DEKENA TAUNA IDA HEREVAHEREVA

Dirava Ena Basileia be Edena Negai Ia Lohia Matamaia?—Kahana 1

Henunai do oi itaia, Iehova ena Witnes tauna ta be ena dekena tauna ida idia herevahereva. Witnes tauna ladana Cameron be Jon ena ruma dekenai ia lao bona idia herevahereva.

AONEGA “TAHUA GOADA”

Cameron: Jon, lau moale badina hanaihanai Baibel ita herevalaia.a Vanegai, oi be Dirava ena Basileia totona henanadai ta oi henia. Oi henanadai, ‘Dahaka dainai Iehova ena Witnes taudia idia abia dae Basileia be lagani 1914 ai ia lohia matamaia?’

Jon: Oibe, emui pablikeisen ta lau duahia, bona ia gwau Dirava ena Basileia be lagani 1914 ai ia lohia matamaia. Unai dainai lau daradara badina oi gwau umui be Baibel ena hereva sibona umui badinaia.

Cameron: Maoro.

Jon: Lau be Baibel ibounai lau duahia. To siri ta ese lagani 1914 ia herevalaia lasi. Unai dainai Intanet ai ia noho Baibel lalonai “1914” lau tahua, to unai lau davaria lasi.

Cameron: Badina rua dainai oi lau hanamoa be namo. (1) Baibel ibounai oi duahia. Lau itaia oi be Dirava ena Hereva oi ura henia bada.

Jon: Tanikiu. Baibel be buka idauna.

Cameron: Oibe. (2) Oi lau hanamoa badina, emu henanadai ena haere be Baibel ai oi tahua. Baibel danu ia gwau: Aonega “oi tahua goada.”b Lau moale badina unai bamona oi karaia.

Jon: Tanikiu. Lau ura diba ma haida lau abia. Ita stadilaia bukana ai, lagani 1914 dekenai hereva haida lau tahua. Inai buka be king ta ena nihi ia herevalaia—au latana ta idia utua, to gabeai ia tubu lou.

Cameron: Oibe. Unai be Daniela karoa 4 ai ia noho peroveta herevana. Bona Babulonia ena King Nebukanesa ena nihi ia herevalaia.

Jon: Oibe. Unai peroveta herevana lau duahia loulou. To, unai karoa ese Dirava ena Basileia bona lagani 1914 ia herevalaia lasi.

Cameron: To, Daniela danu be nihi ena anina ia diba lasi, herevana Dirava ena hahekau henunai unai ia torea.

Jon: Aaa!

Cameron: Oibe. Daniela 12:8 ia gwau: “Ia gwauraia herevana lau kamonai, to unai hereva ena anina be lau diba lasi.”

Jon: Hari lau diba, haida be unai idia diba lasi.

Cameron: Daniela ia diba lasi, badina unai negai Dirava ia ura lasi taunimanima be Daniela ena peroveta herevadia edia anina idia diba. To hari, ita be unai hereva edia anina ita lalopararalaia diba.

Jon: Dahaka dainai?

Cameron: Mani Daniela 12:9 ita duahia, ia gwau: “Inai hereva ena anina be do hunia bamona ia lao, ela bona dokona negana ia ginidae.” Unai dainai, Daniela ena peroveta herevadia be gabeai o “dokona negana” ai taunimanima ese do idia lalopararalaia. Bona Baibel stadi ai do ita itaia, edena bamona gau momo ese idia hamomokania ita be “dokona negana” ai ita noho.c

Jon: Lau ura Daniela ena peroveta herevana ena anina lau diba.

Cameron: Namo, oi do lau durua.

NEBUKANESA ENA NIHI

Cameron: Lau ura King Nebukanesa ese nihi ai ia itaia gaudia lau herevalaia sisina. Gabeai, nihi ena anina ita herevalaia diba.

Jon: Namo.

King Nebukanesa ena nihi lalonai au lata herea ta ia itaia

Cameron: Nebukanesa ese au latana ta ia itaia. Bena Dirava ena aneru ia gwau unai au do idia utua. To, Dirava ia gwau au ena badina mai ena ramuna be tano lalonai do ia noho. “Lagani 7” murinai, unai au do ia tubu lou.d Unai be King Nebukanesa dekenai ia guguru. Ena be ia be king badana, to “lagani 7” lalonai king gaukara do ia karaia lasi—idia utua au latana bamona. Ia vara gauna oi diba, a?

Jon: Lasi.

Cameron: Baibel ia gwau Nebukanesa ia kavakava, toana be ela bona lagani 7. Unai negai, ia be king gaukara ia karaia lasi. To lagani 7 murinai Nebukanesa ia namo bona king gaukara ia karaia lou.e

Jon: Okei. To, edena bamona unai ese Dirava ena Basileia bona lagani 1914 ia herevalaia?

Cameron: Daniela ena peroveta herevana ena guguru negana be rua. (1) Nebukanesa ena king gaukara ia karaia lasi negana. Bona (2) Dirava ena Basileia ena gaukara ia karaia lasi negana. Inai peroveta herevana iharuana be Dirava ena Basileia ia herevalaia.

Jon: Edena bamona unai oi diba?

Cameron: Peroveta herevana ese ia haerelaia. Daniela 4:17 ia gwau: “Mauri noho taudia do idia diba, Ataiai Momokani Dirava, be mai ena siahu taunimanima ibounai edia latanai, bona iena ura hegeregerena, basileia naria siahu ia henia taunimanima ta ta dekenai.” Inai siri be taunimanima edia basileia ia herevalaia.

Jon: Oibe, ia hahedinaraia Ataiai Momokani Dirava be taunimanima edia basileia ia biagua danu.

Cameron: Anina be Daniela ese Nebukanesa sibona ia herevalaia lasi. To, Dirava ese taunimanima ia lohiaia karana ia herevalaia danu. Unai peroveta hereva ibounai dekenai unai ita itaia diba.

Jon: Dahaka dainai unai bamona oi hereva?

BUKA ENA HEREVA BADANA

Cameron: Nega ibounai Daniela be hereva badana ta ia herevalaia. Ia be Dirava ena Basileia—Iena Natuna, Iesu ese ia lohiaia gauna—ia herevalaia. Mani Daniela 2:44 oi kehoa bona duahia.

Jon: Okei. Ia gwau: “Unai basileia namba 4 ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.”

Cameron: Tanikiu. Inai siri be Dirava ena Basileia ia herevalaia, a?

Jon: Aa. Lau daradara.

Cameron: Siri ia gwau, Dirava ena Basileia be do ia “noho ela bona hanaihanai.” To, taunimanima edia gavamani be idia noho hanaihanai diba lasi, ani?

Jon: Oibe.

Cameron: Daniela ena peroveta herevana ma ta ese Dirava ena Basileia ia herevalaia danu. Daniela 7:13, 14 (BHḡ) ai. Vaira nega ai do ia king tauna ia herevalaia neganai, ia gwau: “Lohia siahuna idia henia, bona hairai bona basileia danu, bese idauidau bona iduhu idauidau bona gado idauidau iboudiai ese iena hesiai gaukara do idia karaia; iena lohia siahu be do ia noho hanaihanai siahuna, do ia ore diba lasi gauna bona ena basileia be ta ese do ia hadikaia diba lasi.” Inai siri ai dahaka hereva oi itaia?

Jon: Basileia herevana lau itaia.

Cameron: Maoro. Bona siri ia gwau, inai Basileia ese “bese idauidau bona iduhu idauidau bona gado idauidau taudia” do ia lohiaia. Ita gwau diba, inai Basileia be tanobada ibounai do ia lohiaia.

Jon: Momokani. Siri be unai bamona ia hereva.

Cameron: Daniela ma ia gwau: “Iena lohia siahu be do ia noho hanaihanai siahuna, do ia ore diba lasi gauna bona ena basileia be ta ese do ia hadikaia diba lasi.” Inai peroveta herevana be Daniela 2:44 hegeregerena, ani?

Jon: Oibe.

Cameron: Mani ita riviu sisina. Daniela karoa 4 ena peroveta herevana ese taunimanima ia hadibaia, Ataiai Momokani Diravana be taunimanima edia basileia ia biagua. Momokani, unai peroveta herevana be Nebukanesa sibona ia herevalaia lasi. Bona Daniela ena peroveta herevadia be Dirava ena Natuna ese do ia lohiaia Basileiana ia herevalaia. Ita gwau diba, Daniela karoa 4 ena peroveta herevana ese Dirava ena Basileia ia herevalaia danu.

Jon: Reana unai be maoro. To, lau itaia ia be lagani 1914 ia herevalaia lasi.

“ELA BONA LAGANI 7 IDIA ORE”

Cameron: King Nebukanesa ita herevalaia lou. Peroveta herevana ena guguru negana ginigunana lalonai, au be Nebukanesa ia laulaulaia. Unai au idia utua neganai Nebukanesa be king gaukara ia karaia lasi ela bona lagani 7 idia ore—unai nega lalonai Nebukanesa ia kavakava. Lagani 7 murinai Nebukanesa ia namo bona king gaukara ia karaia lou. Peroveta herevana ia guguru negana iharuana lalonai, Dirava ena Basileia be nega sisina lalonai ena gaukara ia karaia lasi—to Dirava ia lohia noho.

Jon: Emu hereva ena anina be dahaka?

Cameron: Baibel ese ia hahedinaraia, Ierusalema ai, Israela ena king ibounai be “[Iehova] ena terona” ai idia helai.f Idia amo Dirava be ena taunimanima ia lohiaia. Unai dainai, unai king ibounai be Dirava idia laulaulaia. Gabeai, unai king bona idia lohiaia taudia momo be Dirava idia gwau-edeede henia. Unai dainai lagani 607 B.C.E. ai, Babulonia taudia ese Israela taudia ia hadikaia neganai, Dirava be unai ia koua lasi. Unai nega amo, Ierusalema ai king ta be Iehova ena terona ai ia helai lasi. Ita gwau diba, unai negai Dirava ena Basileia ena gaukara ia karaia lasi. Hari oi laloparara, ani?

Jon: Oibe.

Cameron: Unai dainai, lagani 7 be lagani 607 B.C.E. ai ia matamaia, o Dirava ena Basileia be nega sisina lalonai ena gaukara ia karaia lasi. Lagani 7 idia ore neganai, Dirava ena terona, guba ai be king matamata ta do ia helai. Unai negai, Daniela ena peroveta herevadia ma haida idia guguru. To, henanadai badana be inai: Lagani 7 be edena negai idia ore? Unai henanadai ena haere ita diba neganai, Dirava ena Basileia ia lohia matamaia negana do ita diba.

Jon: Hari lau laloparara. Anina be lagani 7 be lagani 1914 ai ia doko, ani?

Cameron: Maoro!

Jon: To edena bamona unai ita diba?

Cameron: Tanobada ai Iesu be ena hesiai gaukara ia karaia neganai, ia hahedinaraia unai lagani 7 ia do ore lasi.g Anina be unai lagani 7 be nega daudauna. Unai lagani 7 be lagani handred momo gunanai, o Iesu be tanobada ia do mai lasi neganai ia matamaia ela bona Iesu be guba dekenai ia giroa. Laloatao danu, Daniela ena peroveta herevadia edia anina do idia hedinarai lasi ela bona “dokona negana ia ginidae.”h Lagani 1800 muridiai, kudou maoro Bible Student taudia be idia ura dikadika Daniela ena peroveta herevadia edia anina idia tahua namonamo. Idia laloparara matamaia lagani 7 be lagani 1914 ai do ia doko. Tanobada ai idia vara kara badadia ese idia hamomokania, lagani 1914 ai Dirava ena Basileia be guba ai ia lohia matamaia. Unai lagani ai dokona negana ia matamaia. Reana, hereva matamatadia momo lau gwauraia, ani?

Jon: Oibe. Namona be inai lau duahia lou, unai amo do lau laloparara namonamo.

Cameron: Namo herea. Lau danu be lagani haida murinai unai lau lalopararalaia. Reana iseda herevahereva amo oi itaia, dahaka dainai Iehova ena Witnes taudia idia abia dae Basileia be lagani 1914 ai ia lohia matamaia.

Jon: Nega momo lau moale badina umui be Baibel ena hereva sibona umui badinaia.

Cameron: Lau itaia oi be unai bamona. To, hereva matamatadia momo lau gwauraia dainai, do oi laloparara haraga lasi. Reana gabeai henanadai ma haida do oi henia. Hegeregere, lagani 7 ita herevalaia neganai, ita itaia Dirava ena Basileia be lagani 607 B.C.E. ai ia lohia matamaia. To, edena bamona ita diba lagani 7 be lagani 1914 ai ia doko?i

Jon: Unai lau laloa danu.

Cameron: Baibel ese ita ia durua lagani 7 ena lata ita diba totona. Oi ura lau giroa mai bona unai ita herevalaia, a?j

Jon: Namo.

Oi ura edena topik be Baibel amo ita herevalaia? Iehova ena Witnes taudia edia hadibaia herevadia o kara haida oi ura diba, a? Bema oibe, vadaeni Iehova ena Witnes ta oi nanadaia. Ia be mai moale ida unai gauna do ia herevalaia.

a Nega momo Iehova ena Witnes taudia be davana lasi Baibel stadi amo edia dekena taudia ida Baibel idia herevalaia.

b Aonega Herevadia 2:3-5.

c Baibel be Dahaka Ia Hadibaia? bukana ena karoa 9 itaia. Iehova ena Witnes taudia ese idia karaia. Danu www.jw.org/ho ai ia noho.

d Daniela 4:13-17.

e Daniela 4:20-36.

f 1 Sivarai 29:23.

g Iesu ese nega dokona ia herevalaia neganai, ia gwau: “Ierusalema [Dirava ena lohia dalana ia laulaulaia] do idia moia ela bona idau bese edia nega ia ore.” (Luka 21:24) Unai dainai Iesu ena nega amo, Dirava ese ena king gaukara do ia karaia lasi ela bona nega dokona.

h Daniela 12:9.

i Baibel be Dahaka Ia Hadibaia? bukana rau 215-218 itaia. Danu, www.jw.org/ho ai ia noho.

j Lagani 7 ena lata ia herevalaia Baibel siridia be atikol gabena ese do ia herevalaia.