Tanobada Dokona Ia Kahirakahira, A?

Haida ese taunimanima idia biagua auka bona idia hamasedia ore karana be Dirava ese do ia koua lasi, a? Ita diba Dirava ese lagani momo lalodiai idia vara dagedage bona hisihisi karadia do ia hadokoa. Taunimanima bona tanobada ia Havaraia Tauna ia ura oi diba, kahirakahira kara ta do ia karaia. Edena dala ai unai ia hahedinaraia?

Mani inai haheitalai oi laloa: Bema oi ura motuka amo gabu ta oi lao bona unai be emu nega ginigunana, reana mapu bona hadibaia hereva haida do oi abia guna. Bena dala ai oi itaia saini be emu mapu bona hadibaia herevadia ida ia hegeregere neganai, oi diba oi be dala maorona oi badinaia noho. Unai hegeregerena, Dirava ese ita dekenai Baibel ia henia bona tanobada ai do idia vara gaudia ia hahedinaraia goevagoeva. Hari idia vara gaudia ita itaia neganai, ita abia dae dokona be kahirakahira momokani.

Baibel ese ia hahedinaraia tanobada ai idia vara hekwakwanai bona toa be do idia idau momokani, bena dokona do ia ginidae. Nega dokona ai unai gaudia be nega tamona ai idia vara—guna bamona lasi. Mani Baibel ese ia herevalaia gaudia haida ita itaia.

1. TANOBADA HEGEGEMADAI IDIA VARA HEKWAKWANAI Mataio karoa 24 ena peroveta herevana ese tanobada ai nega tamona do idia vara toa idauidau ia herevalaia. Unai ese nega dokona ena toana idia hahedinaraia bona unai murinai “dokona be do ia ginidae.” (Siri 14) Unai toa be gabu idauidau ai tuari badadia, hitolo bada, tano mareremarere do idia vara, kara dika do ia bada, lalokau be do ia keru, bona tomadiho gunalaia taudia ese momo do idia hakaudia kerere. (Siri 6-26) Momokani, lagani momo lalonai unai gaudia haida idia vara vadaeni. To, dokona ia kahirakahira noho lalonai, unai gaudia ibounai be nega tamona do idia vara. Inai toa toi do idia vara danu.

2. TAUNIMANIMA EDIA KARA Baibel ia gwau “dina gabediai”—dokona ia kahirakahira lalonai—taunimanima edia kara do ia dika momokani. Ia gwau: “Taunimanima be sibodia do idia laloa bada, moni do idia ura henia bada, sibodia do idia abia isi, do idia hekokoroku, hadikaia herevadia do idia gwauraia, tama sina do idia kamonai henia lasi, tanikiu karana do idia hahedinaraia lasi, ma haida do idia badinaia lasi, ruma bese lalonai lalokau be lasi, do idia ura lasi gwauhamata idia karaia, idia be ladana hadikaia taudia, sibodia edia ura do idia biagua lasi, do idia dagedage, kara namodia do idia ura henia lasi, ma haida edia mase dalana do idia karaia, do idia kwara auka, do idia heagi, moale karadia do idia ura henia bada, to Dirava do idia lalokau henia lasi.” (2 Timoteo 3:1-4) Momokani, ma haida matauraia lasi karana be guna ia vara danu, to hari “dina gabediai” unai kara be ia dika momokani dainai, inai nega ita gwauraia “nega aukadia.” Oi itaia taunimanima edia kara ia dika ia lao momokani, a?

3. TANOBADA IDIA HADIKAIA Baibel ia gwau, Dirava ese ‘tanobada idia hadikaia taudia do ia hadikaia ore.’ (Apokalupo 11:18) Edena dala ai taunimanima ese tanobada idia hadikaia noho? Baibel ese Noa ena nega be iseda nega ida ia hahegeregerea, ia gwau: “Taunimanima ibounai be dika momokani Dirava ena vairana dekenai, bona edia dika be gabu ibounai dekenai. Dirava ese tanobada ia itaia, ia dika rohoroho vadaeni.” Unai kara dika taudia dainai, Dirava ia gwau: “Ibounai do lau hamasea.” (Genese 6:11-13) Oi itaia tanobada be dagedage amo ia honu, a? Danu, taunimanima be inai idia karaia diba: Idia be mai edia siahu tanobada latanai taunimanima ibounai idia hamasea ore totona, badina,idia be mai edia tuari kohu badadia. Danu, dala ma ta ai tanobada idia hadikaia noho. Taunimanima ese mauri ia durua gaudia—hodahoda, animal, tubutubu gaudia, bona davara—idia naria namonamo lasi dainai, ibounai be idia dika idia lao.

Sibona oi nanadaia, ‘Lagani momo gunanai, taunimanima be mai edia siahu ma haida idia hadikaia ore totona, a?’ Hari taunimanima ese tuari kohu matamatadia momo idia karaia noho bona mauri ia durua gaudia idia hadikaia noho. Teknoloji amo idia karaia kohudia be momo herea dainai, taunimanima edia diba be ia hegeregere lasi unai kohu ese idia havaraia dika idia lalopararalaia bona biagua totona. To, vaira nega ai tanobada ai do ia vara gauna be taunimanima ese idia biagua diba lasi. Taunimanima bona mauri gaudia do idia mase ore lasi lalonai, Dirava ese tanobada idia hadikaia taudia do ia haoredia. Unai be iena gwauhamata!

4. TANOBADA IBOUNAI HARORO GAUKARANA Nega dokona ena toana ta be gaukara badana ta do ia vara. Baibel ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.” (Mataio 24:14) Inai haroro gaukara be guna idia karaia gaukarana amo ia idau. Nega dokona ai idia harorolaia mai anina bada herevana be, “Basileia ena sivarai namona.” Oi diba edena tomadiho oreana ese unai sivarai idia harorolaia, a? Oiemu gabu ai grup maragina ta sibona ese unai sivarai idia harorolaia, eiava idia be orea badana ta bona ‘tanobada ibounai dekenai idia haroro, bese ibounai ese idia kamonai’ totona?

Web sait ladana www.jw.org ese “Basileia ena sivarai namona” ia herevalaia momo. Unai Web sait ai, Baibel buka bona magasin be gado 700 mai kahana ai idia halasia. Tanobada hegegemadai Basileia ena sivarai namona idia harorolaia orena ta oi diba, a? Intanet be do lasi neganai, taunimanima idia diba Iehova ena Witnes taudia be gabu momo ai Dirava ena Basileia ena sivarai namona idia harorolaia. Lagani 1939 amo ema bona hari Gima Kohorona magasin ai ia hedinarai herevana be, “Iehova Ena Basileia Ia Harorolaia.” Tomadiho bukana ta ia gwau Iehova ena Witnes taudia edia haroro gaukara be “gaukara badana bona tanobada hegegemadai idia karaia.” Iseda haroro gaukara ese ia hahedinaraia sivarai namona be, kahirakahira “dokona be do ia ginidae,” bona Dirava ena Basileia ese unai do ia karaia.

MAI ANINA BADA NEGANA AI ITA NOHO

Oi itaia inai atikol ese idia herevalaia toa foa be hari idia vara noho, a? Lagani 100 mai kahana lalonai, inai magasin ese tanobada ai idia vara gaudia ia herevalaia, bona duahia taudia ia durua idia laloparara nega dokona be kahirakahira. To, Baibel ena hereva idia abia dae lasi taudia idia gwau, unai be taunimanima edia lalohadai bona ia idau diba. Danu, idia gwau Intanet, mobael fon, bona unai bamona teknoloji gaudia dainai, tanobada ena kahana ta ai ia vara hekwakwanai be tanobada hegegemadai ese idia itaia o kamonai bona ta ta idia durua dainai, hekwakwanai ia bada ia lao. To, idia vara noho gaudia ese idia hamomokania ita be mai anina bada negana ai ita noho.

Diba bada taudia haida idia gwau, kahirakahira nega vaira ai tanobada ai dika badadia haida do idia vara. Lagani 2014 ai, saiens taudia haida ese ripoti ta amo idia hahedinaraia, dika badadia do idia vara bona taunimanima do idia hadikaia ore. Idia gwau: “Unai gaudia ai tahua murinai, ai davaria bese haida be tuari kohudia momo idia haboua dainai, nega vaira ai tanobada ai taunimanima idia hamasea orea diba.” Taunimanima momo idia abia dae momokani ita be mai anina bada negana ai ita noho. Inai magasin idia halasia bona idia duahia taudia momo idia diba momokani, ita be mai anina bada negana ai ita noho bona dokona be kahirakahira do ia mai. To, namo lasi vaira negana ita garilaia. Ita moale be namo. Dahaka dainai? Badina tanobada dokona amo ita roho mauri diba!