Iseda Hisihisi Ibounai Lalonai Iehova ese Lalogoada Ia Henia

1, 2. Hekwakwanai negadiai, edena dala ai Iehova ese ita ia hagoadaia, bona iena Hereva lalonai dahaka hagoadaia herevana ia noho?

SINGUL tadikaka ta ladana Eduardo ese ena lalohekwarahi be ia headava elda tadikakana ladana Stephen dekenai ia gwauraia. Eduardo be 1 Korinto 7:28 ena hereva ia lalohadailaia, unai siri ia gwau: “Do idia headava taudia be edia tauanina ai hisihisi do idia abia.” Ia henanadai: “Inai ‘hisihisi’ be dahaka, bona bema lau headava, edena bamona unai lau haheaukalaia diba?” Stephen be unai henanadai ia do haerelaia lasi neganai, Eduardo ia hamaoroa aposetolo Paulo ena hereva do ia laloa, ia gwau Iehova be “lalogoada ibounai ia henia Diravana . . . iseda hisihisi ibounai lalonai ia ese ita dekenai lalogoada ia henia.”​—2 Kor. 1:3, 4.

² Iehova be iseda lalokau Tamana bona hekwakwanai negadiai ita ia hagoadaia. Reana Dirava ese iena Hereva amo oi ia durua bona hakaua negana oi laloatao diba. Oibe, ita abia dae momokani Iehova be ia ura mauri namona ita moalelaia, guna iena hesiai taudia ia kara henidia bamona.​—Ieremia 29:11, 12.

3. Edena henanadai do ita herevalaia?

³ Bema iseda hekwakwanai o hisihisi ena badina ita lalopararalaia, unai do ita haheaukalaia diba. Vadaeni dahaka dainai iseda headava o famili lalonai hisihisi ita davaria? Bona edena sivaraidia, Baibel negadiai bona hari iseda negai, ese ita idia hagoadaia diba? Unai henanadai edia haere bona ita haheauka dalana mani ita herevalaia.

HAHETOHO ​—“TAUANINA AI HISIHISI”

4, 5. Dahaka gaudia haida ese “tauanina ai hisihisi” idia havaraia diba?

⁴ Dirava ese taunimanima ginigunadia ia havaraia murinai, ia gwau: “Tau ese tamana sinana do ia rakatania, iena adavana dekenai do ia noho, ruaosi be tauanina tamona do idia lao.” (Gen. 2:24) Iehova ese headava ginigunana ia karaia neganai, unai hereva ia gwauraia. To, ita ibounai be goevadae lasi dainai, headava lalonai hekwakwanai idia vara diba. (Roma 3:23) Hegeregere, hahine ia headava murinai, ia be ena tama sina ena siahu henunai ia noho lasi, to ena adavana ena siahu henunai. Badina Baibel ia gwau tau be hahine ena kwarana. (1 Kor. 11:3) Nega haida headava matamatadia dekenai unai be auka. To, Dirava ena Hereva hegeregerena, namona be hahine ia abia dae hari iena adavana ese ia do ia hakaua, to ena tama sina lasi. Danu, reana gau haida dainai edia ravadia bona nakimi huanai heiriheiri ia vara diba, bona unai ese tauanina ai hisihisi ia havaraia.

⁵ Unai sibona lasi, hahine ese tau ia hamaoroa ia be ia rogorogo neganai, mani idia ruaosi edia hemami ita laloa. Ena be idia ruaosi do idia moale bada, to gau haida dainai do idia lalohekwarahi danu. Hegeregere, hahine ena rogorogo negana lalonai ia be do ia namo, eiava? Bona beibi ena helt do idia laloa danu. Bona edia moni be edena bamona do idia gaukaralaia? Beibi ia vara murinai, gau ma haida do idia idau danu. Reana sinana ese ena nega bada do ia atoa edia beibi ia naria totona. Unai dainai reana ena adavana do ia mamia iena hahine be ia ia laloa lasi. To, tau danu be maduna matamata ma haida do ia abia. Ia be do ia gaukara goada ena hahine bona natuna ia naria bona ubua totona.

6-8. Bema idia headava tau bona hahine be natudia idia havaraia diba lasi, dahaka ia vara diba?

⁶ Headava taudia ma haida be hisihisi idauna ta idia mamia danu. Idia be idia ura dikadika natudia idia havaraia, to unai ia vara diba lasi. Hahine be ia rogorogo diba lasi neganai, reana do ia lalohisihisi bada. (Aon. 13:12) Baibel negadiai, bema hahine ta be ia gabani, unai be hemarai gauna. Unai dainai Iakobo ena adavana, Rahela, ia itaia ena taihuna be natudia ia havaraia neganai, ia lalohisihisi bada. (Gen. 30:1, 2) Tano haida ai, taunimanima momo idia laloa ta be natudia momo ia havaraia be gau badana. Unai dainai nega momo unai tano taudia ese misinari taudia idia nanadaia dahaka dainai idia be natudia lasi. Herevana ena badina idia gwauraia hedinarai, to do idia gwau, “Ia namo, umui totona do ai guriguri!”

⁷ Mani haheitalai ma ta ita laloa. England ai ia noho taihu ta be ia ura dikadika natuna ta ia havaraia. To gabeai ia laloparara, inai nega oromana ai ia be natuna do ia havaraia lasi neganai, ia lalohisihisi bada. Gabeai ia bona ena adavana be ma ta amo natuna ta idia abia bona ubua. Taihu ia gwau: “To nega sisina lalonai lau do lalohisihisi. Lau diba ma ta ena natuna naria bona ubua karana be sibona egu natuna havaraia karana amo ia idau.”

⁸ Baibel ia gwau, “hahine be sinana ai idia lao neganai, unai ese idia ia gimaia.” (1 Tim. 2:15) To namo lasi ita laloa hahine be natudia idia havaraia dainai idia be mauri hanaihanai do idia abia. To, unai siri ena anina be hahine be iena natudia bona ruma naria karana dekenai ia bisi bada dainai, ia be nega lasi ma haida ia maumauraia eiava edia mauri ai idia vara gaudia lalonai ia vareai totona. (1 Tim. 5:13) To herevana unai ia vara, iena headava bona ruma bese lalonai hekwakwanai idia vara diba.

9. Headava taudia ese idia davaria hisihisi ma ta be dahaka?

⁹ Headava taudia haida ese idia mamia hisihisina ma ta be edia lalokau adavana ena mase. Reana idia momo idia laloa idia dekenai unai do ia vara lasi. To Keristani taudia dekenai unai ia vara neganai, idia ese Iesu ese ia gwauhamatalaia toreisi lou helarona idia laloa, bona unai ese idia dekenai lalogoada ia henia. (Ioa. 5:28, 29) Momokani, iseda Tamana, Iehova, ese ena Hereva lalonai gwauhamata momo ia toredia, bona nega aukadia lalonai unai gwauhamata ese ita idia hagoadaia diba. Dirava ena hesiai taudia haida be Iehova ena heduru amo idia abia namo mani ita herevalaia.

HAHETOHO NEGADIAI LALOGOADA ITA ABIA

10. Hana be edena dala ai lalogoada ia abia? (Laulau ginigunana herevalaia.)

¹⁰ Elikana ena lalokau adavana, Hana, dekenai ia vara gauna mani ita laloa. Hana be ia gabani, to Elikana ena adavana ma ta, Penina, be natudia ia havaraia. (1 Samuela 1:4-7 duahia.) Unai dainai “lagani ibounai” Penina ese Hana ia hevasehalaia. Unai ese Hana ena lalona ia hahisia bada. Bona heduru totona Iehova ia guriguri henia. Oibe, ia be nega daudau lalonai “Lohiabada dekenai ia guriguri.” Hana ia abia dae Iehova be ia dekenai ena noinoi gauna do ia henia, a? Reana, badina Baibel ia gwau iena guriguri ia haorea murinai, “iena lalohisihisi ia ore,” bona mai maino danu ia lao. (1 Sam. 1:12, 17, 18) Ia diba Iehova ese ia dekenai natuna ta do ia henia eiava dala ma ta ai iena lalona do ia hagoadaia.

11. Edena dala ai guriguri karana ese ita ia hagoadaia diba?

¹¹ Ita be goevadae lasi bona Satani ese ia biagua tanobadana ai ita noho dainai, hahetoho idauidau ita davaria. (1 Ioa. 5:19) To ita moale, badina Iehova be “lalogoada ibounai ia henia Diravana”! Ita davaria hahetoho o hisihisi ita haheaukalaia dalana ta be guriguri amo. Hana ese ena lalohekwarahi ibounai be Iehova dekenai ia gwauraia. Unai hegeregerena, hisihisi ita davaria neganai, namona be iseda hekwakwanai be Iehova dekenai ita gwauraia. To unai sibona lasi, ia ita noia goadagoada be namo; bona ia dekenai iseda hemami ibounai ita gwauraia.​—Fili. 4:6, 7.

12. Dahaka ese Ana ia durua dainai, ia moale?

¹² Ena be ita lalohisihisi bada, badina ita be natudia lasi eiava ita lalokau henia tauna ta ia mase, to lalogoada ita abia diba. Iesu ena negai, peroveta hahinena Ana be lagani 7 sibona ia headava murinai, iena adavana ia mase. Baibel ia gwau lasi ia be mai natudia. Ana ena mauri lagani be 84 neganai, ia be dahaka ia karaia noho? Luka 2:37 ia gwau: “Ia be hanaihanai dubu helaga dekenai ia lao bona dina bona hanuaboi hesiai gaukara helagana ia karaia, ia anivaga bona ia guriguri goadagoada.” Oibe, Iehova tomadiho henia karana ese ena lalona ia hagoadaia bona ia moale.

13. Tura korikoridia ese edena dala ai ita idia hagoadaia diba? Haheitalai gwauraia.

¹³ Iseda tadikaka taihu ita bamodia neganai, ita be tura korikoridia ai ita lao diba. (Aon. 18:24) Paula ena mauri lagani be 5 neganai, iena sinana be hereva momokani ia rakatania. Unai neganai Paula ia lalohisihisi bada. To gabeai painia taihu ta ladana Ann ese ia hagoadaia bona ia ida Baibel ia stadilaia matamaia. Paula ia gwau: “Ena be Ann be egu varavara lasi, to ia ese mai lalokau ida lau ia kara henia, bona unai ese lau ia hagoadaia, Iehova lau hesiai henia noho totona.” Oibe, hari Paula be Iehova ia do hesiai henia noho. Bona ia moale bada badina ena sinana be kongrigeisen dekenai ia giroa lou. Ann danu ia moale, badina Paula dekenai ia be sina ta bamona.

14. Ma haida ita hagoadaia neganai, dahaka namo ita davaria diba?

¹⁴ Momokani, mai lalokau ida ma haida ita kara henia neganai, ita sibona iseda hekwakwanai ita laloaboio diba. Hegeregere, idia headava o singul taihudia idia diba bema ma haida dekenai sivarai namona idia gwauraia, idia be Dirava ida idia gaukara hebou, iena ura idia hagugurua totona. Bona unai ese idia ia hamoalea bada. Ma haida dekenai haroro gaukara be heduru gauna namona. Oibe, kongrigeisen lalonai ita be tura korikoridia ai ita lao diba, bema ma haida edia namo ita laloa bada​—⁠iseda teritori ai idia noho taudia bona iseda kongrigeisen taudia edia danu. (Fili. 2:4) Aposetolo Paulo be haheitalai namona. Tesalonika kongrigeisen taudia dekenai ia be “ena natudia ia ubua bona naria sinana ta bamona” ia kara; bona tama ta bamona ia kara danu.​—1 Tesalonika 2:7, 11, 12 duahia.

RUMA BESE TAUDIA HAGOADAIA

15. Matamata taudia dekenai hereva momokani hadibaia karana be daidia edia maduna?

¹⁵ Iseda kongrigeisen lalonai idia noho ruma bese taudia be edena bamona ita hagoadaia diba? Nega haida, kamonai matamata taudia ese ita do idia noia edia natudia dekenai hereva momokani do ita hadibaia, eiava edia matamata taudia ita stadi henidia totona. To Baibel ese ia hahedinaraia, natudia hadibaia karana be tama sina edia maduna. (Aon. 23:22; Efe. 6:1-4) Ena be nega haida ma haida ese heduru idia henia diba, to gau badana be tama sina sibodia ese edia natudia idia hadibaia. Nega ibounai tama sina be edia natudia ida idia herevahereva be gau badana.

16. Natudia ita durua neganai, dahaka ita laloatao be namo?

¹⁶ Bema tama o sina ta ia ura ma ta ese ena natudia ia stadi henia, namo lasi edia natudia do ia stadi henia tauna ese edia tama sina edia maduna ia abia. Nega haida reana ita stadi henia natudia edia tama sina be hereva momokani idia ura henia lasi. To, namona be stadi tauna ia laloatao, ia ese unai natudia ia stadi henia neganai, namo lasi ia be edia tama o sina hegeregerena ia kara. Bona idia ia stadi henia neganai, namona be edia tama sina be ruma ai idia noho, eiava lo Keristani tauna ida edia stadi ia karaia o pablik gabuna ta ai. Bema unai ita karaia, ta be lalohadai kererena do ia abia lasi. Reana gabeai, edia tama sina ese Dirava amo idia abia maduna do idia hagugurua bona edia natudia do idia hadibaia.

17. Edena dala ai natudia ese edia ruma bese taudia idia hagoadaia diba?

¹⁷ Dirava momokanina idia lalokau henia bona ena sisiba idia badinaia matamata taudia ese edia ruma bese taudia idia hagoadaia diba. Edena dala ai? Bema edia tama sina idia matauraidia, bona dala idauidau ai idia durudia. Danu, bema natudia be Iehova idia hesiai henia noho, unai ese edia ruma bese ia hagoadaia diba. Abata ia do vara lasi neganai, Seta ena bese tauna, Lameka, be Iehova ia tomadiho henia. Ia ese ena natuna, Noa, ia herevalaia, ia gwau: “Lohiabada ese tano ia hadikaia vadaeni kara dekena amo [ia] ese ita do ia hamauria, iseda imana edia gaukara, bona iseda hekwarahi dekena amo do ita laga-ani totona.” Iehova ese tano ia hanamoa lou neganai, unai peroveta herevana ia guguru. (Gen. 5:29; 8:21) Hari danu, bema natudia be tomadiho momokani idia badinaia, unai ese edia ruma bese do ia hagoadaia hari bona vaira negai do idia davaria hahetoho idauidau idia haheaukalaia totona.

18. Ena be hahetoho idauidau ita davaria, to dahaka ese ita ia durua diba ita haheauka totona?

¹⁸ Guriguri karana, Baibel lalonai idia noho sivarai laloa dobu karana, bona Iehova ena taunimanima bamoa karana ese hari taunimanima milioni momo ia durua, hahetoho idauidau idia haheaukalaia totona. (Salamo 145:18, 19 duahia.) Ita diba Iehova be nega ibounai ia noho hegaegae ita ia hagoadaia totona, bona ia ese ita do ia durua mai lalogoada ida hahetoho idauidau ita haheaukalaia totona​—hari bona vaira negai danu.