Dirava Ena Basileia be Edena Negai Ia Lohia Matamaia?​—Kahana 2

NEBUKANESA ENA NIHI​—RIVIU KWADOGINA

Cameron: Jon, lau moale oi lau itaia lou. Wiki ta ta ai ita karaia Baibel stadi lau moalelaia.a Bona oi namo, a?

Jon: Lau namo, tanikiu.

Cameron: Namo herea. Vanegai, ita ese inai henanadai ita herevalaia, ‘Dahaka dainai Iehova ena Witnes taudia idia abia dae Basileia be lagani 1914 ai ia lohia matamaia?’b Baibel bukana Daniela karoa 4 ena peroveta herevana ese toa ta ia herevalaia. Unai oi laloatao, a?

Jon: Oibe, King Nebukanesa ese ia nihilaia au badana ia herevalaia.

Cameron: Maoro. Nebukanesa ena nihi lalonai, au badana ta ia itaia, unai au be lata herea. Bona Dirava ena aneru ta ena hereva ia kamonai, ia gwau, au do idia utua, to au ena badina, mai ena ramuna danu be tano lalonai do idia noho. “Lagani 7” murinai, au do ia tubu lou.c Danu, ita ese unai peroveta hereva edia guguru negadia rua ita herevalaia. Unai peroveta hereva ia guguru negana ginigunana oi laloatao, a?

Jon: Unai be Nebukanesa dekenai ia vara, ani? Ia be lagani 7 lalonai ia kavakava.

Cameron: Maoro. Nebukanesa be ia kavakava dainai, ena king gaukara ia karaia lasi. Unai peroveta herevana be dala badana ai ia guguru, nega sisina lalonai Dirava ena Basileia be ena gaukara ia karaia lasi. Ita herevalaia bamona, Ierusalema be 607 B.C.E. ai idia hadikaia neganai, unai lagani 7 ia matamaia. Unai nega amo tanobada ai king ta be lasi Iehova Dirava ena taunimanima ia lohiaia totona. To lagani 7 dokonai, Dirava ese ena taunimanima totona King ta ia abia hidi, unai King be guba ai do ia lohia. Ita gwau diba, lagani 7 ena dokonai Dirava ena guba Basileia ia lohia matamaia. Ita ese lagani 7 ia matamaia negana ita herevalaia vadaeni. Unai dainai, bema lagani 7 ena daudau ita lalopararalaia, Dirava ena Basileia ia lohia matamaia negana do ita diba. Unai oi lalopararalaia, a?

Jon: Oibe, unai riviu ese lau ia durua unai gaudia lau laloatao totona.

Cameron: Namo herea. Hari, ita ese lagani 7 ena daudau do ita herevalaia. Unai kahana lau duahia badina lau ura ena point badadia lau laloatao. Lau ura oi dekenai lau herevalaia namonamo.

Jon: Namo.

LAGANI 7 IA DOKO​—NEGA DOKONA IA MATAMAIA

Cameron: Unai peroveta herevana be Nebukanesa dekenai ia guguru guna, bona ia herevalaia lagani 7 be lagani korikoridia. To, unai peroveta herevana Dirava ena Basileia dekenai be dala badana ai ia guguru neganai, unai lagani 7 be lagani 7 korikoridia lasi. To, ena anina be nega daudau lalonai ia vara gauna.

Jon: Dahaka dainai unai bamona oi hereva?

Cameron: Laloatao, unai lagani 7 be lagani 607 B.C.E. ai ia matamaia, unai nega ai Ierusalema hanua idia hadikaia. Bema lagani 607 B.C.E. amo lagani 7 ita duahia, lagani 600 B.C.E. ai do ita ginidae. To unai lagani ai, Dirava ena Basileia dekenai mai anina bada gauna ta ia vara lasi. Guna ita hereva bamona, lagani handred momo murinai, Iesu be tanobada ai ia noho neganai, ia hahedinaraia nega 7 ia do ore lasi.

Jon: Oibe. Hari lau laloatao.

Cameron: Unai dainai ia be lagani 7 korikorina lasi, to ena anina be nega daudau o lagani momo ia herevalaia.

Jon: Ena daudau be edena bamona?

Cameron: Apokalupo bukana ena hereva ese Daniela bukana ena hereva ia durua. Unai dainai unai buka ese ita ia durua diba, nega 7 ena daudau ita lalopararalaia totona. Baibel ese ia hahedinaraia lagani toi mai kahana (o lagani 3 1⁄2) be dina 1,260.d Unai ena anina be lagani 7 ena lata be dina 2,520. Lau herevalaia gaudia oi laloparara, a?

Jon: Oibe. To, edena bamona ita diba Dirava ena Basileia be lagani 1914 ai ia lohia matamaia?

Cameron: Okei, hari unai do ita herevalaia. Nega haida Baibel ena peroveta herevadia lalonai, dina ta be lagani ta ia laulaulaia.e Bema ita gwau dina ta be lagani ta ia herevalaia, vadaeni unai lagani 7 ena daudau be lagani 2,520. Lagani 607 B.C.E. amo lagani 2,520 ita duahia neganai, lagani 1914 dekenai do ita ginidae.f Unai negai, Iesu be Dirava ena Basileia ai ia lohia matamaia. Danu, lagani 1914 amo tanobada ai dika badadia idia vara, unai ese Baibel ena peroveta herevana dina gabediai do idia vara gaudia ia hamomokania.

Jon: Dahaka gaudia idia vara?

Cameron: Mataio 24:7 ai, Iesu ena hereva ita laloa. Iesu be guba ai do ia lohia matamaia negana ia herevalaia neganai, ia gwau: “Bese ta do ia toreisi bese ta do ia tuari henia, bona basileia ta ese basileia ta do ia tuari henia, bona gabu idauidau ai hitolo bada bona tano mareremarere do idia vara.” Oi itaia, Iesu ia gwau unai negai, hitolo bada bona tano mareremarere do idia vara. Momokani, idia hanaia laganidia ai ita itaia tanobada ai unai bamona hekwakwanai momo idia vara, ani?

Jon: Momokani.

Cameron: Danu, inai siri ai Iesu ese ia hahedinaraia, ia be Dirava ena Basileia ia lohiaia neganai, tuari do idia vara. Bona Apokalupo bukana ia hahedinaraia, tanobada dokonai tuari maragidia sibona lasi, to tanobada ibounai ai tuari badadia do idia vara danu.g Oi laloatao, edena lagani ai tanobada tuari ginigunana ia vara?

Jon: Unai be lagani 1914 ai ia vara, bona oi gwau unai lagani ai Iesu ia lohia matamaia, ani? Guna unai lau laloa lasi.

Cameron: Vadaeni, lagani 7 ena peroveta herevana bona Baibel ese nega dokona totona ia perovetalaia herevadia ita herevalaia dainai, hari ita laloparara. Iehova ena Witnes taudia idia abia dae, lagani 1914 ai, Iesu be Dirava ena Basileia ai ia lohia matamaia.h

Jon: Unai ibounai lau do lalopararalaia namonamo lasi.

Cameron: Emu hemami lau lalopararalaia. Guna, lau danu be unai lau lalopararalaia lasi. Ena be Baibel ese lagani 1914 ia gwauraia lasi, to lau laloa ita herevalaia gaudia amo do oi itaia, dahaka dainai Iehova ena Witnes taudia be Baibel ena hereva hegeregerena, unai lagani idia laloa bada.

Jon: Oibe, hanaihanai emu hereva dekenai lau moale, badina oi be sibona emu lalohadai amo oi hereva lasi, to Baibel siri amo emu hereva oi hamomokania. To lau laloa, dahaka dainai unai ita lalopararalaia be auka. Dahaka dainai Baibel ai Dirava ia gwau lasi, lagani 1914 ai Iesu be guba ai do ia lohia matamaia?

Cameron: Jon, unai be henanadai namona. To, gau momo be Baibel ese ia gwauraia hedinarai lasi. Dahaka dainai Dirava ese Baibel ia torea dalana amo, ia ura taunimanima do idia hekwarahi Baibel idia lalopararalaia totona? Lau giroa neganai, unai do ita herevalaia.

Jon: Namo, lau ura oi mai.