“Bese Iboudiai” Hadibadia

“Basileia sivaraina namona be tanobada ibounai do idia harorolaia, bese iboudiai hadibalaidia totona; bena dokona do ia ginidae.”​—MATAIO 24:14, NW.

IESU ese ena hahediba taudia, Iuda taudia, unai bamona ia hereva henidia neganai, idia hoa bada! Idia laloa Iuda taudia helagadia ese “idau bese taudia” ‘mirodia’ do idia hereva henidia be maoro lasi. Iuda taudia, edia tomadiho idia goadalaia taudia, be idia ura lasi momokani idau bese tauna ta ena ruma ai do idia vareai! Unai hahediba taudia ese Iesu, bona ena lalokau, bona ena gaukara, be idia do diba namonamo lasi. Bona idia do diba namonamo lasi Iehova ese bese idauidau edia toadia ia lalodia lasi.​—Kara 10:​28, 34, 35, 45.

2. (a) Witness taudia edia gaukara be ede badana? (b) Idia kwalimu ena badina toi be dahaka dahaka?

² Iehova ena Witness taudia ese sivarai namona be bese idauidau ai idia harorolaia vadaeni, Israel ai danu, bona hari idia harorolai henidia besedia edia momo ese guna idia harorolai henidia besedia edia momo ia hanaia. Lagani 1994 ai Witness taudia milion hani mai kahana be tano 230 bamona ai idia haroro. Baibel stadi milion hani mai kahana be kamonai taudia edia ruma ai idia karadia. Ena be tanobada hegegemadai taunimanima ese idia lalo-dika henidia, nega momo badina be edia hahediba herevadia bona edia ura be idia diba lasi dainai, to unai gaukara idia karaia. Gunaguna Keristen taudia idia herevalaidia hegeregerena, idia danu be inai bamona idia herevalaidia diba: “Gabu ibounai . . . inai orea latanai idia hereva ia dika.” (Kara 28:22) Vadaeni, badina be dahaka edia gaukara ai idia kwalimu? Badina toi be inai​—Iehova ena lauma ese ia hakaudia hegeregerena idia raka, Iesu ena gaukara daladia idia tohotohodia, bona hahediba gaudia maorodia idia gaukaralaidia.

Iehova Ena Lauma Bona Sivarai Namona

³ Iehova ena Witness taudia ese edia kwalimu idia heagilaia, hegeregere sibodia edia diba hereana dainai idia kwalimu bamona, a? Lasi, badina be Iesu ia gwau: “Umui dekenai Dirava ia hereva karadia ibounai do umui karaia, vadaeni do umui gwau, ‘Ai be hesiai taudia namodia lasi, badina be ai dekenai idia hereva karadia sibona ai karaia vadaeni.’ ” Iehova ena Witness taudia be Keristen taudia, idia gwauhamata bona bapatiso idia abia taudia; unai dainai, herevana sibodia edia noho be edena bamona, to Iehova ena hesiai lao henia madunana idia abia dae mai edia ura ida. Anina be, haida be nega ibounai misinari gaukarana idia karaia eiava brens opesi bona Keristen bukadia printadia rumadia ai idia gaukara. Ma haida be tomadiho rumadia haginidia gaukarana ai idia gaukara, eiava nega ibounai pioneer gaukarana ai idia haroro, eiava idia dekenai ia noho negana ai sibodia edia kongregesen lalodiai sivarai namona harorolaia gaukarana idia karaia. ‘Ita dekenai idia hereva karadia sibona ita karaia vadaeni,’ unai dainai ita heagilaia be maoro lasi.​—Luka 17:10; 1 Korinto 9:16.

4. Ena be tanobada hegegemadai edia Keristen gaukarana idia koua toho, to dahaka dainai idia kwalimu?

⁴ Ita gwau diba ita be Iehova ena lauma, iena gaukara siahuna, dainai ita kwalimu. Inai be peroveta tauna Sekaria ena negai hegeregerena: “Inai be Iehova ena hereva Serubabele dekenai, ia gwau: ‘Tuari oreana ena goada amo lasi eiava siahu amo lasi, to lauegu lauma amo.’ ” Unai hegeregerena, ena be tanobada hegegemadai Witness taudia edia haroro gaukarana idia koua toho, to idia kwalimu, taunimanima edia siahu amo lasi, to Iehova ena hahekau bona ena hegima amo.​—Sekaria 4:6.

5. Iehova ese Basileia sivaraina harorolaia gaukarana edena bamona ia durua?

⁵ Basileia sivaraina idia abia dae taudia be Iesu ese ia gwauraidia, ia gwau: “Peroveta taudia ese inai bamona idia torea, idia gwau, ‘Idia ibounai Dirava ese do ia hadibaia.’ . . . Egu Tamana ese bema ia durua lasi tauna be lau dekenai do ia mai diba lasi.” (Ioane 6:​45, 65) Iehova ese taunimanima edia lalodia bona edia daradia ia duahidia diba, bona ena be reana idia do diba lasi ia, to ia diba daidia ese ena lalokau do idia abia dae. Ia ese danu ena aneru ia hagaukaradia, inai gaukara do idia biagua totona. Unai dainai Ioane ese matahanai ai aneru ta ia itaia bona ia gwau: “Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia.”​—Apokalupo 14:6.

Idia Diba Lauma Gaudia Do Idia Tahudia be Namo

⁶ Iehova ese ta be sivarai namona do ia abia dae dalana ia kehoa badina ma ta be Iesu ese ia gwauraia, ia gwau: “Idia diba lauma gaudia do idia tahudia be namo taudia idia moale, badina be guba basileiana be idia edia.” (Mataio 5:3, NW) Sibona ena kara dainai ena lalona ia hegeregere tauna o hereva momokani ia tahua lasi tauna be ia diba lasi lauma gaudia do ia tahudia be namo. Tauanina durua gaudia mo ia lalodia. Unai dainai, ruma ta ruma ta ita lao negadiai iseda hereva idia dadaraia taudia edia kara ena badina idauidau iboudiai do ita lalodia be namo.

7. Dahaka dainai momo idia kamonai lasi?

⁷ Momo idia kamonai lasi, badina be edia tamadia sinadia edia amo idia abia tomadihona idia badinaia mai lalodia aukadia ida. Ma haida be sibodia edia ura hegeregeredia tomadiho daladia idauidau idia abidia hidi vadaeni​—haida idia ura gau hehunidia do ita tahudia, haida idia ura edia guriguri ai do idia boiboi mai edia moale bada ida, bona haida ese sosel kalabu be edia dubu ai idia tahua. Momo ese Dirava ena taravatu dadaraidia dalana ta idia abia hidi vadaeni. Reana matabodaga karadia idia karaia dainai idia gwau, “Lau ura lasi.” Ma haida be reana idia heagi, idia gwau idia sikuli namonamo vadaeni, bona Baibel idia dadaraia, idia gwau ena hereva edia anina be dobu lasi.​—1 Korinto 6:​9-11; 2 Korinto 4:​3, 4.

8. Badina be dahaka hedadarai dainai do ita manoka lasi be namo? (Ioane 15:​18-20)

⁸ Momo ese ita idia dadaraia dainai, eda abidadama do ia maragi bona hahemauri gaukarana do ita manokalaia be maoro, a? Paulo ena hereva ese ita idia hagoadaia; ia gwau: “Haida . . . edia abidadama be lasi dainai Dirava ena momokani danu be lasi, a? Lasi bona lasi momokani! Taunimanima ibounai be idia koikoi noho, to Dirava tamona be nega ibounai ia hereva momokani. Buka Helaga be inai bamona ia hereva, ‘Oi ese oi hereva neganai ibounai do idia itaia momokani, oi be maoromaoro.’ ”​—Roma 3:​3, 4.

9, 10. Dahaka ese ia hahedinaraia tano momo ai edia dala be guna idia koua gaudia be idia hanaidia vadaeni?

⁹ Tano momo sivaraidia ese iseda lalona idia hagoadadia. Guna toana be unai tano taudia do idia kamonai lasi, lasi vaitani, to gabeamo ia vara gauna be idau vaitani. Iehova bona aneru be guna idia diba lalo-namo taudia be unuseniai idia noho​—unai dainai Iehova ena Witness taudia be edia gaukara ai idia haheauka be namo. Lagani 50 idia lao vadaeni, Argentina, Brazil, Colombia, Ireland, Italy, Mexico, Portugal, bona Spain ai, Katolik tomadihona be magu aukana ta bamona. Lagani 1943 ai Witness taudia be momo lasi; tanobada hegegemadai idia be 126,000 mo, idia 72,000 be United States ai. Unai neganai lalo-duhu bona lalo-dika be Witness taudia vairadiai ia noho maguna aukana ta bamona, idia hamakohia diba lasi gauna unai. To hari inai negai edia haroro gaukarana unai tano ai ese anina bada ia havaraia. Komiunisi gavamanidia ese guna idia lohiadia tanodia momo be unai bamona. Lagani 1993 ai 7,402 be Kiev, Ukraine ai hebouhebou ta ai bapatiso idia abia sivaraina ese unai ia hamomokania.

¹⁰ Edena dala ai Witness taudia ese sivarai namona be edia dekena taudia idia hadibalaidia toho? Haida edia lalodia veridia totona moni bona kohu idia henidia, a? Ogogami taudia bona sikuli lasi taudia mo sibodia idia lao henidia, a? Haida ese unai bamona idia gwauraidia dika.

Sivarai Namona Hahedibalaia Daladia Maorodia

¹¹ Witness taudia ese taunimanima be hahediba taudia ai idia halaodia dalana be Iesu bona ena hahediba taudia ese idia haginia. Taunimanima idauidau, taga taudia bona ogogami taudia, idia noho gabudia be Iesu ese ia lao henidia​—ruma, ariara, kone, ororo, bona dubu danu.​—Mataio 5:​1, 2; 8:14; Mareko 1:16; Luka 4:15.

12, 13. (a) Paulo ese Keristen taudia edia gaukara dalana edena bamona ia haheitalaidia? (b) Iehova ena Witness taudia ese Paulo ena kara edena bamona idia tohotohoa?

¹² Aposetolo Paulo ese sibona ena gaukara inai bamona ia gwauraia be maoro: “Lauegu kara, guna lau ginidae Asia dekenai ia mai bona hari, umui dekenai edena bamona lau noho, umui diba. . . . Lohiabada ena gaukara lau karaia noho. . . . Umui dekenai lau haroro bona hadibaia neganai, emui ruma dekenai, bona taunimanima vairanai durua gauna ta lau hunia lasi umui dekenai.”​—Kara 20:​18-20.

¹³ Tanobada ibounai lalonai Iehova ena Witness taudia be unai aposetolo hegeregerena ruma ta ruma ta idia lao haroro totona. TV amo idia haroro kava lasi, to taunimanima iboudiai, taga taudia bona ogogami taudia danu, idia lao henidia bona idia ida idia hevaira heheni. Dirava bona ena Hereva herevaherevalaia daladia idia tahudia.a Kohu o moni be taunimanima idia henidia lasi edia lalodia anidia totona. Kamonai taudia idia hereva henidia, idia gwau Dirava ena Basileia mo sibona ese taunimanima edia hekwakwanai do ia haoredia bona edia noho dalana tanobada ai do ia hanamoa.​—Isaia 65:​17, 21-25; 2 Petero 3:13; Apokalupo 21:​1-4.

14. (a) Misinari taudia bona pioneer taudia momo ese badi aukana edena bamona idia atoa? (b) Iehova ena Witness taudia Japan ai edia sivarai ese dahaka ia hahedinaraia?

¹⁴ Gaukara be tano momo lalodiai karaia guguru totona, bese momo lalodiai misinari taudia bona pioneer taudia ese gaukara ena badina idia atoa guna, bena unai tano edia Witness taudia ese idia gunalaia. Unai dainai, ena be idau bese Witness taudia be momo lasi idia dekediai, to haroro gaukarana idia haheaua namonamo noho. Japan ena haheitalai be hereadae. Lagani 1949 ai, misinari taudia, idia momo be Australia taudia bona Britain taudia, be idia lao unuseni, gado idia dibaia, tano taudia edia noho dalana aukana idia manadalaia, bona ruma ta ruma ta ai idia haroro. Guna, Tanobada Ibounai Tuarina Iharuana negana lalonai, Japan ai Witness taudia idia taravatudia bona idia dagedage henidia. Unai dainai, unai misinari taudia idia ginidae neganai, idia davaria Japan ena Witness taudia ta ta mo be idia gaukara noho. To idia momo daekau, ema bona hari idia 187,000 be kongregesen 3,000 lalodiai idia gaukara! Dahaka dainai nega daudau lasi murinai idia kwalimu? Misinari tauna ta, lagani 25 unuseniai ia gaukara tauna, be ia gwau: “Gau badana be taunimanima ida hereva heheni dalana ai dibaia. Bena edia gado ai diba dainai, ai hetura henidia diba bona edia noho dalana ai lalo-pararalaia diba. Namona be ai hahedinaraia ai ura henidia. Edia dekena taudia hegeregeredia ai ai lao toho; gau tamona, emai Keristen taravatudia ai utudia lasi.”

Keristen Karadia amo Danu Idia Hadibadia

¹⁵ To, taunimanima idia kamonai, badina be Baibel ena hereva idia abia dae dainai sibona lasi, to Keristen karadia idia itadia dainai danu. Iehova ena Witness taudia idia itadia, ena be tuari o heiriheiri o badu be edia tano ai idia vara, to idia lalokau heheni noho bona idia lalo-tamona noho. Keristen dalanai Witness taudia ese unai kara iboudiai amo idia gini siri momokani bona Iesu ena hereva idia hamomokania; ia gwau: “Taravatu matamatana lau henia umui dekenai inai bamona, umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia.”​—Ioane 13:​34, 35.

16. Keristen lalokauna be kara amo hahedinaraia dalana be dahaka sivarai ese ia hahedinaraia?

¹⁶ Keristen taudia ese edia dekena taudia idia lalokau henidia dalana be tau burukana ta ese ia gwauraia. Niuspepa ta ia tore henia, ia gwau ena adavana be kahirakahira ia mase gwauraia neganai ena dekena taudia ese idia durua mai edia hebogahisi ida. Ma ia gwau: “Ia mase negana amo ema bona hari . . . edia kara be namo herea. . . . Egu ruma gaukaradia idauidau idia karadia bona egu hekwakwanai idia kokidia toho. Inai be hoa gauna, badina be idia be korema bona lau be kurokuro. Idia be Iehova ena Witness taudia, bona lau be Katolik tauna, ena tomadiho ia negea vadaeni tauna ta.”

17. Edena bamona do ita karaia lasi be namo?

¹⁷ Inai sivarai ese ia hahedinaraia dala idauidau amo ita hadibadia diba, iseda kara amo danu. Bema iseda kara be Keriso ena hegeregeredia lasi, iseda haroro gaukarana be anina lasi, Farisea taudia edia hegeregerena. Ita ura lasi idia hegeregeredia ai do ita lao; Iesu ia gwau: “Idia karaia bamona do umui karaia lasi. Badina be idia hereva, to idia karaia lasi.”​—Mataio 22:​37-39; 23:3.

Hesiai Tauna Oreana ese Tulu Namodia Ita Ia Henia

¹⁸ Sivarai Namona bese iboudiai harorolai henidia gaukarana durulaia gauna badana be inai: Baibel herevalaia gaudia, buka, buklet, pepapepa, bona magasin, Watch Tower Bible and Tract Society ese ia karadia gaudia, be ita abidia haraga diba. Unai gau ese lalo-momokani taudia edia henanadai idia haerelaidia diba. Muslim tauna ta, o Hindu tauna ta, o Buddhist tauna ta, o Taoist tauna ta, o Iuda tauna ta bema ita davaria, pepapepa idauidau bona buklet idauidau amo ita hereva henia matama diba, bona reana Baibel stadi ita hamatamaia diba danu. Evolusen herevana ia abia dae tauna be buka ladana Buka Helaga Herevalaia amo ita haere henia diba. Bema mero ta ese mauri ena anina ia henanadailaia, ita ese buka ladana Memero Kekeni edia Henanadai​—Haere Maorodia ita hamaorolaia diba. Bema ta ese lalo-metau, o hesiku, o reipi, o headava hadokoa karana be ia lalo-hekwarahilaia, ita be mai eda magasin, unai hekwakwanai idia sisibalaidia gaudia unai. Momokani, Iesu ena peroveta herevana hegeregerena, hesiai tauna mai ena kamonai oreana ese nega korikori ai eda aniani ita ia henia.​—Mataio 24:​45-47.

19, 20. Albania ai, Basileia gaukarana be edena bamona ia bada ia lao haraga?

¹⁹ To bese idauidau hadibadia totona, Baibel bona Baibel herevalaia bukadia be gado 200 mai kahana ai edena bamona idia toredia hanai diba? Albania sivaraina ese ia hahedinaraia, ena be hekwakwanai badadia idia vara, bona ena be haida ese Pentekoste dalanai gado be hoa dalanai idia dibadia haraga lasi, to hesiai tauna mai ena kamonai bona mai ena kara maoromaoro oreana ese sivarai namona ia halasia diba.​—Kara 2:​1-11.

²⁰ Lagani 1980 ai National Geographic magasin ia gwau: “Albania ese [tomadiho] ia taravatulaia; lagani 1967 ai ia gwau ia be ‘Dirava dadaraia besena ginigunana tanobada ai.’ . . . Albania ena uru matamatana taudia be Dirava dadaraia lalohadaina mo idia diba.” To hari inai negai Komiunism ena siahu ia maragi dainai, Albania taudia haida, idia diba lauma gaudia do idia tahudia be namo taudia, ese Iehova ena Witness taudia edia haroro herevadia idia abidia dae. Lagani 1992 ai, gado hahanaia oreana maragina be Tiranë ai idia haginia, ia lalonai be Witness taudia, Italian bona English gadodia idia diba taudia. Tadikaka haida be idau tanodia amo idia lao, Albanian revarevadia be kompiuta amo toredia dalana idia hadibalaidia. Matamana ai pepapepa bona Gima Kohorona idia toredia hanai. Edia diba ia bada ia lao neganai, Baibel herevalaia bukadia ma haida idia toredia hanai. Hari inai negai Witness taudia 200 bamona be unai tano maragina ai idia gaukara, bona lagani 1994 ai taunimanima 1,984 be Memorial ai idia hebou.

Ita Ibounai be mai Eda Maduna

²¹ Tanobada ai, raskol karadia, dagedage karadia, ala-ala karadia, bona reipi karadia idia momo daekau, lebulebu karadia be momo dainai pokese goreredia idia vara, bona taunimanima momo ese gavamani idia matauraidia lasi. Unai dainai toana be tanobada taudia lohiadia dalana be lasi. Hari inai nega be Abata Badana ia do vara lasi negana hegeregerena. Unai neganai “Iehova ese taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo. Iehova ena lalona be ia hisihisi taunimanima tanobada dekenai ia havaraia dainai, bona ena lalohisihisi be ia bada momokani.”​—Genese 6:​5, 6; Mataio 24:​37-39.

22. Iehova ena Witness taudia iboudiai edia Keristen madunana be dahaka?

²² Noa ena negai hegeregerena, Iehova ese kara ta do ia karaia. To ena hahemaoro goevagoeva bona ena lalokau ai, ia ura sivarai namona be bese iboudiai do idia harorolai henidia guna bona do idia hadibadia guna. (Mareko 13:10) Unai dainai Iehova ena Witness taudia edia maduna be inai​—Dirava ena maino do idia abia be maoro taudia do idia davaridia bona ena maino daladia do idia hadibalaidia. Nega daudau lasi, Dirava ena nega korikorina ai, edia haroro gaukarana do idia hagugurua. “Unai murinai dokona be do ia ginidae.”​—Mataio 10:​12, 13; 24:14; 28:​19, 20.

[Footnotes]

Oi Laloatao A?

◻ Dahaka ese ia hahedinaraia hari inai negai Witness taudia ese edia gaukara idia kwalimulaia?

◻ Dahaka dainai momo ese Keristen herevana idia dadaraia?

◻ Aposetolo hegeregerena, Witness taudia ese dahaka haroro dalana idia gaukaralaia?

◻ Dahaka ita abidia dainai eda gaukara ai anina ita havaraia diba?

◻ Mareko 13:10 hegeregerena, ita ibounai be dahaka do ita karaia be namo?

1. Dahaka dainai Iesu ena hahediba taudia ese ena hereva Mataio 24:14 ai be idia hoalaia?

3. Dahaka dainai edia kwalimu ita heagilaia be maoro lasi?

6. Edena bamona taudia mo sibodia ese sivarai namona idia abia dae?

11. Iesu ese dahaka gaukara dalana namona ita ia haheitalaia? (Ioane 4:​6-26 itaia.)

15. Witness taudia ese Keristen karadia edena bamona idia hahedinaraidia?

18. Baibel herevalaia bukadia ese ita edena bamona idia durua, lalo-momokani taudia do ita durudia totona?

21. Hari inai nega be edena bamona negana?

[Box on page 19]

TANO WITNESS TAUDIA 1943 AI IDIA GAUKARA 1993 AI

Argentina 374 102,043

Brazil 430 366,297

Chile 72 44,668

Colombia ?? 60,854

France Tuari negana—sivarai be lasi 122,254

Ireland 150? 4,224

Italy Tuari negana—sivarai be lasi 201,440

Mexico 1,565 380,201

Peru Gaukara sivaraina be lasi 45,363

Philippines Tuari negana—sivarai be lasi 116,576

Poland Tuari negana—sivarai be lasi 113,551

Portugal Gaukara sivaraina be lasi 41,842

Spain Gaukara sivaraina be lasi 97,595

Uruguay 22 9,144

Venezuela Gaukara sivaraina be lasi 64,081

[Picture on page 17]

Katolik tanodia momo ai Iehova ena Witness taudia idia momo daekau; unai tano ta be Spain

[Picture on page 18]

Iehova ena Witness taudia be tanobada hegegemadai idia gaukara