Ena be “Hisihisi Idauidau” Oi Davaria, to Dirava Oi Badinaia Noho

1. Dahaka dainai Dirava ena hesiai taudia ese “hisihisi idauidau” idia davaria?

OI LALOPARARA mauri hanaihanai oi do abia lasi neganai, “hisihisi idauidau” do oi davaria dainai oi gari, a? Reana lasi. Herevana oi be vanegai sibona hereva momokani oi dibaia o lagani momo Iehova oi hesiai henia vadaeni, to oi diba Satani ena tanobada ai hisihisi idauidau idia vara.—Apok. 12:12.

2. (a) Taunimanima ese hekwakwanai idauidau idia davaria, to Keristani taudia be edena hisihisi ma ta idia davaria danu? (Laulau ginigunana itaia.) (b) Ita davaria hisihisi be daika amo, bona edena bamona unai ita diba?

² Taunimanima be goevadae lasi taudia dainai, edia mauri lalonai hekwakwanai idauidau idia davaria. To, Keristani taudia be hisihisi ma ta idia davaria danu. (1 Kor. 10:13) Unai be dahaka? Idia ese Dirava ena taravatu idia badinaia dainai, dagedage bada idia davaria. Iesu be ena murinai idia raka taudia dekenai ia gwau: “Igui hesiai tauna ese ena biaguna ia hereaia lasi. Bema lau idia dagedage henia, umui danu do idia dagedage henia.” (Ioa. 15:20) Daika ese unai dagedage karana ia havaraia? Unai tauna be Satani. Baibel ia gwau, Satani be “ia boiboi bada laiona bamona” ia loaloa noho, Dirava ena taunimanima ia “ania ore” totona. (1 Pet. 5:8) Satani be dala idauidau ia gaukaralaia, Iesu ena murinai idia raka taudia edia abidadama ia hadikaia totona. Aposetolo Paulo dekenai ia vara gauna mani ita laloa.

LUSITERA AI IA DAVARIA HISIHISI

3-5. (a) Lusitera ai Paulo ese dahaka hisihisi ia davaria? (b) Edena dala ai ia ese hisihisi idauidau ia herevalaia karana ese ita ia hagoadaia?

³ Paulo be ena abidadama karana dainai nega momo dagedage ia davaria. (2 Kor. 11:23-27) Dagedage karana ta be Lusitera ai ia vara. Paulo ese ia raka diba lasi tauna ta ia hanamoa murinai, hanua taudia be idia hoa dainai idia gwau Paulo bona Banaba be dirava. To, idia ese hanua taudia idia noia idia do idia tomadiho henia lasi! Daudau lasi murinai, Iuda tomadiho gunalaia taudia idia mai bona Paulo bona Banaba edia ladana idia hadikaia bona hutuma edia lalona idia veria. Vadaeni, karaharaga hanua taudia ese edia lalona idia haidaua, bona Paulo be nadi amo idia hodoa bona idia rakatania ia mase totona.—Kara 14:8-19.

⁴ Paulo bona Banaba be Derebe idia vadivadi murinai “Lusitera, Ikonio, bona Antioka dekenai idia giroa lou. Unuseniai hahediba taudia idia hagoadaia, abidadama lalonai do idia gini goada bona idia gwau: ‘Dirava ena Basileia lalonai ita vareai totona, hisihisi idauidau ita abia be namo.’” (Kara 14:21, 22) Reana ita gwau diba, hahediba taudia be “hisihisi idauidau” do idia davaria herevana idia kamonai neganai, idia gari. Vadaeni, edena dala ai Paulo bona Banaba ese hisihisi idia herevalaia neganai, “hahediba taudia idia hagoadaia”?

⁵ Haere ita davaria totona namona be Paulo ena hereva ena anina ita tahua namonamo. Paulo ia gwau lasi: “Hisihisi idauidau ita haheaukalaia be namo.” To ia gwau: “Dirava ena Basileia lalonai ita vareai totona, hisihisi idauidau ita abia be namo.” Unai hereva amo Paulo ese idia ia hagoadaia, badina Dirava badinaia karana amo do idia davaria hahenamo ia herevalaia. Unai hahenamo be do ia vara momokani! Iesu ia gwau: “Ia haheauka ela bona dokona tauna be do ia mauri.”—Mat. 10:22.

6. Idia haheauka taudia ese dahaka hahenamo do idia davaria?

⁶ Bema ita haheauka, hahenamo do ita davaria. Horoa Keristani taudia be guba ai mase diba lasi maurina do idia abia, bona Iesu ida do idia lohia. To, “mamoe ma haida” be tanobada ai do idia mauri hanaihanai, bona “unuseniai kara maoromaoro sibona do ia noho.” (Ioa. 10:16; 2 Pet. 3:13) To, Paulo ia hereva bamona, unai ia do vara lasi neganai ita be hisihisi idauidau do ita davaria guna. Do ita davaria hahetoho rua mani ita herevalaia.

DAGEDAGE KARADIA

7. Keristani taudia be edena bamona dagedage karadia idia davaria diba?

⁷ Iesu ia peroveta, ia gwau: “Taunimanima ese kota dekenai umui do idia abia lao, bona sinagoga dekenai umui do idia dadabaia, bona lau dainai gavana bona king taudia vairanai do umui gini.” (Mar. 13:9) Iesu ena hereva ese ia hahedinaraia, Keristani taudia haida be dagedage bada do idia davaria, hegeregere reana pasto o gavamani taudia ese do idia samania koikoi. (Kara 5:27, 28) Mani Paulo ena haheitalai ita laloa lou. Ia be hisihisi idauidau do ia davaria dainai ia gari, a? Lasi.—Kara 20:22, 23 duahia.

8, 9. Edena dala ai Paulo ese ia hahedinaraia, ena lalona ia hadaia do ia haheauka totona? Bona hari, edena dala ai tadikaka taihu haida be Paulo idia tohotohoa?

⁸ Paulo be mai gari lasi ida Satani ena dagedage karadia ia haheaukalaia, bona ia gwau: “Lau laloa egu mauri be gau badana lasi, to namona be egu heau helulu bona Lohiabada Iesu amo lau abia hesiai gaukarana lau haorea, bona Dirava ena hebogahisi hereadaena ena sivarai namona, do lau gwauraia guguru.” (Kara 20:24) Oibe, Paulo be hisihisi idauidau do ia davaria dainai ia gari lasi. To, herevana dahaka hisihisi ia davaria, ena lalona ia hadaia do ia haheaukalaia. Ia laloa bada gauna be ‘sivarai namona do ia gwauraia guguru.’

⁹ Hari, iseda tadikaka taihu danu be unai bamona idia gini goada noho. Hegeregere, tano ta ai Witnes taudia haida be edia Keristani gini siri karana dainai, kahirakahira lagani 20 lalonai dibura ruma ai idia noho. To, kota vairanai idia gini lasi badina unai tano ai taravatu ta ia noho lasi, lalomamina dainai tuari lalonai idia vareai lasi taudia kota henia totona. Dibura ruma ai idia noho lalonai, idia taravatudia edia ruma bese taudia ese do idia vadivadi henia lasi, bona idia haida be idia dadabaia bona hahisidia.

10. Bema ita dekenai dagedage karadia idia vara haraga, dahaka dainai ita gari lasi be namo?

¹⁰ Gabu haida ai iseda tadikaka taihu dekenai dagedage karadia be idia vara haraga. Bema oi dekenai unai bamona ia vara, oi gari lasi. Mani Iosepa ita laloa. Ia be igui hesiai tauna bamona idia hoihoilaia, to Iehova ese “ena hisihisi ibounai dekena amo ia hamauria.” (Kara 7:9, 10) Iehova ese oi totona unai bamona ia karaia diba. Laloaboio lasi, “Iehova ese ia idia badinaia taudia be hahetoho amo ia hamauridia dalana ia diba.” (2 Pet. 2:9) Oi diba Iehova be ia hegeregere inai tanobada dikana amo oi do ia hamauria, bona oi dekenai mauri hanaihanai do ia henia dainai, ia do oi abidadama henia noho, a? Oibe, unai dainai mai gari lasi ida dagedage oi haheaukalaia be namo.—1 Pet. 5:8, 9.

HAHETOHO KARADIA

11. Edena dala ai Satani ena hahetoho karadia be dagedage karadia amo idia idau?

¹¹ Hisihisi do ita davaria dalana ma ta be, hahetoho amo. Edena dala ai unai be dagedage karadia amo ia idau? Dagedage karadia be ia giroagiroa lai dikana ta bamona. Unai lai ia toa neganai, emu ruma ia hadikaia ore haraga diba. To, ita davaria hahetoho be dimairi ese timba idia ania ore karana bamona. Idia be timba lalonai idia vareai bona metairametaira idia ania ela bona ruma ibounai idia hadikaia. Ruma biaguna be unai do ia itaia lasi ela bona ena ruma be kahirakahira do ia moru.

12. (a) Satani ese ia gaukaralaia hahetoho ta be dahaka, bona dahaka dainai unai be iena tulu namona ta? (b) Dahaka dainai Paulo ia lalomanoka?

¹² Satani ia ura dikadika oiemu hetura karana Iehova ida do ia hadikaia. Unai dainai ia ese dagedage karadia o hahetoho do ia gaukaralaia emu abidadama ia tohoa totona. Satani ese ia gaukaralaia hahetoho ta be lalomanoka karana. Aposetolo Paulo danu be nega haida ia lalomanoka. Nega ta ia ese sibona ia gwauraia dika momokani tauna. (Roma 7:21-24 duahia.) Dahaka dainai Paulo ia lalomanoka? Paulo be lo tauna ta bona reana ia be hakaua oreana ena memba ta. To, ia lalomanoka badina ia danu be goevadae lasi tauna. Ia ura kara namo ia karaia, to kara dika ena taravatu ese ia tuari henia. Bema oi danu be oi lalomanoka, namona be emu lalona oi hagoadaia bona oi laloatao, Paulo danu be unai bamona ia mamia.

13, 14. (a) Dahaka dainai Dirava ena hesiai taudia haida idia lalomanoka? (b) Daika ia ura iseda abidadama ia hadikaia, bona dahaka dainai?

¹³ Nega haida, iseda tadikaka taihu momo be idia lalomanoka, lalohisihisi bona idia mamia idia be anina lasi. Hegeregere, painia goadana ta ladana Deborah, ia gwau: “Lau be nega momo guna lau karaia kerere ta lau laloa loulou, bona lau lalomanoka. Egu kerere lau laloa momo dainai, lau mamia taunimanima bona Iehova ese lau do idia lalokau henia diba lasi.”

¹⁴ Dahaka dainai, Deborah bamona Iehova idia hesiai henia goadagoada taudia idia lalomanoka? Badina idauidau dainai unai bamona idia mamia. Haida edia kara be vaia nega ibounai idia laloa idia be anina lasi, bona edia mauri idia moalelaia lasi. (Aon. 15:15) Ma haida be idia gorere dainai, lalohadai kereredia idia abia. Herevana dahaka dainai ita lalomanoka, to namona be ita laloatao tau ta ia ura unai bamona lalohadai amo ita ia hamorua. Unai tauna be daika? Ia be Satani. Ia diba do ia mase dainai, ia ura oi danu do oi mamia oi be dala lasi mauri hanaihanai oi abia totona. (Apok. 20:10) Satani ia ura do ita lalomanoka bona eda hesiai gaukara ita rakatania. Iena tahua gauna badana be Iehova do ita tomadiho henia lasi. Oibe, Satani be Dirava ena taunimanima ia tuari henia noho!

15. Korinto Iharuana 4:16, 17 ena hereva bamona, namona be eda lalona ita hadaia dahaka do ita karaia?

¹⁵ Namona be emu lalona oi hadaia Satani do oi tuari henia noho. Vaira negana ena hahenamo do oi laloa noho. Paulo be Korinto Keristani taudia ia tore henia, ia gwau: “Ai hesiku lasi, ena be aiemai tauanina be idia dika idia lao noho, to aiemai kudouna be dina ibounai goada matamata idia abia noho. Badina ena be ita abia hisihisi be nega sisina gauna bona ia metau lasi, to ita dekenai hairai hereadaena do ia mailaia, unai hairai be do ia noho hanaihanai.”—2 Kor. 4:16, 17.

HISIHISI HANAIA TOTONA HEGAEGAE

16. Dahaka dainai hekwakwanai ta ia do vara lasi lalonai, hari ita treinini goadagoada be gau badana?

¹⁶ Inai stadi ai ita herevalaia bamona, Satani be “koikoi karadia” idauidau ia gaukaralaia ita ia hamorua totona. (Efe. 6:11) Namona be ita ta ta ese 1 Petero 5:9 ena hakaua herevana ita badinaia. Ia gwau: “Ia umui tuari henia totona, mai abidadama goadana ida do umui gini.” Unai ita karaia totona, namona be hari, ita ese eda lalona bona kudouna do ita hegaegaelaia kara maoromaoro ita badinaia totona. Mani inai haheitalai ita laloa: Ena be tuari ia do vara lasi, to ami taudia be idia treinini goadagoada. Ita danu be unai bamona. Ita diba lasi vaira negana ai Satani be edena dala ai ita do ia tuari henia. Unai dainai, hari hekwakwanai ta ia do vara lasi lalonai, ita treinini goadagoada be gau badana. Paulo ese Korinto tadikaka ia tore henia, ia gwau: “Do umui tahua noho bema umui be emui abidadama umui dogoatao noho eiava lasi, bona do umui hamomokania noho umui be edena bamona taudia.”—2 Kor. 13:5.

17-19. (a) Ita ta ta sibona dekenai dahaka henanadai ita henia be namo? (b) Edena dala ai matamata taudia idia hegaegae diba, edia abidadama idia gwauraia hedinarai totona?

¹⁷ Paulo ena hakaua herevana ita badinaia totona, dala namona ta be sibona ita nanadaia: ‘Lau be nega ibounai lau guriguri, a? Egu turadia ese lau idia dibagania neganai, Dirava be egu lohia dainai ia lau badinaia noho, eiava egu turadia edia hereva lau kamonai? Nega ibounai Keristani heboudia lau lao, a? Mai gari lasi ida hereva momokani lau gwauraia hedinarai, a? Tadikaka o taihu edia kerere lau gwauatao, idia ese lauegu kerere idia gwauatao hegeregerena, a? Kongrigeisen bona tanobada hegegemadai orea idia hakaua taudia lau matauraia, a?’

¹⁸ Ataiai idia noho henanadai rua be hereva momokani ita gwauraia hedinarai, bona turadia edia laloani karadia dadaraia karana idia herevalaia. Iseda matamata taudia momo be sikuli ai unai bamona hahetoho idia davaria. To, idia be mai lalogoada ida edia abidadama idia gwauraia hedinarai, bona idia hemarai o gari lasi. Iseda magasin lalodiai hakaua hereva namodia momo idia noho. Hegeregere, July 2009 Awake! ese ia hahedinaraia bema emu klas turana ta be oi ia nanadaia: “Dahaka dainai oi be evolusen lalohadaina oi abia dae lasi?” inai bamona oi haere diba: “Dahaka dainai evolusen lalohadai do lau abia dae? Hari, saiens taudia danu, ena be idia be diba bada taudia, to unai lalohadai dekenai idia lalotamona lasi!” Tama sina e, namona be ruma ai emui natudia ida umui praktis, sikuli ai edia turadia edia laloani herevadia idia hanaia totona.

¹⁹ Momokani, nega haida ia auka hereva momokani ita gwauraia hedinarai o Iehova ena taravatu ita badinaia totona. Hegeregere, ena be moni gaukara ita karaia ela bona adorahi dainai ita hesiku bada, to sibona ita doria kongrigeisen hebou ita lao totona. Eiava, ena be reana ita ura dabai do ita mahuta noho, to sibona ita doria ita toreisi bona haroro gaukara totona ita lao. Laloatao: Bema hari unai bamona oi karaia hanaihanai, vaira negana ai hahetoho badadia idia mai neganai, do oi hanaia diba.

20, 21. (a) Edena dala ai Iesu ena boubou gauna laloa dobu karana ese ita do ia durua? (b) Namona be eda lalona ita hadaia dahaka ita karaia totona?

²⁰ Hunia dalanai ita davaria hahetoho be edena bamona? Hegeregere, edena dala ai lalomanoka ita hanaia diba? Ita do ia durua bada dalana ta be Iesu ena boubou gauna do ita laloa dobu. Aposetolo Paulo be unai bamona ia karaia. Nega haida ia mamia ia be dika tauna. To, ia diba Keriso be goevadae taudia totona ia mase lasi, to kara dika taudia totona ia mase. Bona Paulo be unai kara dika tauna ta. Ia gwau: “Hari lau noholaia maurina be Dirava ena Natuna lau abidadama henia dainai lau mauri, ia ese lau ia lalokau henia bona lau totona ia sibona ia henia.” (Gal. 2:20) Oibe, Paulo ese Iesu ena mauri davalaia boubouna ia abia dae, bona ia diba Iesu be ia totona ia mase.

²¹ Oi danu be namo oi davaria diba, bema oi abia dae Iesu ena mauri davalaia boubouna be Iehova ese oi totona ia henia harihari gauna ta. To, namo lasi oi laloa oiemu lalomanoka karana be do ia ore haraga. Ita haida be reana lalomanoka karana do ita haheaukalaia ela bona tanobada matamatana. To laloatao: Idia haheauka taudia ese ahuna namona do idia abia. Ita be kahirakahira Dirava ena Basileia henunai maino do ia vara bona abidadama taudia do idia goevadae lou negana ita naria noho. Unai dainai, ena be hisihisi idauidau ita davaria, to eda lalona do ita hadaia Dirava ena Basileia lalonai ita vareai totona.