Iehova Tanikiu Henia Bona Oi Do Ia Hanamoa

1. Dahaka dainai Iehova ita tanikiu henia be namo?

IEHOVA ita tanikiu henia be namo, badina ia ese ita dekenai “harihari gaudia namodia ibounai bona harihari gaudia hereadaedia ibounai” ia henia. (Iam. 1:17) Iehova, lalokau Mamoe Naria Tauna, ese iseda dabu gaudia bona eda hetura karana ia ida ia laloa bada. (Sal. 23:1-3) Lalometau ita davaria neganai, Iehova be iseda “heau mauri gabuna, bona ia ese ita dekenai goada ia henia.” (Sal. 46:1) Unai dainai, mai kudouna ibounai ida salamo torea tauna ena hereva ita abia dae. Ia gwau: “[Iehova] do umui tanikiu henia, badina ia be namo. Iena lalokau bona bogahisihisi do idia noho ela bona hanaihanai.”—Sal. 106:1.

2, 3. (a) Dahaka ia vara diba bema Iehova amo ita abia hahenamo ita laloa bada lasi? (b) Inai stadi lalonai edena henanadai do ita herevalaidia?

² Dahaka dainai Iehova tanikiu henia karana ita laloa bada? Baibel ena peroveta herevana bamona, inai nega dokonai taunimanima be tanikiu karana idia hahedinaraia lasi. (2 Tim. 3:2) Momo be Iehova amo idia abia hahenamo idia laloa bada lasi. Inai tanobada ena laloani karadia dainai, taunimanima milioni momo idia ura edia dabu gaudia sibona lasi, to gau momo idia hoia. Unai kara ese eda lalona ia veria diba, bena Israela taudia bamona eda hetura karana Iehova ida bona eda hahenamo do ita laloa bada lasi, bona ia do ita tanikiu henia lasi.—Sal. 106:7, 11-13.

³ Hahetoho badadia ita davaria neganai, do ita lalometau bona ita abia hahenamo do ita laloaboio. (Sal. 116:3) Unai dainai, edena dala ai Iehova tanikiu henia karana ita hahedinaraia noho? Bona dahaka ese ita do ia durua lalohadai maorona ita abia, herevana hahetoho badadia ita davaria? Mani ita itaia.

‘IEHOVA E, OIEMU DURUA KARADIA AI DEKENAI BE MOMO HEREA’

4. Edena dala ai Iehova tanikiu henia karana ita hahedinaraia noho?

⁴ Iehova tanikiu henia karana ita hahedinaraia noho totona, namona be ia amo ita abia hahenamo ita laloa dobu bona moalelaia. Bona iena lalokau karadia do ita laloa. Salamo torea tauna danu be Iehova ese ia karaia gaudia namodia ia hoalaia.—Salamo 40:5; 107:43 duahia.

5. Aposetolo Paulo ena kara amo dahaka ita dibaia?

⁵ Aposetolo Paulo ese Iehova tanikiu henia karana ia hahedinaraia dalana amo gau momo ita dibaia. Ia be hanaihanai mai kudouna ibounai ida Iehova ia tanikiu henia, unai ese ia hahedinaraia Iehova amo ia abia hahenamo ia laloa dobu. Ena be Paulo ia diba guna ia be ‘Dirava ena ladana ia hadikaia, iena taunimanima ia dagedage henia, bona hemataurai karana ia hahedinaraia lasi.’ To tanikiu karana ia hahedinaraia badina Dirava bona Keriso ese ia idia hebogahisi henia. Bona ia idia abidadama henia dainai hesiai gaukarana idia henia. (1 Timoteo 1:12-14 duahia.) Danu, Paulo ese ena Keristani tadikaka taihu ia hanamoa, bona edia kara namo bona sivarai namona idia harorolaia goadagoada dainai Iehova ia tanikiu henia. (Fili. 1:3-5, 7; 1 Tes. 1:2, 3) Paulo be hahetoho ia davaria neganai, Iehova ia tanikiu henia badina ena tadikaka ese nega maorona ai ia idia durua. (Kara 28:15; 2 Kor. 7:5-7) Unai dainai, ita abia dae momokani Paulo ena hereva ese Keristani taudia ia hagoadaia. Ia gwau: “Tanikiu karana do umui hahedinaraia. . . . Umui ta ta do umui hadibaia bona sisiba henia noho mai salamo ida, Dirava hanamoa anedia bona tomadiho ane hairaidia ida.”—Kol. 3:15-17.

LALOA DOBU BONA GURIGURI BE MAI ANINA BADA

6. Dahaka dainai Iehova oi tanikiu henia?

⁶ Edena dala ai Paulo ita tohotohoa bona tanikiu karana ita hahedinaraia? Paulo bamona, namona be Iehova ese ita totona ia karaia gaudia do ita laloa dobu. (Sal. 116:12) Bema ta ese oi ia nanadaia, ‘Edena hahenamo Iehova amo oi moalelaia?’ edena bamona do oi haere? Emu hetura karana Iehova ida do oi herevalaia, a? Keriso ena mauri davalaia boubouna ese emu dika ia gwauatao dalana do oi herevalaia, a? Hahetoho negadiai oi idia durua tadikaka taihu edia ladana do oi gwauraia, a? Eiava emu lalokau adavana o natudia do oi herevalaia. Bema nega ita atoa eda lalokau Tamana, Iehova, amo ita abia hahenamo ita laloa dobu, do ita moale bona ia do ita tanikiu henia.—Salamo 92:1, 2 duahia.

7. (a) Dahaka dainai mai tanikiu ida Iehova ita guriguri henia? (b) Dahaka namo oi davaria diba?

⁷ Bema ita abia hahenamo ita laloa dobu, unai ese ita do ia doria mai tanikiu ida Iehova ita guriguri henia totona. (Sal. 95:2; 100:4, 5) Momo idia laloa guriguri be Dirava amo gau ta idia noia karana sibona. To, bema eda guriguri lalonai Iehova ita tanikiu henia do ia moale. Baibel ai lalona hagoadaia guriguri edia sivarai momo idia noho, hegeregere Hana bona Hesekaia edia guriguri. (1 Sam. 2:1-10; Isa. 38:9-20) Unai dainai namona be unai abidadama hesiai taudia edia haheitalai namodia ita tohotohoa. Oibe, Iehova amo oi abia hahenamo dainai, mai tanikiu ida ia oi guriguri henia be namo. (1 Tes. 5:17, 18) Unai oi karaia ena namo be momo. Do oi moale, emu lalokau Iehova dekenai do ia bada bona ia kahirakahira do oi lao.—Iam. 4:8.

8. Dahaka ese eda lalona ia veria diba unai amo Iehova ena kara namodia do ita laloaboio?

⁸ Iehova ena kara namodia ita laloaboio lasi totona, dahaka dainai ita naria namonamo? Badina ita be Adamu ena natudia bona iseda kudouna dekenai sibona laloa bada urana ia noho. Mani inai oi laloa: Iehova ese iseda tama sina ginigunadia be paradaiso umana ta lalonai ia atodia. Idia be gau ta dekenai idia dabu lasi bona idia mauri hanaihanai diba. (Gen. 1:28) To idia ese unai hahenamo idia laloa bada lasi. Idia ese mataganigani urana idia habadaia. Unai dainai gau ibounai idia haboioa. (Gen. 3:6, 7, 17-19) Inai tanobada ai momo ese tanikiu karana idia hahedinaraia lasi, unai dainai bema ita naria namonamo lasi Iehova ese ita totona ia karaia karadia do ita laloaboio, iseda hetura karana ia ida bona tanobada hegegemadai tadikaka oreana lalonai ita noho ena hahenamo do ita laloa bada lasi, bona kahirakahira do idia ore tanobada gaudia ese iseda lalona idia veria diba. (1 Ioa. 2:15-17) Unai tarapu ita dadaraia totona, namona be ita abia hahenamo ita lalodia dobu bona Iehova ita tanikiu henia, badina ita be iena taunimanima.—Salamo 27:4 duahia.

HAHETOHO ITA HAHEAUKALAIA NEGANAI

9. Hahetoho badadia ita davaria neganai, dahaka dainai Iehova amo ita abia hahenamo ita lalodia?

⁹ Iehova tanikiu henia karana ese ita ia durua diba hahetoho ita haheaukalaia. Iseda mauri lalonai hekwakwanai badadia, hegeregere, headava tau o hahine ia heudahanai, gorere badadia, lalokau tauna ta ia mase, o disasta badadia idia vara neganai, ita lalohisihisi bada. Unai bamona negadiai, Iehova amo ita abia hahenamo ita lalodia karana ese ita ia hagoadaia diba. Inai ekspiriens haida mani oi laloa.

10. Edena dala ai Irina ese dina ta ta ai ena hahenamo ia laloa karana ese ia durua?

¹⁰ North America ai, Irina be regula painia taihuna ta.a Iena adavana be elda tauna, to ia heudahanai bona Irina bona ena natudia ia rakatania. Dahaka ese Irina ia durua Iehova ia hesiai henia noho totona? Irina ia gwau: “Lau moale badina Iehova ese lau ia laloa bada. Dina ta ta ai lau davaria hahenamo lau lalodia neganai, lau itaia ita ia gimaia guba Tamana be ita ia lalokau henia bona ia ura ita ia diba. Lau diba Ia ese lau do ia rakatania lasi.” Ena be Irina ena mauri lalonai hekwakwanai momo idia vara, to ena moale karana ese ia durua ia haheauka totona, bona ma haida dekenai ia be haheitalai namona.

11. Dahaka ese Kyung-sook ia durua ena gorere badana ia haheaukalaia totona?

¹¹ Asia ai, Kyung-sook bona ena adavana be lagani 20 mai kahana painia gaukara idia karaia. Daudau lasi murinai, ia davaria ena baragi ai kensa gorerena ia noho bona doketa ese ia hamaoroa ia be hua toi o siks do ia mauri noho. Ena be ia bona ena adavana ese hekwakwanai badadia bona maragidia idia davaria, to idia diba edia helt be ia namo. Taihu ia gwau: “Egu gorere lau laloa momo dainai lau lalometau, bona lau mamia lau ese gau ibounai lau haboioa bona lau gari.” Dahaka ese Kyung-sook ia durua ia haheauka totona? Ia gwau: “Hanuaboi ibounai lau do mahuta lasi neganai, lau be egu ruma ena guhi dekenai lau daekau bona dina dekenai lau moalelaia gaudia faiv lau gurigurilaia. Unai ese lau ia hagoadaia bona egu lalona ia veria Iehova dekenai egu lalokau lau hahedinaraia totona.” Edena dala ai Kyung-sook ena hanuaboi gurigurina ese ia ia durua? Ia gwau: “Lau laloparara Iehova ese hahetoho idauidau amo ita ia durua bona iseda mauri lalonai ita abia hahenamo be momo, unai ese ita davaria hahetoho ia hereaia.”

12. Jason ena adavana ia mase murinai dahaka ese ia ia durua?

¹² Jason be Africa ena brens ofesi ta dekenai ia gaukara bona ia be lagani 30 mai kahana lalonai ful-taim hesiai gaukara ia karaia. Ia gwau: “Lagani seven gunanai, egu adavana ia mase bona unai lau laloa neganai lau lalometau bada. Egu adavana be kensa gorere ia abia bona unai hisihisi ia haheaukalaia karana lau laloa neganai lau lalohisihisi.” Dahaka ese Jason ia durua? Ia gwau: “Nega ta, lau be egu adavana ida ai moale hebou negana ta lau laloa, bena guriguri amo Iehova lau tanikiu henia. Unai ese lau ia hamoalea dainai, hanaihanai Iehova lau tanikiu henia. Iehova tanikiu henia karana ese egu mauri ia haidaua. Ena be egu adavana ia mase dainai lau lalohisihisi, to Iehova lau tanikiu henia badina egu headava maurina lau moalelaia. Bona egu adavana, Iehova ia lalokau henia hahinena unai, ida Iehova ai hesiai henia. Unai ese egu lalona ia hagoadaia.”

13. Ena be Sheryl be ena famili haida ia haboioa, to dahaka ese ia durua?

¹³ Lagani 2013 ai, Philippines ai lai gubana (Typhoon Haiyan) ia vara neganai, Sheryl ena mauri lagani be 13, ese gau ibounai ia haboioa. Ia gwau: “Lau ese egu ruma bona famili haida lau haboioa.” Ena tama sina bona tadina toi be unai lai gubana ai idia mase. Dahaka ese Sheryl ia durua unai ia haheaukalaia totona? Ia be Iehova ia tanikiu henia badina Iehova amo ia abia hahenamo ia laloa noho. Sheryl ma ia gwau: “Lau itaia tadikaka taihu ese heduru bona hagoadaia hereva idia henia. Lau diba tanobada hegegemadai tadikaka oreana be lau totona idia guriguri noho.” Ma ia gwau: “Lau tanikiu bada badina Iehova be egu Dirava. Ia ese nega ibounai iseda dabu gaudia ia henia.” Oibe, hahenamo laloa bada karana ese ita ia durua ita daradoko lasi totona. Iehova tanikiu henia karana ese ita ia durua ita haheauka, herevana hekwakwanai badadia idia vara.—Efe. 5:20; Filipi 4:6, 7 duahia.

“[IEHOVA] DEKENAI, DO LAU MOALE BADA NOHO”

14. Dahaka hahenamo namodia ita naria noho? (Laulau ginigunana itaia.)

¹⁴ Idaunega amo ema bona hari, Iehova ena taunimanima be idia abia hahenamo idia moalelaia. Hegeregere, davara kakakana ai Iehova ese Israela taudia be Farao bona ena tuari taudia amo ia hamauria murinai, Israela taudia be Iehova hanamoa bona tanikiu henia anedia idia abia. (Eso. 15:1-21) Hari ita naria noho hahenamo badana ta be, kahirakahira hisihisi bona daradoko ibounai do idia ore. (Sal. 37:9-11; Isa. 25:8; 33:24) Mani oi laloa, Iehova ese ena inai taudia ibounai do ia haorea bona ita be maino bona kara maoromaoro tanobadana ai do ita noho. Unai dina ai Iehova do ita tanikiu henia bada!—Apok. 20:1-3; 21:3, 4.

15. Lagani 2015 ai oi ura dahaka do oi karaia?

¹⁵ Ita moale badina lagani 2015 ai ita ese hahenamo momo do ita moalelaia. To, hahetoho haida do ita davaria danu. Herevana dahaka ia vara, to ita diba Iehova ese ita do ia rakatania lasi. (Deu. 31:8; Sal. 9:9, 10) Ia ese ita do ia durua unai amo ia ita hesiai henia noho. Unai dainai, namona be iseda lalohadai be peroveta tauna Habakuku ena hegeregerena, ia gwau: “Bema fig auna ese huahua idia atoa lasi, bona vain huahua idia vara lasi, bona bema olive audia ese anina idia atoa lasi, bona uma ese koni idia hatubua lasi, ma bema mamoe ibounai idia mase ore, bona boromakau ena ruma danu, be anina lasi do ia noho, to lau be Lohiabada Dirava dekenai, do lau moale bada noho, badina ia be lauegu Hamauria Tauna.” (Hab. 3:17, 18) Lagani 2015 lalonai, namona be mai moale ida Iehova amo ita abia hahenamo do ita laloa, bona unai ese ita do ia hagoadaia lagani 2015 ena siri badana ita badinaia totona. Ia gwau: Iehova “tanikiu henia, badina ia be namo.”—Sal. 106:1.