“Unai be Emu Ura Hegeregerena”

1. Dahaka dainai Iesu be “lauma helaga” ia abia neganai ia “moale bada”? (Laulau ginigunana itaia.)

DIRAVA ese “Iesu dekenai lauma helaga ia henia, bona ia moale bada” toana mani oi laloa. Reana ia moale bada dainai ia kiri. Dahaka dainai Iesu ia moale? Matamanai ia be ena hahediba taudia 70 ia siaia, Dirava ena Basileia ena sivarai namona do idia harorolaia totona. Ia laloa bada gauna be, unai hahediba taudia ese edena bamona haroro gaukara do idia karaia. Unai negai sivarai namona idia inai henia taudia be momo, hegeregere, aonega bona sikuli bada taravatu hadibaia taudia bona Farisea taudia. Idia ese taunimanima edia lalona idia veria, unai amo do idia laloa Iesu be kapenta tauna ta sibona bona ena hahediba taudia be “sikuli bada lasi bona dagi lasi taudia.” (Kara 4:13; Mar. 6:3) To, Iesu ena hahediba taudia be haroro gaukara amo mai moale ida idia giroa. Ena be taunimanima bona demoni ese idia dagedage henia, to haroro gaukara idia karaia. Dahaka ese idia ia durua idia moale bona gari lasi totona?—Luka 10:1, 17-21 duahia.

2. (a) Edena dala ai Iesu ena hahediba taudia be natudia maragidia bamona? (b) Dahaka ese idia ia durua Baibel ena hereva momokani idia lalopararalaia totona?

² Iesu ese Iehova dekenai ia gwauraia herevana mani oi laloa. Ia gwau: “Tamagu, guba bona tanobada edia Lohiabada e, taunimanima vairanai oi lau hanamoa, badina oi ese inai gaudia be aonega bona diba bada taudia amo oi hunia, to natudia maragidia dekenai oi hahedinaraia. Oibe Tamagu, badina unai be emu ura hegeregerena.” (Mat. 11:25, 26) Momokani, Iesu be ia gwau lasi ena hahediba taudia be natudia maragidia. To, ia diba aonega bona diba bada taudia vairanai idia be natudia maragidia bamona. Iesu ese ena hahediba taudia ia hadibaia gau badana be natudia maragidia bamona do idia manau bona hereva do idia kamonai. (Mat. 18:1-4) Idia manau dainai dahaka namo idia davaria? Iehova ese lauma helaga amo idia ia durua Baibel ena hereva momokani idia lalopararalaia totona. To idia ia hadikaia aonega bona diba bada taudia be hereva momokani idia lalopararalaia lasi, badina edia hekokoroku karana bona Satani ese edia matana ia hakepulua.

3. Inai stadi ai dahaka do ita herevalaia?

³ Unai ia vara dainai Iesu be ia moale! Ia itaia Iehova ese Baibel ena hereva momokani be manau taudia ibounai dekenai ia hahedinaraia, herevana idia be aonega bona diba bada lasi taudia. Ia moale badina unai bamona hahediba dalana be ena Tamana ena ura hegeregerena. Iehova be ena kara ia haidaua, a? Edena dala ai ia hahedinaraia ia ese unai bamona hahediba dalana ia abia dae? Unai henanadai edia haere dekenai do ita moale, Iesu dekenai ia vara bamona.

IBOUNAI DEKENAI BAIBEL ENA HEREVA MOMOKANI HADIBAIA

4. Edena dala haida ai ita diba Simplified Watchtower be harihari gauna namona?

⁴ Vanegai lagani lalodiai, Iehova ena orea ese Baibel ena hakaua herevadia momo idia halasia bona idia be auka lasi lalopararalaia totona. Mani haheitalai toi oi laloa. Gau ginigunana be, Simplified Watchtower.a Unai harihari gauna namona ese nao gado idia duahia namonamo lasi taudia ia durua bada. Famili idia itaia natudia be Simplified Watchtower idia lalopararalaia diba. Momo be Hakaua Oreana dekenai edia tanikiu revareva idia siaia. Taihu ta be guna Gima Kohorona stadi ai ia haere lasi. Ia gwau: “Hari lau be haere momo lau henia diba, bona egu gari karana ia ore! Iehova bona umui lau tanikiu henia.”

5. New World Translation of the Holy Scriptures matamatana ena namo haida be dahaka?

⁵ Gau iharuana be, New World Translation of the Holy Scriptures idia hamatamataia gauna. Ia be October 5, 2013 ena lagani ta ta ena hebou ta ai idia halasia.b Ena be unai Baibel ena siri momo edia sentens idia hakwadogia, to ena anina ia do noho bona ita lalopararalaia diba. Hegeregere, Iobu 10:1 guna ena hereva ta ta ibounai be 27, to hari be 19 sibona; Aonega herevadia 8:6 guna ena hereva ta ta ibounai be 20 to hari be 13 sibona. Unai siri rua edia anina be Baibel matamata ese ia hahedinaraia namonamo. Lagani momo lalonai mai abidadama ida Iehova ia hesiai henia horoa tadikaka ta ia gwau: “Lau be Baibel matamatana ai Iobu ena sivarai lau duahia, bona lau mamia unai be egu nega ginigunana Iobu bukana lau lalopararalaia!” Momo be unai bamona idia hereva danu.

6. Mataio 24:45-47 amo diba matamata ita abia dainai emu hemami be edena bamona?

⁶ Gau ihatoina be, idia halasia diba matamatadia. Hegeregere, ita moale badina July 15, 2013, Gima Kohorona, ese “igui hesiai tauna mai ena kamonai bona mai ena kara maoromaoro” dekenai diba matamata ia halasia. (Mat. 24:45-47) Unai magasin ia gwau unai igui hesiai tauna be Hakaua Oreana, bona “hesiai taudia” be Dirava ena hereva amo namo idia abia horoa taudia bona “mamoe ma haida.” (Ioa. 10:16) Ita moale unai hereva momokani ita diba, bona ma haida dekenai ita hadibaia totona! Edena dala ma haida ai Iehova ese ia hahedinaraia ia be auka lasi hahediba dalana ia abia dae?

AUKA LASI DALANAI BAIBEL SIVARAI IDIA GWAURAIA

7, 8. Baibel ai peroveta herevadia edia haheitalai haida be dahaka?

⁷ Bema lagani momo lalonai Iehova oi hesiai henia vadaeni, reana iseda pablikeisen ese guna Baibel sivarai idia herevalaia dalana bona hari ia herevalaia dalana ena idau oi itaia. Edena dala ai? Guna iseda pablikeisen be nega momo Baibel sivarai bona idia laulaulaia gaudia idia herevalaia. Idia gwau Baibel sivarai ta ese gabeai do ia vara gauna ta ia laulaulaia. Badina namodia haida dainai Baibel sivarai be unai bamona ita herevalaia be maoro, a? Oibe. Hegeregere, Iesu be “peroveta tauna Iona ena toa” ia herevalaia. (Mataio 12:39, 40 duahia.) Ia hahedinaraia Iona be gwarume ena bogana lalonai ia noho ena daudau ese Iesu be guria gabunai do ia noho ena daudau ia laulaulaia.

⁸ Baibel ai vaira nega idia perovetalaia sivaraidia ma haida idia noho. Aposetolo Paulo be unai bamona sivarai haida ia herevalaia. Hegeregere, Aberahamo bona ena adavana Hagara bona Sara ese Iehova, Israela besena bona ena guba oreana idia laulaulaia. (Gal. 4:22-26) Unai hegeregerena, palai dubu bona dubu helaga, Kara Dika Ena Davana Karaia Dinana, hahelaga tauna badana, bona Mose ena Taravatu ese ia herevalaia gau haida ese “do idia mai gau namodia” idia laulaulaia. (Heb. 9:23-25; 10:1) Unai bamona peroveta herevadia ita stadilaia neganai eda abidadama ia hagoadaia. To, ita gwau diba Baibel ese ia herevalaia taudia, sivarai, o gau ibounai be tau ta o gau ta idia laulaulaia, a?

9. Guna, Naboto ena sivarai be edena bamona idia herevalaia?

⁹ Guna, iseda pablikeisen be unai bamona gaudia ia herevalaia momo. Hegeregere, Naboto ena sivarai mani ita laloa. Kwini Iesebele ia ura koikoi dalanai Naboto idia kota henia bona idia hamasea, unai amo Iesebele ena adavana, Ahaba ese Naboto ena vain uma do ia abia. (1 Kin. 21:1-16) Lagani 1932 ai, The Watchtower ia gwau unai sivarai be peroveta sivaraina ta bamona. Ia gwau, Ahaba bona Iesebele ese Satani bona iena orea idia laulaulaia; Naboto be Iesu ia laulaulaia; Naboto ena mase ese Iesu idia hamasea karana ia laulaulaia. To, lagani momo murinai, lagani 1961 ai idia printaia buka ladana “Let Your Name Be Sanctified” ese ia hahedinaraia, Naboto ese horoa taudia ia laulaulaia, bona Iesebele be Kerisendom ia laulaulaia. Unai dainai, Iesebele ese Naboto ia hamasea karana be nega dokona ai horoa taudia ese idia davaria dagedage karadia ia laulaulaia. Lagani momo lalonai, Baibel sivaraidia be unai bamona idia herevalaia dainai, Dirava ena taunimanima edia abidadama ia hagoadaia. Vadaeni, dahaka dainai hari unai dala idia badinaia lasi?

10. (a) Edena dala ai igui hesiai tauna mai ena kamonai ese laloa namonamo karana idia hahedinaraia? (b) Hari iseda pablikeisen be dahaka idia herevalaia?

¹⁰ Ita diba, lagani momo lalonai Iehova ese “igui hesiai tauna mai ena kamonai bona mai ena kara maoromaoro” ia durua idia laloa namonamo totona. Unai dainai hari, igui hesiai tauna mai ena kamonai be Baibel ena peroveta herevana ta idia hahedinaraia totona, Baibel idia tahua namonamo guna. Danu, idia davaria guna Baibel ena peroveta hereva idia laulaulaia gaudia be momo ese idia lalopararalaia lasi. Hegeregere peroveta herevadia idia laulaulaia taudia o gau ta be momo ese idia lalopararalaia, laloatao, bona badinaia be auka. Bona bema ta be Baibel sivaraina ia laulaulaia gauna sibona ia laloa, unai sivarai ese ena mauri lalonai ia durua dalana ia laloaboio diba. Unai dainai, hari iseda pablikeisen ai abidadama, haheauka, Dirava badinaia karana bona kara ma haida idia hahedinaraia Baibel sivaraidia idia herevalaia.c

11. (a) Hari, Naboto ena sivarai be edena bamona ita lalopararalaia, bona edena dala ai ena haheitalai ese ita ia durua? (b) Dahaka dainai hari iseda pablikeisen ese Baibel sivaraidia bona idia laulaulaia gaudia idia herevalaia momo lasi? (“Duahia Taudia Edia Henanadai” kahana itaia.)

¹¹ Hari, Naboto ena sivarai be auka lasi dalanai idia herevalaia dainai, ita lalopararalaia diba. Unai kara maoromaoro tauna be ena abidadama dainai ia mase, to Iesu o horoa taudia ia laulaulaia dainai lasi. Naboto be siahu bada lohia taudia ese idia dagedage henia, to ia ese Iehova ena Taravatu ia badinaia. (Num. 36:7; 1 Kin. 21:3) Iena haheitalai ese ita hagoadaia, badina ita danu unai bamona dagedage ita davaria diba. (2 Timoteo 3:12 duahia.) Keristani taudia ibounai ese unai bamona hagoadaia sivaraidia idia lalopararalaia, laloatao bona badinaia diba.

12. (a) Baibel sivaraidia amo dahaka ita dibaia? (b) Dahaka dainai Baibel ese ia herevalaia dobu gaudia ita lalopararalaia diba? (Futnout itaia.)

¹² Ita gwau diba Baibel sivaraidia be ita idia durua daladia sibona idia herevalaia, a? Lasi. Hari, iseda pablikeisen ese idia hahedinaraia Baibel ena sivarai ta ese ita ia durua sivarai ma ta ita laloa. To, unai Baibel sivarai bona ia laulaulaia gaudia do idia herevalaia momo lasi. Hegeregere, Naboto be Dirava ia badinaia dainai, ia idia dagedage henia bona hamasea. Ita gwau diba unai ese Keriso bona ena horoa tadikaka edia haheauka karana ia hahedinaraia. To, danu unai ese ita ia durua Lohiabada ena “mamoe ma haida” edia haheauka karana ita laloatao totona. Unai ita lalopararalaia dainai, ita diba Iehova be ita ia hadibaia noho.d

IESU ENA HAHEITALAI BE AUKA LASI DALANAI IDIA HAHEDINARAIA

13. Dahaka ese idia hahedinaraia Iesu ena haheitalai ita lalopararalaia diba?

¹³ Iesu be tanobada ai ia noho neganai, ia be Hadibaia Tauna hereadaena. Ia haroro neganai, nega momo haheitalai ia gaukaralaia. (Mat. 13:34) Haheitalai ese kamonai taudia edia lalona bona kudouna ia hamarerea diba. Lagani momo lalonai, iseda pablikeisen ese Iesu ia gaukaralaia haheitalai be auka lasi dalana ai idia herevalaia. Ita moale, badina Gima Kohorona, July 15, 2008 ese Iesu ena haheitalai lalonai ia gaukaralaia hatubua muramura, mastadi uhena, bona reke edia anina ia hahedinaraia namonamo. Hari ita laloparara unai haheitalai be Dirava ena Basileia, bona unai Basileia ese tanobada dikana amo Keriso ena murinai idia raka taudia gogoa karana ia herevalaia.

14. (a) Guna, iseda pablikeisen ese Samaria tauna ena parabole be edena bamona idia herevalaia? (b) Hari edena dala ai Iesu ena parabole ita lalopararalaia?

¹⁴ To, Iesu ese ia gwauraia parabole ma haida be edena bamona ita lalopararalaia diba? Idia haida be gau haida idia laulaulaia bona perovetalaia; ma haida be ita idia durua dalana idia herevalaia. To, edena bamona edia idau do ita diba? Lagani momo lalodiai, unai idia hedinarai. Hegeregere, iseda pablikeisen ai Iesu ese Samaria tauna ena parabole ia herevalaia dalana mani ita laloa. (Luka 10:30-37)Lagani 1924, The Watch Tower ia gwau, unai Samaria tauna be Iesu ia laulaulaia; Ierusalema amo ia diho lao Ieriko ena dala be Eden ai ia vara gwau-edeede negana amo ia mai bona hari taunimanima edia mauri ia dika ia lao karana ia laulaulaia; henaohenao taudia be moni idia mataganigani henia bisinesi taudia idia laulaulaia; bona hahelaga tauna bona Levi tauna be Kerisendom gunalaia taudia idia laulaulaia. Hari iseda pablikeisen ese unai haheitalai amo Keristani taudia ibounai ia hagoadaia, taunimanima ibounai ita durua bona Dirava ena hereva ita hadibaia. Ita moale badina Iehova ese auka lasi dalanai ita ia hadibaia, ani?

15. Stadi gabena ai dahaka do ita herevalaia?

¹⁵ Stadi gabena ai, Iesu ese ia herevalaia rami hebou kekeni 10 parabolena do ita herevalaia. (Mat. 25:1-13) Inai nega dokonai, edena dala ai Iesu ese ena murinai idia raka taudia ia durua unai parabole idia lalopararalaia totona? Unai parabole ese ia herevalaia taudia, gaudia, bona ia vara gauna be mai edia anina, a? Eiava, Iesu ia ura unai parabole amo nega dokonai ita ia durua gauna ta ia hahedinaraia, a? Mani ita itaia.