (2 Kor. 6:13) Simon ia ura Palau gado ia dibaia dainai, tadikaka taihu be ia idia ura henia. Oibe, tano ma ta amo idia mai taudia be kongrigeisen tadikaka taihu ida idia gaukara hebou neganai, idia ibounai ese hebamo namona do idia moalelaia. Mai edia ura ida sibona idia henia bona pablisa be momo lasi gabudia idia lao taudia, ese dahaka hahenamo ma haida idia moalelaia?

‘HAHENAMO MOMO DO IDIA ABIA’

Aposetolo Paulo ia gwau: “Uhe momo ia hadoa tauna be anina momo do ia gogoa.” (2 Kor. 9:6) Edia hesiai gaukara idia habadaia taudia dekenai unai siri ena hakaua herevana be mai anina bada. Micronesia ai dahaka ‘hahenamo momo’ idia abia?

Micronesia ai Baibel stadi momo oi davaria diba bona do oi itaia idia be Dirava ena Hereva momokani amo diba idia abia, idia badinaia bona idia goada idia lao. Patrick bona Hannah danu be motumotu maragina ta ladana Angaur ai idia haroro, unuseniai taunimanima 320 bamona idia noho. Hua rua idia haroro murinai, idia ese adavana lasi sina ta idia davaria. Maoromaoro ia ese Baibel stadi ia abia dae, mai ena ura ida hereva momokani ia dibaia, bona ena mauri ia haidaua. Hannah ia gwau: “Stadi ibounai edia dokonai, ia ai rakatania bona emai basikele amo ruma dekenai ai giroa lou neganai, ta ta ai raraia bona Iehova dekenai ai gwau: ‘Iehova e, tanikiu bada!’” Hannah ma ia gwau: “Lau diba Iehova be ia hegeregere dala ma ta ai unai hahine be Ia dekenai do ia veria mai. To, ai be pablisa momo lasi gabuna dekenai ai haroro dainai, ai ese unai kudou maoro hahinena ai davaria bona ai durua Iehova ia diba totona. Emai mauri lalonai inai be ekspiriens namo hereana ta!” Erica ia gwau: “Ma ta oi durua Iehova ia dibaia neganai, moale bada do oi davaria!”

UNAI GAUKARA OI KARAIA DIBA, A?

Tano momo ai, Basileia harorolaia taudia be momo lasi. Oi hegeregere unai bamona gabu ta dekenai oi painia totona, a? Iehova oi guriguri henia bena oi do ia durua emu hesiai gaukara oi habadaia totona. Emu kongrigeisen elda taudia bona sekit naria tauna o pablisa be momo lasi gabudia ai hesiai gaukara idia karaia vadaeni taudia oi hereva henia diba. Palani oi karaia neganai, diba ma haida abia totona do oi lao gabuna ena brens ofesi oi tore henia.a Emu revareva be elda taudia oi henia, idia ese hereva ma haida do idia torea bona unai brens ofesi dekenai do idia siaia. Unai amo oi danu be tadikaka taihu​—⁠matamata bona buruka, singul o idia headava vadaeni​—⁠tausen momo bamona, mai emu ura ida sibona oi henia, bona mai moale ida ‘anina momo do oi gogoa.’