Dahaka Dainai Oi Abia Dae Oi be Hereva Momokani Oi Davaria?

1. Tuari negadiai, Kerisendom ena pasto taudia be dahaka idia karaia?

DIRAVA ena ura be Keristani taudia momokanidia be tuari do idia lao bona idau tano taudia do idia hamasedia, a? Idia hanaia lagani 100 lalodiai, sibodia idia gwauraia Keristani taudia momo be tuari lalonai ta ta idia alaia. Ami edia Katolik pasto ese tuari taudia bona edia tuari kohudia idia hanamoa, unai amo do idia lao idau tano ai idia noho Katolik taudia idia hamasedia totona. Protestan pasto taudia danu be unai bamona idia karaia. Tanobada Tuarina Iharuana ai sibona idia gwauraia Keristani taudia momo be unai bamona idia karaia.

2, 3. Tanobada Tuarina Iharuana lalonai bona murinai, Iehova ena Witnes taudia be dahaka idia karaia, bona dahaka dainai?

² To unai negai, Iehova ena Witnes taudia be edena bamona? Edia sivarai ese ia hahedinaraia, idia be unai tuari amo idia gini siri. Dahaka dainai? Badina idia ese Iesu bona ena hahediba herevadia idia badinaia. Ia gwau: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.” (Ioa. 13:35) Danu, idia be aposetolo Paulo ese Korinto Keristani taudia dekenai ia torea hakaua herevana idia badinaia.—2 Korinto 10:3, 4 duahia.

³ Keristani taudia momokanidia be Baibel amo edia lalomamina idia hadibaia dainai, idia be tuari daladia idia dibaia lasi o tuari idia lao lasi. Unai Keristani dalana idia badinaia dainai, Witnes taudia momo, matamata bona buruka, tatau bona hahine be dagedage idia davaria. Momo be gaukara aukadia idia karaia dibura kamepa o dibura ruma ai hisihisi bada idia davaria. Germany ai, Nazi gavamani ia lohia neganai, Witnes taudia haida idia hamasedia. Ena be Europe ai dagedage bada idia davaria, to Witnes taudia be Iehova ena Basileia ena sivarai namona harorolaia gaukarana idia hadokoa lasi. Dibura rumadia, dibura kamepa bona idau tanodia ai idia siaidia lao neganai, idia haroro noho.a Gabeai, lagani 1994 ai, Rwanda dekenai iduhu ta ta huanai tuari ia vara neganai, Witnes taudia be idia gini siri. Bona vanegai Europe ai, Yugoslavia ena tano gunadia ai tuari idia vara neganai, Witnes taudia be idia gini siri danu.

4. Iehova ena Witnes taudia be tuari amo idia gini siri karana dainai, momo be dahaka idia laloa?

⁴ Iehova ena Witnes taudia be tuari amo gini siri karana idia badinaia dainai, tanobada hegegemadai taunimanima momo idia itaia Witnes taudia be Dirava bona edia dekena taudia idia lalokau henidia momokani. Unai be Keristani tomadiho momokani ena toana. To danu, iseda tomadiho karadia ma haida dainai, momo idia abia dae ita be Keristani momokanidia.

HADIBAIA GAUKARA HEREADAENA

5. Dahaka kara idauna be Keriso ena hahediba taudia ginigunadia ese idia abia dae?

⁵ Tanobada ai Iesu ia hahedinaraia, Dirava ena Basileia sivarai namona harorolaia gaukarana be gaukara badana. Unai gaukara hamatamaia totona, Iesu ese hahediba taudia 12 ia abia hidi, bena gabeai ma 70 ia hadibaia. (Luka 6:13; 10:1) Ia hadibadia Iuda taudia dekenai sivarai namona do idia abia lao guna. Bena kara idauna ta ia vara! Iesu ena hahediba taudia ese sivarai namona be kopina utua lasi idau bese taudia dekenai do idia harorolaia. Israela bese amo idia vara hahediba taudia dekenai unai be kara idauna!—Kara 1:8.

6. Edena dala ai Petero ia laloparara, Dirava be bese edia toana ia laloa lasi?

⁶ Iehova ese aposetolo Petero be kopina utua lasi Idau Bese Tauna, Korenelio ena ruma dekenai ia siaia lao. Bena, Petero ia laloparara Dirava be bese edia toana ia laloa lasi. Korenelio bona ena ruma bese taudia be bapatiso idia abia. Hari, sivarai namona be idau bese taudia dekenai do idia harorolaia danu; Iehova ena ura be bese ibounai ese hereva momokani do idia kamonai bona idia abia dae. (Kara 10:9-48) Oibe, sivarai namona be tanobada hegegemadai do idia harorolaia.

7, 8. Taunimanima ese sivarai namona idia kamonai totona, Witnes taudia be dahaka idia karaia? (Laulau ginigunana itaia.)

⁷ Hari iseda negai, Iehova ena Witnes taudia edia orea idia gunalaia taudia idia gaukara goada, sivarai namona harorolaia bona hadibaia gaukara be tanobada ibounai dekenai idia abia lao totona. Hari, Witnes taudia 8,000,000 bamona idia gaukara goada noho gado 600 mai kahana lalonai Keriso ena sivarai idia harorolaia totona! Taunimanima be Iehova ena Witnes taudia idia diba, badina idia be ruma-ta-ruma-ta bona dala ai idia haroro, bona danu nega haida teibolo bona bodi idia gaukaralaia edia Baibel buka bona magasin idia hahedinaraia totona.

⁸ Gado hahanaia taudia 2,900 idia hadibadia Baibel bona Baibel bukadia idia hahanaia totona. Idia be gado badadia sibona idia hahanaia lasi, to gado maragidia handred momo idia hahanaia danu. Ena be idia be gado maragidia to taunimanima milioni ese idia gaukaralaia. Hegeregere, Spain ai Catalan taudia milioni momo be dina ta ta ai edia gado korikorina, Catalan ai idia hereva. To, vanegai sibona Andorra, Alicante, Balearic Islands, bona Valencia ai, taunimanima momo ese Catalan gado bona ena kahana haida idia gaukaralaia matamaia. Hari, Iehova ena Witnes taudia ese Baibel bukadia be Catalan gado ai idia halasia, bona Catalan taudia idia moale badina Keristani heboudia be edia gado ai idia karaia danu.

9, 10. Dahaka ese ia hahedinaraia Iehova ena orea taudia idia ura taunimanima ibounai ese hereva momokani idia dibaia?

⁹ Unai bamona gado hahanaia gaukarana be tano momo ai idia karaia noho. Hegeregere, Mexico ai taunimanima be Spanish gado ai idia hereva, to idia momo be ruma ai edia gado korikorina idia gaukaralaia. Maya taudia be unai bamona. Mexico ena brens ofesi ese Maya gado idia herevalaia momo gabuna ta dekenai Maya trensleisen ofesi ta ia haginia. Unai amo gado hahanaia taudia be dina ta ta ai Maya gado idia kamonai, bona unai ese ia durudia Baibel bukadia be Maya taudia ese idia lalopararalaia dalanai idia hahanaia totona. Gado ma ta be Nepali. Nepali tanona ai taunimanima 29 milioni idia noho bona gado idauidau 120 ai idia hereva. To, taunimanima 10 milioni mai kahana edia gado korikori be Nepali gado, bona ma haida be unai gado idia gaukaralaia danu. Iseda Baibel bukadia be unai gado ai idia halasia danu.

¹⁰ Iehova ena orea be tanobada hegegemadai Basileia ena sivarai namona harorolaia gaukarana ia laloa bada, unai dainai ia ese trensleisen taudia tanobada hegegemadai ia durua noho. Taunimanima dekenai pepapepa, buklet, bona magasin milioni momo idia hariharilaia, davana lasi. Iehova ena Witnes taudia ese kontribusen monina idia henia unai gaudia idia printaia totona. Idia ese Iesu ena hereva idia badinaia, ia gwau: “Umui abia davana lasi, umui henia davana lasi.”—Mat. 10:8.

11, 12. Tanobada hegegemadai haroro bona hahediba gaukara ita karaia dainai, momo be dahaka idia gwau?

¹¹ Iehova ena Witnes taudia idia abia dae idia be hereva momokani idia davaria vadaeni. Unai dainai, idia ese gau momo idia rakatania unai amo bese idauidau bona gado idauidau taudia dekenai sivarai namona idia harorolaia bona hadibaia totona. Keristani taudia momo be unai gaukara badana idia karaia totona, kohu momo lasi maurina idia noholaia, gado idauna ma ta idia dibaia, bona tano ma ta ena noho dalana idia manadalaia. Iehova ena Witnes taudia be tanobada hegegemadai unai gaukara idia karaia dainai, momo idia abia dae idia be Iesu Keriso ena murinai idia raka taudia momokanidia.

¹² Witnes taudia ese unai ibounai idia karaia, badina idia abia dae idia be hereva momokani idia davaria vadaeni. To, dahaka gau ma ta dainai taunimanima milioni momo idia abia dae, Iehova ena Witnes taudia be hereva momokani idia abia?—Roma 14:17, 18 duahia.

IDIA ABIA DAE HEREVA MOMOKANI IDIA DAVARIA

13. Iehova ena Witnes taudia be dahaka idia karaia edia orea ia goeva noho totona?

¹³ Lo Keristani taudia edia hereva ese ita do ia hagoadaia diba, badina idia abia dae idia be hereva momokani idia davaria vadaeni. Lagani momo lalodiai Iehova ia hesiai henia tadikaka ta ia gwau: “Iehova ena orea ia goeva totona, kerere idia karaia taudia ibounai ese sisiba o matahakani idia abia, herevana idia be daika.” Edena dala ai unai idia karaia? Dirava ena Hereva lalonai idia noho taravatu, bona Iesu bona ena hahediba taudia ese idia hahedinaraia dalana idia badinaia. Hari inai negai, Iehova ena Witnes taudia edia sivarai ese ia hahedinaraia, haida sibona be Dirava ena taravatu idia badinaia lasi dainai orea amo idia atoa siri. To, Witnes taudia momo herea be kara goevadia bona haheitalai namona idia hahedinaraia noho. Guna, idia haida be Dirava ese ia moalelaia lasi mauri dalana idia noholaia, to edia kara idia haidaua.—1 Korinto 6:9-11 duahia.

14. Kongrigeisen amo idia atoa siri taudia momo be dahaka idia karaia, bona dahaka namo idia davaria?

¹⁴ To Baibel ena taravatu hegeregerena, kongrigeisen amo idia atoa siri taudia be edena bamona? Tausen momo be edia kerere amo idia helalo-kerehai bona kongrigeisen ese idia abia dae lou. (2 Korinto 2:6-8 duahia.) Witnes taudia be Baibel ena kara maoromaoro taravatudia idia badinaia dainai, kongrigeisen ia goeva bona ta ta idia abidadama henia diba. Tomadiho oreadia ma haida lalonai taunimanima be sibodia edia ura idia badinaia, to Iehova ena Witnes taudia be Iehova ena kara maoromaoro taravatudia idia badinaia. Unai kara dainai, momo idia abia dae idia be hereva momokani idia badinaia.

15. Dahaka dainai tadikaka ta ia abia dae ia be hereva momokani ia davaria vadaeni?

¹⁵ Dahaka dainai lo Keristani taudia idia abia dae idia be hereva momokani idia davaria? Lagani 54 tadikaka ta, ia gwau: “Lau be do matamata neganai inai mai anina bada herevadia toi lau abidadama henia: (1) Dirava ia mauri noho; (2) ena lauma helaga amo Baibel ia torea; bona (3) hari ia ese Iehova ena Witnes taudia edia Keristani kongrigeisen ia gaukaralaia bona hanamoa noho. Lagani momo lalonai Baibel lau stadilaia neganai, unai hereva toi lau tahua namonamo, badina lau ura hamomokania unai be Baibel ena hahediba herevadia o lasi. Lagani ta ta ai unai hereva edia hamomokania gaudia momo lau davaria, bona idia ese egu abidadama idia hagoadaia dainai, lau abia dae ita dekenai hereva momokani ia noho.”

16. Dahaka dainai taihu ta ia abia dae momokani ia ese hereva momokani ia davaria vadaeni?

¹⁶ Hedikwota, New York dekenai ia gaukara headava taihu ta ese Iehova ena orea ia herevalaia neganai, ia gwau: “Unai orea sibona ese Iehova ena ladana ia harorolaia. Unai ita abia dae badina Baibel lalonai Dirava ena ladana be nega 7,000 bamona ia hedinarai! Lau ese 2 Sivarai 16:9 ena hagoadaia herevana lau ura henia, ia gwau: ‘Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.’” Ma ia gwau: “Hereva momokani ese lau ia hadibaia Dirava do lau badinaia momokani totona, unai amo iena goada be lau dekenai do ia hahedinaraia. Lauegu hetura karana Iehova ida be dava bada gauna. Bona Iesu lau tanikiu henia badina ia amo Dirava lau diba namonamo, bona unai ese lau ia hagoadaia.”

17. Guna, Dirava be lasi lalohadaina ia abia dae tadikaka ta be hari dahaka ia laloa, bona dahaka dainai?

¹⁷ Guna, Dirava be lasi lalohadaina ia abia dae tadikaka ta ia gwau: “Dirava ese ia havaraia gaudia idia hamomokania, Dirava ia ura taunimanima be edia mauri do idia moalelaia, unai dainai lau diba ia ese hisihisi do ia kokia vaitani. Danu, ena be tanobada taudia edia kara dika ia bada ia lao, to Iehova ena Witnes taudia be mai goada ida Dirava idia hesiai, abidadama, bona lalokau henia noho. Iehova ena lauma helaga sibona ese unai ia havaraia diba.”—1 Petero 4:1-4 duahia.

18. Tadikaka rua edia hereva dekenai dahaka oi laloa?

¹⁸ Lagani momo lalonai Dirava ia hesiai henia tadikaka ta be hereva momokani ia davaria vadaeni ena badina haida ia herevalaia. Ia gwau: “Lagani momo lalodiai Baibel lau stadilaia karana amo lau davaria, Witnes taudia be idia gaukara goada Keristani taudia ginigunadia idia tohotohoa totona. Tanobada hegegemadai lau loaloa neganai, Iehova ena Witnes taudia edia lalotamona karana lau itaia. Baibel amo ia mai hereva momokani ese lau dekenai lalomaino bona moale ia havaraia.” Mauri lagani be 60 mai kahana tadikaka ta idia nanadaia, dahaka dainai ia abia dae ia be hereva momokani ia davaria neganai, ia ese Iesu Keriso ia herevalaia, ia gwau: “Ita be Iesu ena mauri bona haroro gaukara ita stadilaia namonamo bona iena haheitalai ita ura henia. Iseda mauri ai gau momo ita haidaua, unai amo Iesu Keriso amo Dirava kahirakahira ita lao diba. Ita laloparara Keriso ena mauri davalaia boubouna amo mauri hanaihanai ita abia diba. Bona ita diba ia be mase amo ia toreisi lou vadaeni. Ia toreisi lou murinai ia idia itaia taudia edia hereva ese unai ia hamomokania.”—1 Korinto 15:3-8 duahia.

MA HAIDA DEKENAI HEREVA MOMOKANI HAROROLAIA

19, 20. (a) Paulo be Roma tadikaka dekenai dahaka gaukara ia herevalaia? (b) Ita bapatiso vadaeni dainai, eda maduna be dahaka?

¹⁹ Ita be Keristani taudia momokanidia dainai, iseda dekena taudia ita lalokau henidia, bona idia dekenai hereva momokani ita harorolaia. Paulo be Roma kongrigeisen tadikaka dekenai, ia gwau: “Bema taunimanima vairanai ‘emu uduna amo’ oi gwauraia hedinarai Iesu be Lohiabada, bona emu kudouna ai oi abidadama Dirava ese ia be mase amo ia hatorea isi lou, oi be do oi mauri. Badina tau ta be ena kudouna ai ia abidadama neganai, ia be kara maoromaoro tauna ai ia lao, to ena uduna amo unai abidadama ia gwauraia hedinarai neganai, ia be hahemauri do ia abia.”—Roma 10:9, 10.

²⁰ Ita be bapatiso vadaeni Witnes taudia dainai, ita abia dae ita be hereva momokani ita davaria vadaeni, bona ita laloparara ma haida dekenai Dirava ena Basileia do ia lohia ena sivarai ita harorolaia be gau badana. Namona be haroro gaukara ai, taunimanima be Baibel amo ita hadibaia herevadia do idia moalelaia sibona lasi, to eda mauri dalana amo do idia itaia ita dekenai hereva momokani ia noho.